Koht “sounpapah kan” ni ahnsou re kin kapwaiada ahr pwukoa me Koht ketikiong irail, me pil kin pid manaman en “kapwungala aramas suwed kan oh katingih me mwahu kan.” (1 Piter 2:​13, 14) Sapwellimen Siohwa ladu kan kin nantiong kapwurehiong Sihsar daksis kan, oh irail pahn mweidong Paipel me kin kaiane ahr nsen-mwakelekel en “dukiong arail kaun akan, . . . oh kapwaiada soahng koaros me mwahu.” (Taitus 3:​1) “Soahng koaros me mwahu” pil kin wehwehki kitail pahn sewese aramas teikan ni ahnsou me aramas kan pahn mihla pahn kahpwal duwehte melimel. Aramas tohto kadehdeiehr duwen kadek me Sounkadehdehn Siohwa kan kin kasalehda ong aramas teikan ni ahnsou me kahpwal pahn wiawi.​—⁠Kalesia 6:​10.

16. Mehnia doadoahk mwahu kan me Sounkadehdehn Siohwa kan kin kalapw wia ong koperment kan oh aramas akan?

¹⁶ Sounkadehdehn Siohwa kan kin poakohng aramas kan oh irail lemeleme me doadoahk me keieu katapan en sewese aramas teikan iei en sewese irail en ahneki loalokong pwung duwen sapwellimen Koht kupwur kan ong wahdo “nanleng kapw oh sampah kapw.” (2 Piter 3:⁠13) Ni ahr kapwaiada oh padahkiong aramas teikan duwen kosonned me pid tiahk en Paipel kan, irail kin kihda sawas laud ong aramas akan. Sapwellimen Siohwa ladu kan kin peikiong kosonned akan oh kasalehda wahu ong kaun akan en koperment, sounkopwung kan, kaun en kahnimw akan, kasalehda wahu ong kaun akan. (Rom 13:⁠7) Pahpa oh nohno en Sounkadehde kan kin perenki ehuong sounpadahk kan en neirail seri kan oh sewese neirail seri kan en onop mwahu, pwe mwuhr neirail seri kan pahn kak diarada ahr doadoahk oh sohte pahn wia ehu kahpwal ong koperment. (1 Deselonika 4:​11, 12) Nan ahr mwomwohdiso kan, Sounkadehde kan sohte kin pwungki irairen lipilipilki keinek akan oh katohrohrpeseng aramas akan pwehki mwohni oh soahng pwukat oh irail kin kesempwaliki en kakehle mour en peneinei kan. (Wiewia 10:34, 35; Kolose 3:​18-​21) Ihme kahrehda, sang ahr wiewia kan, irail kin kasalehda me karaun kan me dene irail sohte kin miniminiong peneinei kan de sohte kin kihda ahr sawas ong ahr kousahpw akan me likamw. Mahsen en wahnpoaron Piter me pwung: “Pwe ih kupwur en Koht en met: kumwail en katokihekihdi ngihl suwed en aramas pweipwei kan amwail wiewia mwahu kan.”​—⁠1 Piter 2:​15.

17. Iaduwen Kristian akan kak “kanahieng arail wiewia kan mwohn irail kan me seupwoson”?

¹⁷ Edetehn sapwellimen Krais tohnpadahk mehlel akan sohte kin “kisehn sampah,” irail kin mih nan sampah en aramas akan oh anahne kanahieng arail wiewia kan mwohn irail kan me seupwoson.” (Sohn 17:16; Kolose 4:⁠5) Nin duwen Siohwa kin mweidong kaun akan en koperment en wiahla sapwellime “sounpapah kan”, kitail pil anahne kasalehda wahu ong irail. (Rom 13:​1-4) Kitail sohte kin utungada pelien politik kan, ahpw kitail kin kapakapki “nanmwarki kan oh me lapalap akan koaros,” keieu ni ahnsou me irail pahn wiahda pilipil kan me pahn kak pid atail kaudokiong Koht ni saledek de soh. Kitail pahn pousehlahte wia met, “pwe kitail en kak momourki mour meleilei oh popohl ni atail kin poadidiong Koht oh wiewia me mwahu,” pwe ‘aramas koaros en ale komourparail.’​—1 Timoty 2:⁠1-4.

Kekeirada Seri Tiahk Mwahu Kan Met Kak Wiawi?

“KITAIL AHNSOUWET momour nan koasoandi ehu me apwal, tiahk en mour kan me wekpeseng, wasa me sohte kosonned en parekpenen tiahk mwahu,” Robert Glossop en Vanier Institute ong mouren Peneinei nan Ottawa, Canada koasoia. Ia imwilahn met? Ripoht ehu nan nuhspehpao The Toronto Star koasoia: “Liseian en kiripw en me pwulopwul kan, iangahki mwersuwed kan me pwulopwul kan kin wiahda oh arail kin kemehla pein irail, kin wie kekeirada.”

Kahpwal wet pil milahr wasa kan likin North America. Bill Damon, director en Center for Human Development ni Brown University nan Rhode Island, U.S.A., onopkiehr ire pwukat nan Britain oh wehin Iurop teikan, iangahki nan Australia, nan Israel, oh nan Sapan. E idialahng sarawi kan, oh sukuhl kan, oh wasahn sawas teikan me sohla kin kihda kaweid ong me pwulopwul kan. E kamehlele me atail tiahk en mour, “sohla kin pohnese dahme seri kan anahne pwehn kekeirada arail irair mwahu kan oh koahiek kan.” Ni ah koasoiahda irail kan me dene re samanih pwukoahn pahpa oh nohno me kin padahki me “kaian me keper ong pali roson en seri kan oh arail nsenamwahu,” Damon koasoia me lamalam wet kin “kanaitikihda seri kan me aklapalap oh sapeik.”

Dahme me pwulopwul en rahnwet anahne? Re kaukaule anahne kaiahn limpoak me kin kapwungala lamalam oh mohngiong. Pwehki me pwulopwul kan wekpeseng, re pil anahne kaiahn kan me wekpeseng. Ni ah kin mwekidikih limpoak, kaian kin kalap kohkihda kahrepe kan pwehn lel mohngiong. Ihme karehda Lepin Padahk 8:33 padahkiong kitail en “rong kaiahn.” Ahpw, ekei, “sohte kak kopwungpwungkihla lokaiahte.” Ong ekei, kalokpe me konehng tiahk sapeik, me kin kohda ni uwe ehu me konehng, mwein ihte me anahn. (Lepin Padahk 17:10; 23:​13, 14; 29:19) Ni ah kihda kaweid wet, Paipel sohte kin pwungki wokiwok me kin wiawi ni lingeringer de kamakam wuk kan, me kak katolehdi oh kawehla seri men. (Lepin Padahk 16:32) Ahpw, seri men anahne wehwehki kahrepen e ale kaiahn oh pehm me met pwehki ah pahpa de nohno kin iang ih, de nsenohki dahme mwahu ong serio.​—⁠Kaparekiong Ipru 12:​6, 11.

Soahngen kaweid en Paipel me katapan oh mwahu pwukat kin pwarada nan pwuhko The Secret of Family Happiness.