• Pakair Kan
    Doadoahk ong Wehio—1998 | February

    • Pakair Kan

      ◼ Pwuhk en kihla ong February: Pwuhk sohte lipilipil me mie ni pali-192 me mihmi nan Kingdom Hall. Ma sohla pwuhk pwukat nan Kingdom Hall ke kak kihla pwuhken Ke Kak Mour Kohkohlahte Nan Paradais Nin Sampah. March: Ke Kak Mour Kohkohlahte Nan Paradais Nin Sampah. Nantiong tepida onop en Paipel rehn aramas akan. April: Wiaiong Mour En Ahmw Peneinei Nsenamwahu.

      ◼ Sounkalohk papidais koaros me iang towehda Service Mihding en wihk me tepida February 2 pahn ale neirail “Advance Medical Directive/Release card” (doaropwe me kin kasalehda me kitail sohte kin ale doken nta) oh “Identity card” ong neirail seri kan.

      ◼ Tepida sounpwong en February oh sohte pwand sang March 1, Sounapwalih en Circuit pahn wia kapahrek ong wehi pokon me oaralap koasoia “Ke Kin Iang Ahneki Madamadau en Koht Me Pid Duwen Mour?”

      ◼ Mwomwohdiso kan anahne koasoanehdi pwehn kasarawi Katamanpen Kamatalahn Krais nan sounpahr wet ni Rahn Kaunop, April 11, mwurin kihrlahn ketipin. Kapahrek ong wehi pokon kak tepida mwohn ketipin pahn kihrla, ahpw passeli en pilawa oh wain sohte pahn wiawi lao ketipin kihrlahr. Tehk rehn aramas me pwukoahki ripohtki irair en mesen lahng pwehn wehwehki kulok depe ketipin pahn kihrla.

      ◼ Kapahrek tohrohr me kin wiawi mwohn Katamanpen Kamatalahn Krais pahn wiawi Rahn Sarawi, March 29. Society pahn kihong elder kan audepen padahk wet (outline). Ma Sounapwalih en Circuit pahn mwemweitla nan ahmw mwomwohdiso de amwail kapokon pahn wiawi March 28 oh 29, elder kan anahne koasoanehdi Kapahrek Tohrohr en uhd wiawi nan wihk mwurio. Ahpw mwomwohdiso koaros sohte pahn koasoanehdi Kapahrek Tohrohr en wiawi mwohn March 29, 1998.

      ◼ Pwihn en elder kan pahn koasoanehdi koasoandi wet ahnsou me kapokon pahn wiawi: Ong wihk en Kapokon en Rahn Tohrohr, koasoandi en mihding kan pahn duwehte wihk teikan, ihte Kapahrek Ong Wehi Pokon oh Onop en Kahn Iroir sohte pahn wiawi. Ong wihk en Kapokon en Circuit, mihding en Theocratic Ministry School oh Service Mihding sohte pahn wiawi, ahpw mihding en Onop en Pwuhk en Mwomwohdiso pahn wiawihte.

      ◼ Compact Disc Kapw kan:

      Kingdom Melodies Volume 7

  • Pwuhk Study En Mwomwohdiso
    Doadoahk ong Wehio—1998 | February

    • Pwuhk Study En Mwomwohdiso

      Schedule ong pwuhk study en mwomwohdiso nan brochure Dahme Koht Kupwurki Kitail en Wia?

      February 2: Iren Mehn Kasukuhl 15

      February 9: Iren Mehn Kasukuhl 16

      Schedule ong pwuhk study en mwomwohdiso nan pwuhken Ke Kak Mour Kohkohlahte Nan Paradais Nin Sampah.

      Sang: Lel:

      February 16: p. 7 p. 15

      February 23: p. 16 p. 24

  • Doadoahngki Mwahu Doaropwehn Luhk kan
    Doadoahk ong Wehio—1998 | February

    • Doadoahngki Mwahu Doaropwehn Luhk kan

      1 Doaropwehn luhk kan kin mwahu pwehn kehsehki aramas akan duwen iawasa Kingdom Hall kin mihmi ie oh ahnsou dah kan me mihding kan wiawi. E pahn mwahu ma ke pahn kihong aramas koaros me ke kin tuhwong. Ihme kahrehda, mwomwohdiso kan anahne kolokol doaropwehn luhk me itar ong anahn en mwomwohdiso. Ong mwomwohdiso kan me kin kawikila arail ansoun mihding kan nan pahr koaros, re anahne oaht neirail doaropwehn luhk kapw kan (me ntingihdi ansoun mihding kapw kan) nan October en pahr mwowe. Re pahn doadoahngki doaropwe me adaneki “Handbill Request” pwehn oaht neirail doaropwehn luhk kapw kan. Ahnsou me kitail ale neitail doaropwehn luhk kan, iaduwen kitail kak doadoahngki ni ahl me keieu mwahu?

      2 Sounkalohk tohto diarada me ma re kin tepikihdahte kihong tohnihmw doaropwehn luhk, e kin sewese irail en tepida koasoiong aramas akan. Ahnsou me re kin koasoia kulok en mihding kan oh dahme ntingihdi ni tihnsou en doaropwe, e kak imwikihla reh koasoia atail doadoahk oh ia kahrepe doadoahk wet kin wiawi. Pahpa oh nohno kan me mwahuki neirail seri kan en tepida koasoi ansoun kalohk kak sewese neirail seri kan en kihong tohnihmw doaropwehn luhk. Sounkalohk kan me ekei pak kin ntingih kisin likou oh kalohk ong aramas akan me re kin ntingwohng kak kihong nan neirail kisin likou doaropwehn luhk oh luhke aramaso en iang towehda mihding kan. Oh pil, kitail kak kihdi doaropwehn luhk pahn wenihmw kan ma sohte tohnihmwo, ahpw kitail anahne kanaieng pwe aramas teikan sohte kak kilang doaropweo sang nan ahlo.

      3 Rahn ohpis en Guam pahn kadaralahng mwomwohdiso koaros ehu doaropwehn luhk (mehn wiahte karasepen met). Mwurin re kawehwe doaropwehn luhk oh ntingihdi kulok en mihding kan, re pahn kadaralahng rahn ohpis en Guam. Rahn ohpis en Guam pahn uhd print doaropwehn luhk kan oh mwadang kadarpeseng ong mwomwohdiso kan.

      4 Doaropwehn luhk kan kak kahluwa aramas mehlel kan ong padahk mehlel. Mie ekspiriens ehu duwen emen lih, pwehki e wadek nah doaropwehn luhk, e kak lel eh mehn akadei me e kin medemedewe erein eh mour: en wehwehkihla Pwuhk Sarawi. Mwurin eh kapakap ong Koht pwong ehu pwon, manda ni mensengo pwopwoud en Sounkadehde ehu kohla ni imweo oh kihong ih doaropwehn luhk me ntingihdi loale “Wehwehkihla Sapwellimomwi Pwuhk Sarawi.” Lih mwadangete tepida onop en Paipel, oh mwuhr papidaisla. Kitail en dehr mwamwahliki manaman en sapwellimen Koht ngehn sarawi, kitail en kaukaule doadoahngki mwahu doaropwehn luhk ni atail men kalohkong aramas koaruhsie.​—⁠Pil kilang Atail Doadoahk Ong Wehio en February 1994, pali 1.

  • Perenki Wia Kalohk Ong Aramas Koaruhsie
    Doadoahk ong Wehio—1998 | February

    • Perenki Wia Kalohk Ong Aramas Koaruhsie

      1 Kitail koaros kin perenki wia soahng kan me kitail kin wia mwahu. Mark 7:37 kasalehda dahme aramas kan koasoiahki Sises oh nda: “Wiepen nin lime kan me inenen mwahu mehlel.” Ihme kahrehda Sises inenen perenki wia kupwuren Koht! (Tehk Melkahka 40:8.) Ma kitail medemedewe en doadoahngki iren sawas pwukat pah, kitail pahn pil diarada peren ni atail kin peikiong sapwellimen Sises kehkehlik en “kalohkiseli rongamwahu pwehn kadehde ong aramas koaruhsie.” (Wiewia 10:42) Nan February, kitail pahn kihla pwuhk sohte lipilipil me mie pali 192 me mihmi nan Kingdom Hall de pwuhken Mour Kohkohlahte. Iaduwen kitail kak doadoahngki pwuhk pwukat pwehn kalohk ong aramas koaruhsie?

      2 Pwehki aramas kin kalap nsenohki ire kan me kin pid roson en paliwar, ke kak nda:

      ◼ “Mendahki kamwahuialahn soumwahu tohto pwehki mwamwahulahn palien wini, aramas tohto kin lokolongkihte soumwahu. Dahme ke medemedewe kahrehda met? [Mweidong en sapeng.] Sises Krais koasoia me soumwahu lusulus laud pahn wia kisehn kilel en imwin rahn. (Luk 21:11) Ahpw, Pwuhk Sarawi kin pil koasoia me ehu ahnsou me kohkohdo, me soumwahu sohlahr pahn wiawi. [Wadek Aiseia 33:24.] Tehk iaduwen pwuhk wet kin sewese aramas en koapworopworki padahk wet me poahsoanda nan Pwuhk Sarawi.” Kasalehda ire kan me pid duwen oaralap wet oh idek rehn tohnihmw ma e men naineki pwuhk wet. Kawehwe me kitail kin ale sawas sang aramas ong atail doadoahk en kalohk sampah pwon.

      3 Ni ahnsou me kitail kalohk ni ahnsou soh-lipilipil me kerenih wasahn sidohwa, ke kak rahnamwahu oh nda:

      ◼ “Ke soh kin kilang me rahn pwukat inenen apwal pwe sohte itar neitail mwohni en pwainda atail anahn akan? [Mweidong en sapeng.] Ke lemeleme ahnsou ehu pahn kohdo me apwal en mwohni pahn mwahula?” Mweidong en sapeng. Mwurin mwo, kasalehda iren Pwuhk Sarawi sang pwuhk me ke men kihla rehn tohnihmwo. Pousehla ahmw koasoi oh nda: “Pwuhk wet kin kasalehda iaduwen, ni e pahn doadoahngki sapwellime Wehi, Koht pahn kamwahuiala kahpwal kan me kin kahrehda mour inenen apwal rahnwet.” Idek rehn tohnihmw ma e men naineki pwuhko oh mweidong tohnihmw en wia eh kisin sawas ong doadoahk en kalohk sampah pwon. Ke kak ndaiong tohnihmw me ke perenki koasoiong ih oh mwurin mwo, idek reh: “Ke lemeleme kitail kak pwurehng koasoipene ehu rahn?” Ih ahnsou me ke kak ale nah nempehn telepohn de idek reh iawasa e kin mihmi ie.

      4 Ke kak wia padahk wet me pid duwen popohl ah pahn wiawi sampah pwon oh doadoahngki pwuhken “Mour Kohkohlahte”:

      ◼ “Dahme kahrehda ke lemeleme e inenen apwal popohl en pweida sampah pwon? [Mweidong en sapeng, oh kasalehda karasaras me mihmi ni pali 20-21.] Kilel wet kin kasalehda duwen wiewia ehu me wiawi me Kaudiahl kin kawehwehda. [Wadek Kaudiahl 12:​7-9, 12 me ntingihdi nan parakrap 17. Mwurin mwo, kasalehda dahme ntingihdi pahn kilelo.] Sohlahr popohl nan sampah pwehki Tepil piskendiong sampah. Pwuhk wet kin sapengla peidek kesempwal kan, oh I pahn perenki kihong uhk ma ke uhdahn pahn wadek pwuhko.”​—⁠Ma ke men kilang pil ekei padahk kan en kihla pwuhken Mour Kohkohlahte, kilang doaropwehn Our Kingdom Ministry (lokaiahn wai) en September 1995, February 1995, September 1994, September 1993, oh August 1992.

      5 Ni ahnsou me ke pwurehng pwurala rehn irail kan me perenki rong, ke kak tepida onop en Paipel rehn tohnihmwo ni ahmw pahn nda:

      ◼ “Ahnsou me kita tuhpene rahn teio, ke nda mehkot me kahreong ie en medemedewe. [Pwurehng nda dahme tohnihmw nda me kahreong uhk en medemedewe.] I medemedewe duwen dahme ke nda, oh I men kasaleong uhk dahme I diarada. [Kasalehda iren Pwuhk Sarawi ehu me pid oaralapo.] Se kin onopki Paipel rehn aramas akan oh koasoandi wet seweseier aramas rar rar kei en sukuhliki tepin padahk en Paipel kan nan ahnsou mwotomwot. Ma ke pahn kasawihada Pwuhk Sarawi, e pahn kakehlail ahmw kamehlele inou en Koht kan.” Koasoia ekei peidek kan me ke pahn sapengla. Ma tohnihmwo sohte men onop Paipel, kawehwe ong ih me mie koasoandi ehu me ke pahn tuhwong tohnihmwo minit 15te pak ehu nan wihk ehu ong wihk 16. Kasalehda brochure Kupwurki, oh kasalehda Iren Mehn Kasukuhl 1, oh idek reh ma ke kak wia kamwomwada ong Iren Mehn Kasukuhl 1.

      6 Tamataman en Doadoahngki Doaropwehn Luhk kan: Kitail kak doadoahngki doaropwehn handbill kan ahnsou me kitail tepida koasoiong aramas akan pwehn kamwekid irail en men wehwehki soahng ngehnin kan, de kitail kak kihong aramas ma re sohte kin ale neitail pwuhk kan. Ahnsou me kitail kin tuhwong aramas akan me kin perenki rong, kitail kak doadoahngki dahme ntingihdi ni tihnsou en doaropwe pwehn kangoange aramaso en onop Paipel rehtail oh iang towehda mihding kan.

      7 Nantiong koahiekla nan ahmw doadoahk oh perenki wia doadoahk wet. Nantiong kalohkong aramas koaruhsie, oh perenki wia kalohk wasa koaros.​—⁠1 Tim. 4:​16.