Koaros me Nda me Irail “Kristian” Uhdahn Kristian kei?

KRISTIAN depe nan sampah pwon? Pwuhk ehu koasoia me nan pahr 2010 mie aramas 2.3 lik kei nan sampah me nda irail Kristian. (Atlas of Global Christianity) Ahpw pwuhko pil kasalehda me irail pwukat kin iang pelien sarawi tohtohsang 41,000 me ehuehu pali pwukat mie pein arail padahk kan oh koasoandi en mwomwen arail wiewia kan. Pwehki irair wet, ekei kin pingkihda. Ele mwein re kin medewe ‘Koaros me nda me irail Kristian uhdahn Kristian kei?’

Kitail song kilang ire wet ni ehu ahl tohrohr. Soun seiloak men kin anahne nda me e wia towe mehlel en wasa me e kohsang ie mwohn eh pahn pedolong nan sahpw ehu. E pil anahne kadehdehda mehlelpen dahme e ndao sang ni eh pahn kasalehda nah passport ape. Pil duwehte, Kristian mehlel men anahne wia laudsang ndahte me e pwoson Krais. E anahne ahneki irair kan me kadehdehda me ih uhdahn Kristian men. Dahkei met?

Lepin lokaia “Kristian” tepin kadoadoahk ekiste mwurin pahr 44. Soupoad en Paipel Luk koasoia: “Ni eh diarada e ahpw kahredohng Andiok. Nan irair en sounpar ehu ira riemenet kin tuhwong tohn mwomwohdiso oh kin padahkih aramas tohto. Iei pil nan Andiok me tohnpadahk ko adanekihla sapwellimen Krais [“Kristian,” NW].” (Wiewia 11:26) Tehk me irail kan me adaneki Kristian kan iei sapwellimen Krais tohnpadahk kan. Ia duwen emen eh kin wia sapwellimen Sises tohnpadahk men? Ehu dikseneri kawehwehda: “En idawehn Sises nin duwen tohnpadahk men kin wehwehki en tounmeteikihla [eh] mour nan soangsoangen irair koaros . . . erein eh mour.” (The New International Dictionary of New Testament Theology) Ihme kahrehda, Kristian mehlel men iei emen me kin idawehn sapwellimen Sises padahk kan oh kaweid kan ni unsek nan soangsoangen irair koaros.

Ia duwe, kitail kak diarada soangen aramas pwukat nanpwungen irail kan me kin nda me irail Kristian kei nan rahnpwukat? Dahme pein Sises mahsanih me pahn kasansalehda ihs me uhdahn sapwellime tohnpadahk kan? Se luke iuk en tehk ia duwen Paipel eh sapengala peidek pwukat. Nan ire kan en mwuhr, kitail pahn tehkpene ire limau me Sises mahsanih me pahn kasalehda irair en Kristian mehlel kan oh pahn sewese kitail en diarada ihs me uhdahn sapwellime tohnpadahk kan. Kitail pahn tehk ia duwen tepin Kristian akan arail kasalehda mepwukat. Oh kitail pahn song kilang ihs nanpwungen me tohto me kin nda me irail Kristian me kin kasalehda irair pwukat.

“Peikiong Ei Padahk kan”

“Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel. Oh kumwail pahn dehdehki dahme mehlel, oh me mehlelo pahn kasaledengkumwailla.”​—SOHN 8:31, 32.

Ia Wehwehn Met: Sapwellimen Sises mahsen de “padahk kan” kohsang meno me lapalapsang ih. Sises mahsanih: “Semei me ketin kadariehdo, pein ih me ketin mahsanih dahme I pahn koasoia oh kadehdehda.” (Sohn 12:49) Nan eh kapakap ong Semeo nanleng, Siohwa Koht, Sises patohwanohng: “Sapwellimomwi mahsen, iei me mehlel.” E kin kalapw doadoahngki Mahsen en Koht pwehn utung sapwellime padahk kan. (Sohn 17:17; Madiu 4:4, 7, 10) Eri, Kristian mehlel kan kin ‘peikiong sapwellime padahk kan,’ me iei re kin pwungki Mahsen en Koht, iei Paipel nin duwen “me mehlel” oh me ahneki manaman laud pwehn kaweid arail padahk kan oh wiewia kan.

Ia Duwen Tepin Kristian kan Ar Kin Wia Met: Duwehte Sises, wahnpoaron Pohl pil wauneki Mahsen en Koht. E ntingihedi: “Audepen Pwuhk Sarawi unsek pwilisang rehn Koht, oh e mwahu.” (2 Timoty 3:16) Ohl akan me pilipildahng en padahki iengerail Kristian kan anahne “tengeteng ni mahseno me likilikpe mie, oh me pil pahrekiong padahk mehlel.” (Taitus 1:7, 9) Kaweid kohwong tepin Kristian kan en soikala “loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.”​—Kolose 2:8.

Ihs me Kin Wia Met Ahnsou Pwukat?: Dahme Vatican koasoanehdi nan pahr 1965 kasalehda met: “Padahk koaros en Kadolik sohte kohsangete Pwuhk Sarawi. Kahrehda kitail anahne wauneki oh lelepek ong tiahk sarawi kan oh Pwuhk Sarawi koaros.” (Dogmatic Constitution on Divine Revelation me ntingdi nan Catechism of the Catholic Church) Ehu makasihn koasoiahki emen sounpadahk en Toronto, Canada me idek: “Dahme kahrehda kitail anahne rong mahsen sang sounpar 2000 samwalahro pwehn kaweid kitail? Mie pein atail lamalam kaselel kan, ahpw atail kin tetehk padahk en Sises oh Paipel kin kaluwetala.”

Ehu dikseneri en Kadolik koasoiahki Sounkadehdehn Siohwa kan: “Re kin wiahki Paipel ihte poahsoanpen dahme re kin kamehlele oh kaweid mwomwen arail wiewia kan.” (New Catholic Encyclopedia) Ehu ahnsou kerendo, ohl emen nan Canada kauhdi emen Sounkadehdehn Siohwa ni eh pahn nda ihs ih. Ohlo nda me e ese me ih emen Sounkadehdehn Siohwa pwehki e doadoahngki Paipel.

“Kaidehn Kisehn Sampah”

“Sampah kailongkiniraillahr pwehki irail kaidehn kisehn sampah.”​—SOHN 17:14.

Ia Wehwehn Met: Pwehki Sises kaidehn kisehn sampah, e sohte kin ketin iang pidada palien politik oh akamai kan me kin wiawi nanpwungen pwihn en aramas kan. E ketin kawehwehda: “A ma ei wehi kisehn sampah wet, ei tungoal papah kan pahn peikin ie, pwe emen de pangielahng rehn mehn Suhs akan. Ahpw soh! Ei wehi kaidehn kisehn wasaht!” (Sohn 18:36) E pil ketin kangoangehki sapwellime tohnpadahk kan ren soikala madamadau kan, lokaia oh wiewia kan me kin uhwong Mahsen en Koht.​—Madiu 20:25-27.

Ia Duwen Tepin Kristian kan Ar Kin Wia Met: Emen sounnting en pelien lamalam Jonathan Dymond koasoia me tepin Kristian kan “kin soikala iang [mahwen] sohte lipilipil dahme kin wiawi ong irail, ma aramas kin kasarowe irail, salihiraildi de kemeirailla.” Re kin pilada ren lokolok, sang kauwehla arail soupoupali. Koasoandi en arail wiewia kan pil kin katohreirailla. Paipel mahsanih duwen Kristian kan: “Eri, met ihme me rotorot akan pwuriamweikilahr amwail sohte kin patehng irail iang wia soangen mwoarong suwed oh kanamenek pwukat, re ahpw kin lahlahwei kumwail.” (1 Piter 4:4) Soupoad Will Durant ntingihedi me Kristian kan “kin kamedekih aramas kan me kin rapahkihte arail peren sang ni arail kin poadidi oh tiahk mwakelekel.”

Ihs me Kin Wia Met Ahnsou Pwukat? Me pid Kristian akan arail kin soupoupali, ehu dikseneri en Kadolik koasoia: “E sapwung en soikala iang mahwen.” (New Catholic Encyclopedia) Ehu doaropwehn rohng koasoia me ehu ripoht sang ehu pwihn me kin apwalih pwungen aramas (African Rights) duwen kamakamlahn mehn Rwanda kan nan pahr 1994 kasalehda me pelien sarawi koaros iang pidada met. Ripoht wet nda me “ihte Sounkadehdehn Siohwa kan me sohte iang pidada met.”​—Reformierte Presse.

Ni emen sounpadahk en high sukuhl eh koasoia duwen kamakamalahn aramas pahn kaundahn Nazi (Holocaust), e nsensuwedkihla me “sohte ehu pwihn kin kasalehda arail sapwungki likamw tohto oh wiewia lemei tohto.” Mwurin eh tehk ire wet ni ehu wasa nan Amerika me kin kasalehda kamakamala wet (Holocaust Memorial Museum), e ntingihedi: “Met I alehdier ei pasapeng.” E esehda me Sounkadehdehn Siohwa kan kin kesihnenda teng ong dahme re kin kamehlele mendahki soangen lokolok me re kin alehdi.

Ia duwen arail koasoandi en wiewia kan? Ehu makasihn en Kadolik koasoia: “Tohto me pwulopwul me iang Kadolik kin sapwungki padahk ong ire kan me duwehte mihmihpene oh wendipene mwohn arail saikinte pwopwoudida.” (U.S. Catholic) Makasihno kasalehda dahme emen dihken nda: “Me tohto, mwein daulih persent 50 kin mihmihpene mwohn arail pwopwoudida.” Ehu dikseneri koasoia me Sounkadehdehn Siohwa kan “kin kehliki arail koasoandi en tiahk mwakelekel.”​—The New Encyclopædia Britannica.

“Kumwail Pahn Limpoakpene”

“I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”​—SOHN 13:34, 35.

Ia Wehwehn Met: Krais mahsanihong sapwellime tohnpadahk ko ren limpoakpene duwehte eh ketin poakohng irail. Ia duwen Sises eh ketin poakohng irail? E kin ketin poakohng aramas koaros mendahki me tohto kin lipilipilki aramas oh mwamwahliki lih akan nan ahnsowo. (Sohn 4:7-10) Limpoak kin kamwakid Sises en ketin tounmeteikihla sapwellime ahnsou, kehl oh pein sapwellime nsenamwahu pwehn sewese meteikan. (Mark 6:30-34) Ni kaimwiseklahn sapwellime mour, Krais ketin kasalehda limpoak ni ahl me keieu laud. E mahsanih: “Ngehi me silepen sihpw mwahu. Silepen sihpw mwahu kin tounmeteikihla eh mour pwehki nah sihpw kan.”​—Sohn 10:11.

Ia Duwen Tepin Kristian kan Ar Kin Wia Met: Tepin Kristian kan kin ekerki emenemen irail riarail kan. (Pailimwon 1, 2) Re kin kasamwo aramas en wehi koaros nan mwomwohdisohn Kristian pwehki re kin kamehlele me “sohte wekpeseng ehu mie nanpwungen mehn Suhs akan oh mehn liki kan. Koht, iei ih mehtehmen me pil Kaunen aramas akan koaros.” (Rom 10:11, 12) Mwurin Pendekos en pahr 33, tohnpadahk kan nan Serusalem “netikihla sapwarail kan oh dipwisou kan oh nehkpeseng mwohni kan nanpwungarail, nin duwen me emenemen kin anahne.” Dahme kahrehda? Pwehki irail me ahpwtehn papidaisla ko ren kak mihmihte nan Serusalem oh “poadidiong ale padahk sang rehn wahnpoaron ko.” (Wiewia 2:41-45) Dahme kamwakid irail en wia met? Mwotomwotsang sounpar 200 mwurin mehlahn wahnpoaron ko, Tertullian koasoia dahme aramas teikan kin ndahki Kristian kan: “Ia uwen arail kin limpoakpene . . . oh ia uwen arail kak mehkihla emenemen irail.”

Ihs me Kin Wia Met Ahnsou Pwukat? Ehu pwuhk koasoia me daulih sounpar epwiki kei, irail me kin nda me irail Kristian “kin peipene nanpwungarail oh kamedekih emenemen uhdahn laudsang dahme irail me kaidehn Kristian kin wiahiong irail.” (The History of the Decline and Fall of the Roman Empire me wiawihda nan pahr 1837) Ehu roporop nan Amerika diarada me me tohto me kin nda me re kin iang pelien sarawi me pali laud kin nda me irail Kristian, kin lipilipilki aramas. Tohn sarawi kan nan ehu sahpw sohte kin ehuiong irail kan me iang arail sarawi nan ehu sahpw tohrohr, kahrehda re sohte kak oh sohte men sewese iengerail kan ma re kin anahne sawas.

Nan pahr 2004 mwurin melimel pahieu eh lel Florida nan erein sounpwong riau, wiliepen pwihn me kin apwalih kahpwal kan nan Florida wia petehkpen dipwisou kan ma re kin kadoadoahk ni ahl me konehng. E nda me sohte ehu pwihn me kin doadoahngki ni pwung duwehte Sounkadehdehn Siohwa kan, oh e kihda soangen dipwisou koaros me Sounkadehde ko anahne. Mwowesang, nan pahr 1997 pwihn en Sounkadehdehn Siohwa kan kohla Democratic Republic en Congo oh wahla wini, mwenge oh likou pwehn sewese iengerail Kristian kan oh meteikan me anahne sawas. Iengerail Sounkadehde kan nan Iurop sawaskihda dipwisou kan ni uwen tala rar.

“I Kasansaledahr Mwaromwi ong Aramas ako”

“I kasansaledahr mwaromwi ong aramas ako me komwi ketikihongieier sang nin sampah. . . . Ngehi me kahrehiong irail en ese mwaromwi.”​—SOHN 17:6, 26, NW.

Ia Wehwehn Met: Sises kin ketin kasansalehda mwaren Koht ni eh kin ketin doadoahngki nan kalohk. Ni Sises eh kin ketin wadek iren Paipel kan nin duwen e kin kalapw wia, e kin ketin wadek ni ngihl sansal mwaren Koht. (Luk 4:16-21a) E ketin padahkihong sapwellime tohnpadahk ko ren kapakapki: “Samat, mwaromwi en sarawihla, mweimwi en pweida.”​—Luk 11:2.

Ia Duwen Tepin Kristian kan Ar Kin Wia Met: Wahnpoaron Piter padahkihong ohl mah ko nan Serusalem me Koht ketikihsang mehn liki kan “aramas kei ong mwareo.” (Wiewia 15:14, NW) Wahnpoaron ko oh meteikan kin kalohki me “Koaros me kin likweriong mwaren Kaun-o [“Siohwa,”NW] pahn mourla.” (Wiewia 2:21; Rom 10:13) Re pil kin ntingihedi mwaren Koht nan pwuhk kan me re wiahda. Ehu pwuhk en kosonned en mehn Suhs kan me wiawihda mpen pahr 300 koasoiahki imwintihti kan ar isikala nein Kristian ko pwuhk kan: “Irail sohte song en koledi pwuhk en Kristian kan oh pwuhk kan en minim [mehn Suhs Kristian kan]. Re mweidohng pwuhk ko en isihsla, . . . iangahki wasa kan me Mwaren Koht pwarada ie nan pwuhk pwukat.”​—The Tosefta.

Ihs me Kin Wia Met nan Rahnpwukat? Ehu pwuhk me National Council of the Churches of Christ nan Amerika wiahda, koasoia ni tepin pali en pwuhko: “En kin doadoahngki ahd ehu me konehng Koht mehlelo, me mwomwen me mie koht teikan oh anahne kasalehda me e weksang irail, sohla kin kadoadoahk rehn pelien lamalam en mehn Suhs mwohn mwehin tepin Kristian akan oh e uhdahn sohte konehng pwoson en sarawi en Kristian pwon.” (The Revised Standard Version of the Bible) Ihme kahrehda re wiliankihdi mwaren Koht “KAUN-O.” Me keren, kaun en Kadoliko ruwesehiong pisop kan: “Dehr kin doadoahngki de pil nda mwaren Koht ni mesen nting pahieu pwukat YHWHb nan koul kan oh kapakap kan.”

Ihs me kin doadoahngki oh kasansalehda mwaren Koht nan rahnpwukat? Ni ahnsou me Sergey pwulopwul oh mi nan Kyrgyzstan, e kilang ehu kasdo me kasalehda mwaren Koht Siohwa. Mwurin sounpar eisek samwa e sohla pwurehng rong mwar wet. Mwuhr, mwurin eh keseula nan Amerika, Sounkadehdehn Siohwa riemen kalohkla imweo oh kasalehiong mwaren Koht sang nan Paipel. Sergey perenkihda eh diarada me mie pwihn ehu me kin doadoahngki mwar wet Siohwa. E kapwuriamwei me ehu dikseneri kawehwehdi pahn lepin lokaia “Siohwa Koht” nin duwen met: “Koht men me keieu lapalap me Sounkadehdehn Siohwa kan kin pohnese oh ihete me re kin kaudokiong.”​—Webster’s Third New International Dictionary.

[Nting tikitik kan me mi pah]

“Rongamwahu en Wehin Koht Pahn Lohkseli”

“Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”​—MADIU 24:14.

Ia Wehwehn Met: Sounnting en Rongamwahu Luk ntingihedi me Sises kin ketin “kakahnseli nan kahnimw oh nan kousapw akan, ketin kapakapahrengki Rongamwahu duwen Wehin Koht.” (Luk 8:1) Pein Sises mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) E ketin poaronepeseng sapwellime tohnpadahk ko pwe ren kalohki rongamwahwo nan kahnimw kan oh kousapw akan oh mwuhr ketin padahkihong irail: “Kumwail ahpw pahn kadehde ie . . . lelohng ni irepen sampah.”​—Wiewia 1:8; Luk 10:1.

Ia Duwen Tepin Kristian kan Ar Kin Wia Met: Sapwellimen Sises tohnpadahk ko mwadangete kapwaiada kehkehliko. “Rahn koaros, nan Tehnpas Sarawio oh nan imwen aramas akan irail kin wonoweite ni padahk oh kawehwe Rongamwahu duwen Sises me iei Mesaia.” (Wiewia 5:42) Tohnmwomwohdiso koaros kin wia doadoahk en kalohk a kaidehn ekeite me pilipilda. Soupoad Neander tehkada me “Celsus, emen imwintihti en tepin Kristian akan mahs ntingihedi me tohndoadoahk kan me kin wiahda likou sang wunen sihpw, aramas en wiahda suht kan, tohndoadoahk kan me kin litepwiada kilin kou, oh irail aramas akan me sohte sukuhl, irail me kin ngoangki kalohki Rongamwahu.” Jean Bernardi ntingihedi nan nah pwuhko: “[Kristian kan] kin kohla kalohk wasa koaros oh ong aramas koaros. Nan ahl akan, kahnimw kan, nan wasahn kapokon kan oh ni ihmw akan. Mehnda ma aramas pahn kasamwo irail de soh. . . . Lella wasa koaros nan sampah.”​—The Early Centuries of the Church.

Ihs me Kin Wia Met Rahnpwukat? Kaun en pelien lamalam en Anglican, David Watson ntingihedi: “Pelien sarawi arail sohte kin kesempwalki doadoahk en kalohk oh katohnpadahk iei ehu kahrepen arail sohte kin perenki sarawi nan rahnpwukat.” José Luis Pérez sang Guadalupe, ntingihedi duwen wiewiahn pwihn en pelien lamalam en Evangelical, Adventist, oh meteikan oh pil nda me “re sohte kin kohla kalohk ihmw lel ihmw.” Me pid Sounkadehdehn Siohwa kan e ntingihedi: “Re kin idawehn arail koasoandi en kalohk ihmw lel ihmw.”​—Why Are the Catholics Leaving?

Jonathan Turley wiahda ripoht ehu me inenen kapwuriamwei oh mehlel: “Aramas pahn ndahte Sounkadehdehn Siohwa kan, a pali laud en aramas kin mwadangete medewe sounkalohk kan ar kin kohla ni imwat ko ni ahnsou sohte konehng. Ong Sounkadehdehn Siohwa kan, arail kin kohla kalohk ihmw lel ihmw kaidehn ongete ren kakairada arail pwoson, ahpw iei uhdahn utupen arail pwoson.”​—Cato Supreme Court Review en pahr 2001-2002.

[Koakon nan pali 9]

Ke Kak Kasawihada Kilelepen Kristian Mehlel?

Poahsoankihda iren Paipel kan me kawehwehdahr nan iren onop pwukat, ihs me ke medewe nan rahnpwukat me kin kasalehda kilelepen Kristian mehlel? Mendahki mie pwihn en pelien sarawi tohtohie me kin nda me irail Kristian, tamataman dahme Sises mahsanihong sapwellime tohnpadahk ko: “Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.” (Madiu 7:21) Kasawihada irail kan me kin wia kupwuren Sahmo me kin kasalehda kilelepen Kristian mehlel, oh kin ehuong irail kak imwikihla kapai soutuk pahn Wehin Koht. Se lukei iuk ken idek rehn Sounkadehdehn Siohwa kan me kihwei noumw kisin pwuhk wet duwen ekei ire kan me pid Wehin Koht oh kapai kan me e pahn wahdo.​—Luk 4:43.