Ke tamataman ahnsou me ke pwupwudi ni omw tikitik? Ele pehmwen ohla de pwukiomwen koroiroila. Ke kak tamanda ia mwomwen omw nohno eh kansenamwahwihiukala? Mwein e kamwakelehda omw ohlao oh pirekihdi likou. Ke sengiseng, ahpw eh koasoi kamantik kan oh eh pwoalehiukedi kahrehiong uhk en nsenamwahula. Ahnsowo, mie me kin kansenamwahwihiuk.

Ahpw mour kin wie apwahpwala ni atail kin wie lalaudla. Kahpwal kan kin wie lalaudla, oh e kin apwal en diarada kamweitpatail. E kansensuwed pwe kahpwal en aramas laud sohte kin kalapw mwahula sang nohno men eh kin pirekihdi likou ohla oh ahn nohno men eh kin pwoaleiukedi. Tehk karasepe pwukat.

• Mie pak me ke pwuriamweikihla me omw wasahn doadoahk pahn kauhiukdihsang doadoahk? Julian koasoia me ahnsou me eh wasahn doadoahk kesehla ih, e uhdahn pwuriamweikihla oh pwunodida. E kin medewe, ‘Ia mwomwen ei pahn apwalih ei peneinei? Sounpar tohto I kin doadoahk laud, a dahme kahrehda wasahn doadoahk wet medewe me sohte katepei?’

• Ele ke mworuskihla ahnsou me kowe oh omw pwoud mweipeseng. Raquel kawehwehda, “Sounpwong 18 samwalahro ei pwoudo kohkohlahsang ie ni soh kasikpe, ih ahnsowo me I pehm nsensuwed eh kipeiehdi. E duwehte me mohngiongiet pwalpeseng, ei pepehm oh paliwerei uhdahn medekla. Met kahrehda I kin masepwehk.”

• Ele ke ahneki kahpwal en roson me mwomwen sohte pahn mwahula. Mwein e pahn mie ahnsou me ke pahn ahneki pepehm duwehte Sohp, me kaulimki: “Solahr ei koapworopwor; I pwangadahr momour.” (Sohp 7:16) Ele omw pepehm duwehte ahn Luis, ohl emen me sounpar 80 samwa, me pein wehkada, “Mie pak me I kin pehm me I awiawihte ien mehla.”

• De ele mehlahn emen me ke poakohng me kahrehda ke men nsenamwahula. Robert kawehwehda, “Ni ahnsou me nei pwutako mehla ni aksident en sompihr ehu, pepehm me I tepin ahneki iei I sohte kamehlele. Mwuri medeko lelie, medek me Paipel karasahiong kedlahs pwoat me doakoaiukedi.”​—Luk 2:35.

Robert, Luis, Raquel, oh Julian diarada kamweitparail nan irair apwal ko. Irail diarada Emen me keieu kak ketin kansenamwahwihirailla, sohte emen likin Koht Wasa Lapalahpie. Ia duwen eh kin ketin kansenamwahwihkitailla? Ia duwe, e pil pahn ketikihong uhk soangen nsenamwahwo me ke anahne?

Wahnpoaron Pohl karasahiong Siohwaa nin duwen “Samatail me kalahngan oh Koht me pwarer en kansenamwahu koaros. Ih me kin ketin sewesei kitail nan atail apwal akan koaros.” (2 Korint 1:3, 4) Ihme kahrehda Paipel kamehlelehiong kitail me aramas koaros kak alehdi sapwellimen Koht sawas oh sohte kahpwal ehu me kak irehdi Samatail nanleng sang kansenamwahwihkitailla.

Mehlel, ma kitail men Koht en ketin kansenamwahwih kitail, kitail anahne wia mehkot. Ia duwen toahkte men eh pahn kak sewese kitail ma kitail sohte wiahda koasoandi en tuhwong ih? Soukohp Eimwos kalelapak: “Ia duwe, aramas riemen kak wia seiloak ehu ni ara sohte pahn inoukipene wasahn ara tuhpene?” (Eimwos 3:3) Ihme kahrehda Paipel kangoangehkin kitail: “Kumwail keido mpen Koht, oh e pahn ketin keiong mpamwail.”​—Seims 4:8.

Ia duwen atail kak kamehlele me Koht pahn ketin keiong mpatail? Keieu, pwehki e kin ketin pwurepwurehng mahsanihong kitail me e kupwurki sewesei kitail. (Kilang koakon me mi nan pali 5.) Oh keriau, pwehki mie mehn kadehde kan sang aramas kan me Koht ketin kansenamwahwihala, aramas ekei me uhdahn mie nan atail ahnsou oh pil mahs.

Duwehte me tohto rahnwet me kin rapahki sawas sang Koht, Nanmwarki Depit pil kin lelohng kahpwal tohto. Mie pak me e peki rehn Siohwa: “Komw ketin karonge ie ni ei kin likweriong komwi pwe I en peki sapwellimomwi sawas.” Ia duwe, Koht ketin sapeng? Ei. Depit kapatahiong: “E kin ketin sewese ie oh kaparanih ie.”​—Melkahka 28:2, 7.

SAPWELLIMEN SISES PWUKOA ME PID KANSENAMWAHWIH KOAROS ME PAHTOU

Koht kupwurki Sises en sapwellimanki pwukoa kesempwal ehu en kansenamwahwihala aramas. Likin pwukoa kan me Koht ketikihong, Sises pahn ketin “kansenamwahwihala me nan kapehd toutoulahr akan” oh “koaloalamwahwihala koaros me kin pahtou kan.” (Aiseia 61:1, 2) Nin duwen me kokohpdahr, Sises kin ketin nsenohki aramas akan me “pwangadahr oh toutoukilahr” arail kahpwal kan.​—Madiu 11:28-30.

Sises kin ketin kansenamwahwihala aramas akan sang ni eh kin ketikihong irail kaweid erpit kan, sang ni eh ketin kadekohng irail, oh ekei pak kamwahwihala arail soumwahu kan. Ehu rahno ohl tokutok men peki rehn Sises: “Maing, ma komw ketin kupwurki, komw kak ketin kamwakeleiehda.” Sises eri ketin kupwurehla oh mahsanih: “Iei, I mwahuki. Nna, mwakelekelda!” (Mark 1:40, 41) Oh ohl tokutoko pa mwahula.

Rahnwet, sapwellimen Koht Ohlo sohte ketiket nin sampah pwehn kansenamwahwih emenemen kitail. Ahpw Semeo, Siohwa, “Koht me pwarer en kansenamwahu koaros” kin ketin pousehlahte sewese irail kan me anahne sawas. (2 Korint 1:3) Tehk ahl pahieu me Koht kin ketin doadoahngki pwehn kansenamwahwih aramas akan.

• Paipel. “Pwe mehkoaros me ntingdier nan Pwuhk Sarawi e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.”​—Rom 15:4.

• Sapwellimen Koht Manaman. Mwurinte pwoulahn Sises, mie ahnsoun popohl ehu wiawi nan mwomwohdisohn Kristian pwon. Dahme kahrehda? “Sang ni sawas en [“sapwellimen Koht manaman,” NW]; oh re kin momour ni ar wauneki Kaun-o.” (Wiewia 9:31) Sapwellimen Koht manaman uhdahn kehlail. Koht kak ketin doadoahngki pwehn kansenamwahwih aramas sohte lipilipil nan irair soh lipilipil.

• Kapakap. Paipel kaweidkin kitail, “kumwail dehr pwunodki mehkot.” Oh e mahsanih, “ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam.”​—Pilipai 4:6, 7.

• Riomw Kristian kan kak wia kompoakepahmw mehlel kei me ke kak likih en kansenamwahwihiuk nan irair apwal kan. Wahnpoaron Pohl koasoiahki ienge kan me re kin “inenen wia sawas laud” ong ih nan “kahpwal akan koaros oh lokolok.”​—Kolose 4:11; 1 Deselonika 3:7.

Ahpw ele ke pahn medewe ia duwen mepwukat koaros ar uhdahn kak wiawi. Kitail pahn tehkpene ni keneinei duwen aramas akan me sansalda ni tepin pwuhk wet me lelohng kahpwal kan. Duwehte irail, ke kak diarada me Koht kin ketin kapwaiadahte sapwellime inou kansenamwahu wet: “I pahn kansenamwahwihkumwailla . . . nin duwen ihn men eh kin kansenamwahwih nah seri.”​—Aiseia 66:13.

NI AHNSOU ME SOHLA DOADOAHK

Setha tamanda, “Ei pwoudo oh ngehi sohla doadoahk ni ahnsoutehkis.” Sounpar riau se kin momourki sawas sang kiseht kan oh ekei kisin doadoahk en lepin ahnsou kan. Imwilahn met, ei pwoudo, Priscilla, mworusala, oh I pehm me sohla katepei.

“Ia duwen at powehdi met? Priscilla kin kalapw katamankihong pein ih sapwellimen Sises mahsen nan Madiu 6:34. E mahsanih me kitail en dehr pwunodki duwen lakapw, pwehki ehuehu rahn kin pwukoahki pein eh pwunod. A duwen ngehi, Melkahka 55:22 kin kansenamwahwih ie. Duwehte sounmelkahkao, I kin mweidohng Siohwa ei kahpwal kan, oh I diarada me e kin ketin sewese ie. Mendahki miehier ei doadoahk ahnsou wet, se kin nantihong ahneki mour me sohte kin kedirepwki soahng kan me sohte nohn kesempwal pwehn pahrekiong sapwellimen Sises kehkehliko nan Madiu 6:20-22. Me keieu kesempwal iei se karanihala Koht oh se pil karanihala emenemen.”

Jonathan kasalehda, “I masak dahme pahn wiawi ni ahnsou kohkohdo ni ahnsou me en ei peneinei tikitik pesineso mehla. At doadoahk laud erein sounpar 20 sohla katepe pwehki ehu kahpwal me wiawi nan palien mwohni en pesines kan. Ngehi oh ei pwoudo tepida akamaiki duwen mwohni. Se masak doadoahngki credit card pwehki e de peien sohte doadoahk.

“Ahpw sapwellimen Koht mahsen oh sapwellime manaman kin sewese kiht en wiahda pilipil mwahu kan. I esehla itarki wia soangen doadoahk sohte lipilipil, oh se katikihala soahng kan me se kin pwainda. Nin duwen Sounkadehdehn Siohwa kan, se pil ale sawas sang rehn riat Kristian kan. Irail kahrehiong sen kak koapworopworki me se kak pweida oh sewese kiht ni ahnsou apwal kan.”

NI AHNSOU ME PWOPWOUD KIN MWEIPESENG

Raquel tamanda, “Ahnsou me ei pwoudo kohkohlahsang ie ni soh kasikpe, I pehm medek oh lingeringer. Oh nsensuwed laud kipehiehdi. Ahpw I karanihala Koht, oh e ketin kansenamwahwihiehla. Sapwellimen Koht popohl pere ei mohngiong ni ahnsou me I kin sohpeiong ih ni kapakap rahn koaros. Ong ie mwomwen E ketin kamwahwihala nsensuwed nan ei mohngiong.

“I kalahnganki Mahsen en Koht, Paipel, pwe I kakehr powehdi ei lingeringer oh nsensuwed. I kin perenki dahme wahnpoaron Pohl koasoia nan Rom 12:21: ‘Eri, dehr mweidohng me suwed en poweiukedi, ahpw omw mwahu en powehdi me suwed.’

“Emen sounkaweid loalokong sewese ie en kilang me I anahne pwilikihdi ei kin nsensuwedki met oh uhd nsenohki soahng teikan. E kasalehiong ie nan Eklesiasdes 3:6 oh ni kadek ndaiong ie me mie ahnsou me kitail anahne mweidala soahng kan. Kaweid wet ekis apwal ahpw ih met me I uhdahn anahne. Met mie ei mehn akadei kapw kan nan mour.”

Elizabeth koasoia, “Ma omw mour en pwopwoud ohla, ke kin anahne sawas. Mie kompoakepahi lih men me kin kihong ie sawas wet. Ehuehu rahn, e kin iang ie sengiseng, e kin kansenamwahwih ie, oh kahrehiong ie en pehm me aramas kin poakohng ie oh I en dehr pehm me aramas keseiehla. I kamehlele me Siohwa me ketin doadoahngki ih en kamwahwihala ei pepehm en nsensuwed laud.”

AHNSOUN SOUMWAHU DE MAHLA

Luis me kitail koasoia ni tepin oaralap en pwuhk wet ahneki soumwahun mohngiong laud ehu, oh pak riau e kereniong mehla. Met e anahne doadoahngki mehn esingek (oxygen) awa 16 ehuehu rahn. E koasoia, “I kin kapakap ong Siohwa ahnsou koaros oh mwurin ei kin kapakap ong Koht, I pehm sapwellime manaman eh kin kakehlaka ie. Kapakap kin kahrehiong ie en eimah oh dehr luwetala pwehki I kamehlele ih oh ese me e ketin nsenohkin ie.”

Petra me sounpar 80 koasoia, “I men wia soahng tohto ahpw I sohte kak. E kin apwal ong ie en kilang ei luhluwetla. I pehm me I sohte kak wia mehkot oh kin anahne kang wini. I kin kalapw medemedewe dahme Sises mahsanih: ‘Ma e kak, a komw ketikihweisang ie dahl en lokolok wet.’ Ahpw Siohwa ketikihong Sises kehl, oh e pil kakehlakaiehda. Kapakap kin wia mehkot me kin kansenamwahwihiehla rahn koaros. I kin nsenamwahula mwurin ei kin pato ong Koht.”​—Madiu 26:39.

Ahn Julian pepehm pil duwehte. E kin nantihong powehdi soumwahu me adaneki sclerosis kereniong sounpar 30. E koasoia, “I sohla mwomwohd pohn sehr nin duwen kaun en pesines ehu ahpw uhd mwohd pohn wheelchair. Ahpw ei mour mie katepe pwehki ei kin nantihong papah meteikan. En kin kihwei kak katikala en emen eh lokolok, oh Siohwa kin ketin kolokolte sapwellime inou en kakehlakahda kitail nan ahnsou apwal pwukat. Duwehte wahnpoaron Pohl, I kak koasoia ni mehlel: ‘I kakohng mehkoaros sang ni manamano me Krais kin ketikihong ie.’”​—Pilipai 4:13.

NI AHNSOU ME EMEN MEHLA

Antonio tamanda oh koasoia: “Ni ahnsou me ei pahpao mehla nan aksident en sidohsa ehu, nin tapio I sohte kamehlele. E mwomwen sapwung met en wiawi pwe e alialuhte pohn ahlo. Ahpw sohte mehkot I kak wia. E sohla kehnwasa erein rahn limau mwohn eh mehla. I nantihong en dehr sengiseng mwohn ei nohno ahpw ahnsou me I kelehpwla I kin sengiseng. I kin pwurepwurehng pein idek rehi: ‘Ia kahrepe? Ia kahrepe?’

“Erein rahn kansensuwed ko, I kin wie pekipeki rehn Siohwa en ketin sewese ie kaunda ei pepehm kan oh en ketikihdohng ie popohl. Eri ekisekis, ei pepehm kan kin meleileidi. I tamanda me Paipel kin kawehwehda me ‘paisuwed’ kak lelohng aramas koaros. Pwehki Koht eh sohte kak ketin likamw, I uhdahn kamehlele me I pahn pwurehng kilang ei pahpa ni ahnsoun kaiasada.”​—Eklesiasdes 9:11; Sohn 11:25; Taitus 1:2.

Robert, me sansalda nan ire kan en mwowe, kin pil ahneki soangen madamadau me duwehte met. E koasoia: “Ei pwoudo oh ngehi kin alehdi popohl en madamadau me Pilipai 4:6, 7 kin kasalehda. Se alehdi met sang ni at kin kapakap ong Siohwa. Popohl wet loalat kin kahrehiong sen kak koasoiong sounwia doaropwehn nuhs kan duwen at koapworopwor en kaiasada. Mendahki nait pwutako mehla ni ahnsou me sompihr ehu ohla, se kin tamatamante ahnsou kaperen kan me se kin ehukihpene mwohn eh mehla. Ih mepwukat me se kin nantihong medemedewe.

“Ni ahnsou me riat Kristian kan kin ndahng kiht me re kin kilang nan TV at kin meleilei oh kawehwehda dahme se kamehlele, se kin padahkihong irail me met kohsang kalahngan en kapakap kan me riat kan kin wia pwehn kapakapkin kiht. I uhdahn kamehlele me Siohwa kin ketin sewese kiht ni eh kin ketin doadoahngki riat kan en kihong kiht koasoi kansenamwahu kan me se kin alehdi pak tohtohie.”

Nin duwen me koasoipen aramas pwukat ar kasalehda, Koht kak ketin kansenamwahwihala aramas akan me lelohng soangsoangen kahpwal kan. Ia duwen komwi? Sohte lipilipil soangen kahpwal dah me ke lelohng nan mour, mie mehn kansenamwahwihiukala erein ahnsou apwal.b Eri, ke sou sohpeiong Siohwa pwehn ale sawas? Pwe ih iei “Koht me pwarer en kansenamwahu koaros.”​—2 Korint 1:3.