“Wiahla Aramas Kapw”
1 Kristian kan kin kalahnganki esehla padahk mehlel! Kitail sukuhlkier iaduwen kitail en mour pwehn liksang mouren irail ko nan sampah pwehki re “sohte iang ahneki mour me kin sang rehn Koht,” re kin “nan kapehd inenen rotorot.” (Episos 4:18) Kitail sukuhlkier en kawiliakapwala atail lamalam sang lamalam en sampah ni atail pahn pwuhrsang nan irair mering kan oh pwuhriong nan irair kapw kan.—Episos 4:22-24.
2 Irair meringo kin kahluwalahng mouren tiahk samin ehu me kin kaukaule wie susuwedla, oh kin imwikihla samin oh mehla. Ihme kahrehda, kitail pekih ni ngidingid irail ko me pahn rong rongen Wehio en kesehsang rehrail mwakar, lingeringer, me suwed kan, lokaiahn kauwe, oh lokaia samin koaros. Irail ko me men kenikenla pahn kupwuren Koht anahne en pwuhrsang irair mering kan ni unsek—duwehte arail kin pwuhrsang nan likou pwelipwel ehu.—Kolose 3:8, 9.
3 Mohngiong oh Lamalam Uhdahn Pahn Onohnsapahlda: Pwuhriong irair en aramas kapw kin pidada kawiliakapwala atail mohngiong oh lamalam. (Episos 4:23) Iaduwen emen pahn kawiliakapwala ah lamalam pwehn uhlahng ni ahl me pwung? Met kak wiawi sang ni ah pahn kaukaule oh pwerisek onopki Mahsen en Koht oh doudouloale wehwehn sapwellimen Koht mahsen. Eri, mwomwen ah lamalam pahn wekila, oh aramaso pahn uhd ahnekihla lamalam en Koht oh Krais. Mouren emen kin wiliakapwala ni ah kin pwuhriong irair tohto kan en Krais, iangahki poakehla mehteikan, kadek, aktikitik, opampap, kanengamah, oh limpoak.—Kolose 3:10, 12-14.
4 Ni atail kin pwuhriong irair en aramas kapwo, kitail kin katohre kitail sang sampah. Elen atail mour kin kahrehda kitail en weksang sampah. Kitail kin mehlel oh lokaia mwakelekel pwehn kakehlailda mehteikan. Kitail kin kak koledi atail lingeringer, kailok, weriwer, lokaiahn kauwe mehteikan oh wiekau mehteikan, oh soahng suwed koaros oh wiliankihdi soahng pwukat mehkan me pwung, oh iangahki irair kan en Koht. Sohte me kin anahne padahkihong kitail en kasalehda mahk pwe kitail kin mahk ahnsou koaros. Kitail kin perenki wia met sang nan mohngiongatail.—Episos 4:25-32.
5 Kitail en dehpa pwuhrsang nan irair en aramas kapw wet. Kitail sohte kak papah Siohwa ni ahl me pwung ma kitail sohte ahneki irair en aramas kapw. Mweidohng irair kapw pwukat en sewese aramas en kohdohng padahk mehlel, oh mweidohng en kalinganada Siohwa, Sounkapikadahn atail irair kan en aramas kapw.—Episos 4:24.