Siohwa Kin Ketikihda Manaman me Siksang Manaman en Aramas
1 Sises ketin likikihong sapwellimen tohnpadahk kan koaros pwais kesempwal en papah Koht me iei doadoahk en kalohk. (Madiu 24:14; 28:19, 20) Ahpw, soh unsek en aramas oh kahpwal akan en koasoandi suwed wet kin ekei ahnsou kahrehong kitail en ahneki madamadau ieu me pwehki atail soakoahiek, kitail sohte kak wia doadoahk wet.
2 Ni ahnsou me kitail pahn kin ahnekihda soangen madamadau duwehte met, kitail kak ale kangoang sang audepen sapwellimen wahnpoaron Pohl kisinlikou me kohwong irail Kristian me keidi kan nan Korint. E ntingihdi: “Kiht me kin ahneki pai kesempwal wet, se rasehng sah pwehl kan me kopwukopw oh kehohla.” (2 Korint 4:7) Pohl mahsanih: “Nan sapwellimen Koht kalahngan lapalap e ketikihong kiht kohwa doadoahk wet; ihme se sohte kin pwangahkihda.” (2 Korint 4:1) Ni mehlel, e sohte mengei ong kitail koaros, edetehn kitail iang pwihn en me keidi kan de “sihpw teikan,” en kalohkiseli Rongamwahuo oh “sohte pwangahkihda.” Kitail anahne kehl sang rehn Koht, me kin ketikihda “manaman me siksang manaman en aramas.”—Sohn 10:16; 2 Korint 4:7.
3 Ahpw, e kin wia kangoang ong kitail en ese me Sounkadehde tohto kin ngoangki wia doadoahk en kalohk edetehn irail kin lelohng uhwong laud, soumwahu, de kahpwal en mwohni. Kitail koaros anahne pohnese me Siohwa kin ketin sewese kitail en wia atail pwukoa en kalohk. Dehr mweidong pahtou de pwunod en kaluwetehla atail inou en papah Siohwa oh kalohkiseli Rongamwahuo, ahpw kitail en “kehlailkihda atail miniminiong Kauno oh manaman en sapwellime roson.”—Episos 6:10; Lepin Padahk 24:10.
4 Iaduwen Kitail Kak Kehlailkihda Sapwellimen Koht Manaman: Poadidiong kapakap, peki sapwellimen Koht sawas oh kehl. (Rom 12:12; Pilipai 4:6, 7) Mwurin mwo, likih Siohwa ni mohngiongomw unsek oh likih me e pahn ketikihong uhk manaman me siksang pein ahmw manaman. (Lepin Padahk 3:5) Kitail pil kak wadek duwen mouren riatail brother oh sister kan nan neitail makisihn kan, pwe met kin wia mehn kadehde me Siohwa kin ketin sewese sapwellime ladu kan en dadaurete mendahki kasongosong kan nan atail ahnsou. Karanih brother oh sister kan nan mwomwohdiso, oh ahnsou koaros iang towehda mihding kan koaros.—Rom 1:11, 12; Ipru 10:24, 25.
5 Kitail en wia uwen atail kak en ale sawas sang Siohwa pwe sapwellime manaman kin siksang pein atail manaman oh met pahn sewese kitail en dehr kesehla doadoahk me keieu kesempwal iei doadoahk en kalohkiseli Wehin Koht.