Dahkot Wehin Koht?

“Rongamwahu en Wehin Koht . . . ”​—MADIU 24:14.

NAN sapwellimen Sises kapahrek en pohn dohl, e ketin kasalehda duwen wiepen kapakap ehu iangahki pekipek wet ong Koht: “Mweimwi en pweida.” Aramas ngeder wadlikihala kapakap wet oh kin kalapw doadoahngki. Ehu dikseneri koasoia me, “iei kapakap wet me pali laud en Kristian akan kin doadoahngki nan arail kaudok.” Ahpw me tohto me kin wia kapakap wet sohte kin wehwehki dahkot Wehio de dahme e pahn wia ni eh pahn pweida.—Madiu 6:9, 10.

Met sohte kapwuriamwei. Kaunen pelien lamalam kan me dene irail Kristian, kin kihda kawehwe kei me pid Wehio me kin uhpene, sawehwe oh pil apwal. Emen ohl ntingihdi me Wehin Koht iei “manaman ehu sang rehn Koht, . . . mehkot me kin kadokepene aramas oh Koht pwe ren ale komourparail.” Emen pil kawehwe me rongamwahu en Wehio iei “kaweid en mwomwohdiso.” Oh nein mwomwohdisohn Kadolik kisin pwuhk en Kadekisimwus koasoia me: “Wehin Koht [iei] pwung, meleilei oh peren rehn Ngehn Sarawio.”

Ahpw ke pahn diar ehu kawehwe sansal nan pali 2 en pwuhk wet. E koasoia: “Wehin Koht me iei uhdahn koperment ehu me mihmi nanleng, pahn kereniong kasorehla soahng suwed koaros oh pahn kawiliakapwala sampah ong ehu paradais.” Kitail pahn kilang ia duwen Paipel eh utung met.

Kaun akan en Sampah Pwon ni Ahnsou Kohkohdo

Wehi ehu iei koperment ehu me nanmwarki men kin kaunda. Nanmwarki en Wehin Koht iei Sises Krais me ketin iasadahr. Eh ketier nan mwoale nanleng sansalda nan kaudiahl me kowohng soukohp Daniel, me ntingihdi: “Nan kaudiahl en nipwongo, I pil kilangada emen me likamwete aramas [Sises]. E ketiket kohdo nanpwungen depwek kan oh pakahrlahng mwohn ih [Siohwa] me sapwellimanki mour poatopoato. E ahpw ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih. Sapwellime manaman en kaunda wasa pahn poatopoat, oh sapwellime wehi sohte pahn imwisekla.”—Daniel 7:13, 14.

Pwuhken Daniel pil kasalehda me Koht pahn ketin kauwada Wehio oh e pahn tengeteng. E pahn kasorehla kaundahn aramas koaros oh e pahn mihmi kohkohlahte. Irelaud 2 kawehwehda ouraman ehu me Koht ketikihong nanmwarki en Papilon. Nanmwarkio kilangada lapalahn sansal ehu me kin wehwehki wehi kan me kin kaunda sampah. Soukohp Daniel kawehwehda ouramano. E ntingihdi: “Ahnsou kohkohdo . . . Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”—Daniel 2:28, 44.

Nanmwarki en Wehin Koht sohte ketin kelehpw kaun. Erein sapwellime doadoahk en kalohk nin sampah, Sises ketin kamehlelehiong sapwellime wahnpoaron lelepek ko me irail iangahki meteikan pahn iasadahng nanleng oh ketidiong nan mwoahl akan. (Luk 22:28-30) Sises sohte ketin koasoakoasoia uhdahn mwoahl kei pwehki nin duwen eh ketin kasalehdahr, Wehio pahn mi nanleng. Paipel kin kawehwehda me irail me pahn iang kakaun pahn kohsang “kadaudok koaros, lokaia koaros, wehi koaros, oh sahpw koaros.” Irail pahn wiahla wehin samworo kei ong atail Koht oh irail pahn kaunda sampah nin duwen nanmwarki kei.—Kaudiahl 5:9; 20:4, 6.

Dahme Kahrehda Rongamwahu en Wehio Mwahuki?

Tehk me Krais Sises ketin alehdier manaman en kaunda aramas koaros, wehi koaros, oh lokaia koaros oh irail me iang ih pahn kaunda sampah nin duwen nanmwarki kei. Eri ihs me pahn mi pahn kaundahn Wehi wet? Irail kan me kin kapwaiada rongamwahwo me kalohkpe wiwiawi rahnwet. Irail kan me pahn pil iang mi pahn kaunda wet iei irail ko me pahn iasada pwehn mour nin sampah oh ahneki koapworopwor en mour kohkohlahte.

Paipel kin kasalehda ni sansal kapai kan me aramas pahn ahneki pahn kaundahn Wehio. Iet ekei kapai kan:

“E kin ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan.”—Melkahka 46:9.

“Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan—ahpw sohte emen tohrohr pahn kak adihasang ar wain.”—Aiseia 65:21, 22.

“[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:3, 4.

“Ahnsowo me maskun kan pahn pehdpeseng, oh me salengepon kan pahn rongada wasa. Me nehtuk kan pahn mwusikekda oh kahkahlek, oh me lohteng kan pahn ngisingiski ar peren.”—Aiseia 35:5, 6.

“Ahnsou ehu pahn kohdo me irail koaros me mihmi nan sousou kan pahn rong kapitie [kapitien Sises], oh re pahn pedoisang nan arail sousou kan. A me wiewia mwahu kan pahn iasadahng mour.”—Sohn 5:28, 29.

“Me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:11.

Met uhdahn rongamwahu ehu! Patehng met, pweidahn kokohp kan kasalehda me ahnsowo kerendohr pwe Wehio en wahdo eh kaunda pwung pohn sampah pwon.

Dahkot Rongamwahwo?

“Rongamwahu . . . ”—MADIU 24:14.

KRISTIAN akan anahne kalohki “rongamwahu en Wehin Koht” sang ni arail pahn kin padahkihong meteikan duwen rongamwahwo oh kawehwehiong irail me Wehio iei koperment ehu me pahn kaunda sampah ni pwung ni ahnsou kohkohdo. Ahnsowohte, Paipel pil kin doadoahngki lepin lokaia wet “rongamwahu” ni soangen ahl teikan. Karasepe, kitail pahn kilang me ekei wasa nan Paipel kin koasoia “rongamwahun sapwellime komour” (Melkahka 96:2); “Rongamwahu wet sang rehn Koht” (Rom 15:16); oh “Rongamwahu duwen Sises Krais.”—Mark 1:1.

Rongamwahwo kin pid padahk mehlel koaros me Sises ketin padahngki oh sapwellime tohnpadahk ko ntingihedi. Mwohn eh ketidahla nanleng, Sises mahsanihong sapwellime tohnpadahk ko: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi [“sapwellimen Koht manaman,” NW], oh kehkehlingkihong irail re en peikiong mehkoaros me I koasoanediong kumwail.” (Madiu 28:19, 20) Eri doadoahk en Kristian mehlel akan kaidehn ihte en kaesehki meteikan kan duwen Wehio ahpw ren pil nantihong pwe meteikan en pil iang wiahla tohnpadahk.

Ia irair en mwomwohdiso kan me pid kalohki rongamwahwo? Aramas tohto sohte wehwehki dahkot Wehio kahrehda re sohte kak padahkihong meteikan dahme pwung duwen Wehio. Ahpw re kin uhd kansenamwahwihki tohnmwomwohdiso kan arail kin padahngki mahkpen dihp oh pwosonla Sises. Re pil kin song en kahrehiong meteikan en iangala arail mwomwohdiso ni arail kin wia doadoahk kan me pahn kamwahwihala mouren aramas, de kauwada imwen wini kan, wasahn sukuhl oh pil wiahda imwen me semwehmwe kan. Soahng pwukat kak kadirehla tohn arail mwomwohdiso ahpw e sohte kak kahrehiong ren wiahla Kristian mehlel kei me kin nantihong mour pahrekiong sapwellimen Sises padahk kan.

Emen semen en pelien lamalam ntingihdi: “Ke pahn diar me pali laud en irail me sukuhl laud oh kaunen mwomwohdiso kan ese me kitail anahne wia doadoahk en katohnpadahk de esehla Sises oh padahkihong meteikan en wia soahng koaros me Sises mahsanih. . . . Sapwellimen Sises kaweid me pid ire wet inenen sansal. Kitail me sohte kin wia dahme e mahsanih. Kitail sohte kin mehleliong doadoahk wet. Oh kitail sehse ia mwomwen atail pahn wia doadoahk wet.”

Met pahrekiong roporop ehu me wiawi nanpwungen irail Kadolik kan nan Amerika. Roporop wet kasalehda me persent 95 pwungki me kalohki rongamwahwo wia kisehn arail pwoson. Ahpw kereniong koaros pehm me ahl keieu mwahu en wia met iei en dehr kin koasoia ahpw arail mour en kin kasalehda mehn kahlemeng mwahu ong meteikan. Lih emen me iang roporop wet koasoia: “Koasoakoasoia rongamwahwo sohte wia ahl me keieu mwahu en kalohki rongamwahwo. Ahpw wiahda mehn kahlemeng mwahu me kesempwal.” Pwihn me wia roporop wet koasoia nan ehu neirail pwuhk me, me tohto kin pweiek en ehukihong meteikan arail pwoson pwehki arail mwomwohdiso eh “adsuwedkihla arail tiahk suwed me arail kaun akan wiahiong seri kan oh arail padahk sapwung kan.”—U.S. Catholic.

Emen kaunen pelien lamalam en Methodist nsensuwedkihla eh mwomwohdiso eh pingida oh tohrohrpeseng kahrehda irail masak wia arail pwukoahn mwomwohdiso oh re kin mour duwehte irail kan me sohte iang arail pelien lamalam. E peidek ni ngilen pwunod: “Ihs me warohng kalohki rongamwahu en Wehio oh ihs me kin wia doadoahk wet?”

Kaun menet sohte sapengla eh peideko. Ahpw mie pasapengpe. Ke pahn diar nan iren mwuhr.

[Kilel nan pali 6]

Rongamwahwo pidada Wehin Koht oh komour sang atail pwoson Sises Krais