ketikihong wehi kan arail pwung (ahpw mie irepen arail kaunda), oh ih me pil ketikihongehr pwungen wehi kan nin sampah.” (Rom 13:1, 2) Aramas akan kin ahneki pwukoa kan “ahpw mie irepen arail kaunda” (kak laudsang de tikitiksang aramas teikan, ahpw ahnsou koaros irail kin tikitik sang Siohwa) pwehki Wasa Lapalapie kin ketin mweidong irail en kaunda. Kristian emen kin uhpaiong kaun akan en koperment kan pwehki met ehu irair en peikiong Siohwa. Ahpw iaduwen ma sapwellimen Koht kosonned akan oh kosonned akan en koperment en aramas akan kin uhpene?

Sapwellimen Koht Kosonnedo oh Ahn Sihsar Kosonnedo

14, 15. (a) Ni ahl dahieu me Daniel liksang kahpwal ieu me kin pid peik? (b) Ni ahnsou mehn Ipru silimeno sohte kak liksang kahpwal ieu me kin pid peik, dahme irail wia?

¹⁴ Daniel oh ienge silimen oko kin wiahda kahlemeng mwahu ieu ong iaduwen kitail kak ni toupahrek peikiong koperment en aramas akan oh peikiong sapwellimen Koht kosonned akan. Ni ahnsou me irail mehn Ipru me pwulopwul pahmeno kalipilipala Papilon, irail kin peikiong kosonned akan en sahpwo oh irail me mwadang pilipilda ong alehdi kaiahn tohrohr ieu. Daniel, ni e wehwehki me kaiahn wet pahn kakete uhwong sapwellimen Siohwa Kosonnedo, e koasoiong kaun emen me kin apwapwalih irail duwen irewet. Imwila met, koasoandi tohrohr kei wiawihda pwen dehr kauwehla nsenmwakelekel kan en mehn Ipru pahmen ko. (Daniel 1:8-​17) Sounkadehdehn Siohwa kan kin idawehn mehn kahlemeng mwahu en Daniel ni ahnsou me irail kin ni kadek kawehwe ong kaun akan duwen irair kesempwal kan pwehn dehr lelohng kahpwal akan.

¹⁵ Ahpw, ehu ahnsou mwurin met, irair ehu pwarada me irail lelohng me pid arail peikiong kaun en wehi de soh. Nanmwarki en mehn Papilon wiahda lapalahn takai sansal nan patapat en Dura oh koasoanehdi ong sapwellime lapalap akan, iangahki kaunen kousapw koaros, en pokonpene ni kasarawio. Eri, mwowe sang met, kompoakepahn Daniel silimeno me idihda en wiahla kaun akan en wehi kan nan Papilon, eri kosonned wet kin dokedoke irail. Ni ahnsou me kasarawio pahn wiawi, koaros me pokonpene pahn anahne poaridi oh pwongih sansalo. Ahpw, mehn Ipru kan ese me met pahn uhwong sapwellimen Koht kosonnedo. (Deuderonomi 5:8-​10) Eri, ni ahnsou me aramas koaros poaridi, irail kesihnendahte. Pwehki irail sapeikiong kosonned en nanmwarkio, irail wehwehki me irail pahn lelohng mehla kamasepwehk ieu, ahpw irail pitsang pwehki manaman sang rehn Koht; ahpw e sansal me irail pilada en mehla sang arail pahn sapeikiong Siohwa.​—Daniel 2:⁠49–​3:29.

16, 17. Dahme wahnpoaron akan wia ni ahnsou aramas akan padahkiong irail en uhdi sang arail doadoahk en kalohk, oh dahme kahrehda?

¹⁶ Nan keieun senturi, kaun en mehn Suhs akan nan Serusalem pangoak wahnpoaron kan en Sises Krais en uhdi sang arail kalohkiseli mwaren Sises. Dahme irail wia? Sises kehkehlikiong irail en katohnpadahk nan wehi kan koaros, oh met pahn pil pid Sudea. E pil padahkiong irail en wiahla sapwellime sounkadehde kan nan Serusalem oh pil nan sampah pwon. (Madiu 28:19, 20; Wiewia 1:8) Wahnpoaron oko ese me sapwellimen Sises kosonned akan kin padahkiong irail dahme Koht kin ketin kupwurki irail en wia. (Sohn 5:30; 8:28) Ihme kahrehda irail nda met: “Se uhdahn pahn peikiong Koht, a kaidehn aramas.”​—Wiewia 4:19, 20; 5:29.

¹⁷ Wahnpoaron ako sohte kin uhwong kaun akan. (Lepin Padahk 24:21) Ahpw, ni ahnsou me kaun akan kin padahkiong irail en dehr wia kupwuren Koht, irail mahsanih, ‘Se uhdahn pahn peikiong Koht, a kaidehn aramas.’ Sises mahsanih me kitail anahne “kihong Sihsar me uhdahn en Sihsar, a ong Koht me uhdahn sapwellimen Koht.” (Mark 12:17) Ma kitail pahn sapeikiong sapwellimen Koht kosonned pwehki aramas emen pahn padahkiong kitail en wia met, kitail kin kihong aramas dahme uhdahn sapwellimen Koht. Eri, kitail kin kihong Sihsar me uhdahn en Sihsar, ahpw kitail kin pohnese duwen sapwellimen Siohwa manaman me keieu ileile. Ih me Kaunepen Lahng oh Sampah, Sounkapikada, Utupen manaman.​—Kaudiahl 4:11.

Kitail Pahn Kesihnenda Teng

18, 19. Mehn kahlemeng dahieu me riatail brother oh sister kan wia, oh iaduwen kitail kak alasang irail?

¹⁸ Ni ahnsouwet, kitail kin kalahnganki me pali laud en koperment kan kin wehwehki duwen sohpoupali en Sounkadehdehn Siohwa kan. Ahpw nan ekei sahpw, Sounkadehde kan kin lelohng kalokolok laud. Nan erein senturi 20 oh leledohng nan atail ahnsou, ekei riatail brother oh sister kan inenen nannanti ong ni pali ngehn irail kin peipeiki “pei mwahu en pwoson.”​—1 Timoty 6:12.

¹⁹ Iaduwen kitail kak kesinenda teng duwehte irail? Keieu, tamanda me kitail anahne kasikasik aramas akan me pahn uhwong kitail. Kitail en dehr pwunod de pwuriamweikihla ma kitail pahn lelong kahpwal pwukat. Pohl padahkiong Timoty: “Aramas koaros me men ahneki mour mwahu ni arail pahn miniminiong Krais Sises, re pahn ale kamakam.” (2 Timoty 3:12; 1 Piter 4:12) Nan sampah ieu me Sehdan kin wia kakaun, iaduwen kitail soh pahn lelong uhwong kan? (Kaudiahl 12:17) Nin duwen kitail pahn lelepek, ahnsou koaros pahn mie ekei aramas me kin pwuriamweikilahr oh re ahpw kin lahlahwe [kitail].’​—1 Piter 4:4.

20. Kataman duwen ire mehlel dah kei kin kangoange kitail?

²⁰ Keriau, kitail kin kamehlele me Siohwa oh sapwellime tohnleng kan pahn sewese kitail. Nin duwen Elisa en mahs mahsanih, “pwe iangata kan tohtohsang irail.” (2 Nanmwarki 6:16; Melkahka 34:7) Ele mwein Siohwa kin kupwurki en mweidong aramas akan me kin uhwong kitail en wiawi ni ahnsou ehu. Ahpw, e pahn ahnsou koaros ketikihong kitail kehl me pahn sewese kitail en dadaurete. (Aiseia 41:9, 10) Ekei aramas kamakamala, ahpw met sohte kin kamasak kitailla. Sises mahsanih: “Kumwail dehr masak irail kan me kin kemehla paliwar, re ahpw sohte kak kemehla soul; a kumwail masak Koht me kak ketin kemehla paliwar oh soul oh kesepwekelahng ira koaros nan Gehenna.” (Madiu 10:16-​23, 28, NW) Kitail kin duwehte “mehn keiru kei” nan koasoandi wet. Kitail kin doadoahngki atail ahnsou en “lelohng ni mouro me uhdahn mehlel,” mour soutuk nan sapwellimen Koht sampah kapw. (1 Piter 2:11; 1 Timoty 6:19) Sohte aramas emen pahn kak kihsang rehtail kating wet ma kitail pahn kolokolte atail lelepek ong Koht.

21. Dahme kitail anahne ni ahnsou koaros tamataman?

²¹ Ihme kahrehda, kitail en tamanda uwen kesempwal atail nanpwung mwahu rehn Siohwa Koht. Ahnsou koaros kitail en kalahnganki kapai kan en wiahla tohnpadahk kan en Krais oh sapwellime towe kan en Wehio. Kitail sang nan mongiongitail unsek en poakong riatail kan koaros, oh perenkihda ahnsou koaros limpoak me irail kin kasalehiong kitail. Ahpw, keieu kesempwal, kitail en kapwaiada mahsen kan en sounmelkakao: “Likih Kauno! Ahneki pwoson, dehr nan kapehd tikitikla.” (Melkahka 27:14; Aiseia 54:17) Eri, kitail iangahki Kristian tohto mwohtail pahn kesinenda teng oh pwoson kehlail​—Kristian lelepek sohpoupalih kan me sohte kin kisehn sampah wet.

“Loalokongala Nan Ahmw Ahnsou me Kohkohdo”

“Pali laud en aramas kin doadoahngki tepin arail mour ong ni ahl ehu me kin kahrehong imwilahn arail mour en kansensuwed.” Iei me soun nting en France me ede Jean de La Bruyère, me memour nan senturi 17, koasoia. Ni mehlel, aramas pwulopwul kan me sohte kak katengehdi ah pilipil kan pahn song me oh song mwo, oh re pahn lelong irair en sohte nsenamwahuki arail mour oh koluhkihla mehkan. Ahpw, irail me keptakai kin mihmihte nan ahl sapwung, oh kawehsang pein irail peren en mour mwuhr ni ah pahn mahla. Ahl pwukat koaros, dipen sohte wia dahme pwung oh dipen wia dahme sapwung kak imwikihla nsensuwed.

Ahpw, iaduwen atail kak irehweisang kitail irair en mour imwila suwed duwehte met? Mahsen en Koht kin kaweid aramas pwulopwul me sohte kak wiahda ahr pilipil kan: “Tamanda Sounwiepomw ni rahn akan me ke wia pwulopwulte, mwohn rahn suwed akan ah pahn kohdo, ahnsou me ke pahn nda, ‘I sohte perenkin rahn pwukat.’ ” (Eklesiasdes 12:1) Ma ke wia aramas pwulopwul men, ken mwadang sukuhliki duwen “Sounwiepomw” ni ahmw wie pwulopwulte.

Iaduwen Paipel kin sewese aramas pwulopwul kan en pere irail sang pweipwei en irair en pwulopwul? E mahsanih: “Rong kaweid oh alehda elen kopwung, pwe ken kak loalokongla nan rahn akan me pahn kohdo.” (Lepin Padahk 19:20, NW) Paipel pil kasalehda mwahu me mwamwaleki erpit en Koht pwehki soukauti de aklapalap en aramas pwulopwul, de pil irair en sounpar soh lipilipil kin imwila suwed. (Lepin Padahk 13:18) Ahpw me kin alehda kaweid sarawi kan kin imwikihla “kareireilahn rahn oh pahr akan en mour oh popohl,” soangen mour me kaperen oh kansenamwahu.​—Lepin Padahk 3:2.

Peidek kan Sang Sounwadawad kan

E sapwung en pet ki mwohni mendahte ma uwen peto me tikitik?

Mahsen en Koht sohte kawehwehda ni oaritik duwen pilein mwohni, ahpw e kihda kawehwe me itar e kasalehda me soangen elen pilein mwohni koaros sohte pahrekiong kaweid en Paipel akan.a Karasepe, aramas koaros ese me pilein mwohni kin kahrehda noahrok. Oh wehwehwette pil itarehr wia mehn tenek nan madamadau en Kristian akan, pwehki Paipel mahsanih me “aramas noahrok” sohte pahn sohsohki Wehin Koht oh karasaiong noahrok duwehte pwongih eni mwahl.​—1 Korint 6:9, 10; Kolose 3:5.

Pilein mwohni pil kin kahrehda madamadau en roporop oh aktuwahu, ineng kehlail men wihn. Wahnpoaron Pohl kalekehki aramas soang pwukat ni ah ntingihdi: “Kitail en dehr aklapalap de kamwakara emen, de peirinpene.” (Kalesia 5:26) Laudsang met, pilein mwohni kin kangoange kitail en koapworopworki mehn ketieni kan me pahn wahdo paiamwahu. Soun pilein mwohni kan kin kamehlele me soangsoangen tiahk kan me kak kahrehda paiamwahu de paisuwed. Irail kin katamandohng kitail mehn Israel salelepek kan me kin “kaunopada tehpel ieu ong koht en Good Luck (koht en paiamwahu) oh audekihdahr kep en wain kan ong koht en Destiny.”​—Aiseia 65:11, NW.

Ekei aramas kak nda me petiki kisin mwohni tikitik ni ahmw mwadong mwahl sohte uhpene oh mwadongki pilei ong omw peneinei de kompoakpohmw kan sohte weksang wia soangen mwadong teikan me kaperen. Mehlel, aramas me kin petki kisin mwohni tikitik mwein sohte pahn kilangwong pein ih nin duwen emen me noahrok, roporop, perenki siaipene, de kihlenuwo. Ahpw, soangen pepehm dah me mih rehn aramas teio me ke pileiwong? Aramas en pilein mwohni tohto tepikihda kisin pet, ‘ong mehn mwadongte.’ (Luk 16:10) Mehkot me likamwete sohte katepe kak wiahla mehkot laud nan ahn emen aramas ah mour.

Met inenen mehlel ma met kin pid seri kan. Seri tohto kin alehdi kaperen en wihnda mehkot me tikitik nin tepio oh mwuri uhd me song pet mwohni laud. (1 Timoty 6:10) Roporop reirei ieu me ntingda sang rehn Arizona Council Me Pid Aramas Akan Me Soumwahukihla Pilein Mwohni, nan United States, kamehlelehda me aramas tohto me tengala nan ineng en “pilein mwohni ong mwadong de pilein cards iang kompoakpahrail de arail peneinei.” Ripohto pil doula oh kapataiong me “persent silisek en seri kan me kin pilein mwohni tepida wia met mwohn arail mahki sounpar eisek ehu.” Mwahnakapw oh peinakapw tohto me kin pilein mwohni kin kihsang neirail mwohni ni pirap de mour samin, nin duwen roporop me nda Dahme Kahrehda Aramas akan kin Wia Pilein Mwohni​—Soumwahu oh Kahpwal en Pilein Mwohni. Imwila suwed akan me kin tepikihda mehkot me likamwete sohte katepe!

Pwehki atail mihmi nan sampah ieu me mie mehn kasongosong oh lidip tohto, mehnda kitail en pil alehdohng kitail pil ehu tohrohr? (Lepin Padahk 27:12) Pilein mwohni​—mehnda ma irail seri de soh, de pet laud de tikitik​—mehpwukat koaros kin kauwehla pali ngehn oh anahne kitail en ireweisang kitail. Kristian akan me kin perenki pilei ki seked de pilei card en ale kaweid kin ntingiedi arail deng kan de ren dehr mwadong ni siaki deng ahpw mehn perente. Kristian marain akan me kin nsenohki arail pali ngehn oh pil ahn arail peneinei oh kompoakparail akan kin irehsang irail pilein mwohni​—mehnda ma kisin mwohni tikitik.