Kosonned En Krais

“I uhdahn iang mi pahn kosonned en Krais.”​—1 KORINT 9:⁠21.

1, 2. (a) Iaduwen sapwung tohto kan en tohnsampah kak en irairdi? (b) Dahme Kristiandom sohte sukuhlkihsang poadoapoad en pelien lamalam en mehn Suhs?

“ARAMAS kan oh koperment kan sohte kin sukuhlkihdi mehkot sang poadoapoad, de mwekidki mour en kosonned kan me kohsang met.” Emen sounpadahk en Sehmen nan senturi kaiesek duwau kosoia. Mehlel, poadoapoad en aramas kin sansalda me duwehte “karis en sapwung,” ireirekdien sapwung kan oh kahpwal kan, me kak irairdi ma tohnsampah pahn men sukuhlkisang arail sapwung kan en mahs.

² Kangohdi ohte duwen sohte men sukuhlkisang sapwung kan en mahs kin sansalda nan kosokosoipene wet me pid kosonned sarawi.Siohwa Koht wiliankihdi Kosonned en Moses kosonned ehu me mwahusang​—⁠kosonned en Krais. Ahpw, kaun akan en Kristiandom, me kin kose me dene re kin padahngki oh mourki kosonned wet, sohte kin sukuhlkisang duwen sapwung en Parisi kan. Eri Kristiandom kin kasapwungehla oh doadoahngki sapwung kosonned en Krais duwehte dahme mehn Suhs akan kin wiahiong Kosonned en Moseso. Iaduwen arail kin wia met? Keiou, kitail en kosoiapene kosonned wet​—⁠dahkot met, ihs me e kin kaweid oh iaduwen, oh dahme e wekihsang Kosonned en Moses. Eri kitail pahn kasawih iaduwen Kristiandom kin doadoahngki sapwung kosonned wet. Eri kitail ahpw pahn sukuhlkisang poadoapoad oh paikihda met!

Kosonned Kapwo

3. Inou dah Siohwa wiahda me pid inou kapw ehu?

³ Ihs ahpw Siohwa Koht kelepw me kak kamwahuwiahla Kosonned kapwo? Inoun Kosonned en Moseso me unsek. (Melkahka 19:⁠7) Mendahki met, Siohwa ketin inoukihda: “Ahnsou ehu pahn kohdo me I pahn wiahda inou kapw ehu ohng mehn Israel oh Suda. E sohte pahn duwehte inou en mahso me I wiahiongehr ar pahpa kahlap ako.” Kosonned Eisekko​—⁠me wia poahson en Kosonned en Moses​—⁠intingdi pohn takai. Ahpw kosonned kapwo, Siohwa mahsanih: “I pahn kihdi ei kosonned nan kapehdirail kan oh ntingihediong nan mongiongirail kan.”​—⁠Seremaia 31:​31-34.

4. (a) Israel dahieu me pidada inou kapwo? (b) Ihs irail kan likin Israel en ngehn me pil mih pahn kosonned en Krais?

⁴ Ihs me pahn iang inou kapw wet? Ni mehlel kaiden “imwen Israel” en uduk, me soikala Sounkamwahupen inou kapw wet. (Ipru 9:15) Soh, “Israel” kapw wet iei “Israel en Koht,” wehin Israel ni pali ngehn. (Kalesia 6:16; Rom 2:​28, 29) Pwihn en Kristian keiekihdi-ngehn tikitik wet pahn mwuhr iangala “pokon kalaimwun ehu” sang nan wei kan koaros me pahn pil rapahki en kaudekiohng Siohwa. (Kaudial 7:​9, 10; Sekaraia 8:23) Nin doken pwihn wet sohte iang kisehn inou kapwo, irail pil mih pahn kosonnedo. (Kaparekiong Lipai 24:22; Nempe 15:15.) Nin duwen “pwihn ehu” pahn “silepetemen,” koaros “mih pahn kosonned en Krais,” duwen me wahnpoaron Pohl intingihdi. (Sohn 10:16; 1 Korint 9:21) Pohl kahdaneki inou kapw wet “inou ehu me mwahusang.” Dahme karehda? Pwehki ehu, inou wet kin poahsonda pohn inou kan me pweida ahpw kaiden e poahsonda pohn mwetehn mehkan me pahn kohdo.​—⁠Ipru 8:6; 9:​11-14.

5. Ia karepen inou kapwo, oh dahme karehda e pahn pweida mwahu?

⁵ Ia karepen inou wet? Iei me e pahn kapwarehda wehin nanmwarki oh samworou ehu me pahn kapaiada tohnsampah koaros. (Eksodus 19:6; 1 Piter 2:⁠9; Kaudial 5:10) Inoun Kosonned en Moseso sohte kak kapwarehda wei wet ni irair unsek, pwehki Israel nin duwen wei ehu kin kangohdi oh katiasang arail ahnsou mwahu wet. (Kaparekiong Rom 11:​17-21.) Ahpw, inou kapw wet, uhdahn pahn pweida, pwehki e kin pidada soangen kosonned ehu me tohror. Tohror ni ahl dah?

Kosonnedo me Saledek

6, 7. Ia duwen kosonned en Krais kin kihda saledek laudsang Kosonned en Moseso?

⁶ Kosonned en Kraiso kin ahnsou koaros pidada saledek. (Sohn 8:​31, 32) E kin adaneki “kosonned en aramas saledek” oh “kosonned unseko me kin kasaledekla emen.” (Seims 1:25; 2:12) Ni mehlel, saledek koaros me aramas ahneki sohte unsek. Ahpw, kosonned wet kin kihda saledek me unsek sang Kosonned en Moseso. Iaduwen?

⁷ Keiou, sohte me ipwidi pahn kosonned en Krais. Soangen ire pwukat duwehte keinek oh wasa emen ipwidi ie sohte katepe. Kristian mehlel kan kin saledekiong pilada nan mongiongarail peikiong kosonned wet. Ni arail wia met, re diarada me mehn wisik wet me kadek, oh marahra. (Madiu 11:​28-30) Pil ehu, Kosonned en Moseso pil wiawihda pwehn padahkiong aramas me e dipan oh anahne ehu meirong tomw pwehn pwainsapahlih. (Kalesia 3:19) Kosonned en Kraiso padahngki me Masaia kohdoiehr, oh e pwiandkidahr tomwo mourih, oh ritingadahng kitail ahl en saledeksang dihp oh mehla! (Rom 5:​20, 21) Pwehn paikihda met, kitail anahne ‘kasalehda pwoson’ meirongo.​—⁠Sohn 3:⁠16.

8. Dahme kosonned en Krais kin oarepene, ahpw dahme karehda momourki sohte kin wehwehki me emen en wadlikihla kosonned pwukat?

⁸ “Kasalehda pwoson” kin pidada momourki kosonned en Krais. Met kin iangaki peikiong kehkehlik kan koaros en Krais. Met kin wehwehki wadlikihla kosonned epwiki kan? Soh. Nin doken Moses, sounkamwahupen inou meringo, kin intingihdi Kosonned en Moseso, Sises, Sounkamwahupen inou kapwo, sohte intingihdi kosonned ehu. Ahpw, e kin mourki kosonned wet. Sang ah elen mour unsek, e pwilikihdi mehn kalimeng ong koaros en idawen. (1 Piter 2:21) Ele ih met me karehda kaudek en Kristian kan en mahs kin adaneki “Ahlo.” (Wiewia 9:2; 19:​9, 23; 22:4; 24:22) Ong irail, kosonned en krais kin sansalda nan mour en Krais. Pwehn kalimengih Krais iei en peikiong kosonned wet. Arail limpoak laud ong ih kin wehwehki me kosonnedo ni mehlel kin intingdi nan mongiongarail, duwen me kokohpo mahsanih. (Seremaia 31:33; 1 Piter 4:⁠8) Oh emen me kin peik pwehki limpoak sohte kin pehm me e mih pahn lokolok​—⁠oh met iei ehu karepe kosonned en Kraiso kin adaneki “kosonned en aramas saledek.”

9. Ia mouren kosonned en Krais, oh ni ahl dah me kosonned wet kin pidada kehkehlik kapw ehu?

⁹ Ma limpoak me kesemwpwal nan Kosonned en Moseso, eri ih me kin wia mouren kosonned en Kristian. Eri kosonned en Krais kin oarepene kehkehlik kapw ehu​—⁠me Kristian kan en ahneki limpoak en tohnmetei ong emen emen. Re en limpoak duwehte me Sises kin wia; e men tohnmeteikihla moure pwehki rie kan. (Sohn 13:​34, 35; 15:13) Eri kitail kak inda me kosonned en Krais kin wia kasalepen manaman ehu sang powe me ileile sang Kosonned en Moses. Duwen me makasihn wet kasalehda mwowe: “ Kaunda sang powe kin kohsang rehn Koht; Koht iei limpoak; ihme karehda manaman sang powe kin kaunkihda limpoak.”

Sises oh Parisi kan

10. Iaduwen padahk kan en Sises kin weksang padahk kan en Parisi kan?

¹⁰ Eri, e sohte kapwuriamwei, me Sises kin uhwong kaun en lamalam en mehn Suhs kan en ah mweio. Sounkawehwehn kosonned ko oh Parisi kan sohte kin medemedewe “kosonned unseko me kin kasaledekla emen.” Re kin sosohng en kaunkihda aramas kan kosonned kan me re wiahda. Arail padahk kan eri kin kaloke, kadeik, oh me kansensuwed. Me weksang met, ahn Sises padahk kan me kin kakehle emen oh kaperen! Ah padahk kan kin mie katepe oh e kin tehk anahn oh pwunod mehlel en aramas kan. Ah padahk kan me mengei oh e kin kasalehda pepehm mehlel ong aramas kan, oh e kin doadoahngki karasaras kan sang mour en ehu ehu rahn oh e kin doadoahngki manaman en Mahsan en Koht. Ihme karehda, “pokono ahpw pwuriamweikihla kowahlap duwen mwomwen eh kin ketikihwei sapwelime padahk.” (Madiu 7:28) Ehi, padahk en Sises kin lel mongiongarail!

11. Iaduwen Sises kasalehda me Kosonned en Moseso kak kadoadoahk ni materek oh mahk?

¹¹ Sises sohte kin kapataiong pil ekei kosonned kan ong Kosonned en Moseso, ahpw e kasalehda iaduwen mehn Suhs kan en kin kapwaiada Kosonnedo sangete mahs​—⁠ki lamalam materek oh mahk. Tamanda, karaspe ehu, ahnsou me lih emen me soumwahuki soumwahu en inta pwilipwil pwarek Sises. Nin duwen Kosonned en Moses, aramas koaros me liho doahke pahn saminla, eri e sohte pahn mihseli nanpwungen pokon en aramas kan! (Lipai 15:​25-27) Ahpw liho inenin men mwahula sang ah soumwahuwo ihme karehda e pidelong nan pokon en aramas ko oh doahke en Sises likouwo. Ah ahnsouohte pwilipwil en inta reh ahpw madada. Sises lipwoare liho pwehki e kawehla kosonnedo? Soh; ahpw e wehwehki en liho irair apwal oh e kasalehda padahk keiou en Kosonnedo​—⁠limpoak. Ni eimah e padahkiong liho: “Nei serepein, omw pwoson me kakehlaiukada. Eri, kohkohwei ni popohl, pwe ke kehlaildahsangehr omw soumwahwen.”​—⁠Mark 5:​25-34.

Kosonned en Kraiso kin Mweidala Soang Koaros?

¹² Eri, kitail en inda me pwehki kosonned en Krais “me saledek,” e kin mweidala soang koaros, ah mehn Parisi kan, ki arail padok kan, kin kak koledi wiewiahn aramas pwe ren tiak mwahu? Soh. Kosonned kan rahnwet karasahda me ma kosonned tohto kin wiawihda, aramas pahn pil rapahki wiepen ren pitsang kosonned pwukat.a Ni mwein Sises tohtolahn kosonned en Parisi kan kin karehong aramas kan en rapahki elen pitsang met, kapwaiadahte kosonned pwukat ni soh limpoak, oh kekeirada liksansal en mwomwen pwung pwehn ekihla arail suwed en loale.​—⁠Madiu 23:​23, 24.

13. Dahme karehda kosonned en Krais kin imwikihla tiak me ileilesang kosonned intingo?

¹³ Me weksang met, kosonned en Krais, sohte kin kapwarehda soangen lamalam wet. Ni mehlel, peikiong kosonned ehu me poahsonda pohn limpoak ong Siohwa oh kasalehda peik ni arail alasang en Krais limpoak en tohnmeteiki meteikan kin imwikihla koasoandi en tiak ehu me ileile sang ideidawen koasoandi en kosonned ehu. Limpoak sohte kin rapahki en pitsang kosonned kan; e kin kolkitaildihsang wiahda me sapwung kan me kosonnedo sohte oaretiki me kitail en liksang. (Kilang Madiu 5:​27, 28.) Ihme karehda, kosonned en Kraiso pahn kamwekid kitail en wia mehkan ong meteikan​—⁠en kasalehda kadek, kasamwo meteikan, oh limpoak​—⁠ni ahl kan me kosonned teikan sohte kak karehong kitail en wia.​—⁠Wiewia 20:35; 2 Korint 9:7; Ipru 13:⁠16.

14. Dahme momourki kosonned en Krais kin wiahiong mwomwohdisohn Kristian nan senturi keiou?

¹⁴ Ma towe kan kin mourki kosonned en Krais, eri mwomwohdisohn Kristian kan en mahs kin paikihda minimin limpoak ehu, me saledeksang lamalam lemeidihd, lamamlam en kadeik, oh mwalauhn me rek nan sinakoke en rahn oko. Tohn mwomwohdiso kapw pwukat ele pepehm me re momourki “kosonned en aramas saledek kei”!

15. Ia ekei en Sehdan nannati kan mahs en kasaminehla mwomwohdisohn Kristian?

¹⁵ Ahpw, Sehdan kin sosohng en kasaminehla nan mwomwohdisohn Kristian, duwehte ah kasaminehla wehin Israel. Wahnpoaron Pohl panawki duwen aramas kan me pahn mwomwen kidien wel me pahn “pitiheki me pwoson akan lokaia likamw” oh re pahn kaloke pelin sihpw kan en Koht. (Wiewia 20:​29, 30) Pohl kin uhwong pelien lamalam en Suhs, me kin sosohng en kawelialekihdi kosonned saledek en Krais liduhn Kosonned en Moses, me pweidaher rehn Krais. (Madiu 5:17; Wiewia 15:1; Rom 10:⁠4) Mwurin kaimwseklahn wahnpoaron kan mehla, sohte me kak irehdi soangen uhwong padahk mehlel wet. Eri saminlahn kaudek reklahr wasa koaros.​—⁠2 Deselonika 2:​6, 7.

Kristendom Kasaminehla Kosonned en Krais

16, 17. (a) Samin dahkei pwarada nan Kristiandom? (b) Iaduwen kosonned en Sarawi en Kadolik kin kawehla lamalam me pid wendipene?

¹⁶ Me duwehte pelien lamalam en Suhs, samin pil mihla ni mwohmw tohto nan Kristiandom. Pali wet pil mihla pahn padahk likamw kan oh tiak samin. Oh e nanti koaros en pere nah kan sang lamalam kan en liki kin pak tohto wia mehkot suwed ong kaudek mwakelekel. Kosonned kan me nohn lemeidihd oh sapwung ong Pwuhk Sarawi pil wie tohtola.

¹⁷ Sarawi en Kadolik me keiou ni ah wiahda kosonned tohtoie ni pali en sarawi. Kosonned pwukat me keiou sapwung ni ah kin pidada wendipene. Nin duwen pwuhko Sexuality and Catholicism, sarawi wet kin alehda padahk en Krihk en Stoicism, me kin sapwungki soangen insenamwahu koaros. Sarawi wet eri kin padahngki me insenamwahu en wendipene, me kin wiawi nan pwopwoud, me dipan. (Kaparekiong Lepin Padahk 5:​18, 19.) Dene wendipene kin wiawihongete wiada seri, sohte mehkot tohror. Ihme karehda kosonned en sarawio kin sapwungki doadoahngki mehn kauhdi neitik me dene dihp toutou ehu met, oh ekei pak kin anahne sounpar tohto me emen en koluhkila met. Pil ehu, samworou kan sohte kak pwopwoud, kosonned ehu me karehda kekeiradahn nenek, iangahki wiekau kisin seri kan.​—⁠1 Timoty 4:​1-3.

18. Dahme kin imwikihla tohtohlahn kosonned en pelien sarawi?

¹⁸ Nin doken kosonned en sarawio tohtohla, re intingdi nan pwuhk kan. Mepwukat eri tepiada kasohwe oh men siksang Paipel. (Pil kilang Madiu 15:​3, 9) Duwehte pelien lamalam en mehn Suhs, pelien lamalam en Kadolik sohte kin likih pwuhk en sampah kan oh kin inda me e wia keper ehu. Lamalam wet pil daulihla dahme Paipel kin kosoiaki ire wet. (Eklesiasdes 12:12; Kolose 2:⁠8) Jerome, emen souninting en sarawi nan senturi kapahieu C.E., kosoia: “Maing Kaun, ma I pahn naineki de wadek pwuhk en sampah, I kahmamkinuhkala.” Kedekedeo, sarawio eri kin kasawih pwuhk kan​—⁠pil iangahki pwuhk kan me sohte kin kosoia mehkan me pid sarawi. Ihme karehda sarawio pil tehkada en emen sounonopki nan wehwe me adaneki Galileo ah intingihdi me sampah kin pidakih ketipino. En sarawio kin ngidingidki en ahneki manaman pohn mehkoaros​—⁠pil iangahki pelien sains me pid nan wehwe​—⁠kin kihsang en aramas pwoson Paipel ahnsou reirei.

19. Iaduwen wasa kan me padire kan kin mihe kin wiahda soangen kaunda lemei kan?

¹⁹ En sarawio kin wiahda-kosonned kan kin rekla nan wasa kan me padire kan kin mihe, wasa kan me re kin katohreirailla sang koasoandi en sampah pwehn mouren semwehmwe. Soangen wasa pwukat en Kadolik tohto kin peikiong “Kosonned en Ohl Sarawi Benedict.” Eden kaun en padire pwukat (abbot) (lepin lokaia me kohsang lokaiahn Aramaic me kin wehwehki “sahm”) kin kaunki manaman unsek. (Pil kilang Madiu 23:⁠9.) Ma padire men pahn ale kisakis ehu sang rehn ah pahpah oh nohno, kaun en irail pwukat pahn koasoanehdi ma padireo de emen padire tohror pahn alehdi kisakiso. Liki ah kin kadeik mehkan me suwed, ehu kosonned me kin irehdi koskosoipene oh kamwan kan, kosoia: “ Tohnpadahk kan endehr wia soangen kosoi pwukat.”

20. Dahme kasalehda me pelien Prohs kin pil alehda soangen manaman kan me sohte kohsang Pwuhk Sarawi?

²⁰ Pelien lamalam en Prohs, me sosohng en kawekila padahk sapwung kan en pelien Kadolik, pil mwuhr duwehla ni ah kin wiahda kosonned lemei kan me sohte kin poahsonda pohn kosonned en Krais. Karaspe ehu, John Calvin me wia emen kaun en mwekid wet eri adanekihla “sounkou kosonned en Sarawi kapw.” E kaunkihda Geneva kosonned tohtoie me kohsang “Elder kan” me ahneki “ohpis,” Calvin kosoia, “en tetehk mour en aramas koaros.” (Pil kilang 2 Korint 1:24.) Pelien lamalamo kin kaunda imwen mwenge kan oh koasoanehdi dahnge me aramas pahn kosoia. Mie kalokolok me kin kohwong soangen sapwung kan duwehte koul oh kalek en sampah.b

Mehn Kasukuhl Duwen Sapwung en Kristendom

21. Ia lipwen ahn Kristiandom kin ‘daulihla mehkan me intingdiehr’?

²¹ Kosonned pwukat oh kehkehlik pwukat kin pere Kristiandom sang saminlahn kaudek? Soh weksang met! Rahnwet Kristiandom pwalpeseng wiahda pwin en sarawi epwikih kei, ekei me nohn lemeidihd ah ekei kin mweidala soangen wiewia koaros. Irail koaros, ni ahl koaros, ‘daulihla dahme intingdiehr,’ ni arail mweidong lamalam en aramas en kaweid aramas kan oh liderehda kosonned sang powe.​—⁠1 Korint 4:⁠6.

22. Dahme karehda ohlahn Kristiandom sohte kin wehwehki me met iei kaimwseklahn kosonned en Krais?

²² Ahpw, poadoapoad en kosonned en Krais sohte wia mehkot me imwila suwed. Siohwa Koht sohte pahn mweidong aramas en katokehdi kosonned sang powe. Kosonned en Kristian kin wie manamante rahnwet nanpwungen Kristian mehlel kan, oh irail pwukat kin ahneki kapai en momourki kosonned pwukat. Ahpw mwurin atail tehkpene dahme pelien lamalam en Suhs oh Kristiandom wiahiong kosonned sang powe, kitail kak medemedewe, ‘Iaduwen atail kak mourki kosonned en Krais oh ni ahnsouwohte liksang lidip en kasaminehkihla Mahsan en Koht lamalam oh kosonned en aramas me kin kasokehla ngehnin kosonned sang powe? Lamalam touparek dah kosonned en Krais en kamwekidki loalatail rahnwet?’ Artikel en mwuri pahn sapeng peidek pwukat.

Momourki Kosonned En Krais

“Kumwail sawaskipene amwail wisik toutou kan, pwe ih duwen amwail pahn kapwaiada kosonned en Krais.”​—⁠KALESIA 6:⁠2.

1. Dahme karehda kitail kak indahki me kosonned en Krais kin wia kehl mwahu ehu rahnwet?

NAN Rwanda, Sounkadehdehn Siohwa kan en Hutu oh Tutsi kin kihong arail mour nan keper pwehn pere emen emen sang kamakamlahn keinek kan me apwtehn wiawi nan sahpwo. Sounkadehdehn Siohwa kan nan Kobe, Sapahn, me tohn arail peineinei kan mehla nan ehu rerrer en sahpw kin insensuwedkihla irail pwukat me mehla. Ahpw mendahki met, re kin mwekidki en sewese irail kan me mihla nan apwal. Ehi, mie mehn karasaras kaselel tohto sang nan sampah me kin kasalehda me kosonned en Krais kin kadoadoahk rahnwet. E kin wia kehl ehu ong mehkot me mwahu.

2. Iaduwen Kristiandom katiasang mouren kosonned en Krais, oh iaduwen atail en kapwaiada kosonnedo?

² Ni ahnsouwohte, kokohp en Paipel ehu duwen “imwin rahn” apwal pwukat pweidaiehr. Me tohto “kin likisansalamwahuki pelien lamalam” ahpw ‘re kin soikewei sang rehr manamano.’ (2 Timoty 3:​1, 5) Keiou nan Kristiandom, pelien lamalam kin ihte wia mwohmw ehu, kaiden sang nan mongiong. Met pwehki e apwal en mourki kosonned en Krais? Soh. Sises sohte pahn kiohng kitail kosonned ehu me kitail sohte pahn kak idawen. Kristiandom katiasang mouren kosonnedo. E sohte kapwaiada mahsan sarawi pwukat: “Kumwail sawaskipene amwail wisik toutou kan, pwe ih duwen amwail pahn kapwaiada kosonned en Krais.” (Kalesia 6:⁠2) Kitail kin “kapwaiada kosonned en Krais” ni atail kin wahda en emen emen wisik toutou, kaiden ni atail kalimengih Parisi kan oh katoutouwihala wisik toutou kan en riatail kan.

3. (a) Ia ekei kehkehlik me mih nan kosonned en Krais? (b) Dahme karehda e pahn sapwung en inda me mwomwohdisohn Kristian sohte ahneki kosonned kan ihte ma e kohsang rehn Krais?

³ Kosonned en Krais kin oarepene kehkehlik kan koaros en Krais Sises​—⁠mendahki ma e pid duwen kalohk oh padahk, de en mour mwakelekel oh itarki mehkan me kitail ahnekiehr, de en kolokol meleilei rehn mehnimpetail, de piskensang nan mwomwohdiso emen me sohte men koluhla. (Madiu 5:​27-30; 18:​15-17; 28:​19, 20; Kaudial 2:​14-16) Mehlel, Kristian kan pwukoahki en kapwaiada kehkehlik kan koaros nan Paipel me kohwong werek kan en Krais. Oh mie me tohto sang met. Pwihn en Siohwa, iangahki ehu ehu mwomwohdiso, anahne koasoanehdi kosonned kan me konehng oh wiepe kan pwehn kak kolokol soanamwahu. (1 Korint 14:​33,40) Kristian kan sohte pahn kak tuhpene ma sohte kosonned duwen ia ahnsoun mihding, iawasahn mihding, oh iaduwen re pahn wia mihding pwukat! (Ipru 10:​24, 25) Peikiong kaweid kan me kohsang rehn irail kan me ahneki manaman nan pwihn kin pil wia kisehn kapwaiada kosonned en Krais.​—⁠Ipru 13:⁠17.

4. Dahme kin kamwekid kaudek mwakelekel?

⁴ Mendahki met, Kristian mehlel kan sohte kin mweidong arail kaudek en wiahla koasoandi en kosonned kei me soh katepe. Arail papah Siohwa sohte kin wiawi pwehki aramas men de pwihn ehu me indaiong irail en wia met. Ahpw, me kin kamwekid arail wia kaudek iei limpoak. Pohl intingihdi: “Pwe limpoak en Krais me kamwakamwakid kiht.” (2 Korint 5:​14, footnote) Sises panawihki nah werek kan en limpoakpene. (Sohn 15:​12, 13) Limpoak en tohnmetei iei poahsonen kosonned en Krais, oh e kin kamwekid Kristian mehlel kan wasakoaros, nan peneinei oh nan mwomwohdiso. Kitail kilang iaduwen.

Nan Peneinei

5. (a) Iaduwen pahpa-nohno kan kak kapwaiada kosonned en Krais nan arail peneinei? (b) Dahme seri kan anahne sang arail pahpa-nohno kan, oh mehn keremwpwe dahkei ekei pahpa-nohno anahne powehdi pwehn kihda anahn wet?

⁵ Wahnpoaron Pohl intingihdi: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Epsos 5:25) Ni ahnsou me ohl pwopwoud men alasang Krais oh kasalehong ah pwoud lih limpoak oh wehwe, e kin kapwaiada pali kesemwpwal ehu en kosonned en Krais. Pil ehu, Sises kin kasale ah poakohng kisin seri kan, ni ah kin pwoaleiraildi, pwilikihdiohng pohrail peh kan, oh kapaiirailda. (Mark 10:16) Pahpa-nohno kan me kin kapwaiada kosonned en Krais kin pil kasalehda arail poakohng nerail seri kan. Mehlel, mie pahpa-nohno kan me kin apwalki alasang kalimeng en Sises nan ire wet. Ekei kin apwalki kasalehda arail pepehm. Kumwail pahpa-nohno kan, dehr mweidong soangen lamalam wet en ireuhkidisang kasalehong nomwail seri kan amwail limpoak ong irail! E sohte itar ong uhk en ese me ke poakohng nomw seri kan. Irail pil anahne ese duwen met. Oh irail sohte pahn ese lau ma ke rapahkida elen kasalehda amw limpoak ong irail.​—⁠Kaparekiong Mark 1:⁠11.

6. (a) Seri kan anahne kosonned en pahpa-nohno, oh dahme karehda ke sapengki met? (b) Karepe dahiehu seri kan anahne wehwehkihla me pid kosonned en peneinei? (c) Keper dahkei kak irairdi ma kosonned en Krais kin kadoadoahk nan peneinei?

⁶ Ni ahnsouohte, seri kan anahne irepen arail wiewia kan, me wehwehki me arail pahpa-nohno kan anahne koasoanedi kosonned kan oh ekei pak wiahda kosonned pwukat ni arail pahn kihda kaian. (Ipru 12:​9, 11) Mendahki met, seri kan anahne ekis ekis ale sawas en wehwehkihla karepen kosonned pwukat: iei me arail pahpa-nohno poakohng irail. Oh irail anahne wehwehkihla me limpoak ih karepe keiou mwahu ong irail en peikiong arail pahpa-nohno. (Epsos 6:1; Kolose 3:20; 1 Sohn 5:⁠3) Pahpa de nohno wehwe men pahn akedeiong padahkiong neirail me pwulopwul kan en doadoahngki arail “loaloakong” pwe ren kedekedeo kak pein wiahda arail koasoandi kan me pahn mwahu. (Rom 12:1; kaparekiong 1 Korint 13:11.) Ong pali teio, kosonned kan endehr nohn tohto de kaian kan dehr nohn lemei. Pohl kosoia: “Kumwail pahpa oh nohno kan, kumwail dehr kamwakara mwahl noumwail seri kan, pwe re dehr mworusala.” (Kolose 3:21; Epsos 6:⁠4) Ni ahnsou me kosonned en Krais kin mih nan peneinei ehu, sohte pahn mie anahnepen kaian me kin kohda ni mwakar de lokaia me kin kamedekihla emen. Nan soangen peneinei wet, seri kan pahn kin ahneki pepehm en meleilei oh kangoang, kaiden toutoula de mworusala.​—⁠Kaparekiong Melkahka 36:⁠7.

7. Ni ahl dahkei peneinei en Pedel kin wia mehn kalimeng me pid koasoanehdi kosonned kan nan ihmw?

⁷ Ekei me kin pwarek peneinei en Pedel kan nan sampah pwon kin kosoia me soangen peneinei wet kin wia mehn kalimeng mwahu en touparek me pid kosonned kan ong peneinei. Mendahki soangen peneinei wet kin audaudkihte aramas laud, pwihn wet kin mwekid duwehte peneinei ehu.a Doadoahk en Pedel me oaretik oh kin anahne kosonned tohto​—⁠tohtohsang kosonned en peneinei. Mendahki met, elder kan me kin tiengla mwowe nan doadoahk en imwen Pedel kan, ohpis kan, oh nan wasahn wiahda soang kan nan Pedel kin nantiong kapwaiada kosonned en Krais. Re kin kilangwong met me iei arail pwukoah kaiden en ihte koasoanehdi doadoahko ahpw en pil utungada kekeiradahn palingehn oh “peren en Siohwa” nanpwungen iengerail tohndoadoahk kan. (Nemwaia 8:10) Ihme karehda, re kin nantiong wia soang kan ni ahl en lamalam pwung oh elen kangoang oh ni materek. (Epsos 4:​31, 32) Ihme e sohte kapwuriamwei me peneinei en Pedel kin indandki arail ngehnin peren!

Nan Mwomwohdiso

8. (a) Ia pahn atail mehn akedei ahnsou koaros nan mwomwohdiso? (b) Pahn soangen irair dahkei ekei kin wia peidek ki de song en wiahkihda kosonned?

⁸ Me pil duwehte nan mwomwohdiso atail mehn akedei iei en kakehle emen emen ni ngehnin limpoak. (1 Deselonika 5:11) Eri Kristian koaros anahne kanaiong pwe ren dehr katoutouwihala katoutou en meteikan ni arail pahn pein idingkiong meteikan pein arail lamalam nan ire kan me emen pahn pein koasoanehdi. Ekei pak, ekei kin intinglahng Watch Tower Society oh kin idek kosonned kan ong ire kan me pid ia pahn arail lamalam ong soangen kasdo ehu, soangen pwuhk kan, oh pil iangahki kepwehn mwadong kan. Ahpw, Society sohte ahneki manaman en kasawih soang pwukat oh wiahda kadeikpen mepwukat. Nan irair tohto, ire pwukat iei me emen emen aramas de tapwin peneinei kan anahne pein koasoanehdi, me pahn poahsonda pohn ah limpoak ong mouren kosonned en Paipel. Mehteikan kin wiahkihla iren sawas kan oh kaweid en Society kosonned kan. Karaspe ehu, nan The Watchtower, en March 15, 1996, mie artikel ehu loale me kin kangoangekin elder kan en kaukaule pwarek oh kakehle tohnmwomwohdiso kan. Karepen met pwehn wiahda kosnned kan? Soh. Mendahki irail ko me kakong kapwaiada met diarada kapai tohto sang met, ekei elder sohte kak wia met. Me parekiong met, artikelo “Peidek Kan Sang Sounwadawad Kan” nan The Watchtower en April 1, 1996, kin kaweidki duwen endehr kihsang wahu en ahnsoun papdais ni arail pahn wia soang kan daulihla, duwehte wiahda kamadipw katairong kan de mwomwehda karis en kana kan. Ekei kin daulihla ni arail kin kapwaiada kaweid pwukat, oh kin wiahkihda kosonned ehu sang met me dene e sapwung en kadarwong emen me papdaisla kisin likoun kangoang!

9. Dahme karehda e kesemwpwalki me kitail en liksang kauwe oh kadeik emen emen?

⁹ Pil tehk duwen met, ma “kosonned unseko me kin kasaledekla aramas” kin mih nanpwungatail, kitail pahn pwungki me kaidehn insenmwakelekel en Kristian koaros kin duwehpenehte. (Seims 1:25) Kitail pahn wiahkihda mehkot ma aramas kan ahneki pilipil kan me wekpeseng me sohte kin uhwong kosonned en Pwuhk Sarawi? Soh. Met pahn karehda saminimin. (1 Korint 1:10) Pohl, ni ah panauwihkin kitail endehr kadeik iengetail Kristian kan, mahsanih: “En liduwohte eh soumaste ma pahn kupwukupwure ma e pahn pweida de soh. Eri, e pahn pweida, pwehki Kaun-o (Siohwa) me ketin manaman en sewesehda pwe en pweida.” (Rom 14:⁠4) Kitail pahn lelohng nan keper en kansensuwedih Koht ma kitail kin kauwehki emen emen soang kan me pein emen pahn pilida.​—⁠Seims 4:​10-12.

10. Ihs me pwukoahki en apwalih mwomwohdiso, oh iaduwen atail pahn utung irail?

¹⁰ Kitail en pil tamataman me elder kan pwukoahki en apwalih pwihn en Koht. (Wiewia 20:28) Irail kin mih wasako pwehn kihda sawas. Kitail en saledekiong pwarewohng irail pwe ren sewese kitail, pwe irail tohnsukuhl en Paipel kei oh irail kin wehwehki dahme kin pwarada nan pwuhk kan en Watch Tower Society. Ni ahnsou me elder kan kin kilang me wiewia ehu pahn kak imwikihla kawehla kosonned en Paipel, re kin eimah kihda sawas me anahn. (Kalesia 6:⁠1) Tohn mwomwohdiso kan kin idawen kosonned en Krais ni arail kin peikiong silepe pwukat, me kin tiengla mwowe nanpwungarail.​—⁠Ipru 13:⁠7.

Elder kan Kapwaiada Kosonned en Krais

11. Iaduwen elder kan kin kapwaiada kosonned en Krais nan mwomwohdiso?

¹¹ Elder kan kin ngoangki kapwaiada kosonned en Krais nan mwomwohdiso. Re kin tiengla mwowe nan kalohk en rongamwahuwo, re kin padahk sang nan Paipel pwehn kak lel mongiong oh, nin duwen sounapwalih limpoak, oh kadek, re kin kosoiong me “insensuwedla kan.” (1 Deselonika 5:14) Re kin liksang lamalam soh konehng kan me rekla nan pelien lamalam tohto en Kristiandom. Mehlel, sampah wet wie susuwedla mwadang, oh duwehte Pohl, elder kan kin insenohki pwihn en mwomwohdiso; ahpw re kin kolokol touparek ni arail kin mwekidki apwalihala soangen ire pwukat.​—⁠2 Korint 11:⁠28.

12. Ni ahnsou me emen Kristian pwarek elder men pwehn ale sawas, iaduwen eldero pahn mwekidki met?

¹² Karaspe ehu, ele Kristian men pahn men tuhkiong elder men ire kesemwpwal ehu me sohte uhdahn pwarada nan Paipel de ire ehu me kin pid kadoadoahkpen soangen mouren iren Paipel wekpeseng kan. Ele e keseudahng pwukoah laud ehu nan ah wasahn doadoahk me pweine pil laudla ahpw pil karehda pwukoah tohto. De en emen Kristian pwulopwul ah pahpa me so pwoson ele pahn wiahda soangen irair kan me pahn kauwe en me pwulupwulo doadoahk en kalohk. Nan soangen irair wet eldero en dehr kihda pein ah madamadau. Ahpw, e pahn pahkpeseng Paipel oh sewese aramaso en doadoahngki mouren kosonned en Paipel konehng kan. E pahn doadoahngki Watch Tower Publications Index, ma mie, pwehn rapahkihda dahme “ladu lelepek oh loalaokong” kin kosoiaki ireo nan The Watchtower oh pwuhk teikan. (Madiu 24:45) Ahpw iaduwen ma Kristiano pahn wiahda koasoandi ehu me eldero sohte leme me pwung? Ma koasoandio sohte uhwong mouren kosonned en Paipel de uhwong kosonned en Paipel, Kristiano pahn diarada me elder kin pohnese en emen pwung en wiahda soangen koasoandi wet, oh e ese me “emen emen pahn pein wa eh wisik.” Ahpw, Kristiano anahne tamataman me, “ dahme emen kin padokedi, ihme e pahn dolung.”​—⁠Kalesia 6:​5, 7.

13. Ia karepen elder kan kin sewese meteikan en doadoahngki arail koahiok en Paipel ong ire ehu, ni arail sohte kin inente kihda pasepeng kan ong peidek kan de pein kihda arail madamadau ong ire wet?

¹³ Dahme karehda elder mah menet wiahki soangen mwekid wet? Met pwehki ong karepe riau. Keiou, Pohl padahkiong ehu mwomwohdiso me e sohte kin wia ‘kaun en arail pwoson.’ (2 Korint 1:24) Eldero, ni ah kin sewese rie brothero en doadoahngki ire Pwuhk Sarawi kan oh wiahda ah koasoandi sang ire pwukat, kin alasang lamalam en Pohl. E pohnese me mie ididi en ah manaman, duwehte Sises me kin pil pohnese me mie ididi en ah manaman. (Luk 12:​13, 14; Sud 9) Ni ahnsouohte, elder kan kin kihda kaweid en Paipel, me kin sawas, oh pil kehlail, ahnsou kan me anahn. Keriou, e kin kaikaian ienge Kristian kan. Wahnpoaron Pohl kosoia: “Kisin tungoal kekeluwak, iei ih me aramas koahieklahr kan kin tungoale, irail kan me ahnlahr oh eselahr wekpeseng en me mwahu oh me suwed.” (Ipru 5:14) Ihme karehda, pwehn kekeirada oh mahla, kitail anahne doadoahngki atail koahiek, kaiden en koapworopworki me emen tohror pahn kihong kitail pasepeng ahnsou koaros. Ni ahl wet, eldero, ni ah kin kasalehong ienge Kristiano iaduwen ah pahn doadoahngki iren Pwuhk Sarawi kan, kin sewese pwehn kekeirada.

14. Iaduwen me mah kan kak kasalehda me re kin likih Siohwa?

¹⁴ Kitail kak pwoson me Siohwa Koht ki sapwelime ngehn sarawi pahn kamwekid mongiong en tohn kaudek mehlel kan. Ihme karehda, Kristian mah kan kin song en lel mongiong en riarail kan, ni arail kin wia pekipek ngidingid rehrail, duwehte me wahnpoaron Pohl kin wia. (2 Korint 8:8; 10:1; Pailimwon 8, 9) Pohl wehwehki me aramas sapwung kan, kaiden me pwung kan, me anahne kosonned oaretik kan pwehn irehdi arail wiewia suwed kan. (1 Timoty 1:⁠9) Pohl sohte kin lemelemehngki rie kan, de kasalehda ah soh likih irail, ahpw e kin likih rie brother kan. Ong ehu mwomwohdiso e intingihdi: “Eri, Kaun-o (Siohwa) kin kupwurehda pwe se en koapworopworkin kumwail.” (2 Deselonika 3:⁠4) En Pohl pwoson, likilik, oh koapworopwor kin uhdahn kamwekid Kristian ko. Elder kan oh soundoulik kan nan rahnwet kin pil ahneki soangen lamalam ohte. Ia uwen mwahu en ohl lelepek pwukat, ni arail kin ni limpoak apwalih pwihn en Koht!​—⁠Aiseia 32:​1, 2; 1 Piter 5:​1-3.

Momourki Kosonned en Krais

15. Ia ekei peidek kan kitail kak pein kalelepek rehtail pwehn kilang ma kitail kin kapwaiada kosonned en Krais nan atail kin ehuwiong riatail Kristian kan?

¹⁵ Kitail koaros anahne kaukaule pein tehk rehtail ma kitail kin momourki oh kekeirada kosonned en Krais. (2 Korint 13:⁠5) Mehlel, kitail koaros kak paikihda ma kitail pahn kalelepek: ‘I kin kakehle meteikan de I kin kauwe irail? I me touparek de I nohn kin daulihla? I kin kasalehda insenohki meteikan de I kin ngidingidkihte pein ahi pwung?’ Kristain men en dehr kin idingkiohng rie Kristian teikan dahnge re pahn wia de dahnge re sohte pahn wia nan ire kan me sohte kin uhwong Paipel.​—⁠Rom 12:1; 1 Korint 4:⁠6.

16. Iaduwen atail kak sewese irail ko me kin lemeleme me pein irail me suwed, oh kitail eri kin kapwaiada ire kesemwpwal ehu en kosonned en Krais?

¹⁶ Nan ahnsou apwal pwukat, e kesemwpwal ong kitail en rapahki ahl akan en kangoange emen emen. (Ipru 10:​24, 25; kaparekiong Madiu 7:​1-5.) Ni atail kin kilang riatail brohter oh sister kan, arail irair mwahu kan soh kin kesemwpwal ong kitail sang arail luwet kan? Ong Siohwa, emen emen aramas me kesemwpwal. E inenin kansensuwed, pwe kaiden koaros kin ahneki soangen lamalam wet, re pil kin sohte leme me pein irail me kesemwpwal. Me tohto kin kilangte pein arail luwet kan oh sohunsek kan. Pwehn kangoange soangen aramas pwukat​—⁠oh meteikan​—⁠kitail kak song kosoiong emen de meh riemen nan ehu ehu mihding, oh kehsekin irail karepen at kesemwpwalki arail kin iang towehda mihding oh sawas kan me re kin wiahda nan mwomwohdiso? Ia uwen e wia mehkot kaperen en kamarahrahla arail katoutou kan ni ahl wet oh sang met kapwaiada kosonned en Krais!​—⁠Kalesia 6:⁠2.

Kosonned en Krais kin Doadoahk!

17. Ni ahl wekpeseng dahkei ke kin kilang kosonned en Krais ah kin doadoahk nan ahmw mwomwohdiso?

¹⁷ Kosonned en Krais kin doadaohk nan mwomwohdisohn Kristian. Kitail kin kilang met rahn koaros​—⁠ni ahnsou me Sounkadehde kan kin ngoangki kalohki rongamwahu, ni ahnsou me re kin kamweit oh kangoange emen emen, ni ahnsou me re kin nantiong papah Siohwa mendahki kahpwal kan, ni ahnsou me pahpa-nohno kan kin songong en kekeirada nerail seri en poakohng Siohwa sang nan mongiongarail, oh ni ahnsou me sounapwalih kan kin padahki Mahsan en Koht ki limpoak oh inseno, pwehn kainengieng tohnmwomwohdiso en ahneki ngoang mwuledek ong papah Siohwa kohkohlahte. (Madiu 28:​19, 20; 1 Deselonika 5:​11, 14) Ni ahnsou me emen emen kitail kin kadoadoahkiong kosonned en Krais nan pein atail mour, met kin uhdahn kaperenda mongiong en Siohwa! (Lepin Padahk 23:15) E ketin kupwurki me irail kan koaros me kin poakohng sapwelime kosonned unsek kan en mour kohkohlahte. Nan Paradais me kohkohdo, kitail pahn kilang ahnsouwo me tohnsampah pahn unsekla, ahnsou ehu me pahn sohla irail sounkawehla kosonned kan oh ahnsou ehu me kitail pahn kak irehdi lamalam en mongiongatail kan koaros. Ia uwen met kin wia kating kaselel ehu pwehki atail kin momourki kosonned en Krais!