Kalohk Kin Sewese Kitail en Dadaurete

¹ Mahsen en Koht kin kangoange kitail en “nantihong dadaurete nan atail mour, rasehng atail kin tang kehlail ni atail kin weirentang.” (Ipru 12:1) Duwehte soun weirentang men kin anahne nannanti dadaurete pwehn pweida oh kanekehla ah weiren tang, kitail anahne dadaurete pwehn alehdi kisakis en mour soutuk. (Ipru 10:36) Iaduwen doadoahk en kalohk kak sewese kitail en lelepek dadaurete lel ni imwi?​—Madiu 24:13.

² Kehlailda Ni Pali Ngehn: Atail pakairki inou me Paipel ketikihda me pid duwen sampah kapw me aramas pwung kan pahn kousoan loale​—⁠inou wet kin kihong kitail koapworopwor kaselel. (1 Deselonika 5:8) Ni atail kin iang kalohk kaukaule, kitail ahneki ahnsou mwahu en kasalehiong aramas akan duwen padahk mehlel me kitail sukuhliki sang nan Paipel. Kitail ahneki ahnsou mwahu en kasalehda kahrepen atail pwoson, me kin uhd sewese kitail en kehlailda ni pali ngehn.

³ Ma kitail men padahk ong aramas teikan ni ahl me pahn pweida mwahu, eri, e kesempwal pein kitail en wehwehki padahk mehlel en nan Paipel. Kitail anahne wia research (roporop) oh doudouloale duwen dahme kitail sukuhliki. Ngoang me kitail kin kasalehda kin sewese kitail en kaloalehla dahme kitail sukuhliki, oh kakehlailih atail pwoson, oh kin kansenamwahwih kitail ni pali ngehn. (Lepin Padahk 2:​3-5) Ihme kahrehda, ni atail kin sewese meteikan, kitail anahne kakehlailih pein atail pali ngehn.​—1 Tim. 4:​15, 16.

⁴ En ngoangki wia atail doadoahk en kalohk kin wia kisehn “tehtehn mahwen koaros me Koht ketikihong kitail,” oh kitail anahne met pwehn pelianda Tepil oh ngehn saut akan. (Episos 6:​10-​13, 15) Atail soupisengki atail doadoahk en papah Siohwa kin sewese kitail en kainenehla atail madamadau ong medemedewehte soahng katapan kan oh pere kitail sang soahng kan me pid duwen sampah suwed wet me Sehdan wie kakaun. (Kolose 3:2) Ni atail pahn kasukuhliki meteikan duwen sapwellimen Siohwa elen mour kan, kitail anahne tamataman pein atail anahn en kolokol tiahk mwakelekel.​—1 Piter 2:​12.

⁵ Kehlailkihda Kehl me Kohsang Rehn Koht: Oh pil, atail iang doadoahk en kalohk kin sewese kitail en kin likih Siohwa. (2 Kor. 4:​1, 7) Ia uwen met ah wia kapai ehu! Atail kakairada soangen likilik wet kin sewese kitail en pweida nan kalohk oh pil kin sewese kitail en powehdi irair sohte lipilipil me kin kak pwarada nan atail mour. (Pilipai 4:​11-​13) Ni mehlel, likih Siohwa ni unsek kin keieu kesempwal ma kitail pahn dadaurete. (Melkahka 55:22) Kalohk kin sewese kitail en dadaurete ni ahl tohto.

Pali 10: Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu

Kaiahne Tohnsukuhl akan nan Kalohk en Ihmw-Lel-Ihmw

¹ Ni ahnsou me elder kan koasoanehdi me aramas emen me kin onop Paipel kakehr iang kalohk nin duwen sounkalohk me saikinte papidais, aramaso kak tepida iang mwomwohdiso kalohk ihmw-lel-ihmw. (Tehk pwuhken Organized to Do Jehovah’s Will, pali 79-​81.) Iaduwen atail kak sewese tohnsukuhl menet en pweida ni ahnsou me e pahn iang kalohk en ihmw lel ihmw?

² Sawaspene Kaunopada ong Kalohk: Sohte mehkot mwahu sang kaunopada mwahu. Kasalehiong tohnsukuhl menet iawasa e kak diar padahk kan me e kak doadoahngki nan Atail Doadoahk Ong Wehio oh nan pwuhken Reasoning, oh sewese ih en pilada padahk mengei me pahn pweida mwahu nan amwail wasahn kalohk. Sangete nin tepio, kangoange ih en doadoahngki iren Paipel kan nan kalohk.​—2 Tim. 4:2.

³ E pahn keieu mwahu ong sounkalohk kapw kan ma ke iang ih praktis ah padahk kan me e kaunopada en doadoahngki nan kalohk. Ni ahnsou me tohnsukuhl menet pahn praktis ah padahk, sewese ih en esehla dahme e pahn nda ni ahnsou me aramas akan pahn nda mehkot de sapeng peidek kan me kitail kin wia ong irail. (Kolose 4:6) Kawehwe ong ih me sounkalohk kan sohte anahne mwadang sapeng peidek koaros me tohnihmw kin wia ong irail. Pali laud en ahnsou, e pahn mwahu en ndaiong tohnihmwo me ke pahn wia research (roporop) oh ke pahn pwurehng pwurodo reh pwehn sapeng ah peideko.​—Lepin Padahk 15:28.

⁴ Sawaspene nan Kalohk: Tepin amwa pahn ehupene nan kalohk, mweidong tohnsukuhlo (ahmw Paipel Study me wiahla sounkalohk me saikinte papidais) en kilang ahmw pahn doadoahngki padahk me kumwa kaunopada. Mwuri, mweidohng ih en iang koasoi. Ekei pak, e pahn mwahu ma sounkalohk kapwo pahn wia ekiste padahko, mwein e pahn kak wadek iren Paipel ehu oh kawehwe ireo. Medemedewe mwahu duwen irair oh koahiek en tohnsukuhlo. (Pilipai 4:5) Kapinga ih ni ahmw pahn ekis ekis kaiahne ih nan kalohk.

⁵ E kesempwal en sewese sounkalohk kapwo en koasoanehdi ah koasoandi kan pwehn kak iang kalohk kaukaule, keieu mwahu ma e pahn iang kalohk nan wihk koaros. (Pilipai 3:​16) Koasoanehdi ah koasoandi kan en ehupene nan kalohk, oh kangoange ih en iang sounkalohk teikan me kin ngoangki kalohk. Ni ahnsou me e pahn kilang arail mehn kahlemeng mwahu oh werekiong irail, met pahn sewese ih en koahiekla nan kalohk oh pil diar peren nan kalohk en ihmw lel ihmw.