Pilahn Mwahu Ehu

MWAHNAKAPW silimen nan wehin Aperika men iang towehda kapokon laud me pahn wiawi nan sapwarail. Ia duwen re pahn kak lella wasao? Wasao dohki uwen mwail 60 sang arail wasahn kousoan. Ahlo sohte mwahu oh uhdahn pwelpar oh pil sohte wererail mehn peidaid. Irail eri medewehda en pekihda pwaiskel siluh pwe ren kak dake kohla ni kapokono, ahpw re sohte diarada ehu me pahn mwahu ong seiloako.

Elder men nan arail mwomwohdiso eri esehda duwen arail kahpwalo. Ih eri kihong irail were pwaiskel me meringlahro ahpw kakete tangatang, pwe ren doadoahngki. E kawehwehiong irail dahme ih oh ienge teikan kin wia mahs pwehn kak iang towehda kapokon laud kan. Eldero eri ndaiong irail en doadoahngkipene pwaiskelo. Dahme e ndaiong irail mwomwen mengei ahpw re anahne en doadoahkpene pwe met en kak pweida. Eri, ia duwen mwahnakapw silimeno kak dake pwaiskel ehute?

Pwe irail en dehr karakarala pahn ketipino, Kristian silimeno tuhpene ni sohrahn en rahno me re mwesel oh kihda arail kepwe ko pohn pwaiskelo. Emen rehrail eri tepida dake kohkohla. Meh riemen teiko ahpw kin alu seimek pwakih ih. Mwurin mwail 2 samwa, me dake pwaiskelo pahn uhdi oh kihdi pwaiskelo ni tepin tuhke pwoat, wasa me pahn kak sansal ong ienge ko ahpw aramas akan sohte pahn kak pirapala. Ih eri tepida sapal kohkohla nanialo.

Ni ahnsou me meh riemeno leledo ni pwaiskelo, emen rehra pahn dakehda pwaiskelo, ahpw mehteio pahn usehlahte alialu. E pahn sapal mwail riau samwa lao lel pwaiskelo, ih ahnsou me e pahn uhd dake. Pwehki re pilahnihada met mwahu oh pil ahneki eimah, mwahnakapw silimeno kamwotehla arail sapalo sang mwail 60 ong mwail 40 samwa. Eri, soahng koaros uhdahn pweida. Nan kapokono, irail tuhwong riarail Kristian teikan oh paiekihda arail karonge padahk mwahu tohto. (Deud. 31:12) Eri ia duwen nan pahret, ke pahn wia uwen omw kak pwehn iang towehda kapokon laud me pahn wiawi karanih omw wasahn kousoan?