Peneinei​—Irair Ehu Me Karuwaru!

“OH re mour nsenamwahu kohkohlahte.” Imwilahn soai wet kin kadoadoahk ongete pwopwoud malaulau rahnpwukat. Inoun kapwopwoud en limpoak ong emenemen ‘ni ahnsou mwahu de suwed erein ara mour’ kin ihte wia lepin lokaia kei. Pwehn kak ahneki peneinei ehu me nsenamwahu kin wia mwomwen mehkot me sohte kak pweida pwehki soahng kan me kin uhwong.

Nanpwungen 1960 oh 1990, mweipeseng kan kin kekeirada pahn pak riau nan pali tohtohn ekei sahpw kan nan Iurop oh North oh South Amerika. Nan ekei sahpw e tohtohla pahn pak pahieu. Karasepe ehu, nan pahr koaros mpen pwopwoud 35,000 kin wiawihda nan Sweden, oh mpen meh 17,000 en pwopwoud pwukat pahn mweipeseng, me kin pidada seri pohnangin meh 45,000. Ohl akan oh lih kan me kin mihpene ahpw sohte kapwopwoud oh kin mweipeseng kin pil wie kekeirada laud, oh kin pil kahpwaliala seri kid kid kei. Irair wette kin pil wie pwarapwarada nan sahpw akan nan sampah pwon, duwen me sansalda nan koakon ni pali 5.

Mehlel, peneinei pingiping kan oh mweipeseng en pwopwoud kan sohte kin wia mehkot kapw nan poadoapoad. Kosonned en Hammurabi en senturi 18 B.C.E. kin pil audaudki kosonned kan me kin mweidohng mweipeseng en wiawi. Pil Kosonned en Moses, me wiawihda nan senturi 16 B.C.E., kin pil mweidohng mweipeseng en wiawi nan Israel. (Deuderonomi 24:1) Ahpw, selen peneinei sohte luwet duwehte nan senturi 20 wet. Sounpar eisek samwa samwalahro, emen sounnting en nuhspehpa ntingihdi: “Sounpar limeisek sang met, ele kitail solahr pahn ahneki peneinei kan ni irair me kin wiawi sangete mahso. Ele re pahn wilialikihdi soangsoangen pwihn kan.” Oh irairo sangete ahnsouwo kin pwungiong dahme e koasoia. Koasoandi en peneinei kin inenen suwedla me karehda peideko, “E kak pitla?” kin inenen konehng en kalelepek.

Dahme karehda e inenen apwalkihong pwopwoud tohto en mihmihpene oh kolokol peneinei minimin ehu? Ia mehn kapir en irail ko me kin mihmihpene erein arail mour, me irail pil kak koanoahdi katamanda arail kapwopwoud me irall pwopwoudki erein sounpar 25 oh sounpar 50? Nan 1983 ripoht kasalehda me mie pwopwoud ehu nan wasa me mahs wia Soviet republic en Azerbaijan me katamanda ara kapwopwoud me ira pwopwoudki erein sounpar 100​—ni en emen mahki sounpar 126 oh emen 116.

Dahme Kin Wia Keper?

Nan sahpw tohto ekei kahrepe kosonned kin mweidong mweipeseng en wiawi iei pwehki kamwahl, wiekau ni pelien madamadau oh paliwar, emen rehra pahn tang, kamamsakau, luwet, saliel, pwoudiki tohto sang emen, oh tengala pahn doadnahngki wini suwed. Ahpw, ehu kahrepe me e kalap wiawihki iei pwehki lamalam ong pwopwoud oh mour en peneinei kin inenen wekla, keieu erein sounpar keren pwukat. Wauneki koasoandi en pwopwoud me sangete mahs kin wia mehkot sarawi kin sohla. Irail me noahrok kan me kin wiahda koul kan, kasdo kan, kasdohn limpoak kan nan T.V., oh pwuhk ndand kan kin kalinganada saledek en wendipene, nenek, tiahk samin, oh koasoandi en mouren roporop. Re kin utungada tiahk en mour ehu me kin kasaminehla madamadau oh mohngiong en me pwulopwul kan oh me mah kan.

Ehu roporop nan 1996 kasalehda me persent 22 en mehn Amerika kan kin kose me kamwahl kin ekei pak mwahu ong pwopwoud ehu. Ehu issue en nain Sweden nuhspehpa me keieu laud, me adaneki Aftonbladet, kin kangoangehki lih kan en mweisang arail pwoud kan pwehki “e pahn kamwahuwiala arail irair.” Irail kan me kin onopki madamadau en aramas oh irail kan me kin onopki tiahk en aramas kin kose me dene evolution [padahk me dene aramas tepsang mahn mongki] “koasoansoandiehr nan loalen aramas” en welianda arail pwoud kan sounpar koaros. Met kin wehwehki me, re kin koasoia me kamwahl oh mweipeseng en pwopwoud kin wia mehkot me aramas uhdahn pahn wia. Ekei kin pil akamaiki me dene mweipeseng en pahpa oh nohno pahn pil mwahu ong seri kan, pwe e pahn kaunopada seri kan en apwaliala pein arail mweipeseng en pwopwoud ehu rahn!

Me pwulopwul tohto solahr inengieng mourki koasoandi pwung en peneinei, me kin audaudki pahpa, nohno, oh seri kan. Ehu lamalam ndand iei: “I sohte kak medewehda en mourki ahi mour en rahn koaros rehn aramas tehmen.” Emen me pwulopwul en Denmark me mahki sounpar 18 koasoia: “Pwopwoud kin duwehte Krismas, duwehte soai ehu. I sohte kamehlele met.” Noreen Byrne en National Women’s Council nan Ireland koasoia: “Pepehmo iei, menda ken pwopwoudla oh wia doadoahk en nan ihmw. Kohlahte oh kaperenikin uhk irail ni ahmw sohte pahn pwoudkin irail . . . Lih tohto koasoanediehr me re sohte anahne ohl pwe ren kak mour.”

Peneinei Me Audaudki Nohno te Wie Kekeirada

Nan Iurop pwon lamalam wet kin karehda kekeirada mwadang en nohno kan me sohte pwopwoud. Ekei nohno pwukat me sohte pwopwoud iei me pwulopwul [teenage] kan me kin pepehm me arail liseianda me re sohte pilahn en wiawi kaidnhn sapwungala ehu. Me malaulau kan nanpwungarail iei lih kan me men kelehpw apwaliada neirail serio. Pali moron en irail iei nohno kan me kin mih rehn pahpahn serio ahnsou kis, ahpw sohte pilahn en pwoudkihda. Makasihno Newsweek kasalehda duwen koasoi ehu pahr samwalahro me pid peideko “Mehlahn Pwopwoud?” E koasoia me seri kan me kin wiawihda likin pwopwoud kin inenen kekeirada mwadang nan Iurop oh sohte me nsenohki. Sweden me keiou nan ire wet, persent 50 en seri kan nan sahpw wet kin wiawihda likin pwopwoud. Nan Denmark oh Norway kereniong persent 50 en seri kan kin wiawihda likin pwopwoud, oh nan France oh England, mpen seri men sang nanpwungen meh 3.

Nan United States, peneinei kan me audaudki pahpa oh nohno kin inenen malaulaula nan pahr samwalahro ko. Ehu ripoht koasoia: “Nan 1960, . . . persent 9 en seri kan koaros kin kousoan nan peneinei kan me audaudki nohno te. Lau lel nan 1990, nempeo keirkihda persent 25. Rahnwet, persent 27.1 en seri en Amerika koaros kin wiawihda nan peneinei me audaudki nohno kelehpw, nempe ehu me wia kekeirada. . . . Sangete 1970, nempehn peneinei kan me audaudki nohno kelehpw kin tohtohla pahn pak riau. Koasoandi en peneinei me kin audaudki pahpa, nohno, oh seri kan milahr nan keper rahnwet me kak karehong en sohla wiawi, ekei sounroporop kan koasoia.”

Nan sahpw kan me Sarawi en Roman Catholic solahr kak kihda kaweid en tiahk mwakelekel, peneinei kan me audaudki nohno kelehpw kin wie kekeirada. Tikitiksang persent 50 en peneinei en Itali koaros kin audaudki nohno, pahpa, oh seri kan, oh koasoandi en soahngen peneinei wet kin wilialikihda pwopwoud kan me sohte naineki seri oh peneinei kan me audaudki nohno kelehpw.

Koasoandi en apwali me semwehmwe kan me koperment kin kihda nan ekei sahpw kin uhdahn kangoange aramas kan en dehr pwopwoudida. Nohno kiripw kan me kin ale sawas kan sang koperment pahn luhs sang sawas pwukat ma re pwopwoudida. Nohno kiripw kan nan Denmark kin ale sawas en pelien mwohni ong apwalihki neirail seri, oh nan ekei kousapw, serepein kan me nohn pwulopwul pahnangin sounpar 18 ahpw neitik kin ale sawas en mwohni oh koperment kin pwainla en serepein pwukat arail rent. Ihme karehda mwohni kin pidada met. Alf B. Svensson koasoia me mweipeseng ehu nan Sweden kin kaluhsikihla irail kan me kin pwain taks nanpwungen uwen tala kid 250 oh kid 375 ni sawas en mwohni, pweinen ihmw, oh sawas sang wehipokon.

Sarawi kan en Kristendom mwomwen sohte kin wia mehkot pwehn wekidala irair suwed wet nanpwungen peneinei kan. Sounpadahk kan oh kaun en pelien lamalam tohto kin nantiong kamwahuwiala kahpwal nan pein arail peneinei, oh re pehm me re sohte kak sewese meteikan. Ekei kin pwungki mweipeseng en pwopwoud. Nuhspehpao me adaneki Aftonbladet en April 15, 1996, ripohtki me sounpadahk Steven Allen sang Bradford, England, wiahda kasarawi tohrohr en mweipeseng, me e koasoia me pahn wiahla padahk manaman en mweipeseng nan sarawi koaros en Britain. E koasoia: “E wia padahk en kamwahu ehu en sewese emen en pohnese dahme wiawi ong irail. E sewese irail en wehwehki me Koht limpoak ongete irail oh kasaledek irail sang medek me re mihla loale.”

Eri iawasa koasoandi en peneinei kohkohla ie? Mie koapworopwor me e pahn pitla? Ehu ehu peneinei kak kolokolte arail miniminpene nindoken arail mihla pahn soahngen keper laud wet? Menlau tehk artikel en mwuri.

[Kakon nan pali 5]

KAPWOPWOUD KAN NAN EHU EHU SOUNPAHR KAPAREKIONG MWEIPESENG KAN NAN EKEI SAHPW

SAHPW PAHR KAPWOPWOUD MWEIPESENG

Australia 1993 113,255 48,324

Canada 1992 164,573 77,031

Cuba 1992 191,837 63,432

Czech Republic 1993 66,033 30,227

Denmark 1993 31,507 12,991

Estonia 1993 7,745 5,757

France 1991 280,175 108,086

Germany 1993 442,605 156,425

Japan 1993 792,658 188,297

Maldives 1991 4,065 2,659

Norway 1993 19,464 10,943

Puerto Rico 1992 34,222 14,227

Russian Federation 1993 1,106,723 663,282

Sweden 1993 34,005 21,673

United Kingdom 1992 356,013 174,717

United States 1993 2,334,000 1,187,000

(Poahsoanda pohn 1994 Demographic Yearbook, United Nations, New York 1996)