Kitail Kak Wia Dahme Siohwa Kupwurki Kitail en Wia
1. Soangen pepehm dah kan me kitail kin ekei pak ahneki, oh pwekihda?
1 Kapwaiada sapwellimen Siohwa kosonned akan oh kaweid akan iei mour me keieu mwahu rahnwet, oh met pahn sewese kitail en kaunopada mwahu ong ahnsou kohkohdo. (Mel. 19:7-11; 1 Tim. 6:19) Ahpw, kitail kin kalap lelohng kasongosong kan oh kahpwal akan sang ahn Sehdan sampah. Pein atail soh-unsek kan kin pil kahrehong kitail en apwaliki powehdi kasongosong oh kahpwal pwukat. Ihme kahrehda, ekei pak kitail kak apwaliki kapwaiada atail pwukoa en pali ngehn kan. (Mel. 40:12; 55:1-8) Mwein ele kitail kak medemedewe ma kitail kak wia soahng koaros me Siohwa kin kupwurki kitail en wia. Ni soangen ahnsou kan, dahme kak sewese kitail en kolokol toupahrek en pali ngehn?
2. Iaduwen—Siohwa kin kasik sang kitail soahng kan me nohn apwal en wia?
2 Sapwellimen Siohwa Kosonned akan Sohte Kin Apwal: Siohwa sohte kin kasik sang kitail en wia soahng kan me nohn apwal. Sapwellime kosonned akan sohte kin apwal, ahpw, re kin wahdo kamwahu ong kitail. (Deud. 10:12, 13; 1 Sohn 5:3) E kin mwahngih duwen atail luwet akan, oh kin “tamataman me kitail uhdahn pwehl.” (Mel. 103:13, 14) Koht kin kalahnganki atail nannanti en papah Ih, mendahki pein atail irair kan sohte kin mweidohng kitail en wia soahng koaros me kitail men wia. (Lipai 5:7, 11; Mark 14:8) E kin luhke kitail en mweidohng Ih en sewese kitail kamwahuwihala kahpwal akan me kitail ahneki, oh E kin kamehlelehiong kitail me E pahn sewese kitail en kolokol atail lelepek ong Ih.—Mel. 55:22; 1 Kor. 10:13.
3. Iaduwen Siohwa kin kakehlailihala kitail pwe kitail pahn kak dadaurete?
3 Anahne Kanengamah: Irail me kolokol arail lelepek me ntingdi nan Paipel duwehte Elaisa, Seremaia, oh Pohl kin kasalehda ia kahrepe kanengamah me anahn. (Ipru 10:36) Siohwa sewese irail ni ahnsou me re lelohng uhwong oh pepehm en men uhdi sang papah Siohwa. (1 Nanmwarki 19:14-18; Ser. 20:7-11; 2 Kor. 1:8-11) Oh pil, kitail kin mwekidki atail rong duwen ekspiriens en brother oh sister kan nan atail ahnsou. (1 Pit. 5:9) Doudouloale duwen mehn karasepe mwahu pwukat pahn sewese kitail en dehr nsensuwed oh dehr medemedewe en uhdi sang atail papah Siohwa.
4. Dahme kahrehda e kesempwal en medemedewe oh tamatamante sapwellimen Koht inou kan ahnsou koaros?
4 Koapworopworki sapwellimen Koht inou kan kin “rasehng mehn poudek ehu nan kapehdatail.” (Ipru 6:19) Koapworopwor wet kamwekid Eipraam oh Sara en mwekidki kupwuren Siohwa ni ahnsou me re anahne kohkohsang imwara oh ‘koukousoanki nan sahpw me Koht ketin inoukihong, nin duwen aramas en liki kei.’ E kakehlailihala Moses pwe e sohte pahn masak kesihnenda teng nan kaudok mehlel. E pil kakehlailihala Sises en dadaurete mendahki e pwoula ni tuhkehn kalokolok. (Ipru 11:8-10, 13, 24-26; 12:2, 3) Ma kitail pahn kehlailki sapwellimen Koht koapworopwor en sampah kapw oh pwung, met pahn sewese kitail en kolokolete atail lelepek.—2 Pit. 3:11-13.
5. Dahme kahrehda e kak kangoange kitail en medemedewe oh tamataman pein atail wiewiahn lelepek me kitail wia mahs?
5 Ma kitail pahn medemedewe oh tamataman dahme pein kitail wia mahs, ia mwomwen pein kitail kasalehda lelepek, ngenen tohnmetei, oh eimah, met pahn pil kakehlailihala atail ngoang oh nannanti papah Siohwa. (Ipru 10:32-34) E kin katamankin kitail duwen peren me kitail kin ahneki ni ahnsou me kitail kin wia dahme Siohwa ketin kupwurki kitail en wia—papah Ih sang mohngiong unsek.—Madiu 22:37.