Ong sapwellime sounkadehde kan mwohn ni mwein Kristian kan, Siohwa ketikihda koapworopwor en mour soutuk pohn sampah. Karasepe ehu, Eipraam pwoson kaiasadao oh awiawih “kahnimw me poahson poatopoat”​—⁠Wehin nanleng me pahnangih e pahn kaiasadahng mour sampah. (Ipru 11:​10, 17-19) Ni ahnsoun imwi wet, Koht kin ketikihong aramas rar kan koapworopwor en mour soutuk pohn sampah nan paradais. (Luk 23:43; Sohn 17:⁠3) Ni mehlel, irail ko koaros me Siohwa ketikihong soahngen koapworopwor kaselel wet anahne uhdahn kasalehda kalahnganki met.

13. Iaduwen ngehn sarawi en Koht kin doadoahk pohn sapwellime aramas?

¹³ Siohwa ketikihong sapwellime aramas kan sapwellime ngehn sarawi nin duwen kisakis ehu. Kristian kan me ahneki koapworopwor en mour nanleng kin keikihdi ngehn sarawi. (1 Sohn 2:20; 5:​1-4, 18) Oh, laduhn Koht kan me ahneki koapworopwor en mour sampah kin ale sawas oh kaweid sang rehn ngehno. Nanpwungarail iei Moses, me ngehnin Siohwa kin ieiang, duwehte ohl 70 ko me idihdda pwehn sewese ih. (Nempe 11:​24, 25) Pahn mwekid en ngehn sarawi, Pesalel kin papah nin duwen emen tohndoadoahk saman me pid impwal sarawi en Israel. (Eksodus 31:​1-11) Ngehnin Koht kin doadoahk pohn Kidion, Sepda, Samson, Depit, Elaisa, Elisa, oh mehteikan. Mendahki aramas en mahs pwukat sohte pahn wisikdohng nan lingan en nanleng, ngehn sarawi kin kaweid oh sewese irail, duwehte me kin wiawihong nein Sises sihpw teikan rahnwet. Eri, ihme, en ngehn sarawi kin kamwekid kitail sohte kin wehwehki me kitail ahneki koapworopwor en mour nanleng. Ahpw mendahki met, ngehnin Siohwa kin ketikihda kaweid, oh sewese kitail en kalohk oh kapwaiada pwukao teikan me Koht ketikihong kitail, oh e kin pil ketikihong kitail kehl me siklasang kehl koaros, oh kapwarehda loaletail ah wah kan en limpoak, peren, popohl, kanengamah, kadek, kamwahu, pwoson, opampap, oh liksang me suwed. (Sohn 16:13; Wiewia 1:8; 2 Korint 4:​7-10; Kalesia 5:​22, 23) Kitail soh pahn kalahnganki kisakis sapan wet sang rehn Koht?

14. Iaduwen atail paikihda sapwellimen Koht kisakis en loalokong oh erpit?

¹⁴ Loalokong oh erpit iei kisakis kei sang rehn Koht me kitail en kalahnganki, mendahki ma atail koapworopwor iei nanleng de nan sampah. Loalokong pwung en Siohwa kin sewese kitail en “kak pilada dahme keieu mwahu” oh “mour nin duwen me Kauno [Siohwa] kin ketin kupwurki.” (Pilipai 1:​9-11; Kolose 1:​9, 10) Loalokong en Koht kin wia perepe ehu oh kaweidpen mour. (Lepin Padahkl 4:​5-7; Eklesiasdes 7:12) Loalokng pwung oh erpit kin poahsoanda pohn Mahsan en Koht, oh me keidi malaulau kan me wie momourte kin keieu perenki dahme e kin koasoiahki arail koapworopwor en nanleng. Ahpw, limpoak ong Mahsan en Koht oh wehwehkihla mwahu audepe kan sohte kin wia mehn kadehde me met iei elen sapwellimen Koht mehn kadehde me kitail ahneki koapworopwor en mour nanleng. Ohl akan me duwehte Moses oh Daniel kin pil ntingihda ekei pwuhk en Paipel kan, ahpw re pahn kaiasadahng mour pohn sampah. Mendahki ma atail koapworopwor iei en mour nanleng de mour nan sampah, kitail koaros kin ale mwengehn ngehn sang rehn sapwellimen Siohwa “ladu lelepek oh loalokong” me e kin ketin kupwurki. (Madiu 24:​45-47) Ia uwen kitail koaros kin kalahnganki loalokong me kitail alehda!

15. Ia ehu sapwellimen Koht kisakis me keieu laud, oh iaduwen komw kin kilangwohng met?

¹⁵ Ehu kisakis en Koht me keiou lapalahpie iei koasoandi limpoak en meirong tomw en Sises, me kapaikitailda mendahki ma atail koapworopwor iei en mour nanleng de nan sampah. Koht poakohng tohnsampah “me e ketikihdohki sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Oh limpoak en Sises kamwekidada ih “en tounmeteikihla moure, pwe me ngeder en maiauda.” (Madiu 20:28) Nin duwen me wahnpoaron Sohn kawehwehda, Sises Krais “tomwkiher dipatail kan [dipen me keidi kan], ahpw kaidehn dipatailte, pwe pil dipen aramas koaros.” (1 Sohn 2:​1, 2) Ihme karehda, kitail koaros en uhdahn kalahnganki koasoandi limpoak wet me kohda ong komour pwehn kak mour soutuk.b

Komw Pahn Iang Mih Wasao?

16. Kasarawi en wiewia kesempwal dahieu me pahn wiawi mwurin kihrlahn ketipino ni April 11, 1998, oh ihs me pahn iang towehda?

¹⁶ Kalahnganki tomwo me Koht ketikihda ki sapwellime Ohlo pahn kawekid kitail en iang mih nan Kingdom Hall oh wasa teikan me Sounkadehde kan en Siohwa pahn pokonpene ie mwurin kihrlahn ketipino ni April 11, 1998, pwehn katamanda matalahn Krais. Ni ahnsou me e tepin wia kasarawi wet rehn sapwellime wahnpoaron lelepek kan ni kaimwseklahn ah mour pohn sampah, Sises mahsanih: “Kumwail wia met ong ni katamanpei.” (Luk 22:​19, 20; Madiu 26:​26-30) Luhwen me keidi malaulau kan me momourte pahn tungoale pilawa soh mweto me kin wehwehki paliwar unsek en Sises oh nim wain weitahtao me kin wehwehki ntahn Sises me kapwilpwildi ni meirongo. Kristian kante me pwekipwekihda ngehn me pahn tungoale pilawao oh nim waino pwehki irail kelepw me mih nan inou kapwo oh nan inoun Wehio oh irail pil ahneki mehn kadehde mehlel sang rehn ngehn sarawi en Koht me arail koapworopwor iei en mour nanleng. Me rar teikan pahn iang mih wasao pwehn iang kawahuwih, irail kan me kalahnganki limpoak me Siohwa oh Krais kasalehda me pid meirong en Sises me karehda mour soutuk en kak mie.​—⁠Rom 6:⁠23.

17. Dahme kitail anahne tamataman me pid keieki ngehn?

¹⁷ Padahk kan en mahs, oh pepehm kehlail me kin kohsang mehlahn kompoakepahn emen, oh kahpwal akan me kin lelohng atail mour nan ahnsouwet, de pepehm me emen alehda kapai tohrohr kei sang rehn Siohwa ele kak karehong ekei en sapwungala oh lemeleme me irail pahn mour nanleng. Ahpw kitail koaros en tamataman me Pwuhk Sarawi sohte kin kehkehlikiong kitail en tungoale pilawa oh nim wain en Katamano pwehn kasalehda atail kalahnganki meirong tomw en Krais. Pil ehu, keikihdi ngehn “kin poahsoanda pohn kaidehn meno me men ale de pohn meno me aleiehr, ahpw e kin poahsoanda pohn Koht,” Meno me pwekida Sises nin duwen seri men ni pali ngehn oh kahredohng seri teikante 144,000 nan lingan.​—⁠Rom 9:16; Aiseia 64:⁠8.

18. Ong pali moron en irail ko me kin papah Siohwa rahnwet, kapai dah kei mihmi mwowe?

¹⁸ Mour soutuk nan paradais nin sampah iei koapworopwor me Koht ketikihda ong pali moaron en aramas kan me kin papah Siohwa ni imwin rahn pwukat. (2 Timoty 3:​1-5) Ni ahnsou keren, re pahn paikihda paradais kaselel wet. Soupeidi kan eri pahn apwalihala wiewia kan nan sampah pahn kaundahn nanleng. (Melkahka 45:16) Irair meleilei kan pahn miehla nin doken tohnsampah pahn peikiong kosonned kan en Koht oh sukuhl laud duwen elen Siohwa kan. (Aiseia 9:​6, 7; Kaudial 20:12) Doadoahk tohto pahn mie ong kokou ihmw oh apwalih sampah. (Aiseia 65:​17-25) Oh medewehla duwen kaperen en peneinei kan ahr pahn tuhpene ni ahnsou me arail peneinei kan me mehla pahn pwurehng kaiasadahng mour! (Sohn 5:​28, 29) Mwurin kaimwseklahn kasongosong me pahn wiawi, me suwed kan koaros pahn kasorala. (Kaudial 20:​7-10) Mwuri ong ahnsou kohkohlahte, sampah pahn dirkihla aramas unsek kan me pahn ‘maiaudahsang mouren liduwih mehla, oh pahn iang sapwellimen Koht seri kan nan arail saledek lingan.’

Ripoht En Sounkalohk Kan En Wehio

E Diarada Ehu “Takai Kesempwal”

“WEHIN Koht rasehng sounnet emen me raparapahkiseli takai kesempwal. E lao diarada me ieu me keieu kesempwahlie, e ahpw kohla netikihla eh dipwisou kan koaros, pwe en pwainda takai kesempwalo.” Mahsen en Sises wet kin kasansalehda ia uwen kesempwal, Wehin Koht. (Madiu 13:45, 46) Irail kan me pohnese duwen kesempwalpen Wehio kin tohnmeteiki pein ahr ahnsou oh mwohni kan pwehn kak ahnekihla Wehio. Ekspiriens me wiawi nan Pingtung County, Taiwan pahn kasalehda duwen met.

Nan 1991, Mr. oh Mrs. Lin tepida onop Paipel rehn Sounkadehdehn Siohwa kan. Ni ahnsou me emen kaun en pelien lamalam en wasao rongada duwen met, e nantiong song en padahkiong ira en iangala eh pelien lamalam. Pwehki pwopwoud wet ahneki pisnes en netiki ntahn pwihk oh ntahn tehk ni market nan ara wasa, ira idek rehn kaun en lamalam menet duwen eh madamadau ma ara pisnes pwung de soh. E sapengki ira, “Soahng koaros me Koht kapikada, kitail kak kang.” Ahpw ni pali teio, Sounkadehde kan en Siohwa kin kangoangekin ira en medemedewe dahme sapwellimen Koht Mahsen mahsanihki duwen irewet. Ira sukuhlikier me Siohwa Koht kin kesempwaliki nta, pwe “mour en mehkoaros me momour kin mihmi nan nta.” (Lipai 17:10, 11, The New English Bible) Kristian mehlel akan anahne “liksang . . . nta.” (Wiewia 15:20) Mwurin pwopwoudo kasawihada iren Paipel wet me pid oaralap wet, ira wiahda ara pilipil en sohla netiki nta, edetehn met iei ara doadoahk en mwohni. Ahpw ni ahnsou mwotomwot mwuri, ira pil lelong ehu kasongosong laudsang met.

Mwohn pwopwoudo sukuhliki padahk mehlel, ira padokedi tuhke pwuh 1,300 nan sahpwara. Mendahki e pahn reireiki sounpahr limau pwe tuhke kan koaros en kak tepida wah mwahu, pwopwoudo kaskasik en alehkihsang met tala $77,000 ehu ehu sounpahr. Ni ahnsou me keieun rahk kerendo, pwopwoudo anahne wiahda ara pilipil kesempwal. Ira sukuhliki sang ara onop Paipel me Kristian kan anahne kamwakeleirailsang “mehkoaros me kin kasaminehla paliwar oh pali ngehn” ni ahr pahn liksang doadoahngki oh netkihla wiewia samin kan duwehte tipaker oh wini suwed oh kang pwuh. (2 Korint 7:1) Dahme re pahn wia?

Pwehki eh nsen mwakelekel kin koarompwa ih, Mr. Lin koasoanehdi en uhdi sang eh onop Paipel. Ni ahnsowo, Mrs. Lin netikihla ara pwuh kan sang ara tuhke mah kan oh ira wihnkihda tala $3,000. Ma ira pousehla ara pisnes, ira pahn kepwepwehla. Ahpw nsen mwakelekel en Mr. Lin kin koarompwa ih.

E nsensuwedki irewet lao ehu rahn e peki rehn Sounkadehde kan en peledi eh tuhke kan ong ih. Ahpw Sounkadehde pwukat kawehwehda, me met pein ih me pahn pilada; ihme konehng ‘pein ih en wa eh wisik’ oh peledi eh tuhke kan. (Kalesia 6:​4, 5) Irail kangoange ih en tamanda inou me pwarada nan pwuhken 1 Korint 10:13, me mahsanih: “Pwe songosong koaros me kin lelohng kumwail, ih me kin lelohng kumwail. Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” Sounkadehde kan pil kin sewese ohlo en wehwehki: “Ma kiht me peledi ahmw tuhke kan, mwein ke kak kohluhkihla met ehu rahn oh kapwukoahkin kiht.” Ahnsoukis mwuri, Mrs. Lin pirkihda ngihlen rasaras. Ei, eh pwoudo oh neira seri kan pelepelehdi tuhkehn pwuh kan!

Mr. Lin diarada me Siohwa kin mehlel oh kin kapwaiada sapwellime inou kan. E diarada doadoahk ehu, oh met imwikihla eh ahneki nsen mwakelekel, oh met e kakehr wiahla emen me kin kapinga Siohwa. E pepdaisla nan kapokon en circuit en Sounkadehdehn Siohwa kan nan April 1996.

Ei, Mr. Lin “netikihla soahng koaros me e naineki” oh pwainda “takai me inenen kesempwal.” Ni ahnsouwet e ahneki pwais kaselel ehu en ahneki nanpwung mwahu rehn Siohwa Koht oh papah sapwellime kupwur kan me pid Wehio.