Tepiada Onop Kan nan Brochure Kupwurki

¹ Ripoht kan sang nan sampah pwon kin kasalehda me brochure Dahme Koht Kupwurki Kitail en Wia? kin wia mehn kalohk lipwalipw ehu en padahkihong aramas akan duwen padahk mehlel. Onop en Paipel kid kei kin tepida wiawi nan brochure wet ehuehu wihk. Ahmw kalohk pweidahr ni omw tepida wia onop en Paipel nan brochure Kupwurki?

² Nindoken me tohto kin mengeiki kihla brochure wet, ekei kin apwalki dahme re pahn nda pwehn tepiada ehu onop nan brochure. Wiepe dah kei me ekei diarada me kin pweida mwahu pwehn tepida onop en Paipel kan doadoahngki brochure Kupwurki? Ire pwukat me kilkilel pah pahn wia mehn sawas laud.

³ Kamwomweda Iaduwen Onopo pahn Wiawi: Ni ahnsou me kitail tepin tuhwong aramaso de kitail pwurehng pwurala reh, kitail en dehr ihte koasoia me kitail pahn onop Paipel rehrail, ahpw kitail kak kamwomweda iaduwen onop en Paipel kin wiawi. Met pahn kihsang rehn tohnihmw tohto arail pwunodki lepin lokaia wet “onop.” Ni ahnsou me kitail kamwomweda iaduwen onopo kin wiawi, kitail pahn diarada me ki tepin lokaia mengei kan, kitail kakehr tepiada onopo.

⁴ Kiho Iei en Kaunopada: Atail ngoangki tepiada onop en Paipel kan kin pidada ia uwen mwahu en atail kaunopada. Kaunopada mwowe pahn sewese kitail en powehdi atail kin pweiek en iang kisehn doadoahk en wia onop en Paipel kan. Ma kitail kin praktis atail padahk kan pak tohto, eri ni ahnsou me kitail wia atail padahk kan, e pahn mwomwen me kitail koasoakoasoi, oh kitail pahn kak kasalehda atail lamalam ni pein atail lokaia. Met sohte pahn ihte sewese kitail en meleilei ahpw pahn pil kameleilei tohnihmwo.

⁵ Ni ahnsou me ke kin praktis omw padahk, e pahn mwahu en kilang ia uwen reirei en omw padahko pwe ken kak padahkihong tohnihmwo ia uwen reirei en omw pahn kamwomweda onopo. Mwurin ah kasalehda ihs ih, emen brother koasoia: “I uhdi rehmw pwehn kasalehiong uhk aht koasoandi en onop Paipel me kin wiawi ni soh isepe. I pahn kasalehiong uhk iaduwen met kin wiawi nan erein minit 5 te. Mie omw ahnsou me reireikihte minit 5?” Ke kak kamwomweda Iren Mehn Kasukuhl 1 en nan brochure Kupwurki me pahn reireikihte minit 5. Ni mehlel, ekeite iren Paipel kan me kak wadawadla nan erein minit 5, ahpw sang ni omw kanekehla keieun mehn kasukuhlo nan erein minit keite, tohnihmwo pahn kakehr pehm ah tepin onopo. Eri ndahng ih me ni ahnsou me ke pahn pwurehng pwurodo pwehn onopkihong ih Iren Mehn Kasukuhl 2, kumwa pahn onopkihte erein minit 15.

⁶ Padahk kan me sansalda pah kin wiawi oh pweida mwahu:

◼ “I men kasalehiong komwi onop en Paipel ehu me inenen mengei oh mwadang, doadoahngki brochure wet Dahme Koht Kupwurki Kitail en Wia? Me tohto kin diarada me nan erein minit 15 te nan wihk ehu erein wihk 16, re kak diarada pasapeng pwung kan en Pwuhk Sarawi ong peidek en Paipel kesempwal pwukat.” Ni mwotomwot kasalehiong oaralap kan nan brochure. Pahkalahng Iren Mehn Kasukuhl 1 oh koasoia: “Ma mie omw ahnsou me reireiki minit limau, se pahn men kasalehiong komwi iaduwen met kin wiawi. Oaralap en Iren Mehn Kasukuhl 1 iei ‘Iaduwen Komw Pahn Kak Diarada Dahme Koht Kupwurki Kitail en Wia.’ ” Mwuri wadek peidek siluh, oh kawehwehda nempe ko nan parentheses de nan kilel ko [ ]. Wadek parakrap 1, oh kasalehiong tohnihmwo iaduwen e kak rapahkihda pasapengo. Tohnihmwo kak wadek parakrap 2. Mwuri ke kak nda: “Me poahsoanda pohn ire pwukat, iaduwen komw kak sapeng peideko? [Pwurehng wadek peideko, oh mweidohng tohnihmwo en koasoi.] Ke pahn tehk me mie iren Paipel kan me kin iang ehuehu parakrap. Mepwukat pahn kahluwa atail lamalam ong pasapeng en Paipel ong peidek pwukat. Karasepe ehu, kita kak wadek 2 Timoty 3:​16, 17 oh kilang ma e kin utungada omw pasapengo me pid meno me ntingihda Paipel.” Mwurin omw wadek parakrap 3, koasoia peideko, oh wadek Sohn 17:​3, oh kahluwalahng madamadau en tohnihmwo loalokong me e sukuhlkiehr ni omw kousapahlih Iren Mehn Kasukuhl 1. Ahnsouwet ke kakehr pahkalahng Iren Mehn Kasukuhl 2 oh wadek kaimwseklahn peideko, “Ni ahl riau dah me kitail kak sukuhlki duwen Koht?” Mwuri kalelepek: “Iahd me pahn mie omw ahnsou me pahn reireikihte minit 15 pwe kita en wia Iren Mehn Kasukuhl 2 oh rapahkihda pasapengo?”

⁷ E kesempwal en wia onopo en mengei oh kapinga tohnihmwo ahnsou koaros ma kak. Ni ahnsou me ke koasoanehdi en pwurehng pwurodo, dehr idek ma e men pousehlahte onop, ahpw kangoange ih en idawehnlahte soahngen wiepen onopo ong iren mehn kasukuhl en mwuri. Kehsehkin ih me ke kaskasik en pwurodo. Ekei sounkalohk kan kin koasoanehdi en wia onop nan delepohn ma e apwal en koasoanehdi en pwurehng pwurala. Ke pil kak kangoangehki tohnsukuhlo en nekidala brochureo nan wasa kis me pahn mengei ong ih en pwurehng ale mwuhr ni ahnsou me ke pahn pwurehng pwurodo.

⁸ En Ahneki Lamalam Kehlail: Nindoken kih en pweida mwahu iei en kaunopada, kitail en ahneki lamalam kehlail en pwurehng pwurala. Onopkihong emen iren mehn kasukuhl ehu nan erein minit keite me apwal, ihme kitail en nantiong praktis padahko pahn pak tohto pwehn samanihala ni ahnsou me kitail pahn kamwomweda onopo. Song en kamwomweda onopo rehn irail kan me kohdo ni wehnimw, ni ahnsou soh lipilipil, oh kalohk nan delepohn. Ma ke apwalki tepiada ehu onop en Paipel rehn emen, dehr mworusala. Ke anahne en lamalam kehlail oh ahneki ineng mehlel en ehukihong meteikan padahk mehlel pwe ken kak pweida ni omw tepiada ehu onop en Paipel.​—Kalesia 6:9.

⁹ Ni omw kapwaiada iren sawas pwukat, ke pil pahn iang ahneki kapai en sewese emen en keid pohn ahl en mour, ni omw pahn tepiada ehu onop en Paipel nan brochure Kupwurki.​—Madiu 7:​14.