Ripoht En Sounkalohk Kan En Wehio

Padokedi Weren Wehio Ahnsou Koaros

SAPWELLIMEN Koht Mahsen, Paipel, kangoangehkin kitail en pwatiet. Nanmwarki Solomon koasoi: “Padokedi nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.”​—Eklesiasdes 11:6.

Ahnsou koaros me konehng, Sounkadehdehn Siohwa kan kin padokedi “war” ni ahr kalkalohki rongamwahu en Wehin Koht. Sahpw oh deke daulih 230, re kin “rahn koaros, nan Tehnpas Sarawio oh nan imwen aramas akan irail kin wonoweite ni padahk oh kawehwe Rongamwahu duwen Sises me iei Mesaia.” (Wiewia 5:42) Ekspiriens kan me ntingdi pah kin kasansalehda iaduwen Sounkadehdehn Siohwa kan sohte kin ‘mweidong pehrail ko en wia kommoal’ me pid doadoahk en kalohk.

◻ Nan Republic en Cape Verde, emen Sounkadehdehn Siohwa kan alialu limwahn imweteng ehu ni ahnsou e iang doadoahk en kalohk. Nan kehlen imweteng, ekei sounimweteng kan wia mwomwohd pohn tuhke ehu. Irail kilikilang Sounkadehde menet pah, oh sounimweteng pwukat eker oh peki ekei makisihn kan. Sounkadehde menet uhd pirehdi ong ni takai ehu ekei Watchtower oh Awake! makisihn kan oh e koskihlong takaio oh makisihn pwukat nan kehlen imwetengo. Sang met, Paipel study 12 tepidaher. Sounimweteng silimen me inoukihdahr ahr mour ong Koht oh papdaisla. Emen sounimweteng kin iang doadoahk en pioneer, erein sounpar ehu. Ahpw iaduwen, irail kin kalohk nan imweteng? Keieu, irail katohrohrpeseng imweteng nin duwen kisin wasahn kalohk kan. Eri, wasahn kalohk pwukat kin nenepeseng nanpwungen Sounkadehde silimen, oh irail kin kalohk cell (pere) lel cell. Sounkalohk en Wehi pwukat kin pwurala rehn irail kan me kasalehda arail kin perenki rong duwehte me Sounkadehdehn Siohwa kan kin wia nin sampah pwon.​—return visit kan. Ahpw mie ehu wekpeseng, me kin pid tohtohn arail kin wia onop Paipel rehn aramas akan. Irail sohte kin onop Paipel pak ehu de riau ni aua ehu nan wihk kan, ahpw ekei sounimweteng kan kin onop Paipel rahn koaros! Patehng met, Kaun en imweteng kin mweidong mihding kan en mwomwohdiso en wiawi nan imweteng.

◻ Emen lih nan Portugal sohsohkihda ekei pwuhk kan en Watch Tower ni ahnsou me eh nohno kahlap mehla. Pwe ih kaidehn emen Sounkadehdehn Siohwa, e sohte men naineki pwuhk pwukat. Ahpw, e sohte men kawehla. Ehu rahn ni ahnsou me emen Sounkadehdehn Siohwa kalohk ihmw lel ihmw e tuhwong liho ni imwe oh e padahkiong ih duwen pwuhk kan. Sounkadehde menet idek rehn liho ma e wehwehki duwen ia wen kesempwal pwuhk ko me e naineki. Liho sapeng: “Ni lokaia mehlel, I sohte wehwehki, ahpw iaduwen I kak ese?” Liho pwungki en onop Paipel, oh e mwadang diarada ia uwen kesempwal nein ah nohno kahlap pwuhk kan. Met e pil wiahla emen Sounkadehdehn Siohwa me pepdais. Oh pil, nah serepein oh kompoakpahn keren en peneinei wet pil kin onop Paipel. Ia uwen kesempwal sohsohn pwuhk pwukat!

Inengieng En Dehdehkihla

“Pwe Kauno [Siohwa] iei ih me kin ketikihdo kupwurokong; iei ih me kin ketikihdo loalokong oh dehdehki.”​—LEPIN PADAHK 2:6.

1. Iaduwen kitail kak inengieng en dehdehkihla?

SIOHWA iei atail Sounkaweid Lapalapie. (Aiseia 30:20, 21) Ahpw dahme kitail anahne wia pwen paiekihda “sapwellimen Koht loalokong” me sansalda sang sapwellime Mahsen? Ehu, kitail anahne ‘inengieng en dehdehkihla’​—ahneki ineng nan mongiongatail en alehda oh kasalehda irair wet. Ma met pahn pweida, kitail anahne sohpeiwohng Koht, nin duwen me ohl loalokongo koasoia: “Pwe Kauno [Siohwa] iei ih me kin ketikihdo kupwurokong; iei ih me kin ketikihdo loalokong oh dehdehki.” (Lepin Padahk 2:1-6) Dahkot loalokong, erpit, oh dehdehki?

2. (a) Dahkot loalokong? (b) Iaduwen ke pahn kawehwehda irair wet, erpit? (c) Dahkot dehdehki?

² Loalokong iei esehla ire mehlel kan me kohsang ahn emen wiewia, keseu, de onop. Erpit iei koahiek en doadoahngki loalokong ni ahl konehng oh pwung. (Madiu 11:19) Nanmwarki Solomon doadoahngki erpit ni ahnsou me lih riemen nda me ira koaros naineki seriohte, oh en kapwungala ireo, e doadoahngki e loalokong duwen ahn nohno men pahn lelepekong nah seri. (1 Nanmwarki 3:16-28) Dehdehki iei “loalokong en wia pilipil.” Oh pil “ese lamalam en dehdehki.” (Webster’s Universal Dictionary) Ma kitail pahn inengieng en dehdehkihla, Siohwa pahn ketkihong kitail met sang sapwellime Ohl. (2 Timoty 2:1, 7) Ahpw iaduwen irairen dehdehki pahn kak doake soahngen irair tohto nan atail mour?

Dehdehki oh Atail Lokaia kan

3. Iaduwen ke pahn kawehwehda Lepin Padahk 11:12, 13 oh ia wehwehn “tiahk en pweipwei” [“in want of heart”?

³ Irairen dehdehki pahn sewese kitail en wehwehki me mie “ahnsoun nennenla oh ahnsoun mwoarongada.” (Eklesiasdes 3:7) Irair wet pahn sewese kitail en kanahieng dahme kitail kin koasoia. Lepin Padahk 11:12, 13 mahsanih: “Tiahk en pweipwei me kin wia lokaiahn mwamwahliki meteikan. Ma ke me loalokong, eri, ke pahn nennenla. Sohte me kin likihong koasoi rir aramas me kin mwahuki wiaseli koasoi, ahpw ke kak koapworopworki mehmen me likilik.” Ei, ohl de lih men me kin kauwe meteikan kin wia “tiahk en pweipwei.” Nin duwen Wilhelm Gesenius emen me wiahda dictionary koasoia, soahngen aramas menet “sohte kak dehdehki.” E sohte kin kak dehdehki mwahu, oh lepin loakaia “mongiong” kin kasalehda irair mwahu kan me sohte mih rehn aramaso. Ma emen Kristian pahn doadoahngki soahngen loakaia me soh konehng lao lel e pahn kauwe emen, elder idihda kan pahn anahne katokedi irair soh konehng wet me pwarada nan mwomwohdiso.​—Lipai 19:16; Melkahka 101:5; 1 Korint 5:11.

4. Dahme Kristian lelepek oh dehdehki kan kin wia me pid duwen koasoi rir kan?

⁴ Weksang irail kan “tiahk en pweipwei,” [want of heart], irail kan me “dehdehki” pahn nennenla ni ahnsou me konehng. Re pahn ekihla mehkot rir. (Lepin Padahk 20:19) Irail kan me kin dehdehki ese me doadoahngki lokaia soh konehng pahn kak imwikihla suwed, ihme re kin “lelepek.” Irail kin lelepekiong iengarail pwoson akan oh irail pil sohte kin koasoi duwen mehkot rir me pahn kahreong iengarail kan en lelong kahpwal. Ma Kristian men pahn doadoahngki irair en dehdehki pahn rong rohng duwen mehkot rir me pid duwen mwomwohdiso, re kin nennenla lao lel sapwellimen Siohwa pwihn pahn kilang ahnsou mwahu en kasalehong koaros sang ni arail pahn ntingihdi nan pwuhk kan.