Irelaud 13

“Wia Mehkoaros Ong Lingan En Koht”

NIN duwen sapwellimen Koht ladu kei me kin weuwa mware, kitail ahneki pwukoa en kasalehda sapwellimen Siohwa lingan ni mehkoaros me kitail kin nda oh wia. Wahnpoaron Pohl kasalehda ehu iren mehn kasukuhl en kamarain ni ah ntingihdi: “Eri mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong kalinganpen Koht.” (1 Korint 10:31) Met kin pidada mwomwen atail mour me pid sapwellimen Siohwa koasoandi pwung, me kin kasalehda sapwellime irair unsek (Kolose 3:10) Kitail anahne wiahla tohn kahlemengih Koht kei, nin duwen pwihn sarawi ehu.​—Episos 5:1, 2.

Wahnpoaron Piter song en kauhlahng lamalam en Kristian kan ong anahn wet ni ah ntingihdi: “Kumwail peikiong Koht; soangen ineng kei mie rehmwail ahnsou me kumwail saikinte marainkihla Koht, eri, kumwail dehr mweidohng soangen ineng ko en kaunda amwail mour ahnsou wet. Ahpw kumwail en sarawihla ni mehkoaros me kumwail kin wia, duwen Koht me ketin malipeikumwaildo, eh ketin sarawi. Pwe Pwuhk Sarawi mahsanih, ‘Kumwail uhdahn pahn sarawihla, pwe ngehi, I me sarawi.’” (1 Piter 1:14-16) Duwehte Israel en mahs, irail tohn mwomwohdiso en Kristian kan anahne en kolokol sarawi. Met wehwehki me irail pahn mwakelekel, sohte pahn saminkihla dihp oh mour en sampah. Irail pahn linganla ohng doadoahk en Siohwa.​—Eksodus 20:5.

Kitail kak kolokol sarawi sang ni atail pahn kin kapwaiada sapwellimen Siohwa kosonned kan oh mour en kaweid kan. Met kin pwarada ni sansal nan Pwuhk Sarawi. (2 Timoty 3:16) Ni atail kin onopki iren Pwuhk Sarawi kan, kitail kin sukuhliki duwen Siohwa oh sapwellime ahl akan oh kitail kin karanihala ih. En wiahla emen sapwellime aramas, met sohte wehwehki me kitail en ihte alehda ekei padahk mengei kan oh eri papidaisla. Atail sukuhliki Paipel kin kamehlelehiong kitail duwen anahn en rapahki mahs sapwellimen Koht Wehio oh en mwohneki kapwaiada kupwuren Siohwa. (Madiu 6:33; Rom 12:2) Eri met wehwehki me kitail anahne en pwuhriong nan mour kapw.​—Episos 4:22-24.

MWAKELEKEL EN PALI NGEHN OH TIAHK KAN

En kapwaiada atail inou en kolokol sapwellimen Siohwa koasoandi pwung kan sohte kin ahnsou koaros mengei en wia. Atail imwintihti, Sehdan me Tepil, kin nantiong wia kitail en sohpeiweisang padahk mehlel. Soangen mehn kasongosong kan me kin kohsang sampah wet me kapilkitailpene oh atail ineng en paliwar dipan kan kin kahrehiong en apwal ong kitail ekei ahnsou. Pwehki mepwukat koaros, kitail anahne en pei ni pali ngehn. Pwuhk Sarawi mahsanih kitail en dehr pwuriamweikihla ma kitail lelohng uhwong de songosong kan. Kitail anahne en lokolok pwehki dahme pwung. (2 Timoty 3:12) Kitail kak peren ni atail kin lelohng lokolok kan pwehki met kin kasalehda me kitail kin wia kupwuren Koht.​—1 Piter 3:14-16; 4:14-16.

Mendahki Sises unsek, e sukuhliki en peik ni ah kin lelohng lokolok. E sohte kin lohdi pahn ahn Sehdan songosong kan oh uhd alehda lamalam en sampah. (Madiu 4:1-11; Sohn 6:15) Sohte pak ehu me Sises pil lemehda en ekis dukula pah. Mendahki ah lelepek kin kahrehiong sampah en kailongki ih ahpw e kin ahnsou koaros kolokol sapwellimen Siohwa koasoandi pwung. Mwohnte e mehla, Sises kalekehki sapwellime tohnpadahk ko me nin duwen sampah wet ah kailongki ih, ih duwen sampah wet pahn pil kailongki irail. Sang ahnsowo kohdo, irail kan me kin idawehn Sises Krais kin lelohng lokolok kan, ahpw irail kin ale mehn kangoang sang ni arail kin wehwehki me Sapwellimen Koht Ohlo kalowehdier sampah.​—Sohn 15:19; 16:33; 17:16.

Pwe kitail en kak kalowehdi sampah wet, kitail anahne en kolokol sapwellimen Siohwa koasoandi pwung, nin duwen me atail Kauno wia. Me patehng kitail en liksang iang pidada sampah wet iangahki ah pelien politik kan, kitail anahne en liksang en sampah wet irair kasaut kan. Eri kitail anahne en ngoangki kapwaiada dahme ntingdi nan pwuhken Seims 1:21: “Eri, kumwail kesehweisang rehmwail soangen tiahk samin kan koaros oh soangen wiewia sapwung kan koaros. Kumwail peikiong Koht oh ale mahsen kan me e kin padokediong nan mohngiongimwail, ihme kak komourkumwailla.” Ni atail kin kaukaule padokedi padahk mehlel nan atail madamadau oh mohngiong sang ni atail kin onop oh sang ni atail kin iang towehda mihding kan, kitail pahn kehlail kolokol atail lelepek mehnda ma kitail lelohng songosong de lokolok. Mendahki mehkan en sampah kin wia mehn songosong laud, kitail en dehpahte pil tepida noahroke mepwukat. Dahme kahrehda? Ni lokaia inen, tohnpadahk Seims kaweidki: “Kumwail sehse me amwail limpoakohng sampah wet wehwehki imwintihti ong Koht? Mehmen me kin inengieng kompoakepahnki sampah wet, iei ih imwintihtien Koht.” (Seims 4:4) Ke kak kilang dahme kahrehda Paipel kaweidki ni kehlail kitail en kolokol sapwellimen Siohwa koasoandi pwung kan oh en dehr iang kisehn sampah?

Kaweid sarawi kan me kohsang Sapwellimen Koht Mahsen kin kalekehkin kitail en dehr iang wia soangen mour kanamenek oh samin kan en sampah. E kin padahkiong kitail me ‘pwehki amwail wialahr sapwellimen Koht aramas pilipil kei, e sohte konehng mahsenpen mehkot me pidada nenek de soangen samin teikan de noahrok, en kin wiawi nanpwungamwail.’ Eri kitail anahne en dehr mweidohng atail madamadau en medemedewe soahng kan me kasaut, kanamenek, oh sohte mie wahupe. Kitail anahne liksang mehn kamweit samin kan. (Episos 5:3-5) Eri met kitail kin kasalehda me kitail kin men kolokol sapwellimen Siohwa koasoandi pwung oh mwakelekel me pid atail wiewia kan.

MWAKELEKEL NI PALIWAR

Me iangahki mwakelekel ni pali ngehn oh tiahk, Kristian kan pil kin pohnese duwen kesempwalpen en mwakelekel ni paliwar. Ni mwehin Israel en mahs, Koht sarawi kupwurki arail wasahn kousoan en kin mwakelekel. (Deuderonomi 23:14) Arail mour nan ahnsowo anahne en pwungiong sapwellimen Siohwa koasoandi kan me pid mwakelekel. Atail elen mour pil anahne en mwakelekel pwe Siohwa en ‘dehr kak kilangada mehkot sapwung rehtail.’

Sarawi oh mwakelekel ni paliwar kin raspene nan Paipel. Karasepe, Pohl ntingihdi: “Kompoakepahi ko, . . . kitail kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwur en Koht.” (2 Korint 7:1) Eri, Kristian mehlel kan anahne en song uwen arail kak en kin ahnsou koaros mwakelekel ni paliwar sang ni arail pahn kin lopworada arail likou kan oh kin duhdu. Mendahki irair en mour kin wekpeseng nan sahpw akan, ohl oh lih Kristian kan kak en rapahkihda sahpw oh pihl me itar pwe irail en kak kamwakele paliwararail oh pil neirail seri kan.

Pwehki atail kin wia doadoahk en kalohk ong aramas koaros, aramas akan kin esei kitail nan atail wasahn kousoan. Ma kitail pahn kin kamwakele imwatail akan loale oh liki, met pahn pil wia kalohk mwahu ehu ong mehn mpatail kan. Met mehkot me peneineio pwon kak iang wia. Ohl pwopwoud oh lih pwopwoud kan en kin nsenohki imwarail kan oh likin imwarail kan pwe aramas en liki kan pahn kin perenki met. Irail tapwin peneinei kan anahne en kin pohnese me ni arail kin tiengla nsenohki met oh arail pali ngehn, met kin kasalehda me irail kin apwalih tohn imwarail mwahu. (1 Timoty 3:4, 12) Lih pwopwoud kan oh nohno kan ahneki pwukoa en kin apwalih mepwukat eri mehlel mehkan en nan ihmw. (Taitus 2:4, 5) Seri kan me kin keirda mwahu kin pil wia arail pwukoa en kamwakele pein irail oh arail perehn meir kan. Eri, tohn peneineio pwon anahne en doadoahkpene oh kakairada tiahk oh mour en mwakelekel me pahn pwungiong sampah kapw pahn kaunda en sapwellimen Koht Wehio.

Sapwellimen Siohwa ladu tohto rahnwet kin doadoahngki sidohsa kan ong kohla mihding de kalohk. Nan ekei wasa, sidohsa kin wia mehkot me inenen anahn nan wasahn kalohk. Pwehki met, e anahne en kin mwakelekel oh epwel mwahu. Imwatail oh waratail sidohsa kan anahne en kasalehda me kitail iang wia kisehn sapwellimen Siohwa aramas mwakelekel oh sarawi kei.

Atail likou oh kapwat anahne en kin pwungiong kupwuren Koht kan. Kitail sohte kak en kohla mwohn irail lapalap en sampah kan ma kitail likou kihou. Eri ia uwen atail anahne en kanahieng ma kitail kin papah Siohwa, weliwelian ih nan doadoahk en kalohk de wia padahk nan mihding! Atail kapwat oh likou kan anahne en kamwekid iaduwen mehteikan kin kilangwohng kaudok ong Siohwa. E uhdahn sohte pahn konehng ma kitail sohte kin kapwatada mwahu oh sohte kin nsenohki mehteikan. (Maika 6:8; 1 Korint 10:31-33; 1 Timoty 2:9, 10) Eri, ni ahnsou me kitail kin iang towehda kalohk de mihding en mwomwohdiso kan, kapokon en circuit, de kapokon laud kan, kitail anahne en tamataman dahme Pwuhk Sarawi mahsanih duwen mwakelekel en paliwar oh kapwat me konehng pwe kitail en kak kaukaule wauneki oh kalinganahda Siohwa.

Kitail pil anahne tehk mepwukat ma kitail pahn kin mwemweitla nan branch ohpis kan en Sounkadehdehn Siohwa Kan. Tamanda, me lepin lokaia Bethel kin wehwehki “Tehnpas en Koht.” Ihme kahrehda, atail likou, kapwat oh tiahk kan anahne en duwehte atail kin iang mihding en kaudok kan nan Kingdom Hall.

MEHN KAMWEIT ME KONEHNG KAN

E sansal me mie anahnepen en kommoal oh ale mehn kamweit. Mie pak ehu me Sises luhke sapwellime tohnpadahk ko en iang ih kohla ni wasa meleilei ehu pwe irail en “kak kommoal ie.” (Mark 6:31) Kihong ahnsou en kommoal oh ale mehn kamweit konehng kan kak kihong kitail ahnsou kaperen ehu. E kak kakehle kitailda pwe kitail en kak doula nan atail doadoahk.

Pwehki tohtohla soangen mehn kamweit kan rahnwet, Kristian kan anahne en pilada mwahu mehn kamweit dah me pahn konehng oh doadoahngki erpit en Koht ni ahmw pahn wia met. Mendahki mie nan dewen kamweit de e kak wia kamwahu ehu ong kitail, met sohte anahne wia mehkot me keieu kesempwal nan atail mour. Paipel kehsehkier kitail me ni “imwin rahn akan,” aramas pahn “inengieng pein arail peren laudsang kupwur en Koht.” (2 Timoty 3:1, 4) Pali laud en dahme aramas en rahnpwukat kin kahdaneki mehn “kaperen” de “kamweit” sohte kin pwungiong dahme irail me kin men kolokol sapwellimen Siohwa pwung kin mwahuki.

Irail Kristian en mahs ako kin liksang soangen mehn kamweit me sohte konehng kan nan sampah en ahnsowo me kin rapahkihte dahme pein irail mwahuki. Nan circus kan en mehn Rom akan, aramas kan me kin kilikilang kin perenki soangen lokolok kan me kin sansalda nan mehn kamweit wet. Pei, kakerehdi nta, oh nenek iei me wia mehn kamweit ong aramas en ahnsowo, ahpw irail Kristian en mahs akan kin liksang soahng pwukat. Pali laud en mehn kamweit kan en rahnwet kin duwehte met oh aramas akan pil kin perenki soahng wet. Kitail anahne en ‘kanaiehng duwen atail mour me kitail weweidki,’ sohpeiweisang mehn kamweit samin kan. (Episos 5:15, 16; Melkahka 11:5) Eri mendahki aramas kin perenki mehn kamweit pwukat, pak tohto dahme aramas en sampah kan kin wia kin keper.​—1 Piter 4:1-4.

Mie soangen mehn kaperen oh kamweit kan me irail Kristian kan kak en iang perenki pwe en kak ekis kommoal sang dahme re kin wia ahnsou koaros oh kakehlahda arail kehl en paliwar oh madamadau. Me tohto kin ale kapai sang ni arail kin kapwaiada kaweid kan sang nan Paipel oh iren sawas konehng kan me kin dierek nan pwuhk kan en Sounkadehdehn Siohwa kan.

Ekei pak, peneinei kan kin ale luhk ong ni ehu ihmw ong werek en Kristian. De brother kan oh sister kan pahn ale luhk en iang towehda kapwopwoud de soangen ahnsou duwehte met. (Sohn 2:2) Irail akan me kin luhke aramas akan ni soangen ahnsou pwukat pahn pehm me irail pahn pein pwukoahki dahme pahn wiawi. Pwehki kahrepe wet, Kristian akan me kin ahneki madamadau pwung kin kilang kamwahupen koasoanehdi uwen tohtohn aramas akan me pahn iang oh uwen reirei en ahnsou en soangen werek pwukat. Ma re pahn kihda sakau en wai, re pahn anahne kanahieng ia uwen laud en sakau en wai me re pahn kihda. (Pilipai 4:5) Ma kitail pahn wia uwen me kitail kak pwe werek en Kristian akan en wiawi ni ahl me konehng oh kansenamwahu ni pali ngehn, eri mwenge oh dahme kitail pahn nim sohte pahn wia mehkot me keieu kesempwal.

E sansal me kitail anahne kanahieng ni ahnsou me pwihn en aramas tohto pahn kohpene. Pwehki ekei kin nohk nsenamwahuki soangen ahnsou pwukat, re wiahda soahng kan me sohte konehng ong Kristian, duwehte nohk mwenge laud oh sakau en wai laud oh dihp laud teikan.

E pahn mwahu en kasamwo meteikan. (1 Piter 4:9) Ni ahnsou me kitail pahn luhke meteikan ong imwatail ong mwenge, nim mehkot, kommoal, oh werekpene kan, kitail men tamatamante irail me paisuwed kan nan mwomwohdiso. (Luk 14:12-14) Ma kitail me pahn ale luhk en mwemweit rehn meteikan, atail wiewia kan pahn anahne pahrekiong kaweid kan me kin dierek nan Mark 12:31. Ahnsou koaros e pahn konehng en kasalehda atail kalahnganki kadek me meteikan kin kasalehong kitail.

Kristian akan kin perenki sapwellimen Koht kisakis mwuledek kan oh ese me re kak ‘mwenge oh nim oh nsenamwahuki wahn atail doadoahk.’ (Eklesiasdes 3:12, 13) Sang ni arail kin koasoanehdi wiewia pwukat oh wiewia teikan en wiawi ong kalinganpen Koht, irail me pahn luhke meteikan oh irail akan me pahn ale luhk pahn tamanda arail kohpene kan, oh kadeikpen loalarail sohte pahn kamedekih irail ahpw re pahn kak nsenamwahuki me irail alehdi kehl en pali ngehn.

WIEWIA KAN EN SUKUHL

Seri en Sounkadehdehn Siohwa kan kin paiekihda kasukuhl me kin wiawi nan sukuhl. Ni arail kin iang sukuhl, re kin nsenohki sukuhliki wadawad oh nting. Kasukuhl teikan me kin wiawi nan elementary sukuhl oh pil nan high sukuhl kak sewese me pwulopwul kan pwehn lel arail mehn akadei en pali ngehn. Nan erein sounpahr kan en arail sukuhl, irail men nantiong en ‘tamanda Sounwieparail’ sang ni arail kin mwohnki mehkan me pid pali ngehn.​—Eklesiasdes 12:1.

Ma kowe emen Kristian me kin iang sukuhl, ke anahne uhdahn kanahieng. Ni ahnsou me pwulopwul kan me sohte iang padahk mehlel pahn kasalehda arail uhwong koasoandi kan, ke dehr iang irail. (2 Timoty 3:1, 2) Nan soangen irair pwukat, mie soahng tohto me ke kak wia pwehn liksang irair en sampah. Siohwa sohte kin ketin mweidong kitail en lelong soahng keper kan ni soh mehn perepatail. (Melkahka 23:4; 91:1, 2) Eri, isaneki sapwellimen Siohwa koasoandi kan; oh met pahn wia mehn perepomw.​—Melkahka 23:5.

Pwehn tohrohr sang sampah nan erein ahnsou me re kin iang sukuhl, Sounkadehde me pwulopwul kan anahne medemedewe irair keper kan me pid duwen iang pidada wiewia kan en mwurin sukuhl. Iengomw tohnsukuhl kan oh sounpadahk kan mwein sohte pahn ahnsou koaros wehwehki ahmw pilipil en dehr iang wiewia pwukat. Ahpw, en kaperenda Koht me keieu kesempwal. Met wehwehki me ke anahne doadoahngki kadeikpen loalomw me ke kaiahnehda sang padahk en Paipel oh kesihnenda teng pwehn dehr iang pidada siaipene kan en sampah de wiewia kan me kin uhki wehi, me pahn kauwehla mouren kosonned en Paipel. (Kalesia 5:19, 26) Sang ni amwail kin rong kaweid en Paipel me amwail pahpa oh nohno Kristian akan pahn kihong kumwail oh pil sang amwail kin paiekihda werek mwahu oh kaweid kan me kin kohda nan mwomwohdiso, kumwail me pwulopwul kan pahn kak ale sawas pwehn peikiong sapwellimen Siohwa koasoandi pwung kan.

DOADOAHK ONG MWOHNI OH WEREK KAN

Nin duwen Paipel, tapwin peneinei kan kin ahneki pwukoa en apwalih anahn akan en pein arail tohn peneinei. (1 Timoty 5:8) Ahpw mendahki met, nin duwen sounpapah kan, irail kin pohnese me arail doadoahk ong mwohni sohte kin kesempwal sang en rapahki mehkan me pid duwen Wehio. (Madiu 6:33; Rom 11:13) Sang ni arail kin kasalehda arail poadidi ong Koht oh itarki kepwe kan me re kin ahneki, re kin liksang kapwunod kan oh lidip kan en soangen mouren rapahki kepwe kan me aramas tohto nan sampah wet kin raparapahki.​—1 Timoty 6:6-10.

Kaidehn tapwin peneineite ahpw Kristian me inouda kan koaros me kin anahne doadoahk ong mwohni anahne en kin medemedewe mouren padahk kan en Paipel. En apwalih pein atail anahn akan ni elen mehlel kin wehwehki me kitail en dehr iang pidada wiewia kan me pahn kauwehla sapwellime Koht kosonned kan de kosonned kan en wehi. (Rom 13:1, 2; 1 Korint 6:9, 10) Oh pil, kitail anahne ahnsou koaros tamanda keper en werek suwed. Nin duwen sounpei en Krais kan, kitail anahne liksang wiewiahn pisnis kan me pahn kauwehla koasoandi en Kristian akan de atail pali ngehn. (2 Timoty 2:4) Kitail en dehr pil iang pidada sapwellimen Koht imwintihti en pelien lamalam, “Papilon Lapalap.”—Kaudiahl 18:2, 4; 2 Korint 6:14-17.

En peikiong sapwellimen Koht koasoandi pwung kan pahn irehkitailsang en isaneki atail werekiong Kristian teikan pwe en kalaudehla pein atail de ahn meteikan wiewiahn pisnis kan. Kahrepen atail kin werekiong meteikan ni ahnsoun mihding en Kristian akan nan mwomwohdiso oh iang towehda kapokon en circuit oh kapokon en district kan iei ongete kaudokiong Siohwa, ale mwengehn ngehn ni sapwellime tehpel oh paieki kangoang kan me kitail kin ehukihpene. (Rom 1:11, 12; Ipru 10:24, 25) Kitail dehr doadoahngki soangen werek pwukat pwehn kalaudehla atail pisnis kan.

KOUSOANPENE NAN MINIMIN EN KRISTIAN

Sapwellimen Siohwa koasoandi pwung kan ong sapwellime aramas akan pil kin padahngki me irail en “dadaurete minimin me Ngehno kin ketikihong [irail] sang ni sapwellime kisakis en popohl me kin kolokol[irail]pene.” (Episos 4:1-3) Emen emen anahne rapahki dahme mwahu ong meteikan, kaidehn ong pein ih. Ih soangen irair me ke kin diarada sang ahmw kin werekiong mwomwohdisohn Kristian. Sohte lipilipil soangen keinek de wehi dah kan me kitail kohsang de atail irair en mwohni de kasukuhl me kitail alehdi, kitail koaros kin mih pahn koasoandi pwung kan me duwepenehte. Aramas akan me sohte kin iang padahk mehlel pil kin kilang irair kaselel wet en sapwellimen Siohwa aramas akan.​—1 Piter 2:12.

Pwehn kasansalehda kesempwalpen miniminpene, wahnpoaron Pohl ntingihdi: “Warteieu mie, Ngehnteieu mie, duwehte koapworopworteieu mie nan mour me kumwail malipilipdohng loale. Kauntehmen mie, oh pwosonteieu, oh pil papidaisteieu. Kohttehmen mie, me Semen aramas koaros, oh Kaunen mehkoaros, me kin ketin kamwakamwakid mehkoaros oh kin ketiket rehtail koaros.” (Episos 4:4-6) Ia uwen met kin kangoange kitail en miniminpene me pid duwen atail wehwehki tepin padahk en Paipel kan oh pil padahk loal en Paipel kan me pid duwen sapwellimen Siohwa kupwur kan oh manaman! Mehlel, Siohwa kin ketikihong sapwellime aramas akan lokaia min duwen padahk mehlel, me kak kahrehiong irail en papah ih ni miniminpene.​—Sepanaia 3:9.

Miniminpene oh popohl en mwomwohdisohn Kristian rahnwet kin uhdahn wia utupen kehl ong koaros me kin kaudokiong Siohwa. Kitail kin kilang pweidahn sapwellimen Siohwa inou wet: “I pahn kapokoneikumwailpene, rasehng pelin sihpw me pwurodohng nan kehl ehu.” (Maika 2:12) Kitail men kolokol minimin oh popohl wet sang ni atail kin kaukaule wia aramas sarawi kan oh ahnsou koaros peikiong sapwellimen Siohwa koasoandi kan.

Meid pai irail akan me kakehr iang sapwellimen Siohwa mwomwohdiso mwakelekel! En wiliandi mwaren Siohwa wia pwais me warohng atail tounmetei koaros me kitail kak wiahda. Ni atail kin kolokol atail nanpwung mwahu rehn Siohwa, kitail pahn nantiong peikiong sapwellime koasoandi pwung kan oh kangoange meteikan en pil peikiong.​—2 Korint 3:18.