pwopwoud tohto en mihmihpene oh kolokol peneinei minimin ehu? Ia mehn kapir en irail ko me kin mihmihpene erein arail mour, me irail pil kak koanoahdi katamanda arail kapwopwoud me irall pwopwoudki erein sounpar 25 oh sounpar 50? Nan 1983 ripoht kasalehda me mie pwopwoud ehu nan wasa me mahs wia Soviet republic en Azerbaijan me katamanda ara kapwopwoud me ira pwopwoudki erein sounpar 100​—ni en emen mahki sounpar 126 oh emen 116.

Dahme Kin Wia Keper?

Nan sahpw tohto ekei kahrepe kosonned kin mweidong mweipeseng en wiawi iei pwehki kamwahl, wiekau ni pelien madamadau oh paliwar, emen rehra pahn tang, kamamsakau, luwet, saliel, pwoudiki tohto sang emen, oh tengala pahn doadnahngki wini suwed. Ahpw, ehu kahrepe me e kalap wiawihki iei pwehki lamalam ong pwopwoud oh mour en peneinei kin inenen wekla, keieu erein sounpar keren pwukat. Wauneki koasoandi en pwopwoud me sangete mahs kin wia mehkot sarawi kin sohla. Irail me noahrok kan me kin wiahda koul kan, kasdo kan, kasdohn limpoak kan nan T.V., oh pwuhk ndand kan kin kalinganada saledek en wendipene, nenek, tiahk samin, oh koasoandi en mouren roporop. Re kin utungada tiahk en mour ehu me kin kasaminehla madamadau oh mohngiong en me pwulopwul kan oh me mah kan.

Ehu roporop nan 1996 kasalehda me persent 22 en mehn Amerika kan kin kose me kamwahl kin ekei pak mwahu ong pwopwoud ehu. Ehu issue en nain Sweden nuhspehpa me keieu laud, me adaneki Aftonbladet, kin kangoangehki lih kan en mweisang arail pwoud kan pwehki “e pahn kamwahuwiala arail irair.” Irail kan me kin onopki madamadau en aramas oh irail kan me kin onopki tiahk en aramas kin kose me dene evolution [padahk me dene aramas tepsang mahn mongki] “koasoansoandiehr nan loalen aramas” en welianda arail pwoud kan sounpar koaros. Met kin wehwehki me, re kin koasoia me kamwahl oh mweipeseng en pwopwoud kin wia mehkot me aramas uhdahn pahn wia. Ekei kin pil akamaiki me dene mweipeseng en pahpa oh nohno pahn pil mwahu ong seri kan, pwe e pahn kaunopada seri kan en apwaliala pein arail mweipeseng en pwopwoud ehu rahn!

Me pwulopwul tohto solahr inengieng mourki koasoandi pwung en peneinei, me kin audaudki pahpa, nohno, oh seri kan. Ehu lamalam ndand iei: “I sohte kak medewehda en mourki ahi mour en rahn koaros rehn aramas tehmen.” Emen me pwulopwul en Denmark me mahki sounpar 18 koasoia: “Pwopwoud kin duwehte Krismas, duwehte soai ehu. I sohte kamehlele met.” Noreen Byrne en National Women’s Council nan Ireland koasoia: “Pepehmo iei, menda ken pwopwoudla oh wia doadoahk en nan ihmw. Kohlahte oh kaperenikin uhk irail ni ahmw sohte pahn pwoudkin irail . . . Lih tohto koasoanediehr me re sohte anahne ohl pwe ren kak mour.”

Peneinei Me Audaudki Nohno te Wie Kekeirada

Nan Iurop pwon lamalam wet kin karehda kekeirada mwadang en nohno kan me sohte pwopwoud. Ekei nohno pwukat me sohte pwopwoud iei me pwulopwul [teenage] kan me kin pepehm me arail liseianda me re sohte pilahn en wiawi kaidnhn sapwungala ehu. Me malaulau kan nanpwungarail iei lih kan me men kelehpw apwaliada neirail serio. Pali moron en irail iei nohno kan me kin mih rehn pahpahn serio ahnsou kis, ahpw sohte pilahn en pwoudkihda. Makasihno Newsweek kasalehda duwen koasoi ehu pahr samwalahro me pid peideko “Mehlahn Pwopwoud?” E koasoia me seri kan me kin wiawihda likin pwopwoud kin inenen kekeirada mwadang nan Iurop oh sohte me nsenohki. Sweden me keiou nan ire wet, persent 50 en seri kan nan sahpw wet kin wiawihda likin pwopwoud. Nan Denmark oh Norway kereniong persent 50 en seri kan kin wiawihda likin pwopwoud, oh nan France oh England, mpen seri men sang nanpwungen meh 3.

Nan United States, peneinei kan me audaudki pahpa oh nohno kin inenen malaulaula nan pahr samwalahro ko. Ehu ripoht koasoia: “Nan 1960, . . . persent 9 en seri kan koaros kin kousoan nan peneinei kan me audaudki nohno te. Lau lel nan 1990, nempeo keirkihda persent 25. Rahnwet, persent 27.1 en seri en Amerika koaros kin wiawihda nan peneinei me audaudki nohno kelehpw, nempe ehu me wia kekeirada. . . . Sangete 1970, nempehn peneinei kan me audaudki nohno kelehpw kin tohtohla pahn pak riau. Koasoandi en peneinei me kin audaudki pahpa, nohno, oh seri kan milahr nan keper rahnwet me kak karehong en sohla wiawi, ekei sounroporop kan koasoia.”

Nan sahpw kan me Sarawi en Roman Catholic solahr kak kihda kaweid en tiahk mwakelekel, peneinei kan me audaudki nohno kelehpw kin wie kekeirada. Tikitiksang persent 50 en peneinei en Itali koaros kin audaudki nohno, pahpa, oh seri kan, oh koasoandi en soahngen peneinei wet kin wilialikihda pwopwoud kan me sohte naineki seri oh peneinei kan me audaudki nohno kelehpw.

Koasoandi en apwali me semwehmwe kan me koperment kin kihda nan ekei sahpw kin uhdahn kangoange aramas kan en dehr pwopwoudida. Nohno kiripw kan me kin ale sawas kan sang koperment pahn luhs sang sawas pwukat ma re pwopwoudida. Nohno kiripw kan nan Denmark kin ale sawas en pelien mwohni ong apwalihki neirail seri, oh nan ekei kousapw, serepein kan me nohn pwulopwul pahnangin sounpar 18 ahpw neitik kin ale sawas en mwohni oh koperment kin pwainla en serepein pwukat arail rent. Ihme karehda mwohni kin pidada met. Alf B. Svensson koasoia me mweipeseng ehu nan Sweden kin kaluhsikihla irail kan me kin pwain taks nanpwungen uwen tala kid 250 oh kid 375 ni sawas en mwohni, pweinen ihmw, oh sawas sang wehipokon.

Sarawi kan en Kristendom mwomwen sohte kin wia mehkot pwehn wekidala irair suwed wet nanpwungen peneinei kan. Sounpadahk kan oh kaun en pelien lamalam tohto kin nantiong kamwahuwiala kahpwal nan pein arail peneinei, oh re pehm me re sohte kak sewese meteikan. Ekei kin pwungki mweipeseng en pwopwoud. Nuhspehpao me adaneki Aftonbladet en April 15, 1996, ripohtki me sounpadahk Steven Allen sang Bradford, England, wiahda kasarawi tohrohr en mweipeseng, me e koasoia me pahn wiahla padahk manaman en mweipeseng nan sarawi koaros en Britain. E koasoia: “E wia padahk en kamwahu ehu en sewese emen en pohnese dahme wiawi ong irail. E sewese irail en wehwehki me Koht limpoak ongete irail oh kasaledek irail sang medek me re mihla loale.”

Eri iawasa koasoandi en peneinei kohkohla ie? Mie koapworopwor me e pahn pitla? Ehu ehu peneinei kak kolokolte arail miniminpene nindoken arail mihla pahn soahngen keper laud wet? Menlau tehk artikel en mwuri.

Peneinei​—Mehkot Me Aramas Anahne!

ARAMAS KIN kose me koasoandi en aramas kin pweida mwahu ma peneinei kan km pweida mwahu. Poadoapoad kasalehda me ni ahnsou me koasoandi en peneinei kin ohla, kehl en kousapw kan oh wehi kan kin pil luwetla. Ni ahnsou me tiahk samin kauwehla peneinei ken nan Krihs en mahsie, ah koasoandio pil ohla, me karehong en mengeiong en lohdi pahn mehn Rom kan. Kaundahn Rom kin kehlailte ma peneinei kin kehlail. Ahpw erein sounpar epwiki kei me dower powe, mouren peneinei kin luwetla, oh kehl en ah wehio kin pil luwetla. Charles W. Eliot, ohl me win president en Harvard University mahso koasoia: “Dahme koasoandi en aramas kin keieu nsenohki iei irair en tengeteng oh irair en ile en peneinei oh mouren peneinei oh ihme paien wehi kin keieu nannantiong.”

Ehi, aramas anahne peneinei. Lipwen peneinei kin karehda tengeteng en koasoandi en aramas oh kin kamwahu ong seri kan oh ong dih kan en mwuhr. Ni sohpeikidpe, mie nohno kiripw tohto me kin doadoahk laud pwehn kekeirada seri kan me peik, oh lih pwukat en ale kaping pwehki arail doadoahk laud. Ahpw, roporop kan kasalehda me seri kan pahn kalap kekeirada mwahu ma re kousoan nan arail peneinei rehn arail pahpa oh nohno.

Ehu onop nan Australia me wiawihong me pwulopwul pohnangin meh 2,100 diarada me “me pwulopwul kan me kohsang peneinei kan me ohla kin ahneki kahpwal en pali en roson tohto, oh re kin ahneki kahpwal en pelien pepehm, oh kin kalapw iang wia tiahk en nenek laudsang seri kan me kohsang peneinei me tengeteng.” Ehu roporop me U.S. National Institutes en Health Statistics wiahiong seri 17,000 kasalehda me seri kan me kohsang peneinei kan me ohla kin mengeiong lellohng aksident me mihmi ni uwen persent 20-30, oh persent 40-75 en irail kin pwurehng kapwurehiong arail sukuhl me re sohte pweida loale, oh persent 70 en irail kin lekdeksang nan sukuhl.“ Oh emen sounkeseu ripohtki me “seri kan me kohsang peneinei kan me nohno kelehpw kin kalapw iang pidada nan tiahk en mwersuwed laudsang irail ko me tikida nan peneinei me audaudki pahpa, nohno, oh seri kan.”

Imwen Peneinei Wia Wasahn Ruk

Koasoandi en peneinei kin kihda wasahn kousoan ehu me kaperen, kakehlail, oh kansenamwahu ong koaros. Emen me loalokong en Sweden koasoaia: “Utupen nsenamwahu oh loalemwahu me keieu kesempwal kaidehn doadoahk en mwohni, de kepwe kan, de mehn kamweit kan, de kompoakepah kan ahpw peneinei.”

Paipel kasalehda me peneinei koaros pohn sampah pweipwandki ederail ong Sounkapikada Lapalap en peneinei, Siohwa Koht, pwehki ih me tepiada koasoandi en peneinei. (Senesis 1:27, 28; 2:23, 24; Episos 3:14, 15) Ahpw, nan Pwuhk Sarawi, wahnpoaron Pohl kohpada duwen uhwong kehlail me pahn wiawihong mouren peneinei, me pahn imwikihla ohlahn tiahk mwakelekel oh ohlahn koasoandi en aramas likin mwomwohdisohn Kristian. E mahsanih me “imwin rahn” pahn sansalkihda salelepek, “sempoak,” oh sapeik ong pahpa oh nohno, oh met pahn pil wiawi nanpwungen irail ko me kin “liksansalamwahuki mwomwen atail pelien lamalam.” E kangoangehki Kristian akan en kalekekin irail soahngen aramas pwukat. Sises kohpada me uhwong padahk mehlel en Koht pahn katohrepeseng peneinei kan.​—2 Timoty 3:1-5; Madiu 10:32—37.

Ahpw, Koht sohte ketin meliehla kitail oh sohte ketikihda sawas. Kaweid tohto kin kileledi nan sapwellime Mahsan me pid nanpwungen peneinei kan. E padahkihong kitail iaduwen kitail kak wiahiong atail peneinei en pweida mwahu oh imwetail en wia wasa kaperen ehu me emenemen tohnpeneinei ahneki pwukoah en kapwaiada ong meteikan.a—Episos 5:33; 6:1-4.

Soahngen nanpwung kaperen pwukat en peneinei kak mie nan rahnpwukat ni en mouren peneinei milahr nan keper? Ehi, uhdahn! Komw kak pweida ni omw pahn winhiong mouren ahmw peneinei en wia wasahn ruk ehu me kaperen, oh kansenamwahu nan sampah wet me lemei, oh rasehng sapwtehn. Ahpw pwe met en kak wiawi, tohnpeneinei koaros anahne wia mehkot. Iren sawas kei kin pwarada pah.

Sewese Ahmw Peneinei en Pitla

Ehu ahl me keieu mwahu me kak kaminiminpene ehu peneinei iei arail pahn ahneki ahnsou ong arail tohnpeneinei. Tohnpeneinei koaros anahne ehukihpene arail ahnsou kan ni ahnsou me re kin pisek. Met kin wehwehki me re anahne tohnmeteikihla ekei arail ahnsoun kommoal kan. Karasepe ehu, kumwail me pwulopwul kan, ele kumwail pahn anahne tohnmeteikihla ekei prokram en T.V. kan me kumwail kin keieu perenki, de mwadong ehu, de amwail pahn iang kompoakepahmwail kan mwemweit. Kumwail pahpa kan, me kin keieu wahdo nein peneinei sent, dehr doadoahngki ahnsoun amwail kommoal ongete mehkan me kumwail kelehpw pahn wia. Pilahnih dahme kumwail pahn wia rehn amwail peneinei, ele mwein dahme kumwail tohnpeneinei pwon pahn wiapene ni imwin wihk kan de ni omw kommoal sang doadoahk de seri kan pahn kommoal sang sukuhl. Ni mehlel, pilahnih mehkot me tohnpeneinei pwon pahn kin kasikasik oh paiekihda.

Seri kan anahne en pahpa oh nohno ahnsou me laud sang elep en awa de awa ehu ahnsou kan. Pahpa oh nohno anahne ehukihong neirail seri kan ahnsou laud. Emen sounnting nan nuhspehpa en Sweden ehu ntingihdi: “Erein sounpar 15 me ih wia emen sounnuhs, I kin tuhwong seri ketihwo tohto . . . Mehkot me irail koaros kin duwepeneki iei me re tikida sohte kalap ehuong arail pahpa oh nohno. Sen ko kin nda: ‘Sohte en ahi pahpa oh nohno ahnsou ong ie.’ ‘Re Sohte kin rong ie.’ ‘Ahi pahpa kalap seiloak.’ . . . Nin duwen pahpa oh nohno men, kumwail kak ahnsou koaros pilada ia uwen laud en amwail ahnsou me kumwail pahn kihong noumwail seri kan. Amwail pilipil palm sansalda sounpar 15 mwuri sang rehn seri sounpar 15 ketihwo men.”

Lamalam Pwung ong Mwohni

Tohnpeneinei pwon anahne kekeirada arail lamalam pwung ong mwohni. Re pahn men ehukihpene dahme re kakohng pwehn pwainda anahn en peneinei. Lih tohto kin anahne doadoahk en mwohni pwehn sewese mouren peneinei, ahpw kumwail lih pwopwoud kan anahne pohnese keper kan oh kasongosong kan me kumwail kakete lellohng. Sampah wet kin kangoangehki kumwail en “kaitarala” pein amwail koahiek oh en “wia dahme kumwail pein men wia.” Met kak karehong kumwail en men pein uhtohrda oh sohla nsenamwahuki amwail pwukoahn nohno oh sounepwelpen nan ihmw me kohsang rehn Koht.​—Taitus 2:4, 5.

Ma kumwail nohno kan kin mih nan ihmw oh kin wia sounkaweid oh kompoakepahn noumwail seri kan, e uhdahn pahn karehda selen limpoak en peneinei en kehlailla me pahn sewese kolpene