ikmwuri kamwakelehdahr ah mour. Dahme rie kan ni pali ngehn pahn wia? Ren kalikamwe ah koluhla oh pouselahte dehr patohng? Me weksang met, Pohl kangoangehki mehn Korint kan: “Eri met, kumwail mahkohng oh sewesehda, pwe eh nsensuwed dehr lalaudla oh kauwehla eh mouren souleng. Eri, I peki rehmwail ni ngidingid, kumwail en kasalehiong amwail limpoak mehlel.” (2 Korint 2:​7, 8) Ahnsou koaros, irail kan me kin wiahda dihp ahpw mwuhr koluhkihla kin pehmitikiong pepehm en namenek oh nsensuwed. Ihme kahrehda, irail pwukat anahne en ale mehn kamehlel me iengerail me pwoson kan oh Siohwa kin poakohng irail. (Seremaia 31:3; Rom 1:12) Met me kesempwal. Dahme kahrehda?

18, 19. (a) Iaduwen mehn Korint kan mwowe kasalehda me re kin nohn mweidala wia nsenarail? (b) Iaduwen lamalam en soh mahk kak imwikihla “Sehdan en powehdi” mehn Korint kan?

¹⁸ Ni ah kaweidih Kristian kan en kasalehda mahk, Pohl kasalehda ia ehu kahrepen met “pwe Sehdan en dehr powekitaildi; pwe kitail eseier duwen eh koasoandi kan.” (2 Korint 2:11) Ia wehwehn mahsen en Pohl wasaht? Eri, mwowe Pohl anahne kihda kaweid kehlail ohng mwomwohdisohn Korint pwehki e nohn mweidala towe kan en wia pein nsenarail. Re mweidalahte ohl menette en wiewia dihp ni soh kalokepe. Ni arail wia met, mwomwohdiso​—⁠keieu elder kan nan mwomwohdiso​—⁠kin mwekid ni ahl ehu me kin kaperenda Sehdan, pwe e men kahrehong irair en mwomwohdiso en sohla likilik.​—1 Korint 5:​1-5.

¹⁹ Ma met elder kan nohn daulihla oh sohte men mahkohng emen me koluhla, Sehdan pahn poweiraildi ni ahl teio. Iaduwen? Iei me e pahn isaneki arail lemei oh soh mahk. Ma me dipan koluhlao “eh nsensuwed lalaudla oh kauwehla eh mouren souleng”​—⁠de nin duwen me Paipelo Today’s English Version kawehwehda, “nsensuwedla lau re sohla men pwuredo”​—⁠ia uwen elder kan pwukoahki laud met mwohn Siohwa! (Pil Kalang Esekiel 34:6; Seims 3:⁠1) Ki kahrepe mwahu, mwurin ah kaweidih sapwellime werek kan en dehr kadipikelekelih “emen me tikitik pwukat,” Sises mahsanih: “Kumwail eri kaleke pein kumwail! Ma riomw men dipada, kopwungala ni meleilei; oh ma e koluhla, mahkohng.”a​—Luk 17:​1-4.

20. Ni ahl dahieu pahn mie peren nanleng oh sampah ni ahnsou me aramas dipan men koluhla?

²⁰ Me kid kan me pwuredohng kaudok mwakelekel ehuehu sounpar kin kalahnganki mahk me Siohwa kin kasalehong irail. Emen sister Kristian kosoiahki ah kasapahldo: “I sohte tamanda ahnsou ehu nan ahi mour me I inenen perenki mehkot duwehte met.” Ni mehlel, tohnleng kan kin iang ih peren. Kitail en pil iang “nanleng perenda” ni ahnsou me emen me dipan kin koluhla. (Luk 15:⁠7) Ni atail wia met, kitail kin kahlemengih sapwellimen Siohwa mahk.

Koht Kin Kamwekid Omw Mour?

NI ahnsou me ke kin lellong kahpwal kapwunod kan, ke kin mengeiki pwarwohng Koht ni kapakap? Ma ehi, eri ke kin pehm me ke kapakap ong Koht emen me uhdahn mie?

Ni ah mahsanih duwen Semeo nanleng, Sises Krais mahsanih: “A ih me ketin kadariehdo, e uhdahn mie.” (Sohn 7:​28, New World Translation) Ehi, Siohwa Koht uhdahn mie, oh kapakapohng ih kin duwehte sohpeilahng emen kompoakepatail keren pwehn ale sawas de kaweid. Ni mehlel, pwe Koht en ketin karonge kitail, atail kapakap kan anahne en pahrekiong kosonned en Pwuhk Sarawi pwehn wia soahngen kapakap me e kin ketin kupwurki. Karasepe ehu, kitail anahne en ni karakarahk kapakap ohng “Sounkaronge kapakap” ni mwaren sapwellime Ohl, Sises Krais.​—⁠Melkahka 65:2; 138:6; Sohn 14:⁠6.

Ekei kin lemeleme me pwehki Koht me soh sansal, e sohte mie. Ohng irail, Koht kin mihte nan madamadau. Ohng ekei Kristian kan, me sukuhlkiehr sapwellimen Koht irair kaselel kan, re kin apwalki kamehlele me Koht uhdahn mie. Met kin pil wiawihong komwi? Ma ehi, dahme kak sewese komwi en kamehlele me Koht uhdahn mie?

Onopki Pwuhk Sarawi

Ke kin onopki Pwuhk Sarawi kaukaule? Ma ke kin kalap onop Paipel oh ahmw onop kan me loal, eri, ke pahn kak kamehlelehla me Siohwa Koht uhdahn mie oh e kak kamwekid omw mour. Omw pwoson eri pahn kehlailla, oh e pahn uhd kahrehong komwi en kak ‘kilang Meno me soh sansal.’ (Ipru 11:​6, 27) Ni pali teio, ma ke kin onopki Paipel ekeite ahnsou, met sohte pahn kak kakehle omw pwoson.

Pwehn karasahda met: Medewehla me omw toahkte kaweidikin uhk en keieki pwudong ehu me sohte kak mwahula wini ehu pak riau nan rahn ehu pwehn kamwahuwiala pwudongo. Pwudongo pahn kak mwahula ma ke kin keieki winio pak ehute de pak riaute nan sounpwong ehu? Met sohte pahn kamwahuwiala pwudongo. Me rasehng met, sounmelkahkao kihong kitail “kisinlikoun kaweid sang rehn toahkte” ong roson en pali ngehn. Wadek Mahsen en Koht “nin rahn oh nipwong.” (Melkahka 1:​1, 2) Pwehn paiekihda laud met, kitail anahne idawehn “kisinlikoun kaweid en toahkte”​—⁠rahn koaros wadek Mahsen en Koht iangahki sawas en pwuhk kan en Kristian.​—⁠Sosua 1:⁠8.

Ke men omw onop en kakehlailla omw pwoson? Iet ehu mehn sawas: Mwurin omw wadek ehu irelaud pwon nan New World Translation of the Holy Scriptures de ehu Paipel me audaudki iren Paipel kan me kin kawehwe ehuehu iretikitik kan, pilada ehu iretikitik oh pahkalahng iren Paipel kan me kin kawehwe iretikitiko. Met pahn kaloalehla omw onop, oh ni mehlel ke pahn pwuriamweikihla duwen parekpenen iren Paipel kan koaros. Met pahn imwikihla me Ih me sapwellimaniki Paipel uhdahn mehlel nan omw mour.

Doadoahngki iren Paipel kan me kin kawehwe iretikitik kan en ehuehu iren Paipel pahn kahrehong uhk en wehwehkihla kokohp en Paipel kan oh pweidahn kokohp kan. Ele ke wehwehki kokohp laud kan en Paipel, duwehte kokohp ko me pid en Papilon kauwehla Serusalem. Ahpw, Paipel kin audaudki kokohp tohto oh ehuehu kokohp pwukat oh pweidahn kokohp pwukat kin kadoadoahkpene. Ekei kokohp pwukat aramas tohto saikinte wehwehki.

Karasepe ehu, wadek kokohpo me pid duwen kalokepen pwurehng kauwada sapahl Seriko oh eri wadek duwen pweidahn kokohpo. Sosua 6:26 mahsanih: “Ni ahnsowo Sosua ahpw kihda pakair kehlail ehu: ‘Mehmen me pahn song kauwada sapahl kahnimw wet, Seriko, e pahn riahla pahn Siohwa. Mehmen me pahn wiahda poahsoan en kahnimw wet, nah mesenih wol pahn mehla; mehmen me pahn kauwada wenihmwen kehl wet, nah pekindihdi pahn mehla.’” Kokohp wet pweida sounpar 500 mwurin met, pwe kitail wadek nan 1 Nanmwarki 16:34: “Nan eh mwehi Iel mehn Pedel kauwada sapahl Seriko. Nin duwen me Sosua nein Nun, kohpadahr sang rehn Kauno (“Siohwa,” NW). Nein Iel pwutak, Aipram mehla ni ahnsou me e wiahda poahsoan en Seriko, oh nah pwutak tikitiko mehla ni ahnsou me e kauwada kehlo.”a Ma sohte Koht, audepen kokohp akan sohte kak pweida.

Nindoken omw wadek Paipel, ke pahn men wehwehkihla duwen ire ehu. Karasepe ehu, ele ke pahn medemedewe me sounpar depe kokohp ehu kin pweida mwurin ah wiawihda. Ieremen ihte kalelepek rehn emen duwen ire wet, ke soh pein rapahkihda pasepengo? Doadoahngki pwuhk kan me wia sawaspen Pwuhk Sarawi oh mehn sawas kan duwehte chart kan, oh ni pwerisek rapahkihda pasepengo duwehte omw kin songosong en rapahkihda kepwe kesempwal kan. (Lepin Padahk 2:​4, 5) Rapahkihda pasepeng ko pahn kamwekidada laud omw pwoson oh pahn kakaranihuhkalahng Siohwa Koht.

Poadidiong Kapakap

Dehr pohnsowehla kesempwalpen kapakap oh pwoson. Sapwellimen Sises tohnpadahk kan wiahda pekipek wet: “Komw ketin kalaudehla at pwoson.” (Luk 17:5) Ma ke sohte nohn kamehlele me Siohwa uhdahn mie de ke pehm me ke sohte karanih Koht, dahme ke soh kapakapong ih oh pekih en kalaudehla omw pwoson? Ni likilik, pekih rehn Samatail nanleng en sewese uhk kakaranihuhkalahng Ih.

Ma kahpwal ehu kin kapwunodehiuhk, wiahda ahnsou me anahn pwehn kasalehda ahmw pepehm ong Kompoakepahmw en Lahng sang nan mohngiongomw. Ni ahnsou me Sises kerenlahng kamakamala, e kin kapakap ngidingid. Mendahki e kin kadeikada tiahk en pelien lamalam akan me kin kapakap reirei mehn liksansalamwahu, e kelehpwla pwohng ehu pwon kapakap mwohn e pilada sapwellime wahnpoaron 12 ko. (Mark 12:​38-40; Luk 6:​12-16) Kitail pil kak ale mehn kasukuhl sang Ana, me wiahla nohnohn soukohp Samuel. Pwehki e men naineki emen pwutak, “e kapakapohng Kauno [“Siohwa,” NW] ahnsou reirei.”​—⁠1 Samuel 1:12.

Ia mehn kasukuhl en met? Ma ke koapworopworki en ale pasapengpen omw kapakap, ke anahne kapakap ni ngoang, oh ngidingid, oh ahnsou koaros​—⁠oh, ni mehlel, en pahrekiong kupwuren Koht. (Luk 22:44; Rom 12:12; 1 Deselonika 5:17; 1 Sohn 5:​13-15) Omw wia met pahn sewese uhk en karanih Koht.

Kilang Kapikipikda Kan

En sounmahlen men irair kan kin sansalda sang ah mahlen kan. Me rasehng met, “irair soh sansal kan” en Siohwa, Sounwiahda oh Sounkapikada en lahng oh sampah, kin sansalda nan kapikipikda kan. (Rom 1:20) Ni ahnsou me kitail kin ni keneinei kasawih wiepen nin lime Siohwa kan, kitail kin wehwehkihla sapwellime irair kan, oh eri kitail pahn kamehlelehla me e uhdahn mie oh kitail kak karanih Ih.

Ma ke kasawih ni keneinei mehkan me Koht ketin kapikada, ke uhdahn pahn pwuriamweikihla mehlel en sapwellimen irair kan. Karasepe ehu, oaritik kan duwen menpihr kan ahr koahiek en ese elen wasa kan me re kin pipihr ie pahn kak kalaudehla omw kalahnganki erpit en Siohwa. Ni omw wadek duwen nan wehwe, ke pahn sukuhlkihdi me mwutumwut en usu kan me adaneki Milky Way, kin dohki sounpar 100,000, oh kin wiahte ehu mwutumwut en usu lik kan nan wehwe. Met soh kin kamwekid uhk en kamehlele me erpit en Sounkapikadao uhdahn mehlel?

Ehi, erpit en Siohwa uhdahn mehlel! Ahpw ia wehwehn met ong komwi? Eri, e uhdahn sohte pahn ketin pwonopwonkihda kahpwal akan me kitail kin kasalehiong ih ni kapakap. Ehi, atail wehwehki ekiste kapikipikda kan kak kahrehong kitail en karanih Siohwa Koht.

Iang Siohwa Kekeid

Ke kak karanih Siohwa Koht? Ehi, ma ke duwehte ohl lelepeko Noha. E kin ahnsou koaros peikiong Siohwa, me kahrehda Paipel en mahsanih: “Noha kin iang Koht mehlelo kekeid.” (Senesis 6:⁠9) Noha kin momour duwehte ma Siohwa kin ketiket limwa. Ke kak karanih Koht duwehte Noha.

Ma ke kin iang Koht kekeid, ke kin likih inou kan en Pwuhk Sarawi oh omw wiewia pahn pahrekiong met. Karasepe ehu, ke kamehlele mahsan en Sises: “Eri, kumwail rapahki mahs Wehin Koht oh dahme e [Koht] kin ketin kupwurki, a soahng teikan koaros [anahn akan en paliwar] e ahpw pahn kin ketikihong kumwail.” (Madiu 6:​25-33) Mehlel, Siohwa ele sohte pahn ahnsou koaros ketikihong komwi dahme ke anahne ni ahlo me ke kasikasik. Ahpw, ni ahnsou me ke kapakap oh eri pehmada en Koht sewese komwi, e pahn sair omw mour duwehte aramas men mihte limwahmw.

Soahngen nanpwung keren wet rehn Siohwa kin kekeirada ni en emen kin ngidingidkihte iang Koht kekeid. Tehk duwen Manuela, emen Sounkadehde me kin doadoahngki lokaiahn Spain, me kin dadaur pahn kasongosong tohto. E koasoia: “Ni ahnsou kan me I kin pwunodada de anahne sawas, I kin kapwaiada mouren kosonned en Paipel me diarek nan Lepin Padahk 18:10. I kin tangala rehn Siohwa pwehn ale sawas. E kin ahnsou koaros wia ahi ‘wasahn doulik kehlail ehu.’” Manuela kak koasoia met pwehki erein sounpar 36 e kin likih Siohwa oh pehm sapwellime sawas.

Ke kin tepiada en wiakihla Siohwa likilikpomw? Dehr mworusala ma omw nanpwung reh saikinte lel irairo me ke mwahuki. Mourki ehuehu rahn duwehte aramas men me kin iang Koht kekeid. Ni omw mourki omw mour ni lelepek, ke pahn paiekihda ahnekihla nanpwung keren ehu rehn Siohwa.​—⁠Melkahka 25:14; Lepin Padahk 3:​26, 32.

Ehu ahl en iang Koht kekeid iei en soupisengkihla sapwellime doadoahk. Ni ahnsou me ke kin iang doadoahk en kalohki Wehio, ke kin wiahla emen iengen Siohwa tohndoadoahk. (1 Korint 3:⁠9) Omw pohnese met pahn sewese komwi en karanih Koht.

Sounmelkahkao kangoangehki: “Mweidohng Kauno [“Siohwa,” NW] pein kowe; likih, e ahpw pahn seweseiuk.” (Melkahka 37:⁠5) Dehr uhdihsang en mweidohng Koht omw katoutou kan de pwunod kan. Ahnsou koaros kilangwohng pwehn ketikihda sawas oh kaweid. Ma ke kin likih Siohwa Koht oh kin ahnsou koaros koapworopworki unsek, ke pahn pehm meleilei pwehki ke ese me e uhdahn pahn sewese uhk. Ke ahneki likilik ni ahnsou me ke kin kapakapkiohng Siohwa pein omw pwunod kan? Ke pahn wia met​—⁠ma ke kin kamehlele me ke kak karanih Koht.