Irelaud 14
Kolokol Popohl Oh Mwakelekel En Mwomwohdiso
EHU ehu pahr, aramas tohto kin tepida iang sapwellimen Siohwa tehnpas ong kaudok min, oh met kin wia pweidahn kokohp en Paipel. (Maika 4:1, 2) Ia uwen kaperen ni atail kin kasamwo irail ong nan “mwomwohdisohn Koht”! (Wiewia 20:28) Irail kin kesempwalki arail ahnsou mwahu en iang kitail papah Siohwa oh paieki atail paradais en ngehn. Irair en mwakelekel ni pali ngehn oh irair en popohl wet kak wiawi pwehki doadoahk en sapwellimen Siohwa ngehn sarawi oh pil atail kin kapwaiada kaweid kan me dierek nan sapwellime Mahsen, Paipel.—Melkahka 119:105; Sekaraia 4:6.
En doadoahngki mouren padahk en Paipel kan kin sewesei kitail en kakairada irair en Kristian. (Kolose 3:10) Kitail kin wia uwen me kitail kak pwe atail mour en pahrekiong sapwellimen Siohwa koasoandi kan. Ong kahrepe wet, kitail kin mendahkihla kisin akamai kan oh wekpeseng en atail madamadau kan. Sang ni atail kin ale sapwellimen Siohwa madamadau duwen ire kan, kitail kak powehdi irair en sampah kan me kak kauwehla atail miniminpene, oh met kin mweidohng kitail en doadoahkpene ni minimin oh limpoak nin duwen pirien en sampah pwon.—Wiewia 10:34, 35.
Ahpw, ekei pak kahpwal kin kak wiawi, oh met kak kauwehla popohl oh minimin en mwomwohdiso. Ia kahrepen soangen kahpwal pwukat en wiawi? Pali laud en ahnsou, met kin wiawi ni ahnsou me kitail sohte kin tehk oh kapwaiada kaweid en Paipel. Kitail anahne en kin powehdi atail soh unsek kan. Sohte emen kitail sohte mie dipe. (1 Sohn 1:10) Mwein ekei tepida wia mehkot me kak kahrehdo irair en samin en pali en tiahk de pali ngehn nan mwomwohdiso, ahpw pein irail sohte wehwehki met. Mwein sang ni atail wiewia kan de atail lokaia kan, kitail pahn kansensuwedih meteikan, de mwein pein kitail pahn nsensuwedkihla dahme meteikan nda de wiahda. (Rom 3:23) Ni ahnsou me soangen kahpwal pwukat pwarada, dahme kitail kak wia pwehn kapwungala ire pwukat?
Kitail kak kalahnganki me Siohwa ketin mwahngih soahng pwukat koaros. Sapwellime Mahsen kin kihda kaweid kan me pid duwen dahme kitail anahne wia ni ahnsou me kahpwal kan pwarada pwehki atail soh unsek me kitail sohsohki oh atail soh itar kan, de pil ahnsou me dihp kan wiawi nan mwomwohdiso. Silepen sihpw en pali ngehn kan kak sewese emenemen tohnmwomwohdiso. Sang ni atail kin kapwaiada arail kaweid me poahsoankihda Paipel, kitail kak kolokol nanpwungmwahu rehn koaros nan mwomwohdiso oh pil rehn Siohwa. Ma kitail anahne kaiahn de kaweid kehlail pwehki atail wiahda dihp, kitail kak kamehlele me soangen kaiahn pwukat kin wia kasalepen limpoak en Samatail nanleng ong kitail.—Lepin Padahk 3:11, 12; Ipru 12:6.
KAPWUNGALA KAHPWAL TIKITIK KAN
Mwein pahn mie ahnsou me akamai kan de kisin kahpwal kan pahn wiawi nanpwungen tohnmwomwohdiso kan. Kitail anahne mwadang kapwungala soangen kahpwal pwukat sang ni atail pahn kasalehda limpoak en pirien. (Episos 4:26; Pilipai 2:2-4; Kolose 3:12-14) Ke pahn diarada me ke kak kapwungala pali laud en kahpwal kan me pid duwen ahmw nanpwung rehn tohnmwomwohdiso teikan sang ni ahmw pahn doadoahngki ahn Piter kaweid en “nantihong en limpoakpene, pwe limpoak kin mahkohng soahng tohto.” (1 Piter 4:8) Soangen kahpwal tikitik pwukat kin wiawi pwehki soh unsek en aramas. Kitail koaros kin kalapw sapwungala. (Seims 3:2) Sang ni atail kin wehwehki met oh ni atail kin doadoahngki kaweid ndand ehu me kin kangoange kitail en wiaiong meteikan dahme kitail men irail en wiawiong kitail, kitail kak kalapw kapwungala kahpwal tikitik kan sang ni atail kin mahkohng oh manokehla kahpwal pwukat.—Madiu 7:12.
Ahpw ma kahpwal laud wiawi nanpwungen kowe oh emen tohnmwomwohdiso oh ke lemeleme mie mehkot me ke anahne wia pwehn kapwungala kahpwalo, e pahn wia elen erpit en dehr kapwandehla kapwungala kahpwalo pwehki ke ese me ahmw nanpwung mwahu rehn Siohwa kin iang pidada. Sises ketin kaweidih sapwellime tohnpadahk kan: “Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.” (Madiu 5:23, 24) Mwein mie sawehwe nanpwungamwa. Ma ih duwen met, eri ke anahne kapwungala met sang ni ahmw kin nantihong kolokol ehupenehn Kristian oh kapehse mwahu nanpwungamwa. Kapehse mwahu nanpwungen koaros nan mwomwohdiso kak irehdi sawehwe kan oh kak kapwungala kahpwal kan me kin wiawi pwehki soh unsek en aramas.
KIHDA KAWEID EN PAIPEL
Ekei ahnsou, sounapwalih kan kin diarada me re anahne kaweidih emen oh song en kapwungala ah madamadau. Met sohte mengei ahnsou koaros. Ong Kristian akan nan Kalesia, Pohl ntingihdi:“Riei ko, ma mie emen rehmwail me lohdiong nan sapwung ehu, kumwail kan me poadidi ni ngehn, kumwail kapwungala. Ahpw kumwail pahn kamantik.”—Kalesia 6:1.
Sang ni arail kin apwalih pelin sihpw ni elen limpoak, sounapwalih kan kak pere mwomwohdiso sang irair keper ni pali ngehn kan oh irehdi kahpwal laud kan en kekeirda. Silepen sihpw kan anahne ahnsou koaros nantihong papah mwomwohdiso nin duwen koasoandi en sapwellimen Siohwa inou me kileldi nan pwuhken Aiseia: “Emenemen irail pahn rasehng wasahn rukusang kisinieng oh melimel. Re pahn rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.”—Aiseia 32:2.
KAPWUNGALA EKEI DIHP LAUD KAN
Atail kin perenki pohnsehse sapwung kan me meteikan wiawiong kitail oh mahkohng irail sohte kin wehwehki me kitail sohte kin nsenohki dihp de kitail kin pwungki dihp. Kaidehn dihp koaros me kitail kak kapwukoahkin soh unsek; de e sohte pahn wia kamwahupen riatail kan de e sohte pahn wia kamwahupen mwomwohdiso ma kitail pahn pohnsehse dihp laud kan. (Lipai 19:17; Melkahka 141:5) Kosonned en inou kin kasalehda uwen laud en dihp oh sapwung kan. Kristian akan pil wehwehki ire mehlel wet.—1 Sohn 5:16, 17.
Sises ketin kasansalehda ekei koasoandi kan ong kapwungala kahpwal kan me pid dihp laud kan, duwehte widing de karaun likamw, me kin pwarada nanpwungen Kristian akan. Tehk kahk kan me e ketin koasoanehdi: “Ma riomw wiahda dihpiong uhk, [1] kohwei reh oh kapwungohng dipeo. Ahpw met en wiawi nanpwungamwahte. Ma e pahn rong uhk, eri a, ke kasapahldohr riomwo. A ma e sohte pahn rong uhk, [2] a emen de riemen en ianguhkada, pwe me riemeno de silimeno en wia kadehdehn soahng koaros nin duwen me Pwuhk sarawi mahsanih. A ma e pil sohte men rong irail, [3] a ke lelki mwomwohdiso. A ma e pil sohte men rong mwomwohdiso, a wiahkihla ih mehn liki men de sounrik daksis men.”—Madiu 18:15-17.
Karasaras me Sises ketikihda mwurin met, me kileldi nan Madiu 18:23-35, kin kasalehda me dihp kan me Madiu 18:15-17 kin koasoia iei soangen dihp me pid mwohni de dahme emen ahneki—sohte pwain ni pwung ong mehkot de soangen wiewiahn widing. De mwein dihpo kauwehla eden aramas emen sang ni karaun likamw. Nan soangen irair pwukat, ma me dipano pohnese ah sapwung, oh kasalehda me e pahn kapwungala ireo ni uwen me e kak, oh peki mahk, eri kahpwalo kak pwungla ma aramaso me dihpo wiawihongehr pahn kasalehda mahk.—Madiu 5:25, 26.
Ma mie mehn kadehde rehmw me emen nan mwomwohdiso wiahdahr soangen dihp laud ong uhk, ken dehr mwadang tuhwong sounapwalih kan de meteikan, oh peki rehrail sawas ong uhk. Nin duwen Sises ketin kaweidki, ken koasoiong mahs aramaso me mie ahmw komplein ong. Song kapwungala ireo nanpwungamwa oh sohte emen tohrohr pahn iang. Ma e sohte mwekidki ahmw nanti, ke pahn kak mweidong ekis ahnsou en dower powe. Tamataman me Sises sohte ketin mahsanih ‘kohwei pak ehute, oh kapwungohng dipeo.’ Kahrehda ma aramaso sohte pahn pohnese ah sapwungo oh peki mahk nin tepio, mwein e pahn mwahu en medemedewe en pwurehng tuhwong ih mwuhr. Ma ireo kak pwungla ni ahl wet, aramaso me wiadahr dihpo pahn uhdahn kalahnganki me ke sohte padahkiong meteikan duwen dipeo de kauwehla adamwahu nan mwomwohdiso. Ke pahn lel ahmw mehn akadei en ‘kasapahldo riomw brother.’
Ma aramaso me wiahda dihp pahn pohnese ah pwukoa, oh peki mahk, oh kapwungala ah sapwungo, eri sohte anahn mie en wia pil ehu kahk. Met kin kasalehda me mendahki dihp laud wiahier, dihpo kak pwungla nanpwungen irail kante me iang pidada. Irair wet sohte kin pid soangen dihp kan duwehte nenek, kamwahl, ohl mwahuki ohl oh lih mwahuki lih, lahlahwe padahk mehlel, pwongih dikedik kan, oh dihp teikan me duwehte dihp pwukat. (1 Korint 6:9, 10; Kalesia 5:19-21) Ma soangen dihp pwukat wiawi, eri anahne mehkot me laud sang mahkte en kohwong me medeklau. Pwehki mwakelekel en mwomwohdiso en pali ngehn oh tiahk me mih nan keper, elder kan anahne ese oh apwalih ire pwukat.—1 Korint 5:6; Seims 5:14, 15.
Ma ke sohte kak kasapahldo riomw brother sang ni ahmw ‘kohwei reh oh kapwungohng dipeo nanpwungamwahte,’ mwein ke pahn wia dahme Sises ketin mahsanih—ke pahn wahla emen de riemen oh pwurehng koasoiong riomw brother. Irail me ke pahn wahla anahne ahneki soangen mehn akadei en kasapahldo riomw brother. E pahn mwahu ma irail wia sounkadehdehn sapwungo, ahpw ma sohte mie sounkadehde kan, mwein ke pahn pilada wahla brother kan en wia sounkadehdehn amwa koasoipene. Mwein irail ese soangen irairo oh re pahn kak koasoanehdi ma dahme wiahier uhdahn sapwung. Elder kan me pilipilda nin duwen sounkadehde kan sohte pahn wiliandi mwomwohdiso, pwehki pwihn en elder kan sohte idihada irail en iang irair wet.
Ma ke uhdahn kamehlele me riomw brother wiahda dihp laud ong uhk oh mie mehn kadehde me kasalehda dipeo oh ireo sohte pwungla mwurin ahmw nantihong pwurepwurehng kapwungala—ni ahnsou me ke koasoiong ih kelepw de ni ahnsou me ke wahla emen de riemen oh tuhwong ih—oh ke pehm me ke sohte kak pohnsehse ire wet, eri ke anahne ripohtki ong elder kan en mwomwohdiso ire wet. Tamanda me arail mehn akadei iei en pil kolokol popohl oh mwakelekel en mwomwohdiso. Ni ahmw tuhwong elder kan, ke wiahdahr soahng koaros me ke kak wia. Mweidong irail en apwalih kahpwalo, oh likih Siohwa me met pahn pwungla. Ke dehr mweidong wiewiahn meteikan en kadipikelekelih uhk de kihsang ahmw peren en doadoahk ong Siohwa.—Melkahka 119:165.
Ma mwurin silepen sihpw kan ahr kasawih ireo oh e sansalda ong irail me brothero uhdahn wiahda dihp laud ong uhk, ahpw sohte men koluhla oh kapwungala ah sapwung, eri elder kan pahn anahne koasoanehdi me e pahn piskensang nan mwomwohdiso. Ni ahl wet, re pahn pere pelin sihpw oh mwakelekel en mwomwohdiso.—Madiu 18:17.
KILELEHDI IRAIR KAN ME POHNKAHKE, ME SOHTE KIN MOURKI MOUREN KAWEID EN PAIPEL KAN
Nan nah keriaun kisinlikou ong mehn Deselonika kan, Pohl kihda kaweid me pid duwen ekei me kin pohnkahke, met wehwehki irail akan me sohte kin mourki mouren kaweid en Paipel kan, oh ma mwomwohdiso pahn wiahki irail mehn kahlemeng mwahu, re pahn kauwehla pali ngehn en meteikan. Pohl kaweidih Kristian en mehn Deselonika kan “en kalekeikumwailsang [Kristian] akan me mouren pohnkahke me sohte kin idawehn peneu kan me se kin panawihekin irail.” (2 Deselonika 3:6) E kasansalehda mouren kaweido oh ntingihdi: “Mwein mie rehmwail me sohte pahn peikiong kosonned wet me se kadarowohng kumwail nan nait kisinlikou kiset. Eri, ma mie, a kumwail kilelehdi, oh dehr miniminiong, pwe en namenekla. Kumwail dehr wiahki amwail imwintihti, ahpw kumwail panawih nin duwen riamwail [Kristian].”—2 Deselonika 3:14, 15.
Ekei pak, emen me sohte kin wia dihp laud me kak kahreiong ih en piskenla, ahpw e kin kasalehda me e mwamwahleki sapwellimen Koht koasoandi me anahne kaunda mouren Kristian akan. Met kin pid soahng kan duwehte nohk pohnkahke de kaukauwe meteikan, wia aramas emen me kin koasoakoasoi soahng soh katepe kan oh kin ‘kedirepwe en aramas teikan ar doadoahk.’ (2 Deselonika 3:11) De met kak pid emen me kin song isaneki meteikan en ale kepwe kan de me kin kalapw iang mehn kamweit kan me sohte konehng. Wiewiahn pohnkahke oh mwamwahleki mouren kaweid en Paipel kan kaidehn soangen dihp tikitik kan me kak pwungla sang ni ihte kihda kaweid en Paipel oh kasalehda limpoak, ahpw met kin pid mehkot laud me kak kauwehla eden mwomwohdiso oh kak kamwekid Kristian teikan en pil iang wia.
Mwurin elder kan pwurepwurehng kihong soangen aramaso kaweid oh diarada me e kin pousehlahte mwamwahleki mouren kaweid en Paipel kan, irail elder kan pahn koasoanehdi ma padahk ehu pahn anahne wiawi ong mwomwohdiso pwehn kihda kaweid konehng kan duwen soangen wiewia pwukat. Elder kan pahn song en toupahrek oh doadoahngki loalokong en koasoanehdi ma irairo uhdahn mehkot laud oh kahrehda kahpwal laud, oh anahnepen padahk en kaweid en wiawi. Padahk wet sohte pahn kasalehda eden aramaso me sohte peikiong kaweid kan. Irail akan me ese irairo pahn wehwehki ihs ih me padahko dokedoke oh sohte pahn kalapw patehng ih.
Poadidi en me lelepek kan en mwomwohdiso kak kamwekid aramaso en namenek oh koluhla. Ni ahnsou me e sansalda me aramaso kesehlahr ah mour me sohte pahrekiong koasoandi en Kristian, re sohlahr pahn anahne wiahki ih emen me kileldi.
APWAHPWALIH IRAIR EN DIHP LAUD KAN
Mwurin arail doadoahngki kahk kan me kileledi nan Madiu 18:15, 16, mwein ekei brother de sister kan pahn ripohtki ong elder kan irair en dihp laud kan me sohte pwungla. (Madiu 18:17) Ni pali teio, mwein ekei pahn tuhwong elder kan pwehn wehkada pein diparail de ripohtki dahme re ese duwen dipen meteikan. (Lipai 5:1; Seims 5:16) Sohte lipilipil ia mwomwen elder kan tepin esehda dihp laud kan me tohnmwomwohdiso papidaisla men wiahda, elder riemen pahn kasawih dahme wiahier. Ma e sansalda me mie poahsoanpen ripohto oh mehn kadehde me kasalehda me dihp laud uhdahn wiahier, pwihn en elder kan pahn koasoanehdi pwihn en judicial committee me wiawihkihda elder silimen de tohto sang en apwalih ireo. Me pid duwen dihp laud me emen me saikinte papidaisla wiahda, kilang pali 157-8.
Elder kan pahn mwasamwasahn duwen irair en pelin sihpw, oh songosong pere mwomwohdiso sang soahng kan me pahn keper ni pali ngehn, ahpw ni ahnsowohte, re pahn pil song en doadoahngki Mahsen en Koht ni koahiek oh kaweidih irail me wiahda dihp oh song en sewese irail en onehda sapahl arail nanpwung mwahu rehn Siohwa. (Sud 21-23) Met kin pahrekiong kaweid kan me Pohl kihong Timoty, me ntingihdi: “Eri, I pangenkin uhk mwohn silangin Koht oh Krais Sises, me pahn ketin kadeik aramas koaros, me momour oh me melahr akan, . . . panawih irail oh kakehlaka irail ni omw kin padahk ni kanengamah.” (2 Timoty 4:1, 2) En wia met pahn doadoahngki ahnsou laud oh doadoahk laud, ahpw met wia kisehn doadoahk laud en elder kan me mwomwohdiso kin kalahnganki oh pwehki met, re kin kihong elder kan kaping laud.—1 Timoty 5:17, NW.
Nan irair koaros me dihp laud sansalda, mehn akadei en sounapwalih kan iei en sewese me dipano en onehda sapahl ah nanpwungmwahu rehn Siohwa ma e uhdahn koluhla, sang ni ah “wia soahng kan me pahn kasalehda me [e] wiliakapwalahr.” (Wiewia 26:20) Ma e koluhla oh irail kak sewese ih, arail kihda kaweid, ongete ih de mwohn irail akan me ese dipeo, pahn kak kihong ih kaiahn oh kihong irail pwukat masak me konehng. (2 Samuel 12:13; 1 Timoty 5:20) Ahnsou koaros ma judicial committee pahn kihong me dipano kaweid, ekei pwais kan pahn kohsang reh. Met pahn sewese me dipano en ‘kainenehla ah ahl’ mwurin mwo. (Ipru 12:13) Ni kekeiradahn eh pali ngehn kin sansalda, pwais kan pahn pwurehng kohwong ih.
PAKAIR KAN EN KAWEID
Ma judicial committee koasoanehdi me emen koluhla ahpw mwomwohdiso de aramas akan nan wasao pahn ese ireo de ma mie kahrepe teikan me elder kan kamehlele me mwomwohdiso anahne ese, eri pakair mwotomwot ehu pahn wiawi nan Service Mihding. E pahn nda: “[Eden aramas] aleier kaweid.” Presiding overseer anahne tehk pakair wet.
MA PILIPIL IEI PISKENLA
Nan ekei irair kan, me dipano kin tenglahr nan ah wiewiahn dihp kan oh sohte kin mwekidki sawas laud me kohwong ih. Wah kan de doadoahk me pahn kasalehda koluhla sohte kin sansalda, de sohte koluhla mehlel pahn sansalda ni ahnsou me judicial committee tuhwong ih. Eri, dahme pahn anahne wiawi? Nan soangen irair pwukat, me dipano me sohte koluhla anahne piskensang nan mwomwohdiso, pwehn kasalehda me e sohlahr kisehn sapwellimen Siohwa mwomwohdiso mwakelekel. Met kin wiawi pwehn kihsang nan mwomwohdiso irair suwed en me dipano, oh kolokol mwakelekel en mwomwohdiso en pali en tiahk oh pali ngehn oh pere eden mwomwohdiso. (Deuderonomi 21:20, 21; 22:23, 24) Ni ahnsou me wahnpoaron Pohl esehda wiewia kanamenek en emen tohnmwomwohdiso en Korint, e kaweidih elder kan en “pangala aramas menen rehn Sehdan . . . pwe pali [ngehn en mwomwohdiso] en kak pitla.” (1 Korint 5:5, 11-13) Pohl pil ripohtki piskenlahn irail kan me kin uhwong padahk mehlel nan keieun senturi.—1 Timoty 1:20.
Ni ahnsou me judicial committee koasoanehdi me dipan me sohte koluhla anahne en piskenla, re anahne kehsehkin ih arail pilipil, oh kasalehda ni sansal iren Paipel kan ia kahrepen ah pahn piskenla. Ni ahnsou me judicial committee pahn padahkiong me dipano arail pilipil, re anahne padahkiong ih me ma e kamehlele me sapwung laud wiawi me pid duwen pilipilo oh e men karong sapahl en wiawi, e kak wia met sang ni ah wiahda kisinlikou oh kasalehda ia kahrepe ni sansal. E ahneki rahn isuh en wia met, sang ahnsouo me committeeo kehsehkin ih arail pilipil. Ma pwihn en elder alehdi soangen kisinlikou, re pahn koasoiong sounapwalih en circuit, me pahn idihada elder kan en papah nan appeal committee en wia karong sapahl ong ireo. Elder kan me pilipilda en apwalih pwukoa toutou wet anahne ahneki eksperiens mwahu oh koahiek en wia met. Re anahne wia uwen me re kak pwe karong sapahl en wiawi erein wihk ehu mwurin re ale kisinlikou ong karong sapahl. Nan irair wet, pakair en piskenla pahn kosoula. Nan erein ahnsowo, pwais en iang pasapeng oh kapakap ni ahnsoun mihding de pwais tohrohr kan pahn kohsang reh.
Karong sapahl pahn wiawi nin duwen kasalepen kadek ong aramaso oh mweidohng ih en pwurehng kasalehda ah madamadau. Kahrehda ma e sohte pwarala ni ahnsoun karong sapahl mendahki e kak, pakair en ah piskenla pahn wiawi mwurin arail nsenohki tuhwong ih.
Ma me dipano sohte men karong sapahl en wiawi, eri judicial committee anahne kawehwehiong ih anahnepen koluhla oh soangen kahk dah kan me e kak wia pwehn kasapahldo nan mwomwohdiso ehu rahn. Met pahn wia sawas oh kasalepen kadek ong ih, oh re pahn koapworopworki me e pahn wekidala ah mour oh ehu rahn e pahn pwurodo nan sapwellimen Siohwa pwihn.—2 Korint 2:6, 7.
PAKAIR EN PISKENLA
Ni ahnsou me anahnepen kihsang emen me dipan men sang nan mwomwohdiso, pakair mwotomwot pahn wiawi, me ndahte: “[Eden aramas] sohlahr wia emen Sounkadehdehn Siohwa kan.” Sohte anahne kihda kahrepe. Met pahn kehsehkin tohnmwomwohdiso lelepek kan me re sohlahr pahn patehng aramaso. (1 Korint 5:11) Presiding overseer anahne tehk pakair wet.