Pioneer—Doadoahngki Atail Ahnsou Ni Elen Loalokong!

¹ ‘Ahi pwukoah dirlahr! E pahn mwahu ma I pahn wia pioneer men ahnsou wet?’ Iei me emen sister medemedewe ni ahnsou me e rongorong elder-pioneer men wia padahk nan Kapokon en Circuit me oaralap koasoia “Nantihwei Mwowe Nan Doadoahk en Pioneer.” Emen brother me pwulopwul me pil wie rongorong padahkohte kin medemedewe, ‘Iaduwen brothero ah kin kak koasoanehdi ah ahnsou pwehn pioneer? Ngehi kaidehn elder men, ahpw ahi mour kedirepwkihlahr kedirepw tohto!’

² Ni en eldero pouselahte, e kin kasalehda duwen kapai kan me kohsang doadoahk en pioneer, oh e pil interview ekei pioneer me kin wiahda wekidekla kan me anahn pwe irail en kak pioneer oh duwen Siohwa kin ketin kapaiada arail nannanti. E interview emen pioneer me ahneki kahpwal en paliwere, emen me ah pwoud sohte iang padahk mehlel, oh emen me tounmeteikihlahr ah doadoahk en mwohni me pweilaudo pwehki mwohni sang ah doadoahk en ahnsou wet itar ohng ah anahn akan. Ni en brother pwulopwulo oh sistero kin wie rongorong duwen pioneer pwukat ahr kin pweida mwahu sang ni sapwellimen Siohwa sawas, ira eri pwurehng kasawih pein ara madamadau oh irair akan. Se pil men kangoange kumwail en pil wia met, keieu pwehki awa kan me pioneer kan anahne kalohk tikitiklahr oh sounkalohk en Rongamwahu tohto kakehr kalohk awa kan me pioneer kan anahne kalohk.

³ Kitail ese me Siohwa iei Ih me Sounkapikadahn mehkoaros oh Kaun Lapalap en Lahng oh Sampah oh kitail pweipwandkihong Ih atail mour. (Dan. 4:​17; Wiewia 17:28) E sansal ong kitail me Siohwa kin ketin doadoahngki pwihn ehute. Kitail paiekihda atail kin iang pwihn wet oh papah Siohwa ni lelepek, ni atail kin utungada “ladu lelepek oh loalokong” pwehn kalohk ong aramas akan duwen Wehin Koht mwohn imwin koasoandi wet eh pahn leledo. (Madiu 24:45; 25:40; 1 Piter 2:9) Pwehki kitail memour ni “imwin rahn akan,” kitail wehwehki me ahnsoun kalohk wie mwotomwotalahr. (2 Tim. 3:1) Ahnsowohte, kitail pil anahne apwalih atail peneinei ong anahn en war akan. Neitail mwohni me kitail kin ale sang atail doadoahk en mwohni solahr itar duwehte mahs. (1 Tim. 5:8) Atail roson en paliwar solahr duwehte mahs. Oh, ni mehlel, kitail men ahneki ekis ahnsou oh mwohni ong pein kitail. (Ekl. 3:​12, 13) Ihme kahrehda, kitail kin medemedewe ma atail ale luhk en pioneer wia pilipil mwahu ehu.

⁴ E konehng emen emen kitail en kasawih pein atail irair kan oh pilada ma kitail kak pioneer. (Rom 14:12; Kalesia 6:5) E kin wia mehn kangoang laud en tehk duwen tohtohlahn irail akan me mwekidki luhk en iang doadoahk en pioneer. Mendahki kapwunod akan oh kahpwal akan en imwin rahn pwukat, ripoht en kalohk me mihmi nan Pwuhk en Pahr en 1999 (1999 Yearbook) kasalehda me sapwellimen Siohwa aramas 700,000 samwa nan sampah pwon kin nantihong wiewia doadoahk en kalohk nin duwen pioneer. Sohte lipilipil ma irail kin papah Siohwa nan wasa ieu me apwal en mwohni, sohte mehn peidaid, kahpwal en soumwahu, de kahpwal teikan, irail brother oh sister pwukat sohte kin pwangahkihda wiewia dahme mwahu, oh e konehng kitail en kapinga irail. (Kal. 6:9) Re ale sapwellimen Siohwa luhk en song ma e pahn ketin sewese irail. (Mal. 3:​10) Irail kin pehm me doadoahk en pioneer kin sewese irail en doadoahngki arail ahnsou oh mwohni ni elen loalokong oh irail kin kilang me Siohwa kin ketin kapaiairailda pwehki arail wiahda wekidekla kan me anahn pwe irail en kak iang doadoahk en pioneer oh kak mihmihte nan doadoahko.

⁵ Pioneer kan Kin Ale Kapai kan: Emen sister nan Cameroon me naineki kisin serepein kis kawehwehda iaduwen e kin pioneer: “Sangete ahnsou me nei serepeino ipwidi, ahnsou koaros e kin iang ie kalohk. Pil mwohnte e tepida alu, I kin wah ih. I kin pirehiong tihnsoweie. Ehu ni menseng, I uhdi ni ehu kisin sidohwa limwahn ahlo. Nei serio alulasang ie, oh e wahda ekei makisihn sang nan ahi kopwouo. E alu wasawasas kolahng ni pil ehu kisin sidohwa. Mendahki e sohte nohn kak lokaia, emen lih kilang ih oh e kihong liho ehu makisihn. Liho uhdahn pwuriamweikihla seri menet ah tikitik ahpw iang kalohk. E perenki ale makisihno oh e pil pwungki en onop Paipel rehi!”

⁶ Pwehki ah mwekidki luhk en iang doadoahk en Auxiliary Pioneer, emen elder oh pil tapwin peneinei nan Zambia me ahneki doadoahk en mwohni me full-time koasoanehdi en iang doadoahk en Auxiliary Pioneer mendahki ah inenen kin kedirepw. E men wiahda mehn kahlemeng mwahu ong ah mwomwohdiso oh ah peneinei. Ekei pak, e kin peidi limwahn ahl oh kapirada audiocassette en The Secret of Family Happiness. E kin luhke aramas me kin alialu pohn ahlo en kohdo rong audepen audiocassette. Ni ahl wet, e kihla pwuhken Family Happiness 16 oh pwuhken Loalokong 13, oh tepida onop Paipel rehn aramas riemen.

⁷ Ngenin pioneer pil kin sansal nan sapwen Zimbabwe. Nan April 1998, ehu mwomwohdiso me mie sounkalohk 117 ripohtki me irail sounkalohk 70 iang doadoahk en Auxiliary Pioneer oh sounkalohk 9 iang doadoahk en Regular Pioneer. Pil ehu mwomwohdiso me mie sounkalohk 94 ripohtki me irail sounkalohk 58 iang doadoahk en Auxiliary Pioneer. Pil ehu mwomwohdiso me mie sounkalohk 126 ripohtki me sounkalohk 58 iang doadoahk en Auxiliary Pioneer oh pil sounkalohk 4 iang doadoahk en Regular Pioneer. Ripoht en pahr en kalohk me ahpwtehn neko nan Zimbabwe wia ripoht mwahu ehu. Mendahki brother kan kin kedirepwki peneinei, mwomwohdiso, oh irail pil kin kakau arail Branch Ohpis, irail nannantihte doadoahngki arail ahnsou ni elen loalokong nan doadoahk en kalohk.

⁸ Pioneer kan kin wehwehki me iang doadoahk en pioneer oh pil kin dadaurete arail wiewia doadoahk wet sohte kin kohsang pein arail kehl. Irail wehwehki me arail doadoahk en sewese aramas kin kak pweida pwehki irail kin “likih kehl me Koht kin ketikihda.” (1 Piter 4:​11, NW) Arail pwoson kin sewese irail en doudoulahte nan arail doadoahk en kalohk rahn koaros. Pioneer me kin pweida sohte kin rapahki mehkan me kansenamwahu ong pein irail, ahpw re kin wehwehki me re anahne “nanti laud” nan doadoahk en kalohk, oh irail pahn ahpw kak ale kapai mwuledek.​—1 Deselonika 2:2.

⁹ Kitail en Kahlemengih Mehn Kahlemeng Mwahu en Pohl: Paipel kin kasalehda iaduwen wahnpoaron Pohl ah kin pweida mwahu nan kalohk oh sawas laud me e kin kihong aramas tohto. Ahpw, ma mie emen me ah pwukoa diralahr, Pohl iei emen. E kin dadaurete mendahki kalokolok oh kahpwal akan pwe en kak kalohki Rongamwahu oh kakehle mwomwohdiso kan. E pil anahne kanengamahiong ah soumwahu laud. (2 Kor. 11:21-​29; 12:​7-​10) E kin lamalam kehlail pwe e men doadoahngki ah ahnsou ni elen loalokong. E kin kasalehda me e kin wiahda ah doadoahk kan koaros sang ni sawas en Siohwa. (Pilipai 4:​13) Sohte emen rehn irail akan me Pohl sewese kak nda me Pohl kin doadoahngki mwahl ah ahnsou oh kehl nan doadoahk en Siohwa de e kakete wiahda mwahu sang dahme e wiewia. Ni mehlel, rahnwet kitail pil kin paieki en Pohl e doadoahngki ah ahnsou ni elen loalokong! Ia uwen atail kin kalahnganki kaweid me Pohl ketikihda pwehn sewese kitail en koasoanehdi dahme keieu kesempwal nan atail mour oh pil tengediongete padahk mehlel nan ahnsou apwal pwukat.

¹⁰ Ahnsou wet, “ahnsou me luhwehdi ong kalohki Rongamwahu mwotomwotalahr.” (1 Kor. 7:​29; Madiu 24:14) Kahrehda, e konehng emen emen kitail en pein idek rehtail, ‘Ma ahi mour pahn imwisekla lakapw, I kak patohwan ong Siohwa me rahnwet I kin doadoahngki ahi ahnsou ni elen loalokong?’ (Seims 4:​14) Dahme ke soh kapakap ong Siohwa ahnsou wet, oh kamehleleiong Ih duwen ahmw ineng en doadoahngki ahmw ahnsou ni elen loalokong nin duwen emen sapwellime Sounkadehde kan? (Mel. 90:12) Kapakap ong Siohwa en sewese iuk en kihsang nan ahmw mour soahng soh-katepe kan. Mendahki mahso ke lemeleme me ke sohte kak pioneer, ke soh men pwurehng kasawih ahmw mour oh tehk ma ke kakehr pioneer ahnsouwet?

¹¹ Doadoahngki Mwahu Irair kan me Ke Mihmi Loale: Mehlel me kaidehn koaros kak kalohk awa 70 nan sounpwong koaros nin duwen me irail Regular Pioneer kan kin wia pwehki irair en sounkalohk koaros kin wekpeseng. Ahpw, sounkalohk tohto kin koasoanehdi en kalohk awa 50 nan sounpwong ehu nin duwen Auxiliary Pioneer kan ahnsou koaros me irail kak. Ma ke sohte kak Auxiliary de Regular Pioneer pwehki irair kan me ke mihmi loale, ke dehr mworusala. Kaukaule kapakap pwe ahmw irair akan en kak wekidekla. Ma ke pil sohte kak wekidala ahmw irair me ke mihmi loale ahnsou wet, tamataman me Siohwa kin ketin kupwurperenki dahme ke kin wia ni ahmw papah Ih sang nan mohngiong unsek. (Madiu 13:23) E mwahngih me ke kin kesihnenda teng ni ahmw kin papah Ih oh me ke pil kin wia uwen ahmw kak koaros nin duwen sounkalohk lelepek men me kin kalohk nan sounpwong koaros. Mwein ke kak nantihong koahiekla nan kalohk, oh nantihong kamwahuwihala ahmw koahiek nin duwen omw kin wia sounkalohk oh sounpadahk en Rongamwahu.​—1 Tim. 4:​16.

¹² Pwehki “rahn lapalap oh kamasepwehk” en Siohwa kerendohr, kitail pil kin doadoahngki atail ahnsou ni elen loalokong ni atail pahn kin kanekehla doadoahk me Siohwa kehkehlikihong kitail en wia. (Soel 2:​31) Sehdan ese me ah ahnsou mwotomwotlahr, oh e kin wia uwen ah kak koaros en kahpwalihala atail mour oh kahrehiong kitail en ekis ekis sohpeisang soahng kan me keieu kesempwal. (Pilipai 1:​10; Kaudiahl 12:12) Ke dehpa lemehda me Siohwa sohte kin nsenohkin uhk oh pil tamataman me Siohwa kin ketin kakohng sewese iuk en kihsang nan ahmw mour soahng soh-katepe kan oh pil ketin sewese iuk en wia uwen ahmw kak koaros nan kalohk. (Mel. 145:16) E kaperen pwe sounkalohk tohto, ni arail kin pwurehng kasawih oh tehk sapahlih arail irair akan, irail kin diarada me irail kakehr iang doadoahk en Auxiliary Pioneer de Regular Pioneer. Ni mehlel, pioneer kan kin diarada nsenamwahu mehlel ni arail kin doadoahngki arail ahnsou ni elen loalokong. Ke kak iang wia emen pioneer?