“Ale Ketihnain Sang Mahsen en Pwoson”

¹ En mourki mour lelepek ong Koht kin wehwehki doadoahk oh nanti laud. (1 Tim. 4:​7-​10) Ma kitail pahn likih pein atail kehl, kitail pahn pwangada oh pwupwudi ni atail pahn sosong en mour mwahu. (Aiseia 40:29-​31) Ehu ahl me kitail kak ale kehl sang rehn Siohwa iei ni atail pahn “ale ketihnain sang mahsen en pwoson.”​—1 Tim. 4:6.

² Diren Mwengehn Ngehn: Siohwa kin ketikihong kitail diren mwengehn ngehn ki sapwellime Mahsen oh pil pwihn en “ladu lelepek oh loalokong.” (Madiu 24:45) Kitail kin wia uwen atail kak en paiekihda mwengehn ngehn? Kitail kin wadek Paipel rahn koaros? Kitail kin koasoanehdi atail ahnsou en wia pein atail onop oh doudouloale? (Mel. 1:​2, 3) Soangen koasoandi en kaukaule kang mwengehn ngehn pwukat pahn pere kitail sang luwetla pwehki kasongosong kan sang ahn Sehdan sampah. (1 Sohn 5:​19) Ma kitail audaudkihda atail madamadau soahng mwahu kan oh doadoahngki kaweid nan atail mour, Siohwa pahn ketin ieiang kitail.​—Pilipai 4:​8, 9.

³ Siohwa pil kin kakehle kitail ni e doadoahngki mihding kan en mwomwohdiso. (Ipru 10:24, 25) Kaweid ngenin kan oh pil werek mwahu kan me kitail kak diar nan tuhpene pwukat kin kakehlailih kitail pwe kitail en kak powehdi kasongosong kan me lelohng kitail. (1 Pit. 5:​9, 10) Emen Kristian me pwulopwul koasoia: “I kin kohla sukuhl rahn koaros oh met kin kansensuwediehla. Ahpw, mihding kan kin duwehte wasahn kommoal pahn mwetehn tuhke nan sapwtehn, wasakis me kin kansenamwahuih ie ien kak nannanti en powehdi pil ehu rahn en sukuhl.” Ia uwen atail kin paiekihda atail kin nantihong iang towehda mihding kan!

⁴ Kalohkiong Aramas Padahk Mehlel: Kalohk ong meteikan duwehte mwenge ong Sises. E kin kakehlada ih. (Sohn 4:​32-​34) Oh pil, ni ahnsou me kitail kin kalohkiong meteikan duwen sapwellimen Koht inou kaselel kan, kitail kin pehm me kitail kehlailkihda. Kedirepwki doadoahk en kalohk kin kahrehong atail mohngiong oh madamadau en kilangwohngete Wehin Koht oh kapai kan me pahn wiawi ni ahnsou keren. Mehpwukat kin kakehlailih kitail.​—Madiu 11:28-​30.

⁵ Ia uwen atail paiekihda kapai kan me kohsang mwengehn ngehn me Siohwa kin ketikihong sapwellime aramas akan rahnwet! Kitail en kaukaule kalaudehla atail perenki kapinga Ih.​—Aiseia 65:13, 14.

Pali 5: Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu

Koasoanehdi Ia Uwen Laud en Brochure de Pwuhk me Kumwa Pahn Onop

¹ Ni ahnsou me Sises kin padahk, e kin medemedewe duwen sapwellime tohnpadahk kan, oh padahk ong irail “duwen me re kin kak wehwehki.” (Mark 4:​33; Sohn 16:12) Duwehte rahnwet, kitail me kin wia sounpadahk kan en Mahsen en Koht anahne koasoanehdi ia uwen laud me kitail pahn onopki rehn aramas akan erein ahnsou me kitail onop rehrail. Uwen me kitail pahn onopki pahn poahsoanda pohn koahiek en tohnsukuhlo oh pil irair en sounpadahko oh pil tohnsukuhlo.

² Kakairada Pwoson Kehlail: Ekei tohnsukuhl mwein pahn anahne kasukuhl pak tohto sang pak riau de siluh pwehn koledi dahme tohnsukuhl teikan alehier nan kasukuhl ehute. E kesempwal kitail en sewese tohnsukuhlo en wehwehki dahme e onopki sang atail mwadang wia onopo ahpw tohnsukuhlo sohte wehwehki dahme e onopki. Tohnsukuhl koaros anahne wehwehki mwahu padahk kan en Mahsen en Koht pwehn kak ahneki pwoson kehlail.​—Lepin Padahk 4:7; Rom 12:2.

³ Ni ahmw pahn onop rehn tohnsukuhlo wihk koaros, pil kihong ahmw ahnsou me anahn pwehn sewese ih en wehwehki oh kamehlele padahk kan me kohsang nan Mahsen en Koht. Dehr karuwaru onop pweh tohnsukuhlo anahne paiekihda padahk mehlel me e sukuhliki. Mweidong ahnsou me itar en kasalehda ire kesempwal kan oh iren Paipel kan me pahn utungada padahk kan.​—2 Tim. 3:​16, 17.

⁴ Doudoulahte Nan Onopo: Kitail sohte men karuwaru ni ahnsoun onop oh pil kitail sohte men mweidohng mehkot en kauwehla atail onopki brochure de pwuhko. Ma tohnsukuhlo kin perenki koasoakoasoia soahng kan me pid pein ih, kitail anahne koasoanehdi en koasoia soahng pwukat mwurin onopo.​—Ekl. 3:1.

⁵ Ni pali teio, kitail anahne kanahieng me pein kitail sohte pahn koasoakoasoi nohn daulihla pwehki kitail kin medemedewe uwen atail kin ngoangki padahk mehlel. (Mel. 145:​6, 7) Ekei pak, kitail kak koasoia duwen ekspiriens ehu de ehu ire tohrohr me pahn sewese tohnsukuhlo en wehwehki duwen onopo, ahpw kitail sohte men koasoakoasoi nohn daulihla pwehki met pahn kauwehla en tohnsukuhlo ahnsou en sukuhliki loalokong pwung en padahk kan sang Paipel.

⁶ Ni atail pahn kawehwe dahme kitail onopki ni uwe ieu me itar nan ehu ehu onop, kitail kak sewese tohnsukuhl akan en “keid nan marain me Siohwa ketikihong kitail.”​—Aiseia 2:​5, New World Translation.