Ke Kaunopadahr ong Kahpwal akan (Natural Disaster)?
1. Dahme kahrehda e wia elen loalokong en kaunopada ong kahpwal akan (disasters)?
1 Sounpahr koaros, aramas rar kei nin sampah pwon, iangahki riatail brother oh sister kan tohto, kin lelong soangen kahpwal akan duwehte rerrer en sahpw kan, tsunami kan, monsoon kan, oh lapake kan. Pwehki soangen kahpwal pwukat kin wiawi ni ahnsou me kitail sohte lemeleme re pahn wiawi oh re kak wiawihong kitail koaros, e wia elen loalokong en kaunopada.—Lepin Padahk 21:5.
2. Dahme kahrehda kitail anahne padahkiong elder kan neitail address oh nempe en telephone (kan) en ahnsou wet?
2 Kaunopada mwowe: Ekei pak kaunen wehi kan kak pakairki kahpwal akan (disasters) me pahn kereniong wiawi. E kesempwal en rong kanahieng soangen pakair pwukat. (Lepin Padahk 22:3) Nan soangen irair pwukat, elder kan pahn song en kapehse ong koaros nan mwomwohdiso pwehn sewese irail en kaunopada dahme re anahne. Mwurin kahpwal (disaster) ehu wiawi, elder kan pil pahn song en kapehse ong koaros me kin iang mwomwohdiso pwehn kilang ma re mih nan irair me sohte keper oh soangen sawas dah me re anahne. Ahnsou kesempwal laud pahn katihasang ma elder kan sohte kin kolokol rekord mwahu en neirail nempe en telephone de wasa me re kin kousoan ahnsou wet. Kahrehda e kesempwal sounkalohk kan en padahkiong secretary oh arail sounapwalih en Pwuhk study neirail address oh nempe en telephone en ahnsou wet.
3. Iaduwen kitail pahn miniminiong elder kan ma kitail kin kousoan nan wasa me kahpwal (disaster) kan kin kalapw wiawi?
3 Ma mwomwohdiso kin mihmi nan wasa me kahpwal (disaster) kan kin kalapw wiawi, elder kan mwein ele pahn idek rehn sounkalohk kan ahd oh nempe en telephone en arail peneinei de kompoakepah me sohte kin kousoan nan wasao pwe elder kan en kak kapehse ong irail ni ahnsou me kahpwal kan wiawi. Met pahn kak sewese elder kan en diarada irail akan me pitla. Elder kan mwein ele pahn men wiahda pilahn ong mwomwohdiso me pid soahng kan duwehte kisin list en dipwisou kan me re anahne kolokol ong ahnsoun kahpwal akan, koasoandi kan ong ahnsou me re pahn pitla, oh pilahn kan pwehn sewese irail kan me anahne sawas tohrohr kan. Minimin ong soangen koasoandi limpoak pwukat inenen kesempwal.—Ipru 13:17.
4. Dahme kitail anahne wia ma kahpwal (disaster) wiawi nan atail wasa?
4 Mwurin Kahpwal (Disaster): Dahme ke anahne wia ma kahpwal ehu (disaster) wiawi nan ahmw wasa? Tehk mwahu en kaitarala anahn karuwaru en paliwar en ahmw peneinei. Ma ke kak, kihong sawas ong meteikan me lelong kahpwal kan. Nantiong mwadang koasoiong ahmw sounapwalih en pwuhk study de emen elder. Met anahne wiawi mendahki ma pein kowe sohte mih nan irair keper kan oh sohte anahne sawas. Ma ke anahne sawas, tamanda me riomw brother kan pahn wia uwen me re kak pwehn sewese iuk. (1 Korint 13:4, 7) Tamataman me Siohwa kin ketin mwahngih ahmw irair; eri likih ih pwe e pahn sewese iuk. (Melkahka 37:39; 62:8) Pehmitik ong ahnsou mwahu kan pwehn kihong meteikan utuht en pali ngehn oh pali pepehm kan. (2 Korint 1:3, 4) Mwadangete pwuralahng wia ahmw koasoandi kan me pid pali ngehn.—Madiu 6:33.
5. Iaduwen kitail nin duwen Kristian akan kin mwekidki irair en kahpwal (disaster) kan?
5 Mendahki irair keper en kahpwal (disaster) kan kin kahrehda kapwunod laud ong tohnsampah, kitail kak kilangwohng ahnsou kohkohdo ki koapworopwor. Ni ahnsou keren, kahpwal (dsiaster) kan koaros pahn sohrala. (Kaudiahl 21:4) Lao lel ahnsowo, kitail kak kapwaiada kahk kesempwal kan pwehn kaunopada mwahu ong ahnsoun apwal kan ni atail kin kolokolte atail ngoangki pakairki rongamwahu ong meteikan.
[Peidek en Onop]