4. Kaweid dahieu me kileledi nan 1 Korint 10:12, 13 me Pohl kihda?

⁴ Ni ahnsou me Pohl ntingwong Kristian akan nan Korint​—kahnimw en Korint kin ndandkihla tiahk suwed akan—​e kihda kaweid me pahn sewese irail en pelian kasongosong kan oh sewese irail en wehwehki duwen kehl en ineng en wia dihp. E mahsanih: “Eri, mehmen me pepehm me e kesikesihnen teng, a en kanahieng pwe e de pwupwudi. Pwe songosong koaros me kin lelohng kumwail, ih me kin lelohng aramas koaros. Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:12, 13) Kitail koaros​—pwulopwul oh mah, ohl oh lih—​kin lelohng kasongosong tohto nan wasahn sukuhl, wasahn doadoahk, oh pil wasa teikan. Eri, kitail en kasawihada mwahu mahsen en Pohl oh tehk duwen ia wehwehn mahsen pwukat ong kitail.

7. Dahme kahrehda e kin wia kangoang laud ong kitail en ese me aramas teikan kin powehdi kasongosong kan me kin lelohng irail?

⁷ Kitail kin alehdi mehn kamweit laud ni atail pahn wadek mahsen en Pohl: “Pwe songosong koaros me kin lelohng kumwail, ih me kin lelohng aramas koaros”! (1 Korint 10:13) Wahnpoaron Piter ntingihdi: “Eri, kumwail tengeteng ni amwail pwoson oh kehlail ong ih [Tepil], pwe kumwail ese me riamwail Kristian akan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Piter 5:9) Ei, meteikan pil kin lelohng soangen kasongosong kan duwehte kitail oh irail kin powehdi kasongosong pwukat pwehki re kin ale sawas sang Koht, eri, kitail pil kak wia met. Kitail koaros nin duwen Kristian mehlel akan me kin momour nan sampah suwed wet, kitail anahne kaunopada atail madamadau kan me kitail pahn lelohng kasongosong kan. Iaduwen kitail pahn kak ese me kitail pahn kak powehdi atail luwet akan oh kitail sohte pahn lohdi pahn kasongosong kan oh wiahda dihp?