Esekiel

12 Siohwa ketin pwurehng mahsanihong ie: 2 “Nein-aramas, ke kin koukousoan rehn aramas uhwong kei. Mie pwoaren masarail mehn kilang, ahpw re sohte kilang, oh mie salengarail mehn rong, ahpw re sohte rong,+ pwe irail aramas uhwong kei.+ 3 A kowe, nein-aramas, kaunopada omw koaruk duwehte ma ke pahn kalipilipala. Eri, erein nin rahn ni ar kilikilang, ke pahn kalipilipala. Kohsang ni imwomwo kohla ehu wasa tohrohr nin duwen emen me pahn kalipilipala nindoken ar kilikilang. Mweinele re pahn tehk, mendahki irail aramas uhwong kei. 4 Wahieido omw koaruk en kalipilipalao erein nin rahn ni ar kilikilang, oh eri nin soutik ni ar kilikilang, ke pahn mweselda rasehng emen me kalipilipala.+

5 “Nindoken ar kilikilang, koapwoarehda ni kehlo ehu pwoahren, oh wahda omw kepwe ko keidla nan pwoahro.+ 6 Nindoken ar kilikilang, kapaikada omw kepwe kan oh wa kohieila nan roto. Perehla mesomwen pwe ken sohte kak kilang pwehl, pwe I pahn wiahkin uhk kilel ehu ong aramas en Israel kan.”+

7 Ngehi eri kapwaiada duwehte kehkehlik me I alehdio. Erein nin rahn I wahieido ei koaruko nin duwen koaruk en kalipilipala, oh nin soutik I koapwoarehkihda kehlo pehie. Oh ni eh rotorotdi, I kihiei ei kepwe ko, oh kapaikada mepwukat mwohn masarail kan.

8 Nimensengo, Siohwa ketin pwurehng mahsanihong ie: 9 “Nein-aramas, aramas en Israel kan, aramas uhwong kan, sou idek rehmw, ‘Dahme ke wiewia?’ 10 Ndaiong irail, ‘Iet me Kaun Wasa Lapalahpie Siohwa ketin mahsanih: “Kadeik wet pidada kaunen+ Serusalem oh aramas en Israel koaros nan kahnimw wet.”’

11 “Nda, ‘I wia kilel ehu ong kumwail.+ Duwehte dahme I wiahier, ihme pahn wiawihong irail. Irail pahn kalipilipala, irail pahn selidi.+ 12 Kaun me mi nanpwungarail pahn kapaikada eh kepwe kan oh mwesel nan rotorot. E pahn koapwoarehda pwoahr ehu ni kehlo oh wa eh kepwe ko keidla nan pwoahro.+ E pahn perehla meseo pwe en sohte kak kilang pwehl.’ 13 I pahn kesepeseng ei uhko powe, oh e pahn lohdi nan ei uhko.+ Mwuri I pahn wahla ih Papilon, nan sapwen mehn Kaldia kan, ahpw e sohte pahn kilang; oh e pahn mehla wasao.+ 14 Oh I pahn kamwarakpeseng wasa koaros irail koaros me mi limwah, sawasepe kan oh nah pwihnen sounpei kan;+ oh I pahn usada kedlahs pwoat pwehn pwakihekin irail.+ 15 Oh irail pahn anahne ese me ngehi me Siohwa ni ei kihirailpeseng nan wehi kan oh kamwarakirailpeseng nan sahpw akan. 16 Ahpw I pahn mweidohng me malaulau rehrail en pitsang kedlahs, lehk lapalap oh soumwahu lusulus, pwe ren kak koasoia arail wiewia kasaut kan koaros nan wehi kan me re pahn kohla ie; oh re pahn anahne ese me ngehi me Siohwa.”

17 Oh Siohwa ketin pwurehng mahsanihong ie: 18 “Nein-aramas, ke pahn tungoale konomw pilawahn ni rerrer oh nim nimomw pihlen ni masepwehk oh pwunod.+ 19 Ndaiong aramas en sahpwo, ‘Iet me Kaun Wasa Lapalahpie Siohwa ketin mahsanihong tohn Serusalem kan nan sapwen Israel: “Re pahn tungoale kanarail pilawa ni pwunod oh nim nimarail pihl ni masepwehk, pwe sapwarailo pahn tehnla douluhl+ pwehki tiahk lemei en irail koaros me koukousoan wasao.+ 20 Kahnimw kan me mie towe pahn mwomwla, oh sahpwo pahn wiahla wasa tehn ehu;+ oh kumwail pahn anahne ese me ngehi me Siohwa.”’”+

21 Oh Siohwa ketin pwurehng mahsanihong ie: 22 “Nein-aramas, mie amwail lepin kahs ehu nan Israel me kin nda, ‘Rahn akan imwiseklahr, oh kaudiahl koaros sohte kin pweida.’+ 23 Ihme kahrehda ndaiong irail, ‘Iet me Kaun Wasa Lapalahpie Siohwa ketin mahsanih: “I pahn wiahiong lepin kahs wet en sohrala, oh re sohla pahn doadoahngki nin duwen lepin kahs ehu nan Israel.”’ Ahpw ndaiong irail, ‘Rahn ako kerendohr,+ oh kaudiahl koaros pahn pweida.’ 24 Pwe e pahn sohla kaudiahl likamw de kosetipw widing rehn aramas en Israel kan.+ 25 ‘“Pwe ngehi, Siohwa, me pahn mahsen. Soahng koaros me I mahsanih pahn mwadang pweida.+ Kumwail aramas uhwong kei, erein amwail momour,+ I pahn mahsanih mahseno oh kapwaiada,” Kaun Wasa Lapalahpie Siohwa me ketin mahmahsen.’”

26 Siohwa ketin pwurehng mahsanihong ie: 27 “Nein-aramas, iet me aramas en Israel kan ndinda, ‘Kaudiahl me e kilangehro pahn pwand, e saikinte pahn leledo, oh e kin kohpada ong ahnsou kohkohdo.’+ 28 Kahrehda ndaiong irail, ‘Iet me Kaun Wasa Lapalahpie Siohwa ketin mahsanih: “‘Ei mahsen kan koaros sohte pahn pwapwand; sohte lipilipil dahme I mahsanih pahn pweida,’ Kaun Wasa Lapalahpie Siohwa me ketin mahmahsen.”’”