Ahmw Sawas Anahn

¹ “Kalahnganki soahng koaros me ke kin wia ong kiht. Uhdahn e wia sawas laud.” Soangen kaping wet iei atail pepehm ong elder kan oh ministerial servant kan. Ni sapwellimen Koht pwihn sansal kin wia lalaudla, mie anahnpen ohl koahiek kan en papah nan mwomwohdiso 100,000 samwa nan sampah pwon. Ma ke wia emen brother me papidaislahr, ahmw sawas anahn.

² “Kalaudehla Ahmw Sawas”: Iaduwen ahmw pahn kak kalaudehla ahmw sawas ong pwukoa kan nan mwomwohdiso? (1 Tim. 3:1) Sang ni ahmw pahn wia mehn kahlemeng mwahu nan irair koaros en ahmw mour. (1 Tim. 4:​12; Taitus 2:​6-8; 1 Piter 5:3) Oh pil, ken wia uwen ahmw kak koaros nan doadoahk en kalohk oh sewese sounkalohk teikan en wia duwehte. (2 Tim. 4:5) Kasalehda ahmw kin nsenohki riatail brother oh sister kan ni pali ngehn. (Rom 12:13) Ken pwerisek ni ahmw onop Mahsen en Koht oh nantihong “koahiekla nan padahk.” (Taitus 1:9; 1 Tim. 4:​13) Oh pil, pwerisek en apwalihala pwukoah kan me elder kan likikihong uhk. (1 Tim. 3:​10) Ma ke wia tapwin peneinei, ken ‘apwahpwalih mwahu ahmw peneinei.’​—1 Tim. 3:​4, 5, 12.

³ Ma ke papah pwehki pwukoa ehu kohwong uhk duwehte pwukoa en elder de ministerial servant, ke anahne pwerisek doadoahk laud oh pil ke anahne ahneki ngenin tohnmetei. (1 Tim. 5:​17) Kahrehda, ni ahmw kin kalaudehla ahmw sawas, ken kasalehda aktikitik ni ahmw kin papah meteikan. (Madiu 20:25-​28; Sohn 13:​3-5, 12-​17) Doudouloale duwen lamalam en Timoty, oh nantihong kahlemengih ih. (Pilipai 2:​20-​22) Duwehte Timoty, ahmw wiewia mwahu kan pahn kasalehda me ke kak kapwaiada pwukoa kan me kohwong uhk. (Wiewia 16:​1, 2) Ni ahmw pahn kekeirada ni pali ngehn pwehn kak apwalih pwukoa kan oh doadoahngki kaweid me kin kohwong uhk pwehn kak kamwahuwihala ahmw pali ngehn, “aramas koaros pahn kak kilang omw kekeirada.”​—1 Tim. 4:​15.

⁴ Pahpa oh Nohno kan, Kaiahne me Pwulopwul kan en Kak Iang Sawas: Seri kan kak ale mehn kasukuhl sang ahnsou me re tikitik. Kaiahne irail pwe re kak rong kanahieng ahnsoun mihding kan, oh kaiahne irail nan kalohk, oh pil kaiahne irail en tiahk mwahu nan Kingdom Hall oh ni imwen sukuhlo. Sewese irail en perenki sewese meteikan, duwehte kamwakel Kingdom Hall, sewese me mah kan, oh soangen sawas teikan. Sewese noumw seri kan pwe ren kehn soangen peren me kin kohsang kihkihwei. (Wiewia 20:35) Soangen kaiahn wet kak sewese irail en wiahla pioneer kan, ministerial servant kan oh pil elder kan ehu rahn.

Pali 4: Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu

Kaiahne Tohnsukuhl kan en Kaunopada

¹ Tohnsukuhl emen me kin wadek iren mehn kasukuhlo mwowe, kaunopada oh lainih pasapeng kan, oh kin medemedewe iaduwen e pahn pasapeng ni pein ah lokaia, kin kekeirada mwadang ni pali ngehn. Ihme kahrehda, ni ahnsou me ke kin kohla rehn ahmw Paipel study kaukaule, kowe oh ahmw Paipel study kak ehupene oh kaunopada iren mehn kasukuhl ehu pwehn kasalehiong tohnsukuhlo ia mwomwen e pahn onop Paipel. Ong pali tohto en tohnsukuhl kan, e pahn mwahu ma kumwa pahn sawaspene kaunopada irelaud ehu de iren mehn kasukuhl ehu pwon.

² Lainihdi Pasapeng kan oh Ntingihdi Ire Kesempwal kan: Kawehwe iaduwen tohnsukuhlo kak diar pasapeng kan me pwungiong peidek kan. Kasalehiong tohnsukuhlo pein noumw brochure de pwuhk me kumwa onopki me kasalehda me ke kileledihte lepin lokaia kesempwal kan. Ni amwa pahn ehupene kaunopada iren mehn kasukuhlo, tohnsukuhlo pahn men alasang ahmw mehn kahlemeng mwahu, oh lainihdi nah brochure de pwuhk ire kan me kesempwal pwehn kak katamankin ih duwen pasapeng pwungo. (Luk 6:​40) Mwuri, ke pahn idek rehn tohnsukuhlo en kasalehiong uhk ah pasapeng ni pein eh lokaia. Met pahn sewese iuk en ese ia uwen laud tohnsukuhlo wehwehki duwen mouren padahko.

³ Mehkot kesempwal tohnsukuhlo en kaunopada oh kasawihada iei iren Paipel kan me audepe kan sohte ntingdi nan brochure de pwuhk me kumwa onopki. (Wiewia 17:11) Sewese ih en wehwehki me iren Paipel pwukat kin utungada ire kan nan parakrapo. Kasalehiong ih iaduwen e pahn kak ntingihdi mehn kataman kan ni keilen nah brochure de pwuhk me kumwa onopki. Kalap katamankin ih me soahng koaros me e kin sukuhliki kin poahsoanda pohn Paipel. Kangoange ih en doadoahngki iren Paipel kan nan eh pasapeng kan nan onop.

⁴ Kasawih oh Kousapahl: Mwohn tohnsukuhlo pahn kaunopada ong ah onop, e pahn mwahu ma e pahn kilang wasao me e pahn onop. E kak wia met ni e pahn tehk oaralap, sawaspen oaralap, karasaras oh kilel kan. Kawehwehiong ih me ni ahnsou e kin kaunopada eh onop, e kak kousapahlih ire kesempwal kan, oh sapeng peidek kan nan koakon en kousapahl ma mie. Ma e pahn wia met, e pahn sewese ih en tamataman ire kesempwal kan sang onopo.

⁵ Kaiahne tohnsukuhlo en kaunopada mwahu ong eh onop rehmw pahn pil sewese ih en wia pasapeng mwahu kan nan mihding en mwomwohdiso kan. E pahn pil sewese ih en wiahda soangen onop me pahn katapan oh met pahn sewese ih pil mwurin ah onop rehmw pahn nekier.