“Amwail Koasoi en Ahnsou Koaros . . . Dolki Soahl”
1. Ia wehwehn kitail en ‘doalohki soahl atail koasoi kan’?
1 “Amwail koasoi en wiawi ni kadek, oh dolki soahl pwe kumwail en ese duwen amwail pahn kin sapeng emenemen.” (Kol. 4:6, New World Translation) Doalohki soahl atail koasoi wehwehki kitail en kin pilada lokaia pwung oh koasoi ni ahl ehu me pahn kansenamwahu ong me rongorongo. En wia met ni ahnsoun kalohk inenen kesempwal.
2. Iaduwen Sises eh kak kalohk ong lihen Sameria?
2 Kahlemeng en Sises: Ni ahnsou me eh komkommoal ni keilen pwarero, Sises pein tapihada koasoiong lihen Sameria me kohdohn idipil. Pak tohto ni ara wie koasoakoasoi, liho kin kapwarehda ire kei me pid duwen nanpwung suwed me mih nanpwungen irail mehn Suhs oh Sameria. E pil kasalehda duwen eh kin kamehlele me mehn Sameria kan wia kadaudok en Seikop, mendahki irail me mehn Suhs akan kin kamehlele me irail mehn Sameria kan wia kadaudok kei en mehn liki. Sises sohte akupwungkihong liho duwen met ahpw e pousehlahte oh wie koasoakoasoi ni ngihl mwahu. Imwilahn met, eh wia mehn kalohk mwahu me sewese liho oh pil aramas akan en kahnimwo.—Sohn 4:7-15, 39.
3. Iaduwen kitail kak kahlemengih Sises ni ahnsoun kalohk?
3 Ahnsou me kitail kin kalohk, kitail anahne tamataman duwen atail mehn akadei—iei en “wa kohdo rongamwahu.” (Rom 10:15) Kitail men ehukihong tohnihmwo ire kaselel oh me kin kakehl kan sang Paipel, ahpw kaidehn kitail en kihong ih madamadau en me kitail men kauwe mehkan me e kin kamehlele. Ma eh kasalehda ehu ire sohte pwung, atail pasapeng en dehr wiawi ni mwomwen koasoi en uhwong. Iaduwen, mie mehkot nan eh koasoi me kitail kak pwungkihpene de kapingahki? Ele mwein kitail kak kasalehda ehu iren Paipel oh koasoia, “Mie pak ke kin medemedewe me met kak wiawi?”
4. Dahme kitail en wia ma tohnihmwo kin lemei?
4 Iaduwen ma tohnihmwo kin lemei de mwein e sansal me ihte me e men wia iei akamai? Kitail en kaukaulehte kasalehda kadek oh aktikitik ni atail mwekid oh lokaia kan. (2 Tim. 2:24, 25) Ma aramaso sohte perenki rongamwahu en Wehio, eh pahn mwahu kitail en mweselsang wasao ni elen kadek.—Mad. 7:6; 10:11-14.
5. Iaduwen emen sister ahneki ekspiriens mwahu pwehki eh kin koasoi ni elen kadek?
5 Imwila Mwahu: Ni ahnsou me emen sister song en kalohk ong mehn mpe, liho inenen lingeringerda oh lokaia suwed ong ih. Sistero koasoi ni ngihl kadek oh nda: “Kupwur mahk ahmw ahneki soangen pepehmen. Eri kaselehlie.” Wihk riau mwuri, liho letelet imwen sistero, pek mahki eh mwekid, oh kasalehda eh men rong dahme sistero pahn koasoia. Koasoi kadek kin kalapw imwila mwahu!—Lep. Pad. 15:1; 25:15.
6. Dahme kahrehda e kesempwal kitail en doadoahngki koasoi me dolki soahl ni ahnsoun kalohk?
6 Nantihong doadoahngki soangen koasoi me kin dolki soahl ni ahnsoun kalohk. Mendahki ma tohnihmwo sohte men rong, mwein eh pahn men rong mwuhr ni ahnsou me Sounkadehdehn Siohwa kan pahn pwurehng kalohkla ni imweo.