Esekiel
19 “Ke pahn koulki koulen kedepwidepw pwoat* duwen kaunen Israel kan 2 oh nda,
‘Dahmen omw nohno? Laion lih men nanpwungen laion kan.
E kin wendi nanpwungen laion pwulopwul kehlail kan* oh apwalih nah kan.
3 E apwalihada emen wah ko, oh e wiahla laion pwulopwul kehlail men.+
E esehla mwomwen eh pahn dapengpeseng seike,
E pil kin kadallehla aramas akan.
4 Wehi kan rongada duwen laiono oh lidipihedi nan pwoahr ehu,
Oh re kihong kehs kan ni tumweo oh wahla ih nan sapwen Isip.+
5 En laiono nohno awiawih oh kedekedeo e esehda me solahr koapworopwor me e pahn pwurodo.
Ih eri ale pil emen wah ko oh kadarieila nin duwen laion pwulopwul kehlail men.
6 Laiono pil kohkohseli nanpwungen laion kan oh wiahla laion pwulopwul kehlail men.
E esehla mwomwen eh pahn dapengpeseng seike, oh e pil kin kadallehla aramas akan.+
7 E kin waiseli nanpwungen ar imwen doulik kehlail kan oh kamwomwala arail kahnimw kan,
Eri sahpw tehnlao direkihla ngilen eh kin weriwer.+
8 Aramas akan sang wehi kan me kapilpene ahpw kohdo pwehn kesepeseng ar uhko powe,
Oh e lohdi nan arail pwoahro.
9 Re kihong kehs kan ni tumweo pwehn waikalahng ih nan kehl ehu oh wahla ih rehn nanmwarkien Papilon.
Re salihedi ih wasao, pwe ngileo en dehr pwurehng kohda pohn nahna kan en Israel.
10 Omw nohno rasehng tuhkehn kreip pwoat+ nan omw nta,* me poad limwahn pihl kan.
Pwehki diren pihl, e kin wa oh rah kan me tohto.
11 E kin wiahda rah* kehlail kan, me mwahuwong wiahla sokon en kaun akan.
E kekeirda oh reireisang tuhke teikan,
Oh e sansalla pwehki eh reirei oh pwehki teh kan me tohto.
12 Ahpw ni engieng e usuhsda+ oh lekdekdiong nin sampah,
Oh kisinieng en palimese ahpw kamengala wah kan.
Rah kehlail kan tipwasang oh mengila,+ oh kisiniei kamwasikeirailla.+
13 Eri e poadidi nan sapwtehn,
Nan sahpw ehu me sohte pihl oh madekeng.+
14 Kisiniei eri kohpeseng sang ni rah* kan oh kamwasikahla eh pons kan oh wah kan,
Oh sohte rah kehlail ehu me luhwehdi, solahr sokon ong kaunda.+
“‘Met iei koulen kedepwidepw pwoat me aramas akan pahn kalapw koulki.’”