Iren Mehn Kasukuhl 7
Kereniong Koht ni Kapakap
Dahme kahrehda e kesempwalki en kin kapakap ahnsou koaros? (1)
Ihs me kitail anahne kapakap ong, oh iaduwen? (2, 3)
Oralap konehng dah kitail kak doadoahngki ong atail kapakap kan? (4)
Iahd me ke anahne kapakap? (5, 6)
Koht kin karonge kapakap koaros? (7)
1. Kapakap iei elen koasoi aktikitik ehu ong Koht. Ke anahne kapakap ong Koht ahnsou koaros. E pahn kahrehda ken kerenih ih duwehte koampoakepomw men. Siohwa inenen lapalap oh kehlail, ahpw e kin ketin karonge atail kapakap kan! Ke kin kapakap ong Koht ahnsou koaros?—Melkahka 65:2; 1 Deselonika 5:17.
2. Kapakap iei kisehn atail kaudok. Ihme, kitail anahne kapakap ongete Koht, Siohwa. Ahnsou Sises ketiket sampah, e kin ahnsou koaros kapakap ong Seme, kaidehn emen tohrohr. Kitail anahne alasang ih. (Madiu 4:10; 6:9) Ahpw, kitail pahn ahnsou koaros kapakap ni mwaren Sises. Met pahn kasalehda me kitail kin wauneki Sapwellimen Sises pwais, oh kitail pwoson sapwellime meirong en tomw.—Sohn 14:6; 1 Sohn 2:1, 2.
3. Ahnsou me kitail kin kapakap, kitail anahne patoh ong Koht sang nan mongiongatail. E sohte konehng kitail en wadilik atail kapakap kan de wadek atail kapakap kan sang nan pwuhk en kapakap kan. (Madiu 6:7, 8) Pil kitail kak kapakap ni mwomwen sondi en paliwar koaros, ahnsou koaros, oh wasa koaros. Koht kin kak ketin karonge atail kapakap rir kan sang nan mongiongatail kan. (1 Samuel 1:12, 13) E pahn mwahu kitail en rapahkihda wasa meleilei ieu, kelekelepwla oh wia pein atail kapakap kan.—Mark 1:35.
4. Dahme pahn wia audepen atail kapakap akan? Mehkoaros me pahn pid nanpwungen kitail oh Koht. (Pilipai 4:6, 7) Kapakap en Sises kasansalehda me kitail anahne kapakapki mwaren Siohwa oh sapwellime kupwur kan. Kitail pil kak peki sawas ong atail anahn ni pali war kan, oh pil mahkepen dipatail kan, oh sawas en powehdi kasongosong kan. (Madiu 6:9-13) Atail kapakap kan en dehr roporop. Konehng kitail en kapakapki mehkan me pahn pid kupwuren Koht.—1 Sohn 5:14.
5. Komw kak kapakap ahnsou me mongiongomwi kamwekidada komwi en kalahngan de kaping ohng Koht. (1 Kronikel 29:10-13) Ke anahne kapakap ahnsou ke ahneki kahpwal kan oh kin lelong kasongosong. (Melkahka 55:22; 120:1) E konehng ken kapakap mwohn omw pahn mwenge. (Madiu 14:19) Siohwa ketin luke kitail en kapakap “ahnsou koaros.”—Episos 6:18.
6. Kitail anahne kapakap ma kitail wiahda dihp toutou. Ni soangen ahnsowo, kitail anahne peki sapwellimen Siohwa mahk kalahngan pwehn mahkong kitail. Ma kitail wekada dihpatail oh wia wen atail kak en dehr pwurehng wia dihpo, Koht pahn “ketin mahkikihong uhk.”—Melkahka 86:5; Lepin Padahk 28:13.
7. Siohwa kin ketin karonge kapakap kan en irail aramas pwung kan. Pwe Koht en karonge omw kapakap kan, ke anahne nantiong en kapwaiada sapwellime kosonned akan. (Lepin Padahk 15:29; 28:9) Ahneki lamalam en aktikitik ahnsoun kapakap. (Luk 18:9-14) Ke pahn anahne nantiong kapwaiada dahme ke kapakapki. Ke pahn kasalehda me ke pwoson oh ke kamehlele dahme ke nda. Iei ahnsou me Siohwa kak sapengki omw kapakap kan.—Ipru 11:6.