medemedewe duwen irairen aramaso oh tehk ma e ahneki soumwahu en madamadau de pepehm me kahrehong ih en kemehla pein ih, oh ma e pahn wehwehki met​—⁠e pahn kak sewese ih en wiahda ah pilipil ma e pahn wiahda kapahrek en mehla ong emen me kemehla pein ih de soh.

Pil mie ehu irair en medemedewe: Iaduwen aramas akan me kousoan nan pein ahmw wasa kin kilangwong aramas akan me kin kemehla pein irail? Elder kan kin anahne nsenohki met, pwe irail kin kesempwaliki adamwahu en mwomwohdiso en Sounkadehdehn Siohwa kan en wasao. Ma pali laud en aramas akan nan sahpwo kin suwedki aramas akan me kin kemehla pein irail, oh keieu ong aramas emen me ahpwtehn kemehla pein ih, elder kan ele mwein sohte pahn mwomwen utungada mehla wet pwen sansal ong wehi pokon de wiahda ehu kapahrek en mehla nan Kingdom Hall.

Ahpw, ma Kristian minister emen ale luhk ehu en wiahda kapahrek en mehla, ele mwein e kin lemeleme me e pahn kakete wia met sang pein eh pilipil. Ma e pilada en wia padahko, e anahne en kanahieng en dehr nda mehkot me pahn kahrehong aramas akan en lemeleme me mwein mie koapworopwor ong aramaso me kemehla pein ih. Koapworopwor ong aramas mehlahr akan kin mih rehn Siohwa, oh aramas sohte kak nda ma aramas mehlahro pahn iang iasada de soh. Minister menet pahn kak koasoia duwen padahk mehlel kan en Paipel me kin pid mehla oh kihda mehn kamweit ong me pahtou kan.

Ahnsou me Konehng en Kasalehda Koasoi Rir

Pingiping de popohl kak wiawi nanpwungen aramas ma aramas pahn kasalehda koasoi rir de soh. Ahpw, mie ahnsou me konehng en kasalehda koasoi rir? Tehk dahme soukohp Eimwos koasoia duwen Koht: “Siohwa sohte kak wia mehkot ma e sohte kasalehiong sapwellime ladu soukohp kan kupwure me riro.” (Eimwos 3:7, NW) Sang mahsen pwukat, kitail kak sukuhliki mehkot duwen kasalehda koasoi rir. Ekei pak, Siohwa sohte kin ketin kasalehda ekei ire kan erein lepin ahnsou oh kedekedeo e kak kasalehong ekei aramas duwen ire pwukat. Iaduwen kitail kak kahlemengih Siohwa ni ahl wet?

Ekei pak, irail sounsilepen sihpw me idihdda pwehn apwalih sapwellimen Siohwa sihpw nan mwomwohdiso en Kristian kin diar me e kesempwal en sohte kasalehda ire ieu lao lel pil ehu ahnsou me konehng. (Wiewia 20:28) Karasepe ieu, elder kan, ni arail medemedewe duwen kamwahupen mwomwohdiso, irail pahn pilada en sohte kasalehda oaritik kan me pid duwen koasoandi ieu me pid pwukoah kan nan mwomwohdiso lao lel ehu ahnsou mwuhr.

Ahpw, ma met pahn wiawi, e pahn kesempwal me koaros me pid ireo pahn wehwehki ni sansal duwen iahd, iaduwen, oh ma ireo pahn sansalda ong mwomwohdiso. Ma re wehwehki iahd ireo pahn sansalda, e pahn sewese irail en dehr kasalehda duwen ireo mwohn ahnsou me kileledi.​—Lepin Padahk 25:9.