Tepida Onop en Paipel Rehn Aramas Ni Wenihmw kan oh Ni Ahmw Doadoahngki Telephone

1, 2. Iaduwen kitail kak kawekila atail koasoandi en onop Paipel pwehn kak sewese aramas me kin kedirepw?

¹ Rahnwet, aramas kin inenen kedirepw. Ahpw, aramas tohto kin perenki rong duwen soahng ngenin kan. Iaduwen atail kak sewese irail en kaitarala arail anahn en pali ngehn? (Madiu 5:3) Sounkalohk tohto kin onop Paipel rehn aramas ni arail wenihmw kan de ni arail doadoahngki telephone. Ke kak kalaudehla ahmw kalohk ni ahl wet?

² Pwehn tepida onop en Paipel rehn aramas akan, kitail anahne kaunopada pwehn kak doadoahngki ahnsou mwahu kan koaros en kasalehong aramas kamwomwada en onop Paipel. Iaduwen oh iawasa met kak wiawi?

3. Dahme kahrehda e pahn mwahu en kasalehda kamwomwada en onop Paipel ni ahnsou me kitail kin tepin tuhwong aramas akan, oh iaduwen kitail kak wia met?

³ Ni Wenihmw kan: Ni ahnsou me ke pahn tuhwong aramas emen me kin perenki koasoi duwen Paipel, ke kak pahkalahng noumw brochure parakrapo me ke kaunopadao, duwehte nan Kupwurki brochure, Iren Mehn Kasukuhl 1, parakrap 1 oh tepida. Wadek parakrapo, wadek peidek oh mweidohng tohnihmw en sapeng peideko, oh koasoia iren Paipel ehu de riau. Pali laud en ahnsou, met kak wiawi ni wenihmwo nan erein minit limau de eisek. Ma aramaso perenki met, koasoanehdi ahnsou ehu me ke kak pwurodo oh wia pil ehu parakrap de riau.​—Iren sawas teikan ntingdi nan Atail Doadoahk Ong Wehio en January 2002, pali 6.

4. Iaduwen ke kak tepida onop Paipel rehn aramas me ke return visit reh ni wenihmwen imweo?

⁴ Ke kak pil wia met pwehn tepida onop Paipel rehn aramas akan me ke kin Return Visit rehrail. Karasepe, ke kak kasalehda mwaren Koht nan Kupwurki brochure ni ahmw pahn doadoahngki Iren Mehn Kasukuhl 2, parakrap 1-2. Ni ahnsou ke pahn pwurehng pwurala mwurin rahno, ke kak kasalehda dahme Pwuhk Sarawi kin mahsanih duwen sapwellimen Siohwa irair kan, ni ahmw doadoahngki parakrap 3-4. Mwurin mwo, ni ahnsou me ke pahn koasoia parakrap 5-6 oh pil kilel ni pali 5, ke kak kasalehiong tohnihmwo iaduwen onop en Paipel pahn sewese ih en esehla Siohwa. Soahng pwukat koaros kak wiawi ni ahmw pahn kesihnen ni wenihmwo.

5, 6. (a) Dahme kahrehda ekei aramas pahn perenki onop Paipel ni arail pahn koasoipene nan telephone? (b) Dahme kitail kak nda ma kitail men tepida onop Paipel rehn aramas ni atail doadoahngki telephone?

⁵ Ni Ahmw Pahn Doadoahngki Telephone: Ekei aramas kin perenki koasoi nan telephone sang arail kin perenki koasoi ni arail kilikilang aramas teio. Medewehla duwen ekspiriens wet: Ni ahnsou me emen sister kalohk sang ihmw lel ihmw, e tuhwong lih pwulopwul men me wia nohno men oh kin pil kedirepwki ah doadoahk en mwohni. Sistero diarada me liho sohte kin kalap mihmi nan ihmw, eri e song en tuhwong ih sang ni e doadoahngki telephone. Lih pwulopwulo kawehwe ong sistero me e sohte ahneki ahnsou en kak koasoia Pwuhk Sarawi. Sistero eri koasoia: “Ni minit 10 de 15, ke kak sukuhliki mehkot kapw, pil sang ni ata pahn koasoipene nan telephone.” Liho eri sapeng: “Eri, ma ke pahn call ie, eri, I pwungki!” Sohte pwand, sistero tepida onop rehn liho ni ara kin doadoahngki telephone.

⁶ Iaduwen​—⁠ke lemeleme ekei aramas me ke kin tuhwong pahn pwungki onop Paipel nan telephone? Ke kak song doadoahngki kaweid me kitail koasoipeneo, de ke kak nda: “Ma ke mwahuki, kita kak koasoipene duwen Paipel nan telephone. E pahn mwahu ong komwi?” Ni ahmw pahn wekidala ahmw koasoandi kan pwe ken kak onop Paipel rehn meteikan ni ahnsou oh ni ahl me pahn mwahu ong irail, kitail pahn kak en sewese irail en “diarada loalokong me pid duwen Koht.”​—Lepin Padahk 2:5; 1 Kor. 9:​23.

Dahme Kitail Kak Koasoia Duwen Makisihn kan

KAHN IROIR

PAKPAKAIRKI WEHIN SIOHWA

August 2005

“Ni ahnsou me aramas me ke poakpoake mehla, ke men pwurehng kilang aramaso. Ke sou pwungki? [Mweidohng en sapeng.] Aramas tohto kin ale kamweit ni arail kin medemedewe duwen inou me ntingdi nan Paipel me pid duwen kaiasada. [Wadek Sohn 5:​28, 29.] Makisihn wet kin kasalehda duwen iahd kaiasada pahn wiawi oh ihs me pahn iang iasada. I pahn perenki pwurodo rehmw oh kita kak koasoiapene duwen met. Ma ke men kihda ahmw kisin sawas ong doadoahk en kasukuhlih aramas duwen Paipel, I pahn perenki ale.”

The Watchtower Aug. 15

“Ma aramas emen kin mehla kapwuriamwei, aramas teikan kin medemedewe ma dahme kin wiawi ahnsou me aramas kin mehla. Ke lemeleme kitail aramas kak wehwehki dahme kin wiawi ni ahnsou aramas akan kin mehla? [Mweidohng en sapeng.] Makisihn wet kin kawehwehda dahme Paipel kin kasalehda duwen irair en me mehlahr akan. E pil kin kasalehda duwen sapwellimen Koht inou en kaiasada aramas me kitail poakpoake.” Wadek 1 Korint 15:26.

Awake! Aug. 22

“Ke wehwehki me palien “tourism” me keieu nan sampah nin duwen wasahn alehda tohndoadoahk? [Mweidohng en sapeng.] Kekeiradahn “tourism” kin mie kamwahupe kan oh kasuwedpe kan. Makisihn wet kin kasalehda duwen kamwahupen oh kasuwedpen doadoahk me pidada tourist kan. E pil kin kihda iren sawas kan ong irail me kin seiloak wasa doh kan.”