Sapwellimen Koht Erpit Kin Sansalda Ni Kapikipik Kan

“Koht me kin ketikihong kitail kupwurokong, pwe kitail en loalokong sang mahn de menpihr.”—SOHP 35:11.

MENPIHR kan ahneki soangen koahiek kapwuriamwei kan. Irail soun wiahda sompihr kan kin linganki ni menpihr kan sohte kin wiahki doahk laud ehu en pipihrseli nan wehwe. Ekei mahn kan kak pihrki mwail kid kei pohn sehd oh ese wasa re mih ie de lella wasa re pahn kohla ie mendahki sohte kilel kan pohn sehdo me pahn kahluwa irail.

Pil ehu koahiek en menpihr kan—me kin kasalehda erpit en Sounkapikadao—iei arail koahiek en wehwepene ni arail kin likwer oh sang ni ngilen arail koul kan. Iet ekei mehn karasepe kan.

Koasoi en Menpihr kan

Ekei soangen menpihr kan kin tepida koasoipene sangete ni ahnsou me re mihmihte nan kutohro. Karasepe, menpihr me adaneki quail kin kak kutohr lella kutohr waluh, ni uwen marahra en kutohr ehu nan rahn ehu. Eri ma kutohr ko koaros sawa ni uwen marahra tehieu eri koaros pahn sawa ni uwen reirei en rahn waluh. Nohno en menpihr pwelel pwukat pahn uhd ale pwukoa apwal en tetehk kanaiehng irail kan me mahkier wihk ehu pwe e pahn pil ni ahnsowohte anahne kemwpwal kutohr me saikinte sawao. Weksang met, kutohr waluho pwon kin sawa ni erein awa weneu. Iaduwen met kin wiawi? Irail soun roporop kan diarada me menpihr ko me mihmihte nan eh kutohro kin koasoipene nanpwungarail oh mwomwen koasoanehdi irail en kin emente sawa mwurin emen.

Ni ahnsou me menpihr ko laudla, pali laud en ahnsou menpihr ohl kan me kin koul. E kin wia met ni ahnsou en kaparapar pwe en kin kilelehdi eh wasa de en kin likwerih eh werek. Nanpwungen soangsoangen menpihr kid kei, emenemen soangen menpihr kan kin mie pein eh lokaia, eri met kin kahrehiong menpihr liho en ese soangen menpihr dah ih.

Menpihr kan kin kalapw koul ni menseng de ni soutik kan ni kahrepe mwahu ehu. Ni ahnsou pwukat, e sohte kin nohn kisinieng oh sohte pil nohn katairong. Irail soun roporop kan diarada me ngilen koul en menpihr kan kin pak 20 sansal sang ahnsou teikan ma irail kin koul ni menseng oh ni soutik kan.

Kisakis Laud Ehu

Erpit me Siohwa kin ketikihong menpihr kan inenen kapwuriamwei. Ahpw me pid duwen koasoipene de wehwepene, aramas akan kin uhdahn sikla ni ahl wet. Sohp 35:11 kasalehda me Koht ketin kapikada aramas akan en “loalokong sang mahn de menpihr.” Aramas kante me kin kasalehda madamadau loal de apwal kan ni soangen ngihl kan me kin kohsang nan kepinwararail kan de ni mwomwen meserail de arail mwekid kan.

Mwomwen atail kin kasalehda atail madamadau de pepehm kan sang ni atail lokaia de mwekid kan iei kisakis kesempwal ehu sang rehn Koht. Ahpw ehu kisakis me laudsang met iei atail kak koasoiong Koht ki kapakap. Ni mehlel, Siohwa Koht kin ketin luke kitail en koasoiong ih. Sapwellimen Koht Mahsen, Pwuhk Sarawi mahsanih “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros.”—Pilipai 4:6.

Ni atail kin lelohng irair kan me kitail anahne wiahda pilipil apwal kan, Siohwa ketin kupwurki kitail en kin tehk soangen kaweid erpit kan me kileldi nan Paipel. E pahn ketin sewese kitail en wehwehkihla iaduwen kitail kak doadoahngki kaweid kan me kitail diarada nan Paipel. Seims, soun nting en Paipel men mahsanih: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.”—Seims 1:5.

Mwurin Depit kin doudouloale duwen mwomwen eh wiawihda, sounmelkahka menet mwekidki met oh patohwanohng Koht: “I kin patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.” (Melkahka 139:14) Ni ahmw pahn kin kasawih ni ahmw kalahnganki duwen sapwellimen Koht erpit me sansalda nan sapwellime kapikipikda kan, ahmw pwoson me sapwellime kehl pahn kihong uhk kaweid mwahu pahn laudla.

[Credit Line/Kawehwehpen kilel kan nan ehu ehu pali 4]

© Dayton Wild/Visuals Unlimited

Sapwellimen Koht Kehl Kin Sansalda Sang Usu Kan

KETIPIN wehte pali laud en usu kan. Mendahki met, e laudsang sampah pak 330,000. Pali laud en usu kan me karanih sampah tikitiksang ketipin. Ah usu teikan, me duwehte usu me adaneki V382 Cygni, pak 27 lapala sang ketipin.

Ia uwen kehl me kin kohsang ketipin? Nna song medewe ia uwen kehl en kisiniei ehu me ke pahn kak alu mwail eisek ah ke kakete pehm karakar en kisinieio. Ketipin dohsang sampah ki mpen mwail million 93. Ahpw ni rahn akan me ketipin kin kehl, kilin aramas kin kak mpweinpihlda! Ahpw e kapwuriamwei pwe ihte lik kis ehu en kehl en ketipin me kin leledo sampah. Ahpw kisin kehl wet itar en apwalih mour pohn sampah.

Kehl en ketipino kin kohsang nan werengen ketipino ahpw ketipino inenen laud mehlel oh nan werengen ketipino inenen kekeluwak me kahrehda kehl me kohsang nan werengen ketipino anahne seiseiloaki erein sounpar million kei pwe kehl wet en kak lella ni mas likin ketipino. Web site en SEC koasoia: “Ma rahnwet me Ketipino sohla wiahda de kihda kehl wet, kitail me koukousoan pohn Sampah ahpw pahn esehda oh pehmada duwen met mwurin sounpar 50,000,000!”

Nna song medewehla duwen met: Ni ahnsou me ke kin kilangada nanleng nipwong, ke kin kilang usu kid kei, oh ehuehu usu pwukat kin kihwei soangen kehlohte me atail ketipin kin kihwei. Oh saintis kan kapatahda me mie usu billion pak billion kei me mih nan wehwe!

Iawasa usu pwukat kohsang ie? Pali laud en soun roporop kan kin pwonopwonki iaduwen sampah wet eh kak pein miehla erein sounpar billion 14 samwalahro. Paipel kasalehda ni sansal: “Nin tepio, Koht ketin kapikada lahng oh sampah.” (Senesis 1:1, New World Translation) Sohte peikasalpe me Ih me ketin kapikada usu pwukat me kin wiahda kehl kin sapwellimanki ‘manaman lapalap.’—Aiseia 40:26.

Iaduwen Koht Kin Ketin Doadoahngki Sapwellime Manaman

Siohwa Koht kin ketin doadoahngki sapwellime manaman pwehn kakehle irail akan me kin wia kupwure. Karasepe, wahnpoaron Pohl kin doadoahngki eh kehl pwehn padahkihong meteikan duwen Koht. Pohl sohte ahneki manaman, ahpw e kak wiahda me mwahu tohto mendahki uhwong laud. Iaduwe? Pein ih kamehlele me e alehdi “manaman lapalap eh uhdahn sapwellimen Koht.”—2 Korint 4:7-9.