OARALAP | DAHME KAHREHDA KITAIL EN KIN MEHLEL?

Ia Duwen Sohte Kin Mehlel Eh Kin Pidada Atail Mour

“Nan soangen kahpwal koaros kitail kak apwalihala ma kitail sohte kin nohn mehlel.”—Samantha, South Africa.

Ke pwungki koasoi wet? Duwehte Samantha, kitail koaros kin lelohng nan soangen irair kan me ekei pak apwal. Mwomwen atail pahn mwekidki kasongosong ehu me song kitail en kin sohte mehlel kin kasalehda soangen irair dah me kitail kin kesempwalki. Karasepe, ma kitail kin kesempwalki kahng sarohdi pahn aramas, kitail sohte kin suwedki en kin kinehda likamw de sohte kin mehlel pwe kitail en dehr mwamwahlla mwohn aramas. Ahpw, ahnsou me e kin dierekda dahme uhdahn mehlel, likamw kin kalapw wahdo imwila suwed kan. Tehk ire pwukat.

LIKAMW KIN KAUWEHLA LIKILIK

Nanpwungmwahu en aramas kin tepisang likilik. Ni ahnsou me aramas riemen kin likihala emenemen, ira kin nsenamwahupene oh sohte perki mehkot. Ahpw likilik sohte kin mwadangete miehla. Aramas akan kin kakairada likilik ni ahnsou me re kin ehupene, koasoakoasoipene ni mehlel oh kadekpene. Ahpw, likilik kak ohla de kitail kak sohla likih emen, pwehki likamw ehu me e wiahda. Oh ni ahnsou me likilik kin ohla, e kin inenen apwal en pwurehng likih emen.

Mie pak me ke leme emen me wia kompoakepahmw mwahu men pitihiukedi? Ma iei, ia omw pepehm? Uhdahn ke medekla, ele ke pehm me e panguhkala. Koaros wehwehki soangen pepehm wet. Mehlel me likamw kak kauwehla poahsoanpen nanpwungmwahu en aramas.

SOHTE MEHLEL KIN KANAITIKIHADA LIKAMW

Ehu roporop me Robert Innes, sounpadahk men me samanih palien pai en wehi sang University en California, diarada me “sohte kin mehlel kin douseli.” Ihme kahrehda, sohte kin mehlel kak duwehte mwahs ehu, omw kin kalapw ieiang aramas me kin likamw, uwen laudlahn omw pahn mihla nan keper en kak “alehdi mwahs” en likamw.

Ia duwen omw kak soikala pwupwudiong nan lidip en sohte kin mehlel? Paipel kak sewese iuk. Menlau tehk ekei kaweid kan oh ire mehlel kan en Paipel.

Ekei Wiepen Sohte Kin Mehlel

Likamw

DAHKOT MET? Koasoiaiong emen me anahne ese dahme mehlel mehkot likamw. Likamw pil kak wehwehki koasoi likamw de wekidala ire mehlel en pitihedi emen, kihsang ire mehlel kan pwehn pitihedi aramas emen, oh kinehda likamw laud ehu pwehn mwomwen mehlel en pitiehdi emen.

DAHME PAIPEL MAHSANIH: “KAUN-O kin ketin kalahdeki aramas akan me kin wia me suwed, ahpw e kin ketin kompoakepahnki me pwung kan.” (Lepin Padahk 3:32) “Kumwail kesehla amwail likamw akan, oh emenemen kumwail en kin lokaia mehlel ong rie souleng.”—Episos 4:25.

Karaun Likamw

DAHKOT MET? Koasoiahda ire kan me likamw oh mwersuwed me pahn kauwehla eden emen aramas.

DAHME PAIPEL MAHSANIH: “Aramas suwed kin wisik lokaia; re kin kahrehda kahpwal oh kauwehla nanpwungen aramas akan.” (Lepin Padahk 16:28) “Ma sohte tuwi, kisiniei pahn kunla; ma sohte liketihti, akamai pahn tokedi.”—Lepin Padahk 26:20.

Widing

DAHKOT MET? Kamwakid aramas emen pwehn kesehla nah mwohni de kepwe me emen pitihedi en kamehlele me e mehlel.

DAHME PAIPEL MAHSANIH: “Ke dehpa kasapwungehla pweinen tohndoadoahk emen me semwehmwe oh paisuwed.” (Deuderonomi 24:14, 15) “Ma ke pahn kahpwalihala aramas semehmwe, ke mwamwahliki Koht, me ketin wiairailda, ahpw tiahk en kadek ong me semwehmwe kan iei kaudok ehu.”—Lepin Padahk 14:31.

Pirap

DAHKOT MET? Ale mehkot ehu sang rehn emen ni omw sohte peki.

DAHME PAIPEL MAHSANIH: “Aramas me kin epwehnki pirap, en tokedihsang eh pirap, oh en tapihada wia ehu soangen doadoahk me e kak momourki oh kak sewesehki me semwehmwe kan.” (Episos 4:28) “Kumwail dehr nan kapehd rotorot . . . me lipirap akan, me noahroke kepwe kan, me kamamsakau kan, me karaunlikamw akan, oh me loallap suwed kan, re sohte pahn iang sohsohki Wehin Koht.”—1 Korint 6:9, 10.