Rahnen Siohwa Kerendohr

¹ Kristian akan kin uhdahn kasikasik Rahnen Siohwa, pwehki ih ahnsou me E pahn ketin kauwehla koasoandi suwed wet oh E pahn wahdo sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr. (2 Piter 3:​12, 13, footnote) Pwehki kitail sehse ahnsou dah me Rahno pahn leledo, kitail anahne dadaurete oh mwasamwasahn oh pil sewese meteikan en pil wia duwehte. (Esekiel 33:​7-9; Madiu 24:42-​44) Doudouloale sapwellimen Koht mahsen en kokohp akan pahn kakehle atail kin kamehlele me “Rahnen Siohwa kerendohr.”​—Sepanaia 1:​14.

² Ireirekdo en Wehi kan me Kaunda Sampah kan: Nin duwen me kileledi nan pwuhken Kaudiahl 17:​9-​11, wahnpoaron Sohn kasalehda duwen “nanmwarki isimen,” me wehwehki kaundahn sampah isuh. Sohn pil kasalehda me mie “kawelimen en nanmwarki,” me iei pwihn en United Nations me mie rahnwet. Eri, mie pil ekei kaunda kan likin mepwukat me pahn pil kaunda sampah? Soh, kokohpo kasalehda me kawelimen en nanmwarki pahn “ale kamwomwpe,” mwurin mwo sohte pil ehu kaundahn aramas me pahn wiawi. Iaduwen​—⁠kokohp wet soh kin sewese iuk en kilang ahnsou dah me kitail memour loale?

³ Daniel 2:​31-​45 kin sewese kitail en wehwehki duwen ketidohn Rahnen Siohwa. Nan kokohpo, lapalahn sansal me Nepukadnesar kilangada nan ah auremeno kin wehwehki irekdi en kaunda en sampah kan me kin wiawi sangete mahs leledohr rahnwet. Ehu ehu kaundahn sampah pwukat kaunda sampah mahso. Mehnia kaunda me kakaun sampah ahnsou wet? Kitail memour nan ahnsou kan me rasehng patehn nehn sansalo. Kokohpo kasalehdahr dahme pahn wiawi mwurin met. Kaundahn sampah kan koaros pahn sohrala douluhl, oh mwurin mwo “iei kaundao me sohte pahn kak lohdi” me pahn uhd tepida kakaun sampah. Ke kak kilang mwahu me Rahnen Siohwa kerendohr?

⁴ Pil Ekei Mehn Kadehde kan: Kitail kin wia sounkadehde kan me kin kilang mehn kadehde kan me kasalehda me Rahnen Siohwa kerendohr. Kitail kilang pweidahn kokohp me wahnpoaron Pohl kasalehda me pid duwen irair en aramas “ni imwin rahn akan.” (2 Tim. 3:​1-5) Oh kitail kin iang lohkiseli Rongamwahu en Wehin Koht mwohn imwin koasoandi wet ah pahn imwisekla poatopoat. (Madiu 24:14) Eri, ni ahnsou me kitail kin kalohk, kitail en kasalehda atail kin kesempwaliki pakair en tohnleng kan me mahsanih: “Kumwail lemmwiki Koht oh kapinga sapwellime roson lapalahpie! Pwe e lelehr ahnsoun eh pahn ketin kadeikada tohnsampah kan.”​—Kaudiahl 14:​6, 7.

Pali 9: Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu

Kaunopada Tohnsukuhl akan en Kalohk ni Ahnsou Sohte Lipilipil

¹ Ni ahnsou me Andru oh Pilip esehda me Sises iei Mesaia me inoupe mie, ira sohte kak ekihla dahme ira ese, oh ira ese me ira anahne kohla oh lohkihong aramas akan duwen met. (Sohn 1:​40-​45) Duwehte rahnwet, ni en irail me kin onop Paipel kin pwosonla dahme re sukuhliki, irail kin mwekidki met oh irail kin men koasoiong meteikan. (2 Kor. 4:​13) Iaduwen atail kak kangoange irail en kalohk ni ahnsou sohte lipilipil oh kaunopada pwe irail en kak pweida nan arail kalohk?

² Ke kak idek rehn aramaso me kin onop Paipel ma mie pak me e koasoiaiong meteikan duwen dahme e sukuhliki sang nan Paipel. Ele mwein mie kompoakepah kan de tohn ah peneinei me e kak luhke en iang ih onop. Idek reh ma mie ienge tohndoadoahk kan, de ienge tohnsukuhl akan, de aramas me e kin ese me kasalehda me irail perenki rong Rongamwahu. Ni ahl wet, e kakehr tepida kalohk ong irail akan me e kin ese. Sewese ih en wehwehkihla anahnepen en doadoahngki ah loalokong oh kasalehda wahu oh kadek ong aramas ni ahnsou me e pahn kin kalohk ong irail duwen Siohwa Koht oh sapwellime kupwur akan.​—Kol. 4:6; 2 Tim. 2:​24, 25.

³ Ehukihong Meteikan Dahme Re Sukuhliki: E inenen kesempwal en kaiahne tohnsukuhl en Paipel kan en doadoahngki Mahsen en Koht ni ahnsou me re men kin ehukihong meteikan dahme re sukuhliki. Ekei pak, ke kak idek rehn tohnsukuhlo: “Iaduwen ahmw pahn doadoahngki Paipel en kawehwehiong ahmw peneinei duwen padahk wet?” de “Mehnia iren Paipel ke kak doadoahngki pwehn kawehwehiong kompoakepahmw kan duwen padahk wet?” Tehk iaduwen e pahn sapeng, oh kasalehiong ih iaduwen e kak doadoahngki iren Paipel kan en kawehwe duwen dahme e kin kamehlele. (2 Tim. 2:​15) Ni ahmw pahn wia met, ke pahn sewese ahmw Bible Study en kin kaunopada ong kalohk ni ahnsou sohte lipilipil oh pil mwuhr e kak iang tohnmwomwohdiso kalohk ahnsou me e pahn kak.

⁴ E wia elen loalokong en sewese atail Bible Study kan en kaunopada ong uhwong sang aramas teikan. (Madiu 10:36; Luk 8:​13; 2 Tim. 3:​12) Ni ahnsou me meteikan pahn wia peidek kan de koasoi kan me pid duwen Sounkadehdehn Siohwa kan, met kin ritingada ahl en kalohk ong irail. Brochure me oaralap koasoia: Jehovah’s Witnesses​—Who Are They? What Do They Believe? kak sewese irail en “kawehwehiong irail duwen koapworopwor me mih rehrail.” (1 Pit. 3:​15) Brochure wet kin kasalehda ire pwung oh kesempwal kan me irail me kapw akan kak doadoahngki pwehn kak sewese kompoakparail oh peneinei kan me mehmehlelki arail men ese dahme pwung oh mehlel, sewese irail en wehwehki dahme kitail kin wia oh kamehlele sang Paipel.