Nsenohki Meteikan Ni Ahmw Kin Kadek ong Irail
1 Lih emen me mahs kin kailongki Sounkadehde kan tamanda ahnsou me e tepin tuhwong irail oh e koasoia: “I sohte taman dahme se koasoia, ahpw I tamanda me Sounkadehde menet me inenen kadek oh aktikitik. I inenen perenki ih.” Koasoi wet kin kasalehda duwen kesempwalpen nsenohki aramas akan me kitail kin kalohk ong.—Pil. 2:4.
2 Limpoak me Kadek: Ehu ahl kitail kak kasalehda limpoak ong meteikan iei kasalehda kadek. (1 Kor. 13:4) Aramas kadek men kin nsenohki meteikan oh e kin rapahki ahl akan en sewese irail. Doadoahk en kalohk iei doadoahk kadek ieu. Ahpw, atail nsenohki meteikan pahn sansal, kaidehn ihte sang ni atail kin kalohk ong irail, ahpw sang ni atail kin kadek ong irail, tiahk mwahu, rong kanahieng dahme re koasoia, atail lokaia oh ia mwomwen kitail kin koasoiong meteikan.—Mad. 8:2, 3.
3 Limpoak ong aramas akan pahn kamwekid kitail en pein kihda atail sawas. Emen liohdi me mah padahkiong emen pioneer brother en kohkohlahsang imwe ni ahnsou me e wehwehki me brother menet emen Sounkadehde. Lih menet nda me e ahpwtehn doudi sang kehndake pwe e wiliandi dama ni ahnsou me brother menet letelet ni wenihmwo. Brother menet uhd nda, “E keper komwi kelepw en wia doadoahk wet.” Liohdi menet luhke ih en pedolong nan imwe. Brother menet eri wiliandi dama oh kohkohla. Ni ahnsou me nein liohdi nah ohl mwemweitla reh, e padahkiong nah ohlo dahme wiawi. Ohlo inenen peren oh nantihong rapahki brother menet pwehn kasalehda ah kalahngan. Mwurin mwo, ohlo tepida onop Paipel.
4 Sang ni atail kin kasalehda kadek ong meteikan, kitail kin kahlemengih sapwellimen Siohwa limpoak ong aramas oh kalinganahda Rongamwahu en Wehio. Eri, kitail kak ahnsou koaros “kasalehda ni mehkoaros me kitail kin wia, me kitail ladun Koht kei, ni at kin kasalehda kadek.”—2 Kor. 6:4, 6.