Inglis, Saina, Russia, Spain, Portugal, French, oh Dutch. Re kin pil ntingihda pwuhk en sawas en onop Paipel ni lokaia kan me pali moron en tohnsampah kin ese. Ahnsou keren pein Siohwa Koht pahn mwekid ni ahl ehu me pahn kapwaiada sapwellime mahsen me wehi kan “pahn ese me [ih] me Siohwa.”​—⁠Esekiel 38:⁠23.

Ahnsou Me Dahme Emen Pein Kamehlele Kin Kamwekidih Ah Kawehwe

9. Iaduwen Paipel kasalehda duwen toutou en pwukoa me mihla pohn irail ko me kin kawehwe oh padahki Mahsen en Koht?

⁹ Pwukoa toutou ehu milahr pohn irail ko me kin kawehwe Mahsen en Koht iangahki irail ko me kin padahki Mahsen en Koht. Wahnpoaron Pohl mahsanih me pid ah kalohk oh en ienge kan: “Se kin soikeweisang reht soangen tiahk rir oh kanamenek koaros; se sohte kin widinge aramas akan, se pil sohte kin wekidala [kihong ire sapwung kan loale] mahsen en Koht. Se kin momour nan marain unsek en me mehlel mwohn silangin Koht.” (2 Korint 4:⁠2) En wekidala kin wehwehki en kasaminehla ni ahr pahn doaloakihda mehkot me sohte warohng de mwahl. Wahnpoaron Pohl sohte kin duwehte sounsilepen Israel salelepek kan ni mwein Seremaia me Siohwa panauwi kehlail pwehki re kin padahki pein arail lamalam ahpw kaidehn dahme Koht mahsanih. (Seremaia 23:​16, 22) Ahpw dahme wiawi nan ahnsou pwukat?

10. (a) Iaduwen ineng ah kaidehn loaloapwoatohng Koht kin kamwekidih en ekei sounkawehwe kan ahr kawehwe nan ahnsou pwukat? (b) Pwukoa dahkei re kin pein alehong irail?

¹⁰ Erein Mahwen Keriau en Sampah, sounpadahk en sarawi kan oh pastor kan kin miniminiong koperment en Nazi nan Sehmen pwehn wiahda ehu kawehwe kapw en “Kadehde Kapw” me pahn kihsang loale ire kan me kin kosoia mwahu en mehn Suhs kan oh pil ire kan koaros me kin kosoia me Sises Krais kohsang kadaudek en mehn Suhs. Nan ahnsou keren kan, sounkawehwe kan me wiahda The New Testament and Psalms: An Inclusive Version, kin ahneki madamadau weksang met, ni ahr kin nantiong kihsang ire kan koaros nan kawehwe wet me kin kosoia me mehn Suhs kan me pwukoahki matalahn Krais. Sounkawehwe ko kin pil lemeleme me irail kan me kin utung pwung en lih kan en duwehte ohl me kin wadek kawehwe wet pahn peren ma sounkawehwe kan pahn kawehwehong Koht, kaidehn Sahm, ahpw Sahm-Ihn oh en kawehwehong Sises me, kaidehn sapwellimen Koht Ohl, ahpw sapwellime Seri. (Madiu 11:27) Ni ahr wia soahngen kawehwe wet, re kihsang kosonned en lih pwopwoud kan en wauneki arail pwoud ohl kan oh seri kan en peikiong ahr pahpa oh nohno kan. (Kolose 3:​18, 20) Irail ko me wiahda kawehwe pwukat sansal me re sohte kin ahneki lamalam en Pohl en dehr ‘wekidala mahsen en Koht.’ Re manokehla pwukoahn sounkawehwe, oh eri alehda pwukoa me irail me ntingihda mahsen sarawi pwukat, oh wiahda pwuhk kan me kin doadoahngki eden Paipel pwehn utungada pein arail lamalam kan.

11. Iaduwen padahk kan en Kristiandom kin uhwong dahme Paipel padahngki duwen lepin lokaiahn wai wet soul oh mehla?

¹¹ Sarawi kan en Kristendom kin kalap padahki me lepin lokaiahn waio soul dene ngehn ehu, me kin pidoi sang nan paliwaren aramas ni ahnou me aramaso mehla, oh me soul wet sohte kak mehla. Me weksang met, kawehwehn Paipel mering kan ni pali moron en lokaia kan kin kasalehda ni sansal me aramaso iei soul, me mahn pil iei soul, oh me soul kin mehla. (Senesis 12:5; 36:6; Nempe 31:28; Seims 5:20) Padahk wet kanamenekihla kaun en pelien lamalam kan.

12. Ni ahl dahkei ekei kawehwe kan en ahnsouwet kin ekihla padah mehlel en Paipel

¹² Ahnsouwet ekei kawehwe kapw kan kin ekihla padahk mehlel pwukat. Iaduwen? Re sohte kawehwe inen lepin lokaiahn Ipruwo nephesh (soul) nan ekei ire kan. Nan Senesis 2:​7, re kin kawehwe me tepin ohlo “tepiada momour” (ahpw re sohte kawehwe me “e wiahla soul momour men”). De ni arail pahn kawehwe dahkot mahn re kin doadoahngki lepin lokaiao “mour” ahpw kaidehn “soul.” (Senesis 1:21) Nan soahngen ire kan me duwehte Esekiel 18:​4, 20, re kin doadoahngki kawehweho “aramas” de “meno” (ahpw kaidehn “soul”) me pahn mehla. Ele soahngen kawehweh pwukat, kin pwungiong sounkawehweho. Ahpw ia uwen sawas me re kin kihong irail ko me milahr pahn manaman en padahk en Kristiandom me sohte kohsang nan Pwuhk Sarawi me ni mehlel kin raparapahki padahk mehlel?b

13. Ni ahl dahkei ekei kawehwehn Paipel kan kin ekihla kupwuren Koht me pid sampah?

¹³ Ni ahr songosong en utungada arail padahk me dene aramas mwahu koaros pahn kohla nanleng, sounkawehwe kan​—⁠de sounpadahk kan en pelien lamalam akan me kin tetehk arail kawehweh​—⁠pahn nantiong en ekihla dahme Paipel kosoiahki kupwuren Koht ong sampah. Nan Melkahka 37:​11, kawehwe tohto kin kosoia me me aktikitik kan pahn sapwenikihla “sahpwo.” “Sahpw” kin wehwehkiong lepin lokaiao (erets) me kin kadoadoahk nan Paipel en lokaiahn Ipru. Ahpw, ehu kawehwe me adaneki Today’s English Version (me kin wia poahson en kawehwe kan ong ni lokaia tohto teikan) kin wia laud sang met. Mendahki kawehwe wet kin kawehwe lepin lokaiahn Krihko ge me iei “sampah” pak 17 nan Pwuhken Rongamwahu en Madiu, nan Madiu 5:5 re kin wiliankihdi “sampah” lepin lokaiao “dahme Koht ketin inoukihda.” Irail tohnsarawi kan kin lemeleme me met iei nanleng. Re sohte ale padahk mehlel me, nan ah Kapahrek pohn Dohl, Sises Krais mahsanih me me opampap, karakarahk oh aktikitik kan pahn “sohsohkila sampah.”

14. Ineng roporop dahieu kin sansalda nan ekei kawehwehn Paipel kan?

¹⁴ E sansal me ekei kawehwe kan en Pwuhk Sarawi kin doaodoahngki lepin lokaia kan me pahn sewesehki sounpadahk kan en ale pweipwei mwahu. Mehlel me Paipel mahsanih: Tohndoadoahk men uhdahn pahn ale pweine.” (1 Timoty 5:18) Ahpw nan 1 Timoty 5:​17, wasao me mahsanih me ohl mah kan me kin wiewia doadoahk mwahu “uhdahn pahn ale pweipwei laud,” ekei irail sounkawehwe kan kin medemedewe me wauwohte me re anahne kasalehda me ohl mah kan warohng ale iei ni palien mwohni. (Kaparekiong 1 Piter 5:⁠2) Ihme karehda, Paipelo The New English Bible kin kawehwe me dahme elder pwukat “warohng ale iei pweinerail pak riau,” oh kawehweo me adaneki Contemporary English Version kosoia me re “warohng ale pweipwei pak riau.”

Loaloapwoat Utungada Mahsen en Koht

15. Iaduwen atail kak diarada mehnia kawehwehn Paipel en doadoahngki?

¹⁵ Ia wehwehn met ong aramaso me kin wadek Paipel oh ong irail ko me kin doadoahngki Paipel pwehn kasukuhlikihong meteikan? Ni pali moron en lokaia kan me aramas kalap doadoahngki, mie kawehwehn Paipel tohto me kitail kak pilada sang menia kitail pahn doadoahngki. Komw anahne kasalehda irair en dehdehki ni amw pil menia Paipel me ke pahn doadoahngki. (Lepin Padahk 19:⁠8) Ma kawehwe ehu sohte ni mehlel kasalehda ihs me Koht mehlel​—⁠ni ahr kihsang nan sapwellime Mahsen sarawi mware pwehki soahngen karepe likamw kan​—⁠sounkawehwe ko soh pil wekidala kawehwehn ekei iren Paipel kan? Ma komw peikasalki ma ehu kawehwehn Paipel me pwung de soh, ah komw nantiong kaparekiong met kawehwehn Paipel mering kan. Ma komwi emen me kin padahki Mahsen en Koht, en doadoahngki Paipel kan me arail kawehwe kin duwehte dahme mih nan tepin Paipel en lokaiahn Ipru oh Krihk.

16. Iaduwen emen emen kitail kak kasalehda loaloapwoat ni atail doadoahngki Mahsen sarawi en Koht?

¹⁶ Emen emen kitail koaros en loaloapwoatohng Mahsen en Koht. Kitail kin wia met ni atail kin nsenohki dahme e audaudki pwe, ma kak, kitail en doadoahngki ekei ahnsou rahn koaros wadek Paipel. (Melkahka 1:​1-3) Kitail kin wia met ni atail kin kapwaiada unsek nan atail mour dahme e mahsanih, ni atail kin sukuhlki en doadoahngki ah kosonned kan oh karasaras kan en wia poahson en wiahda koasoandi pwung kan. (Rom 12:2; Ipru 5:14) Kitail kin kasalehda me kitail kin loaloapwoat utungada Mahsen en Koht ni atail kin ngoangki kalohki met ong meteikan. Kitail pil kin wia met nin duwen sounpadahk kan ni atail ki doadoahngki pwung Paipel, ni atail sohte kin wekidala de kapataiong ire kan pwehn pwungiong pein atail padahk kan. (2 Timoty 2:15) Dahme Koht ketin kohpada sohte pahn sapwungala ahpw e pahn pweida. E kin ketin loaloapwoatohng kapwaiada sapwellime Mahsen. Kitail en loaloapwoat utungada met.

Kasalehda Limpoak ong Irail ko me Anahne Sawas

KRISTIAN kan ahneki pwukoa oh kapai en kasalehda limpoak ong riarail ohl oh lih kan ni pali ngehn. (1 Sohn 3:​17, 18) Wahnpoaron Pohl ntingihdi: “Eri, nindoken eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Emen brother me papahkier Siohwa kereniong sounpar pahieu nan ahnsou keren kan pehmada limpoak en rie Kristian kan erein ahnsou me ah pwoudo soumwahu oh mwuri mehla. E ntingihdi:

“Pwehki ih kin apwalih ahi pwoud ni imwat erein ahnsou me e wie sousoumwahu, I sohte kak doadoahk en mwohni kereniong sounpwong riau. Ia uwen ahi nsenamwahula ni ahnsouwo me kompoakepahi kan nan mwomwohdiso pein nsenki sewesei kiht! Kisakis en mwohni tohto​—⁠kin kohdo ‘pwehn sewesehki pweinen soahng teikan,’ kisinlikou me iang kisakis pwukat kin kosoia​—⁠pwehn pwain sapwat, pihl oh lioal, oh pweinen soahng teikan.

“Wihk riau mwohn ahi pwoudo mehla, at soundoulik en circuit kangoange kiht ni ah pwarek kiht. E pil kasalehda kilel soh mwekid kan (slides) me mwomwohdiso pahn kilang ni imwin wihk. Se pil kak rong mihdingo nan delepohn​—⁠iangahki mihding en kalohk me soundoulik en circuito wiahda. Ni ehu mihding pwukat, e padahkiong irail ko koaros me iang towehda mihding en kalohko en rahnmwahu oh inda ‘kaselel,’ nin duwen pwihn ehu ong ahi pwoudo. Ihme karehda, mendahki e dohsang irail ni wahr , ahi pwoudo sohte pehm me e kelepw.

“Awa ehu mwurin e mehla, kereniong elder kan koaros kohdo ni imweio. Pohnangin brother oh sister epwiki kei kohdo ni imwei. Mwenge kan ‘pwarada’ pohn tehpel ong irail ko koaros me mih wasao. I sohte kak wadekedi uwen tohtohn kisakis kan koaros, oh kasalepen poakehla me re wiahiong ie, oh lokaiahn kamweit kan, oh kapakap kan me wiawi pwehki ngehi. Ia uwen met kakehle ie! Ikmwuri I anahne peki rehn riei pwukat en uhdi wiahda mwenge kan oh sawas en kamwakele imwei!

“Ia wasa ahpw nan pwihn en Siohwa kelepw me kitail kak diarada soahngen kasalepen poakehla, nseno, oh limpoak? Pali moaron en aramas rahnwet kak wadekedi kompoakeparail mehlel kan. Siohwa ketin kapaiakin kitailda peneinei laud ehu en riatail ohl oh lih kan ni pali ngehn!”​—⁠Mark 10:​29, 30.