Irelaud 12

Utungada Doadoahk Ong Wehio Nan Pein Atail Wasa Oh Nan Sampah Pwon

NIN duwen pweidahn sapwellimen Sises kokohp me pid duwen imwin rahn akan, Sounkadehdehn Siohwa kan kin wia doadoahk en kalohki rongamwahu oh “lelohng ni irepen sampah.” (Wiewia 1:8; Madiu 24:14) Ni arail kin wia met, irail kin perenki tounmeteikihla arail ahnsou oh kehl ong mehkan me pid pali ngehn. Irail kin likih Siohwa me e pahn ketikihong sapwellime tohndoadoahk kan dahme re anahne, oh re sohte kin pwunodki arail anahn akan ahpw re kin kaukaule mwohnki Wehin Koht nan arail mour. (Madiu 6:25-34; 1 Korint 3:5-9) Dahme kin wiawi kin kasalehda mehn kadehdehn sapwellimen Siohwa kupwuramwahu.

APWAHPWALIH DOADOAHK ONG WEHIO NAN SAMPAH PWON

Ni ahnsou me ekei aramas kilangada wiepe kan me Sounkadehdehn Siohwa kan kin doadoahngki ong kalohki rongamwahuo rahnwet oh pil iaduwen re kin kihseli sawaspen Paipel kan ni soh isepe, irail pahn idek: “Iaduwen soahng pwukat kak wiawi?” Mehlel, misihn en wia pwuhk kan me kin wiahda Paipel tohto oh sawaspen Paipel tohto anahne mwohni pwehn doadoahk. Mwohni pil anahn ong doadoahk en wia imwen Bethel kan oh apwahpwalih ihmw pwukat ong irail akan me kin doadoahngki misihn en wia pwuhk kan, irail akan me kin apwahpwalih doadoahk en kalohk, oh pil irail akan me kin wia doadoahk en kalohk kaukaule ni ahl teikan. Kapatahiong mehpwukat, missionary kan kin ale kasukuhl oh kohla sahpw tohto. Ekei sounkalohk kan kin ale pwukoa en special pioneer kan, me kin doadoahngki arail ahnsou ong doadoahk nan wasa doh kan de nan mwomwohdiso tikitik kan. Sounapwalih en mwemweit kan, me kin papah mwomwohdiso kan, kin ale kisin sawas me kak sewese irail en wia doadoahk wet. E dehde mwahu, me mwohni laud me anahn pwehn utungada doadoahk en kalohk nan atail ahnsou nan ehu ehu sahpw de nan sampah pwon. Iawasa mwohni pwukat kin kohsang ie?

Mendahki kitail kin kihla neitail pwuhk kan ong wehi pokon ni soh isepe, aramas tohto kin kalahnganki doadoahk en Sounkadehdehn Siohwa kan oh perenki kihda sawas ong doadoahk en kalohko. Kapatahiong sawas pwukat, pein Sounkadehde kan pil kin kihda sawas me pahn kohwong branch ohpis en Sounkadehdehn Siohwa kan. Pwehki irail ese anahn en mwohni, re kin kasalehda ngenen tounmetei me duwehte sapwellimen Koht ladu en mahs ko me kin perenki kihda arail sawas ong doadoahk en kauwada imwen kaudok en Siohwa. (Eksodus 35:20-29; 1 Kronikel 29:9) Ekei kin wia kisinlikou pwehn kihda sawas en mwohni laud ong doadoahk wet ni ahnsou me re mehla, ahpw pali laud en sawas kan me kohsang emen emen aramas, mwomwohdiso kan, oh circuit kan kin tikitik. Ahpw ni ahnsou me sawas pwukat kin kohpene, met kin itar en utungada doadoahk en kalohk wet.

Kahrehda ni ahnsou me irail kin iang doadoahk en kalohki rongamwahu, Sounkadehdehn Siohwa kan kin lemeleme me met wia arail pwais en doadoahngki neirail mwohni oh kepwe teikan ong doadoahko. Sises oh sapwellime tohnpadahk kan kin naineki koakon en mwohni me re kin doadoahngki pwehn sewese me semwehmwe kan oh apwalih anahn teikan. (Sohn 12:6; 13:28, 29) Paipel kin kasalehiong kitail duwen lih akan me kihda sawas pwehn apwalih doadoahk en kalohk en Sises oh sapwellime tohnpadahk kan. (Mark 15:40, 41; Luk 8:3) Wahnpoaron Pohl kin perenki ale sawas kan me kohsang rehn irail akan me men utungada doadoahk en kalohk oh irail akan me men sewese ah doadoahk en kalohk. (Pilipai 4:14-16; 1 Deselonika 2:9) Sounkadehdehn Siohwa kan kin pousehlahte kahlemengih soangen mehn kahlemeng en mahs kan me pid duwen arail ngoangki doadoahk en kalohk oh perenki kihda sawas. Kahrehda, irail me mohngiong mehlel akan nan wasa koaros kak ale ‘pilen komour nin duwen kisakis ehu.’—Kaudiahl 22:17.

APWAHPWALIH ANAHN AKAN EN EHU EHU MWOMWOHDISO

Meirong me aramas akan kin pein toukihda pil kin kaitarala anahn en mwohni nan ehu ehu mwomwohdiso. Mwomwohdiso sohte kin idingkihong towe kan en kihda arail sawas, oh sohte kin koasoanehdi uwen laud en mwohni me emen emen anahne kihda de sohte kin peki mwohni; ahpw mie koakon en meirong nan wasahn arail mihding kan oh emen emen aramas kak kihda sawas nin duwen “dahme e koasoanedier nan kapehde.”—2 Korint 9:7.

Mwohni me aramas kan kihda kin kadoadoahk ong anahn en mwomwohdiso oh apwahpwalih arail Kingdom Hall. Pwihn en elder kan kak koasoanehdi me re pahn kadarala ekei mwohni ong branch ohpis en Sounkadehdehn Siohwa kan pwehn sewese doadoahk en kalohk en sampah pwon. Ma ih duwen met, mwomwohdiso anahne pwungkihpene oh wiahda kamwekid ehu. Ni ahl wet, mwomwohdiso tohto kin kaukaule kihda sawas ong doadoahk en sampah pwon. Ekei pak, anahn teikan me pid duwen mwohni kin pwarada oh pakair pahn anahne wiawi duwen anahn pwukat, ahpw ma koaros kin wehwehki anahn akan en mwomwohdiso, soangen pakair kan me pid duwen meirong sohte anahne wiawi ahnsou koaros.

APWAHPWALIH MEIRONG KAN

Mwurin ehu ehu mihding, elder riemen de ministerial servant riemen me pwihn en elder kan me pilada pahn kihsang mwohni koaros me mih nan koakon en meirong kan oh wiahda rekord en meirong pwukat. (2 Korint 8:20) Pwihn en elder kan pahn wiahda koasoandi konehng kan pwehn nekidala mwahu mwohni pwukat lao lel ahnsou me re pahn kadarala mwohni pwukat ong branch ohpis de doadoahngki mwohni pwukat ong anahn akan en mwomwohdiso. Ong met, mwein mwomwohdiso pahn anahne wiahda arail bank account. Brother men me kin apwahpwalih mwohni en mwomwohdiso kin kaunopada ripoht en mwohni ong ehu ehu sounpwong pwe pakair en wiawi ong mwomwohdiso, oh nan sounpwong siluh koaros, presiding overseer pahn koasoanehdi audit en mwohni en mwomwohdiso. Mehn katamanpen ire wet kin kaukaule kohda nan Atail Doadoahk Ong Wehio.

APWAHPWALIH MWOHNI EN KAPOKON EN CIRCUIT KAN OH KAPOKON EN RAHN TOHROHR KAN

Meirong me Sounkadehde kan nan circuit kihda pahn kadoadoahk pwehn kaitarala anahn en mwohni ong kapokon kan. Koakon en meirong kan kin mihmi nan wasahn kapokon kan, duwehte re kin mihmi nan wasahn mihding en mwomwohdiso kan. Ni ahl wet, aramas kak pein toukihda meirong ong arail circuit. Emen brother me sounapwalih en circuit pilada pahn apwalih mwohni en circuit, pwainla soahng kan me sounapwalih en circuit pwungki.

E konehng, me ehu ehu kapokon kak pwain anahn akan me wiawi, oh luhwen mwohni kak kohdi nan account en circuit. Ma mie mwohni me sohte itar ni kaimwiseklahn kapokon oh mwohni nan account en circuit kak pwainla mwohni me soh itaro, eri sohte anahne wiahda kisinlikou ong mwomwohdiso kan duwen ire wet. Ahpw, ma mie mwohni me sohte itar nan circuit account pwehn pwainla anahn en kapokon me nekiero, de sohte itar mwohni pwehn kaunopada ong kapokon me pahn wiawi, duwehte mwohni ong ale wasahn kapokon, eri sounapwalih en circuit kak kehsehkin mwomwohdiso kan me re kak wiahda meirong. Ehu ehu pwihn en elder kan pahn koasoiapene duwen ireo oh koasoanehdi ia uwen laud mwohni me arail mwomwohdiso pahn kak kihda ong arail circuit. Mwurin mwo, irail pahn kehsehkin mwomwohdiso oh wiahda ehu kamwekid.

Ni ahnsou me elder kan pahn tuhpene me pid duwen kapokon, elder pwukat pahn koasoanehdi iaduwen re pahn doadoahngki mwohni en circuit. Pilipil kan anahne wiawi me pid duwen anahn akan ong kapokon, pwainda dipwisou kan ong circuit, oh mwohni me sounapwalih en mwemweit kan doadoahngki ni ahnsou me re papah circuit. Re pil pahn kak koasoipene duwen wiahda meirong ong doadoahk en sampah pwon, meirong ong kauwada Kingdom Hall kan, meirong ong Assembly Hall me re kin doadoahngki, de anahn kesempwal teikan.

Pilipil kan koaros likin pilipil kan me pid duwen anahn ong kapokon, pahn kileldi pwe elder kan en wiahda kamwekid kan. Kamwekid pwukat kin kasalehda uwen mwohni me re pahn doadoahngki oh anahne wiawi ehu ehu ahnsou me mwohni en circuit pahn kadoadoahk. E sohte konehng elder kan en doadoahngki kamwekid me wiawihdahr mahs pwehn doadoahngki mwohni en circuit, oh e pil sohte konehng en wiahda soangen kamwekid me uwen laud en mwohni me re pahn doadoahngki sohte kileldi. Circuit kak nekidala neirail mwohni ni branch ohpis pwehn nekidala mwahu lao lel ahnsou me circuit pahn anahne doadoahngki.

sounapwalih en circuit pahn koasoanehdi audit en mwohni en circuit mwurin ehu ehu kapokon en circuit oh kapokon en rahn tohrohr.

APWAHPWALIH ME SEMWEHMWE KAN

Ehu kahrepe me Sises oh sapwellime tohnpadahk kan kin kolokol koakon en mwohni iei en sewese me semwehmwe kan. (Mark 14:3-5; Sohn 13:29) Pwukoa en Kristian wet mihmihte, pwe Sises mahsanih: “Me paisuwedlahr akan kin mihmihte rehmwail ahnsou koaros.” (Mark 14:7) Iaduwen Sounkadehdehn Siohwa kan kin apwalih pwukoa wet rahnwet?

Ekei pak, irail me lelepek kan nan mwomwohdiso pahn anahne sawas pwehki irail mahlahr, de iangada soumwahu, de lelong kahpwal akan me re sohte kak kelehpw powehdi. Emen emen nan mwomwohdiso me esehda soangen anahn pwukat mwein ele pahn mwekidki oh kapwaiada mahsen en wahnpoaron Sohn: “Ma aramas kepwehpwe men me kilangada apwal en rie [Kristian], ahpw ritingedihsang rie eh mohngiong, ia duwen eh pahn kak nda me e poakohng Koht nan eh mohngiong? Nei kompoakepahi ko! Atail limpoak en dehr mihmihte ni lepin lokaia de koasoi, ahpw en mihmihte ni uhdahn limpoak mehlel me pahn sansalda sang ni atail wiewia kan.” (1 Sohn 3:17, 18; 2 Deselonika 3:6-12) Kaudok mehlel kin pid apwahpwalih me lelepek kan me kin lelong kahpwal akan oh anahne sawas.—Seims 1:27; 2:14-17.

Nan nah keieun kisinlikou ong Timoty, wahnpoaron Pohl kin kawehwehda iaduwen sawas en mwohni oh kepwe kan ong irail kan me konehng ale kak wiawi. Ke kak wadek ah kaweid kan nan 1 Timoty 5:3-21. Emen emen Kristian ahneki pwukoa laud en apwalih anahn akan en pein ah peneinei. Me mah kan oh me soumwahu kan anahne ale sawas sang rehn neirail seri kan, nein neirail seri kan, de tohnpeneinei keren teikan. Ekei pak, sawas en mwohni kak kohsang koperment de pwihn en wehi kan, oh tohnpeneinei kan de meteikan pahn kak sewese irail pwe ren kak wia pekipek ong sawas pwukat. Irair ehu kak pwarada me mwomwohdiso pahn anahne koasoanehdi en kihda sawas ong ekei brother kan oh sister kan me kin wereila papah Siohwa ni lelepek oh met re anahne sawas. Ma sohte arail tohnpeneinei de kisehrail kan me kak sewese irail oh sohte sawas me itar kin kohsang koperment de pwihn en wehi kan, eri pwihn en elder kan kak idek rehn mwomwohdiso ma re kak koasoanehdi sawas ong irail. Kristian lelepek kan kin perenki ehukihong irail pwukat sawas kan ni ahnsou me re lelong kahpwal kan.

Tohto riatail brother kan me kin anahne sawas pwehki uhwong kan, mahwen kan, rerrer en sahpw kan, lapake kan, lehk lapalap kan, de kahpwal teikan me kin wiawi ni ahnsou apwal pwukat. (Madiu 24:7-9) Nan soangen ahnsou pwukat, mwomwohdiso kan nan sahpwo mwein sohte mehkot me re kak ehukihpene nanpwungarail, kahrehda Governing Body pahn koasoanehdi doadoahk en brother kan nan sahpw teikan pwehn kaunopada sawas me anahn. Met duwehte ahn Kristian akan nan Asia Minor kaunopada mwenge ong brother kan nan Sudia erein ahnsoun lehk. (1 Korint 16:1-4; 2 Korint 9:1-5) Ni atail kin kahlemengih arail mehn kahlemeng, kitail kak kasalehda atail limpoak ong riatail brother kan oh kasansalehda me kitail wia sapwellimen Sises Krais tohnpadahk mehlel kan.—Sohn 13:35.

KIHSELI PWUHK KAN

Kihseli Paipel kan oh sawaspen Paipel kan kin wia ehu ahl kesempwal en kalohki padahk en Wehio. Pwihn en elder kan kin koasoanehdi emen ministerial servant en apwalih pwuhk kan, booklet kan, brochure kan, oh doaropwe teikan en mwomwohdiso, oh pil emen ministerial servant en apwalih makasihn kan. Sounkalohk kan kak ale soangen sawaspen Paipel kan koaros oh irail kin uhd kihong aramas akan me perenki wadek.

Brother kan me kin pwukoahki apwalih sawaspen Paipel pwukat kin kesempwaliki arail pwukoa kan. Irail kin kolokol rekord mwahu duwen pwuhk kan me kohdo oh pwuhk kan me sounkalohk kan ale. Ni arail kin tehk mehnia pwuhk kan me re kak ale oh mehnia pwuhk kan me sounkalohk kan kin kihla nan wasahn kalohk, re kak koasoanehdi mwahu pwehn kak nekidala sawaspen Paipel kan me itar ong mwomwohdiso. Pwehki sawaspen Paipel kak kin wia sawas laud pwehn kalohkiseli rongamwahuo, sounkalohk kan kin ale kangoang en kihla pwuhk pwukat nan arail kalohk. Atail Doadoahk Ong Wehio kin pakairki dahme kitail pahn kihla nan ehu ehu sounpwong pwe doadoahk en kalohk en wiawi ni soandi mwahu oh pweida.

Nin duwen Kristian inouda kan, kitail wehwehki me atail ahnsou, paliwaratail, koahiek, kepwe kan, oh atail mour iei sapwellimen Koht kisakis oh konehng doadoahngki mepwukat ong sapwellime doadoahk. (Luk 17:10; 1 Korint 4:7) Ni atail kin doadoahngki soahng koaros me kitail ahneki, kitail kak kasalehda uwen loal en atail limpoak oh poadidi ong Siohwa. Kitail men kawauwih Siohwa ki atail kepwe kesempwal kan, pwe kitail ese me e pahn kupwurperenki atail meirong soh lipilipil me kitail kin kihda pwehn kasalehda atail poadidi ong ih. (Lepin Padahk 3:9; Mark 14:3-9; Luk 21:1-4; Kolose 3:23, 24) Ni atail kin kolokol madamadau pwung duwen kepwe kan oh atail ngenen tounmetei, kitail kak kapwaiada mahsen en Sises: “Nin duwen amwail aleier nin sohte pweipwei, kumwail pil kihwei nin sohte pweipwei.” Ma kitail pahn wia met, kitail pahn ahneki peren laud.—Madiu 10:8b; Wiewia 20:35.