Ihs Irail me Kin Kalohki Rongamwahwo?

“ . . . pahn lohkseli wasa koaros nin sampah.”—MADIU 24:14.

SOUNKADEHDEHN Siohwa kan me kin kalohki rongamwahwo nan sampah pwon. Irail kin wia met ni soangsoangen wiepe kei. Iet ehu wiepe.

Koasoiong Aramas akan. Sounkadehdehn Siohwa kan kin wahla rongamwahwo rehn aramas akan duwehte me Sises oh sapwellime tohnpadahk ko ketin wia. (Luk 8:1; 10:1) Irail sohte kin awih aramas en kohdo rehrail. Kalohk ong aramas akan duwen Wehin Koht iei mehkot me Sounkadehde koaros me tohtohsang meh 7,000,000 kin iang wia. Irail kin kalohk sang ihmw lel ihmw, pohn ahl akan, doadoahngki delepwon, oh pil soangen wiepe teikan. Sounkadehde kan kalohki awa tohtohsang 1,500,000,000 nan pahr nekiero.

Likin padahngki duwen Wehin Koht, irail pil kin padahkihong meteikan duwen ‘mehkoaros me [Sises] koasoanehdi.’ (Madiu 28:20) Irail kin kaukaule wia onop en Paipel me daulih welirar ni imwen aramas kan.

Sounkadehde kan kin kalohk sampah pwon nan sahpw 236. Irail kin kalohk ong soangen aramas koaros. Irail kin kalohk nan wehi kan, kahnimw kan, nanwel kan en Amazon, nan wasa me inenen kopou nan Siberia, nan sapwtehn kan en Aperika oh pil nan nahna kan en Himalaya. Irail sohte kin alpweipweiki doadoahk wet. Irail kin doadoahngki pein neirail mwohni oh arail ahnsou pwehki arail limpoak ong Koht oh mehn mparail kan. Iet pil ehu ahl me irail kin doadoahngki pwehn kalohki rongamwahwo.

Pwuhk kan. Kisin pwuhk wet, me oaralape pwon iei Kahn Iroir Pakpakairki Wehin Siohwa, kin wiawihda ni lokaia 185 oh ehuehu sounpwong uwen tohtohn me kin kohpeseng kin daulih meh 42,000,000. Iengen pwuhk wet me adaneki Awake! me pil kin koasoia duwen Wehio, kin wiawihda ni lokaia 83. Oh mpen 40,000,000 kin kohpeseng ehuehu sounpwong.

Pwuhk kan, kisin pwuhk kan, kisin doaropwe kan, CD oh MP3 kan, iangahki DVD kan me kin kawehwehda padahk en Paipel kan mieier ni lokaia 540. Sounpar 10 samwalahro, Sounkadehde kan wiadahr oh kihpeseng soahng pwukat tohtohsang meh 20,000,000,000. Met wehwehki me aramas emen kin alehdi soahng siluh sang dipwisou pwukat.

Sounkadehdehn Siohwa kan pil kin iang kihla soangsoangen kawehwe kan en Paipel. Irail wiahda ehu kawehwehn Paipel me adaneki New World Translation of the Holy Scriptures me mieier ni lokaia 96. Ekei kin kawehwehdi Paipelo pwon a ekei kin kawehwe ekeite wasa. Sounkadehdehn Siohwa kan kin wiahda oh kihpeseng kawehwehn Paipel wet. Kawehwehn New World Translation of the Holy Scritpure kohpesengehr daulih meh 166,000,000. Sounkadehde kan pil kin ehukihong meteikan rongamwahu en Wehio ni ahl wet.

Mihting kan en Kristian. Mihting kan me kin wiawi ehuehu wihk nan Wasahn Kaudok kaidehn koasoandien sarawihte ahpw e wiawihda pwehn wia kasukuhl. Padahk kan kin pid oaralap kan me kohsang nan Paipel oh onop en Paipel kin wiawi sang sawaspen Kahn Iroir oh pwuhk teikan. Nan mihting kan, Sounkadehde kan kin pil sukuhlki ren wiahla sounkalohk koahiek kei en rongamwahwo.

Sounkadehde kan kin onopki soahng tehieu nan mwomwohdiso kan me tohtohsang meh 107,000 nan sampah pwon. Met kahrehda ren kin miniminpene. Mihting pwukat kin langadahng wehipokon. Sohte delen meirong kin wisikseli. Soahng pwukat koaros pahn sohte katepe ma Sounkadehde kan sohte kin kapwaiada dahme re kin kalohki. Ihme kahrehda irail kin nantihong utung rongamwahwo ni ahl wet.

Arail Mehn Kahlemeng. Irail kin nantihong wia mehn kahlemeng mwahu nin duwen Kristian kan sang ni arail wiewia kan. Irail kin wia uwen arail kak en wiahiong meteikan duwehte dahme irail men meteikan en wiahiong irail. (Madiu 7:12) Mendahki irail soh unsek oh kin sapwungala, irail kin uhdahn men kasalehda limpoak ong aramas koaros kaidehn ihte ni arail kalohki rongamwahwo ahpw pil sang ni arail kin sawas ni ahl teikan me re kak.

Sounkadehdehn Siohwa kan sohte kin song wekidala en aramas koaros arail pelien lamalam ni arail kalohk. Ahpw, ni ahnsou me doadoahk wet pahn lelehr ahnsou me Siohwa kupwurki, imwio pahn leledo duwehte me Sises ketin kohpadahr. Ia pahn wehwehn met ong sampah oh towe kan?

[Kilel nan pali 7]

Rongamwahwo kin lohkseli nan sampah pwon sang Sounkadehdehn Siohwa kan

Dahkot “Imwin Sampah”?

“. . . a mwuri, imwin sampah ahpw pahn kohdo.”—MADIU 24:14.

ME KEREN, aramas tohto kin koasoakoasoia duwen imwin sampah. Pwuhk kan oh kasdo kan, mehnda ma manga de e pid sains, kin kasalehda mwomwen ohlahn sampah ehu rahn. Soahng pwukat pil kin kasalehda duwen mahwen en pakudang kehlail kan, usu kan ar pahn loiong sampah, mwahs keper me kak kemehla aramas, wekideklahn nan wehwe de soahng kan me pahn kohsang maslikin sampah me pahn kauwehla sampah wet.

Madamadau en palien lamalam pil wekpeseng. Me tohto kin padahngki me “imwin sampah” pahn kihsang mour koaros nin sampah. Iet me emen semen en palien lamalam koasoiahki Madiu 24:14: “Iren Paipel wet iei ehu ire me keieu kesempwal nan sapwellimen Koht Mahsen . . . Dih me kitail mihmi loale kin kohkohlahng ahnsou ehu me sampah pwon pahn ohla oh malaulau me kin medemedewe duwen dahme pahn wiawi.”

Soangen madamadau pwukat kin pohnsehsehla ire mehlel wet: Siohwa Koht ketin wiahda sampah “teng oh poatopoat.” E “sohte ketin wiahda ni mwomwen sapwtehn ehu, ahpw ni mwomwen wasa mwahu ong aramas en kousoan ie.” (Aiseia 45:18) Eri, ni Sises eh ketin mahsanih duwen “imwin sampah,” e sohte wehwehki me sampah pahn ohla de aramas koaros pahn kasohrala. Wehwehn sapwellime mahsen iei irail me suwed kan me sohte men mour pahrekiong sapwellimen Siohwa kaweid limpoak me pahn kasohrala.

Medewe karasaras wet. Ia duwen ma mie imwomw ihmw kaselel ieu oh ke mweidohng aramas en mi loale ni soh pweipwei. Ekei tohnihmwo kin ahneki mour meleilei nanpwungarail oh re kin apwalih mwahu ihmwo. Ahpw meteiko kin wiahda kahpwal tohto, peipene nanpwungarail oh kin wiakauwe me mwahu ko. Irail kauwehla omw wasao oh re sohte men rong ni omw song en kauhiraildi.

Dahme ke pahn wia pwehn kapwungala irairo? Ke pahn kauwehla imwomwo? Sansal me soh. Mwein ke pahn kausasang aramas suwed ko oh kamwahwihala wasa kan me re kauwehla.

Siohwa pahn ketin mwekid ni soangen ahlohte. E ketin kamwakid sounmelkahkao en ntingihdi: “Irail kan me kin likih KAUN-O pahn sapweniki sahpwo, a aramas suwed kan pahn koakoahksang. Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail; a me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:9-11.

Wahnpoaron Piter pil koasoia duwen ire wet. Koht ketin kamwakid en ntingihdi: “Duwen nanleng oh sampah eh wiawihkihda mahseno, duwen sampah eh pwarada oh wiawihda sang pihl oh nan pihl, oh duwen eh ohkihla pihl kawao, iei pilen Nohlik Lapalapo.” (2 Piter 3:5, 6) Piter koasoakoasoia duwen Nohliko ni mwehin Noha. Aramas suwed akan kasohrala ahpw sampah sohte ohla. Nohliko wia “kadehdepen dahme pahn wiawihong me suwed kan.”—2 Piter 2:6.

Piter pil doula koasoia: “Nanleng oh sampah en ahnsou wet mihmihehki mahsenohte en Koht oh wie nekinek ong ni ahnsou re pahn ohkihla kisiniei.” Ma kitail pahn uhdi wasaht, kitail kak ahnekihda madamadau sapwung. Tehk me iretikitiko pousehlahte koasoia: “Iei rahnen kamwomwmwomwlahn me suwed kan.” Kaidehn sampah me pahn kamwomwomwla ahpw me suwed kan. Dahme pahn wiawi mwuri? Piter ntingihdi: “Kitail koapworopwor oh awiawih lahng kapw [Wehin Koht me Mesaia kin kaunda] oh sampah kapw [koasoandi en aramas pwung kan], wasa me pwungen kalahngan en Koht pahn poadada ie poatopoat, duwen eh ketin inoukidahr.”—2 Piter 3:7, 13.

Kokohp en Paipel pil kasalehda me imwio kerendohr. Wadek Madiu 24:3-14 oh 2 Timoty 3:1-5 oh kilang mehn kadehde kan me kadehdehda me met mehlel.a

Ke lemeleme e sou wia mehkot kapwuriamwei eh mie sawehwe laud duwen Madiu 24:14, ire ieu me pil lella seri men kak wehwehki? Mie kahrepe. Pwehki Sehdan kin karotongehla aramas sang padahk mehlel me dierek nan Mahsen en Koht. (2 Korint 4:4) Pil ehu, Koht ketin ekihsang kupwure kan irail kan me aklapalap oh e kin ketin kasalehiong irail kan me aktikitik. Me pid duwen met Sises mahsanih: “Semei, Kaunen nanleng oh sampah! I kapingahkin komwi omwi ketin kasalehiong me soaloalokong kan mehkan me komw ketin ekihsang me koahiek oh loalokong en sampah kan.” (Madiu 11:25) Ia uwen eh wia kapai ehu en iang mi nanpwungen irail me aktikitik kan me kin wehwehki dahkot Wehin Koht oh iang kasikasik kapai kan me Wehio pahn wahdo ong koaros me kin utung!