Kalohki Duwen Wehin Koht​—⁠Atail Pwais Kaselel

¹ Rahn koaros, tohnsampah lik lik kei (billions) kin paiekihda dahme Siohwa ketikihda ong mour. (Madiu 5:​45) Ahpw, aramas malaulau kin paiekihda pwais kaselel en kalahnganki dahme Sounkapikpatail ketikihda ni arail kin kalohki Rongamwahu en Wehin Koht. (Madiu 24:14) Ia uwen laud en ahmw kesempwaliki pwais kaselel wet?

² Kalohki duwen Wehio kin kawauwih Koht oh wahdo koapworopwor oh popohl nanpwungen aramas me kin pahtoukihla irair suwed en sampah ahnsou wet. (Ipru 13:15) Ong irail me kin mwekidki Rongamwahu en Wehio, e kin kihong irail koapworopwor ong ahneki mour soutuk ehu rahn. (Sohn 17:3) Mehnia doadoahk en wai nan sampah wet kak kihda soangen kapai pwukat? Wahnpoaros Pohl kasalehda me e kin kalahnganki doadoahk en kalohk ni ah kin ngoangki wia doadoahk wet. E kin kilangwohng doadoahk wet duwehte emen me diarada kopwahn takai kesempwal kei.​—Wiewia 20:20, 21, 24; 2 Kor. 4:​1, 7.

³ Kalahnganki Atail Pwais Kaselel: Ehu ahl me kitail kak kasalehda atail kalahnganki atail pwais kaselel en kalohk iei sang ni atail nsenohki kamwahupen oh kesempwalpen atail kalohk. Kitail kin tounmeteiki atail ahnsou oh kehl en kaunopada atail padahk me pahn kamwekid aramas me kitail koasoiong? Mie mehkot kitail kak wia pwehn kamwahuwihala atail koahiek en doadoahngki iren Paipel kan oh kawehwe ong irail ni ahl me pahn sair mohngiongarail? Kitail kin wia uwen atail kak en kalohk ong aramas koaros nan atail wasahn kalohk? Kitail wehwehki iaduwen kitail kak tepiada onop Paipel rehn aramas oh wia onop rehrail nan wihk koaros? Duwehte irail Kristian lelepek kan en mahs oh pil nan atail ahnsou, kitail en ahneki madamadau pwung oh konehng duwen atail kalohk oh kitail en kesempwaliki atail pwais kaselel.​—Madiu 25:14-​23.

⁴ Ni ahnsou me kitail kin lelohng kahpwal kan me pidada atail mahlahr, atail soumwahu kan, de kahpwal teikan, e kin wia mehn kamweit en wehwehki me Siohwa kin kesempwaliki atail nannanti nan kalohk. Mahsen en Koht kin kamehleleiong kitail me Siohwa kin kesempwaliki soahng koaros me kitail kin wia ni atail papah Ih, iangahki dahme kitail kin wia me aramas teikan sohte kin tehk.​—Luk 21:​1-4.

⁵ Kalohki Wehio kak kihong kitail nsenamwahu mehlel. Emen sister me mahki sounpahr 92 koasoia: “Ia uwen ahi kin kalahnganki pwais kaselel me I ahneki ni ahi kin papah Siohwa erein sounpahr 80 oh I sohte koluhkihla ahi pilipil en papah Siohwa erein ahi mour! Ma I kak pwurehng wiahda pilipil en dahme I pahn wia nan ahi mour, I pahn pwurehng pilada en papah Siohwa pwehki ‘sapwellimen Koht limpoak poatopoat me mwahu sang mour.’ ” (Melkahka 63:3) Kitail en pil kesempwaliki pwais kaselel wet me Koht ketikihong kitail​—⁠iei doadoahk en kalohki Wehin Koht.

Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu Pali 12:

Sewese Tohnsukuhl kan me Wiahla Sounkalohk Kapw kan en Tepida oh Wia Onop en Paipel Rehn Aramas akan

¹ Ni ahnsou me neitail tohnsukuhl en Paipel kin wiahla sounkalohk kapw kan, irail kakete saloh ni arail kin medemedewe duwen tepiada onop Paipel rehn aramas oh pil wia onop pwukat nan wihk koaros. Iaduwen atail pahn kak sewese irail sounkalohk kapw kan en ahneki madamadau pwung oh pil koahiekla ni arail tepida oh wia onop en Paipel rehn aramas akan?​—Madiu 24:14; 28:19, 20.

² Ni ahnsou me tohnsukuhl en Paipel men pahn wiahla sounkalohk kapw men, e sansal me e iangadahr Theocratic Ministry Sukuhl. Kaiahn me e pahn ale sang sukuhl wet ni ah kin kaunopada oh wia padahk kan pahn sewese ih en koahiekla “nin duwen tohndoadoahk men me sohte namenengki eh doadoahk, me kin doadoahngki mahsen en padahk mehlel ni ahl me pwung oh konehng.”​—2 Tim. 2:​15.

³ Padahk Ni Ahmw Wia Mehn Kahlemeng Mwahu: Sises kaiahne sapwellime tohnpadahk ko ni ah ketikihda kaweid sansal oh wia mehn kahlemeng mwahu. E mahsanih: “Tohnpadahk koaros ni ar pahn deila mehlel, re pahn kin duwehla ar sounpadahk kan.” (Luk 6:​40) E kesempwal ahmw kin kahlemengih Sises ni ahmw wia mehn kahlemeng mwahu nan pein ahmw doadoahk en kalohk. Ni ahnsou me noumw tohnsukuhlo pahn kilang ahmw mehn kahlemeng mwahu nan kalohk, e pahn wehwehki me atail mehn akadei ni ahnsou me kitail kin pwurehng pwurala rehn aramas iei en tepiada onop Paipel rehrail.

⁴ Kawehwe ong ih me ni ahnsou me kitail kin tepiada onop Paipel rehn tohnihmwo, e sohte anahne kawehwe ni oaritik duwen koasoandi en onop. Pali laud en ahnsou, e pahn keieu mwahu en kawehwe duwen koasoandi en onop ni ahmw pahn wia parakrap ehu de riau nan brochure. Ke kak tehk duwen iren sawas kan me pahn sewese iuk en wia met nan Atail Doadoahk Ong Wehio en sounpwonget, pali 8 oh pil sounpwong en January 2002, pali 6.

⁵ Ke kak luhke noumw tohnsukuhl me wiahla sounkalohk kapw en iang uhk de pil emen me koahiek nan kalohk en kohla rehn amwa Paipel Study kan ni ahnsou me konehng. E kak kawehwe mehkot me pid parakrap nan onopo de kawehwe duwen iren Paipel ehu. Eri, ni sounkalohk kapwo pahn kilang ahmw wia onop en Paipel rehn ahmw Paipel Study, e pahn sukuhliki iaduwen e kak sewese aramas me onop Paipel en kekeirada mwahu ni pali ngehn. (Lepin Padahk 27:17; 2 Tim. 2:2) Kapinga ih, oh sewese ih en kamwahuwihala wasa kan me anahn.

⁶ Kaiahne sounkalohk kapw kan en wiahla sounpadahk kan me pahn kawehwe mwahu Mahsen en Koht oh met pahn sewese irail en koahiekla nan “doadoahk mwahu” en tepida wia onop en Paipel rehn aramas akan. (2 Tim. 3:​17) E inenen kansenamwahu en sewese irail en pil sewese aramas teikan en mwekidki luhk wet: “Mehmen me men nimpildahr en kohdo, en ale pilen komour nin duwen kisakis ehu, mehmen me men ale, en ale”!​—Kaudiahl 22:17.