Me Pwulopwul kan—Dahme Ke Pahn Wia nan Ahmw Mour?
1 Nin duwen me pwulopwul men, ele ke kin medemedewe duwen dahme ke pahn wia nan ahmw mour. Lepin Padahk 21:5 kin padahkihong kitail: “Wiahda omw koasoandi ni keneinei, ke ahpw pahn ahneki dipwisou tohto.” E pahn wia kamwahupomw ma ke pahn medewe mwahu duwen ahmw mehn akadei kan. Ni ahmw pahn wiahda mehn akadei kan, ke kak medewe duwen doadoahk en pioneer. Pwekida?
2 Idek rehn me laud kan me wia doadoahk en pioneer ni ahnsou me irail pwulopwul dahme re medewehki duwen arail pioneer. Irail koaros pahn ndahte: “Ih ahnsou me keieu kaperen nan ei mour!” Emen brother me kin iang doadoahk en pioneer ni ahnsou me e pwulopwul mwuhr koasoia: “E inenen kansenamwahu en tamanda ahnsou me I pwulopwul oh kak nda me I kapwaiada kaweid mwahu wet: ‘Tamanda Sounwiepomw nindokon omw wie pwulopwulte.’” (Ekl. 12:1) Kowe oh ahmw pahpa oh nohno anahne sawaspene pwe ken kak ahneki soangen peren wet ni ahmw wia pwulopwulte.
3 Mwohneki Doadoahk en Pioneer: Me pwulopwul kan, kumwail sohte anahne peikasalki duwen doadoahk en pioneer. Ke kak wia doadoahk en sawaspen pioneer ni ahnsou me ke kak, duwehte ahnsoun kommoal kan en sukuhl. Ma ke pahn wia met, ke pahn kak wehwehki ia uwen kaperen en doadoahk en pioneer! Ke kak medewehla ahmw pahn wia doadoahk en sawaspen pioneer sang met lel sounpwong en August?
4 Ma kowe emen brother pwulopwul nan mwomwohdiso, ke pil kak medewe mwahu pwe ken kak wiahla sounsawas men. (1 Tim. 3:8-10, 12) Patehng met, ke kak medewe ma ke men iang doadoahk nan Bethel de iang Sukuhl en Brother kan ong Pwukoa Tohrohr kan (Ministerial Training School) ni ahnsou me ke lelehr sounpar. Ahmw kin wia doadoahk en pioneer pahn kihong uhk kasukuhl mwahu tohto, me duwehte en wiahda de kamwahwihala ahmw koasoandi kan, kamwahwihala ahmw ehuong meteikan oh koahiekla en kapwaiada ahmw pwukoa kan. Soahng pwukat koaros pahn kaunopada uhk ong pwukoa laud kan me ke pahn kak ale mwuhr.
5 Pwehn pweida mwahu nan doadoahk pwukat, ke anahne pwerisek nan doadoahk ong Koht. Wahnpoaron Pohl kin kangoange uhk en ahneki irair wet oh kasalehda kapai kan: “Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kauno, ahpw kaidehn ong aramas. Kumwail en tamataman me Kaun-o pahn ketin katingih kumwail.” (Kol. 3:23, 24) Se kapakapki me Siohwa en ketin kapaiada ahmw doadoahk ong ih!