Ke Kak Mehlel Nan Sampah Mwersuwed Ehu?
‘Se kin men wia dahme pwung ahnsou koaros.’—IPRU 13:18.
MENDAHKI kasongosong laud kin kohsang sampah wet, sang rehn Tepilo oh pil pwehki kitail dipan, kitail kak pelianda soahng pwukat. Ia duwen? Sang ni atail kin karanihala Koht oh sang atail doadoahngki sapwellime Mahsen, Paipel, me erein ahnsou reirei kin wia kamwahu ong kitail. Tehk mehn kahlemeng riau pwukat.
KAWEID EN PAIPEL: “Dehr kahlemengih wiewia kan en sampah wet.”—Rom 12:2.
Dahme uhdahn wiawi ong Guilherme: Guilherme wia soun pesines men nan Brazil me kin pweida mwahu. E kasalehda ni mehlel me e sohte mengei en kin mehlel nan doadoahk. E koasoia: “E kak mengei ong soun pesines men en tepida mwersuwed nan eh pesineso, ele pwehki e anahne karuwaru kapwaiada mehn akadei kan en eh pesineso de e kin men pweida nan wasa ehu me pali laud en aramas akan kin siaipene. Aramas tohto kin medewe me e sohte sapwung en natih oh pwain meteikan de ale pweipwei sang meteikan ni elen mwersuwed pwehn alehdi dahme re mwahuki. Ma kowe emen me ahpwtehn tapiada omw pesines oh kakete luhs sang mwohni laud, e kin uhdahn apwal en mehlel.”
Ahpw, Guilherme pweida ni eh pelianda kasongosong en dehr mwersuwed nan eh pesines. E koasoia: “Ke kak mehlel mendahki ke mi wasa ehu me me tohto kin pwungki de mweidohng soun pesines kan ren kauwehla ekei kosonned. Ke anahne uhdahn kolokol omw tiahk mwahu. Paipel kin sewese ien kilang kamwahu kan me kohsang ei kin mehlel. Emen me kin mehlel kin ahneki nsen mwakelekel, meleilei, oh pil wahu. E kak kamwakid meteikan ni ahl mwahu.”
KAWEID EN PAIPEL: “Irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto, me kin kauweirailla. Pwe limpoak ong mwohni, iei tepin soangen suwed koaros.”—1 Timoty 6:9, 10.
Dahme uhdahn wiawihong André: André ahneki pesines ehu me kin kihong dipwisou ehu nan ihmw kan me kin pere de irehsang lipirap akan. Ehu wasa me kin pwain eh sawas iei pwihn en mwadong ehu (soccer). Ehu pak, mwurin mwadong laud ehu wiawi, André kohla ni en pwihn wet arail ohpiso pwehn wahla doaropwehn pweinen eh sahpiso. Ohpis me kin pwukoahki palien mwohnio wie wadewadekte mwohni me re alehdi sang ohpis en ticket kan. Pwehki e daulihlahr kuloak en nek doadoahk, arail kauno mwadangete pwainla André oh pil ahn pesines teikan arail sahpis.
André koasoia: “Ni ei kohkohlahng imweio, I tehkada me kaunen wasao pwainla laudsang dahme kileldi. I ese me e sohte pahn ese ihs me e pwainohng uwen mwohni wet me daulihala. I pil ese me ohl menet pahn pein pwain mwohni me salongala. Ngehi eri lemehda ien pwurala. I nantihlahte nanpwungen pokono oh kapwurehla mwohnio. Kaun menet inenen pwuriamweikihla pwehki sohte pak ehu emen kapwurehla mwohni.”
André doula koasoia: “Wiewia mwahu wet kahrehiong kaun menet en wauneki ei pesineso. Sounpar tohto dower powe, nanpwungen pesines kan me kin iang kihda sawas ong pwihn en mwadong wet, ei pesineso kelehpw me miehte kontrak rehrail. I kalahnganki pwehki ei doadoahngki kaweid kan en Paipel me pid tiahk mwahu kahrehda ien ahneki adamwahu.”
E kin kangoange kitail en ese me kitail kak pelianda wiewiahn mwersuwed pwehki sawas sang rehn Koht. Ahpw, ahn emenemen eh nanti sohte pahn uhdahn kihsang wiewiahn mwersuwed. Kahrepe kan me nohn laud ong aramas soh unsek kan ren kamwahwihala. Eri ia duwe, met wehwehki me wiewiahn mwersuwed sohte pahn uhdi? Ire kan mwuhr pahn kasalehda pasapeng mwahu sang nan Paipel.