oaralap en kaping me pokon kalaimwun wet kin iang sapwellimen Koht luwen me keidi kan kokoulki? Sohn padahkiong kitail: “Komourpat pwilisang rehn at Koht, me ketiket nan mwoale, oh sang rehn Sihmpwulo!” (Kaudiahl 7:10) Kaping wet kin lohkseli ni eimah wasa koaros nin sampah. Oaloahlki tehn paini kan me wehwehki atail ehukihpene kapinga Koht nin duwen Kaunepen Lahng oh Sampah oh ni pereperen wekada mwohn nanleng oh sampah me “kitail pwukoahkin” atail kamourala reh oh sapwellime Ohl, Sihmpwulo, Sises Krais. Ei, wahnpoaron Sohn inenen perenkihda e kilang nan kapoudiahl wet pokon kalaimwun ehu! Oh ia uwen kaperen ong kitail nan rahnpwukat en kilang oh pil iang dahme wahnpoaron Sohn kilangada nan kapoudiahl mahs!

13. Dahme kin katohrohrla sapwellimen Siohwa aramas akan sang sampahwet?

¹³ Nin duwen sapwellimen Siohwa ladu kan, kitail kin suweiki kadehde duwen mware. (Aiseia 43:10, 12) Pwehki kitail wia Sounkadehdehn Siohwa kan, kitail kin weksang sampahwet. Ia uwen kaperen en kadehde mwaren Koht oh wia sapwellimen Koht doadoahk sarawi nin duwen atail mehn akadei nan mouritail! Kupwur lapalap en Siohwa en kasarawihla mware sarawi oh en kawauwihla sapwellime kaunda unsek en lahng oh sampah ki Wehio kin kihong katepen atail mour. Oh e ketin sewese kitail en ahneki pwais ehu nan sapwellime kupwur sarawi me pid duwen mware oh Wehio. E ketin wia met ni ahl silu.

Pwukoahki Padahk Mehlelo

14, 15. (a) Ia ehu ahl Koht ketin sewese kitail en ahneki ehu pwais nan sapwellime kupwur sarawi me kin pid duwen mware oh Wehio? (b) Iaduwen Wehio me kokouda nan pahr 1914 C.E. wiksang mehteio me pwupwudi nan pahr 607 B.C.E.?

¹⁴ Keieu, Siohwa likihong sapwellime aramas akan padahk mehlel. Kasansal me keieu kaperen iei me sapwellime Wehio tepida kakaun nan 1914. (Kaudiahl 12:10) Koperment en nanleng wet weksang wehio me mih nan Serusalem en mahs, wasa me nanmwarki en kadaudok en Depit kin kakaun ie. Wehi wet pwupwudi, oh nan pahr 607 B.C.E., Serusalem pwon mihla pahnangin kaundahn manaman en Mehn Liki kan. Wehi kapwo me Siohwa kauwada nan pahr 1914, kin mihmih nanleng me sohte pahn lohdi pahn ehu mwehi likin Siohwa, oh pahn mihmi kohkohlahte. (Daniel 2:44) Pil ehu, eh kaunda pahn weksang kaunda teikan. Iaduwen? Kaudiahl 11:15 mahsanih: “Atail Kauno oh sapwellime Mesaia uhd sapwellimankiher manaman en kaunda sampah ahnsou wet, oh e pahn ketin kaunda erein dih koaros kohkohlahte!”

¹⁵ “Atail Kauno oh sapwellime Mesaia” kin kaunda pohn sampah pwon. Lepin lokaia kapw pwukat me pid kaundahn Siohwa, me ong Sapwellime Ohl oh rien Sises meh 144,000, pali laud en irail iasadalahngehr nanleng, oh sohte pahn wia mehkot me aramas akan pahn koasoiapene pwehn peikasalki. Soh, Wehin nanleng iei koperment mehlel ehu. Oh atail koapwoaroapwoar kaperen en mour soutuk ni unsek pwehki wehi wet kin kihong kitail kahrepe mwahu en pousehla pereperen. En pwukoahki padahk mehlel pwukat en sapwellimen Siohwa mahseno kin kamwekid kitail en ahnsou koaros koasoiaiong aramas teikan duwen wehio. (Melkahka 56:10) Ke kin kaukaule padahkiong koaros me Sapwellimen Koht Wehin Mesaia kin wia kakaun sang nanleng ni ahnsowet?

Ale Sawas sang Ngehn Sarawi oh Pirien en Pali Ngehn nin Sampah Pwon

16, 17. Ia kariau oh kesiluwen ahl akan me Koht ketin sewesekin kitail pwen kitail en kak ahneki pwais nan sapwellime kupwur sarawi?

¹⁶ Kariau en ahl me Koht kin ketin sewese kitail en ahneki pwais ehu nan sapwellime kupwur sarawi kapwarehda iei sang sapwellime ngehn sarawi, me kin sewese kitail en wah mwahu nan atail mour oh kenikenla reh. (Kalesia 5:22, 23) Pil, Pohl ntingwong Kristian me keidi kan: “Kitail aleier . . . Ngehn Sarawi me Koht ketin poaronehdo pwe en ketin kehsehkin kitail mehkoaros me Koht ketikihong kitail.” (1 Korint 2:12) Sang ni atail pahn mwekidki ngehn sarawi en Siohwa, kitail koaros kak esehla oh wehwehki soahng mwahu koaros e ketikihong kitail​—sapwellime inou kan, kosonned akan, oh ire teikan.​—Pil kilang Madiu 13:11.

¹⁷ Ahl kesiluh me Koht kin ketin sewese kitail, iei atail kin ahneki pirien en pali ngehn nin sampah pwon oh sapwellimen Siohwa koasoandi en pwihn en kaudok. Wahnporon Piter koasoi duwen met ni ahnsou me e padahkiong kitail en “poakohng riamwail Kristian kan.” (1Piter 2:17) Atail peneinei en brother oh sister kan ni pali ngehn nin sampah pwon kin sewese kitail en papah Siohwa ki peren en mongiong, nin duwen Melkahka 100:2 mahsanih: “Kumwail pereperen kaudokiong Kauno [Siohwa], oh patohdo mwohn silangi ngisingiski amwail koul!” Iretikitik 4 mahsanih: “Kumwail pedokihlong nan kelen Tehnpaso amwail koulen kaping; kumwail patohwanohng amwial kapingkalahngan oh kapikapinga.” Eri, mendahki kitail kin kalkalohk ong wehi pokon de iang towehda mihding kan, kitail kak ahneki peren. Ia uwen kaselel popohl oh meleilei kitail diarada nan kelen tehnpas en sapwellimen Siohwa tehnpas en pali ngehn!

Pereperenki Kapinga Siohwa!

18. Dahme kahrehda kitail kak perenki kapikapinga Siohwa edetehn kitail kin lelong kalokolok kan de kahpwal teikan?

¹⁸ Sohte lipilipil soangen irair en kahpwal akan, kalokolok kan,de kahpwal teikan me kitail pahn lelong, kitail en perenkihda mih nan sapwellimen Siohwa ihmwen kaudok. (Aiseia 2:2, 3) Tamataman, peren, iei irair ehu me kohsang mongiong. Riatail Kristian brother oh sister kan en mahs kin wiahla sounkaping peren kei en Siohwa edetehn irail kin lelong kahpwal tohto. (Ipru 10:34) Iengatail tohnkaudok kan nan rahnpwukat kin duwehte irail.​—Madiu 5:10-12.

19. (a) Ia kaweid kan me kin pwurpwurehng kohda me kin kamwekidada kitail en kapinga Siohwa? (b) Ma kitail men alehdi mour soutuk, dahme kitail anahne wia, oh ia atail mehn akadei?

¹⁹ Koaros me kin papah Siohwa kin perenki peikiong kaweid kan en Paipel en kapinga ih. Pak tohto pwuken Kaudiahl kin kasansalehda kapinga Koht ni lepin lokaia pwukat “Kapinga Jah!” (Kaudiahl 19:1-6) Nan iretikitik weneu en Melkahka 150, kitail ale kaweid en kapinga Siohwa pahn pak 13. Met kin kohwong koaros en iang koulki ni peren sapwellimen Siohwa peren. Atail pahn alehdi mour soutuk pahn poahsonda pohn atail iang pwihn laud ehu me kin kapinga Siohwa! Ehi, irail kante me pahn mour kohkohlahte iei irail akan me sohte kin uhdi sang arail kapinga Siohwa. Ihme kahrehda, kitail kin nantiong karanih sapwellime mwomwohdiso lelepek nin sampah pwon nin duwen imwio ah kerendohr. Eri, kitail kak koapworopwoarki kilang imwin mahsen en Melkahka 150 eh pweida: “Kumwail me momour koaros, kumwail kapinga Jah. Kapinga Jah!

Iaduwen Komw Pahn Sapeng?

◻ Dahme kin katohrohrla sapwellimen Siohwa aramas akan sang aramas teikan?

◻ Dahme kahrehda sapwellimen Siohwa ladu kan kin inenen peren?

◻ Dahme kin katohrohrpeseng kitail oh sampah wet?

◻ Ni ahl silu dah kei Koht ketin sewese kitail en ahneki pwais nan sapwellime kupwur sarawio?

Ripoht En Sounkalohk Kan En Wehio

Saladeksang Manaman en Dimen kan

WIEWIAHN wunahni de akmanaman kin ni ahnsou reirei kaunda mouren aramas rar kei. Ahpw aramas kak saladeksang. Met wiawiher nan kanihmw Episos en mahs mahsie. Nin duwen Paipel, “me tohto sang irail kan me kin wunahni re kihpene neirail pwuhk kan oh isikala mwohn masarail koaros . . . Ni soangen manaman wet mahsen en Kauno ahpw inenen kekeirda kehlail oh lolohkseli.”​—Wiewia 19:19, 20.

Mwomwohdisohn Kristian nan rahnpwukat kin pil kekeirada. Duwehte nan Episos, nanpwungen irail kan me pwosonla, irail mahs kin wia wunahni. Ekspiriens wet me kohsang Zimbabwe kin kasansalehda met.

Gogo (Nohno kahlap) Mthupha wia aramas ndand men me pid wunahni kan. Aramas akan kin kohsang wasa doh, kohsang Zambia, Botswana, oh South Africa pwen ale sawas sang ih. Gogo Mthupha pil kin padahkiong mehteikan iaduwen irail kak wiahla n’anga, Sounwunahni men. Oh ekei pak e kin wia wunahni ong aramas teikan!

Ni menseng en Rahn Sarawi ehu, Sounkadehdehn Siohwa kan me iang doadoahk en ihmw-lel-ihmw oh irail tuhwong Gogo Mthupha. E inenen perenkihda laud koasokoasoiapene rehrail duwen inou en Paipel kan me pid sampah kapw ehu me sohlahr pahn mie dimen kan. E alehier pwuhko me oralape Ke Kak Mour Kohkohlahte nan Paradise nin Sampah oh pwungkihla en onopki Paipelo.a Mwurinte onop silu te, e tepida iang tohwehda mihding kan.

Sang eh onop en Paipel, Gogo Mthupha sukuhlkier me e manaman tohrohr kan kin kohsang ngehn suwed kei me uhweng sapwellimen Siohwa kaunda. (2 Piter 2:4; Sud 6) E pil sukuhlikier dimen pwukat kin nananti en pitidi aramas koaros en uhweng Siohwa oh kaudok mehlelo. Pwehki eh kin likwerihong ngehn suwed pwukat oh met kin wia mwomwen pisnes ong ih, dahme lih menet pahn wia?

Gogo Mthupha kasalehda eh pepehm me e men kesehla eh dipwisou en wunani kan koaros. Met pil kin pidada eh koduhpwel oh “kode en mahn kou kan me kak lokolokaia,” me kin sewese ih en wia n’anga, (kamwahuiala aramas akan). Gogo Mthupha men kesehla dipwisou en wunani pwukat koaros pwehki e pahn kak papah Koht Mehlel oh ieias, Siohwa Koht.

Ekei kise kan, uhweng ih, pwehki eh kin sewese irail en mwohni kan sang eh doadoahk en wunani. Irail peki ni ngidingid en kihong irail dipwisoun wuhnani kan iangahki eh manaman koaros pwe irail pahn kak wia pisnes. Gogo Mthupha kahng.

Ki sawas en mwomwohdiso en Sounkadehdehn Siohwa kan en wasao, e kihpene eh dipwisoun wuhnani kan ehd silu, oh isikala. Ni ahnsou eh dipwisoun wuhnani kan lululda nan kisinei, Gogo Mthupha koasoia: “Kilang! Kode, sohte kak doarehla pein ih.”

Ni ahnsou konehng, Gogo Mthupha ni pereperen inoukihda eh mour ong Siohwa oh pepdaiski pihl. Iaduwen e kin memour ni ahnsowet? E kin netkihla wahntuhke kan. Ehi, sang manaman en sapwellimen Koht Mahsen, emen kak saledeksang kaudok en dimen kan. Gogo Mthupha ni peren nda: “Ni ahnsowet I ahneki pepehm en saledek.”