Atail Pweipwand Ong Meteikan

¹ Wahnpoaron Pohl pehm me e sapwellimaniki pwukoa en kalohk ong meteikan. E ese me Siohwa ketin koasoanehdi sapwellimeo en pwoukinkitailla pwe soangsoangen aramas akan en kak ale komourparail. (1 Tim. 2:​3-6) Ihme kahrehda, Pohl mahsanih: “Mie ei pwukoa ong aramas akan koaros, ong me marainlahr oh pil ong me rotorot akan, ong me loalokong oh me lampwon kan.” E kin nantihong eimah kalohki Rongamwahu ong aramas akan pwehn pwainla ah pweipwand.​—Rom 1:​14, 15.

² Duwehte Pohl, Kristian akan rahnwet kin rapahki ahnsou mwahu kan koaros en ehukiong meteikan Rongamwahu. Pwe “Kahn Kamakam Kowahlap” pahn kereniong wiawi, atail doadoahk en rapahki aramas me mohngiong mehlel inenen karuwaru. Limpoak mehlel ong aramas teikan pahn kamwekid kitail en ngoangki wia doadoahk kesempwal wet.​—Madiu 24:21; Esekiel 33:8.

³ Pwainla Atail Pweipwand: Ahl me keieu kesempwal me kitail kak doadoahngki pwe en kak tuhwong aramas iei kalohk sang ihmw lel ihmw. Nan wasa kan me aramas tohto sohte kin kalap mihmi ni imwarail kan, kitail anahne ntingihedi mwahu eden aramas akan me kitail tuhwong oh kitail en pwurala ahnsou kan me irail pahn mihmi nan ihmw. (1 Kor. 10:33) Kitail pil kak tuhwong aramas akan ni atail pahn kalohk nan wasahn pisnis kan, nanial, nan wasahn mwemweit kan, nan wasahn peidi en sidohsa kan, oh pil ni atail pahn doadoahngki telephone. Kitail kak pein idek rehtail, ‘I wia uwen ahi kak en kalohk nan wasa kan koaros pwe en kak ehukihong meteikan duwen rohng kesempwal wet me pid atail mour?’​—Madiu 10:11.

⁴ Emen pioneer kin kesempwaliki ah pwukoa en tuhwong aramas koaros nan ah wasahn kalohk. Ehu ihmw me e kin kalap kohla, ahnsou koaros sohte aramas ni ihmwo oh kahdeng kan kin ritidi ahnsou koaros. Ahpw, ehu rahn, sistero sohte iang kalohk oh e moahl wasao oh e kilang sidohsa pwoat peipei likin ihmwo. Pwehki e men tuhwong aramas akan me kin mihmi mwo, e ahpw letelet ni wenihmwo. Ohl emen ahpw pidoido, oh sistero kalohk ong ohlo oh mwurin mwo, sistero oh ah pwoud pwurehng pwurala rehn ohlo. Mwuri, ohlo men onop Paipel, oh met ohlo papidaislahr. Ohlo kin kalahnganki me sistero kesempwaliki ah pwukoa en kalohk ong aramas koaros.

⁵ Pwehki mwotomwotlahn ahnsou, a kitail anahne isaneki atail ahnsou en pwainla atail pweipwand ong aramas akan ni atail pahn kin nantihong kalohk ong aramas koaros.​—2 Kor. 6:​1, 2.

Pali 11: Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu

Sewese Tohnsukuhl akan me Wiahla Sounkalohk kan en Pwurehng Pwurala Rehn Aramas akan

¹ Ni ahnsou me tohnsukuhl en Paipel men kin tepida iang kalohk, e pahn kin tuhwong aramas akan me kin perenki rong duwen Rongamwahu. Iaduwen omw kak sewese sounkalohk kapwo en pweida mwahu ni e pahn pwurehng pwurala rehn aramas akan (return visit) oh kakairada ahn tohnihmwo ah ineng en men rong?

² Kaunopada ohng wia return visit kak wiawi ni ahnsou me e pahn tepin tuhwong tohnihmwo. Kangoange sounkalohk kapwo en kasalehda a nsenohki aramas akan me e kin tuhwong. (Pilipai 2:4) Ekis ekis kaiahneda sounkalohk kapwo en kin wia peidek kan ong tohnihmw kan me e kin padahk ong pwe irail en kak kasalehda arail madamadau kan, oh rong mwahu ahnsou me irail pahn koasoi, oh tamataman dahme irail kin pwunodki. Ni ahnsou me tohnihmwo pahn kasalehda me e perenki rong, sewese sounkalohk kapwo en ntingihdi soahng kan me kesempwal me duwehte ede, ah wasahn kousoan, dahme re koasoipene. Doadoahngki soahng pwukat pwehn koasoanehdi dahme sounkalohk kapwo pahn koasoia ni ah pahn pwurehng pwurala rehn aramaso.

³ Kaunopada Pwehn Pwurehng Pwurala: Kousapahlih tepin ara tuhpeneo, oh kasalehiong sounkalohk kapwo iaduwen a pahn pilada ehu ire me pid Wehio me pahn sair mohngiong en tohnihmwo. (1 Kor. 9:​19-​23) Kumwa kaunopada ehu kisin padahk pwe en kak doadoahngki iren Paipel ehu oh pil wadek ehu parakrap nan brochure. Oh pil, kaunopada peidek ehu me e kak kihda ni imwin ah padahko pwehn kak kaunopada ong ah pahn pwurehng pwurala rehn tohnihmwo mwuhr. Kasalehiong sounkalohk kapwo iaduwen e kak kalaudehla ahn aramaso ah loalokongkihla Mahsen en Koht ehu ehu return visit me e pahn kin wia.

⁴ E pil pahn wia sawas laud ma ke pahn sewese tohnsukuhlo (sounkalohk kapwo) en wiahda ehu kisin padahk mwotomwot pwehn kak doadoahngki ni ah pahn pwurehng pwurala rehn tohnihmwo (return visit). Mwurin e pahn rahnmwahuih tohnihmwo, e kak nda: “I perenki ata koasoipene rahn teio, oh I pwurodo pwehn pil ehukihong