Karanih Siohwa

1. Dahme emen sister koasoia duwen ah koasoandi en pali ngehn?

¹ Emen Kristian sister koasoia: “I mihmi nan padahk mehlel sounpahr 20 met oh I kin iang mihding kan koaros oh pil iang kalohk. Ahpw, I diarada me mendahki I wehwehki me soahng pwukat (iang mihding oh iang kalohk) kin kesempwal, soahng pwukat kelepw sohte kak sewese ie ni ahnsou me I kin lelohng kahpwal. . . . I wehwehki met me I anahne kawekila ahi madamadau oh koasoandi pein ahi koasoandi kan pwehn kak wia pein ahi onop me katapan oh I anahne karanih Siohwa oh kalaudehla ahi limpoak ong Ih oh kalahnganki dahme sapwellime Ohl wia ong kitail.”

2. Dahme kahrehda e kesempwal en karanih Siohwa?

² Kitail anahne doadoahk laud pwehn kakairada atail nanpwung mwahu rehn Siohwa. Met kin wehwehki me kitail anahne wia laud sang iang mihding kan oh iang kalohk. Ma kitail sohte kin kalap kapakap ong Siohwa sang loaletail, kedekedeo, Siohwa pahn duwehla kompoakpah men me kitail karanih mahs ahpw met kitail solahr kin koasoiong oh solahr karanih. (Kaudiahl 2:4) Kitail en kasawih iaduwen onop Paipel oh kapakap kak sewese kitail en karanih Siohwa.​—Mel. 25:14.

3. Ia mwomwen atail pahn wia pein atail onop pwehn kak karanih Koht?

³ Kapakap oh Doudouloale Kin Kesempwal: Ma kitail wia pein atail onop Paipel me pahn kakehlailih atail mohngiong en pali ngehn, met kin wehwehki me kaidehn ihte en lainih ire kesempwal kan nan Kahn Iroir de pwuhk kan oh kilang iren Paipel kan. Wia pein atail onop kin wehwehki doudouloale duwen dahme kitail sukuhliki me kin kasalehda duwen sapwellimen Siohwa ahl akan, koasoandi kan oh irair akan. (Eksodus 33:13) Ni ahnsou me kitail kin wehwehkihla duwen mehkan me pid duwen atail pali ngehn, eri met pahn kamwekid atail pepehm kan oh pil sewese kitail en medemedewe duwen pein atail mour. (Melkahka 119:35, 111) Kitail pahn wia pein atail onop Paipel pwehn kak karanih Siohwa. (Seims 4:8) Ma kitail mehleliong pein atail onop, kitail pahn koasoanehdi ahnsou mwahu ong onop oh koasoanehdi wasahn onop me mwahu, oh kaiahne pein kitail en wia onop kaukaule. (Dan. 6:​10) Mendahki ahmw mour kin inenen kedirepw, ke kin koasoanehdi ahmw ahnsou rahn koaros en doudouloale duwen sapwellimen Siohwa irair kaselel kan?​—Mel. 119:147, 148; 143:5.

4. Iaduwen kapakap mwohn atail pahn wia pein atail onop Paipel pahn sewese kitail en karanih Siohwa?

⁴ Kapakap sang nan mohngiong pil kin kesempwal ni ahnsou me kitail pahn wia pein atail onop. Kitail anahne sapwellimen Koht ngehn sarawi pwe padahk en Paipel kan en kak kamwekid mohngiongatail kan oh pil kamwekid kitail en “papah Koht ni lelepek oh wahu.” (Ipru 12:28) Ihme kahrehda, e kesempwal kitail en tepikihda pein atail onop kapakap oh peki Siohwa en ketikihong kitail sapwellime ngehn sarawi. (Madiu 5:3) Ni ahnsou me kitail kin doudouloale duwen iren Paipel kan oh doadoahngki pwuhk kan, brochure kan, makisihn kan oh tract kan me sapwellimen Siohwa pwihn wiahda, kitail kin ritingada mohngiongatail ong Siohwa. (Mel. 62:8) Ma kitail pahn wia pein atail onop ni ahl wet, met kin wia mwekid en kaudok me kitail kak kasalehda atail lelepek ong Siohwa oh e pahn sewese kitail en karanih Ih.​—Sud 20, 21.

5. Dahme kahrehda e kesempwal kitail en doudouloale duwen Mahsen en Koht rahn koaros?

⁵ Duwehte atail ehuong aramas teikan, ma kitail men atail ehuong Siohwa en kekeirada, kitail anahne wia uwen atail kak en karanih Siohwa ahnsou koaros. Ihme kahrehda, kitail anahne koasoanehdi atail ahnsou rahn koaros en karanih Koht, pwe kitail ese me E pahn karanih kitail ma kitail pahn nantihong karanih Ih.​—Mel. 1:​2, 3; Episos 5:​15, 16.