Koht Ketin Nsenohki Seri Kan? — Watchtower ONLINE LIBRARY

Koht Ketin Nsenohki Seri Kan?

SERI tohto kin lelohng kahpwal kan pwehki mie aramas akan me kin wiakauwe oh mwersuwedih irail nan pahr koaros. Aramas kin doadoahngki seri tohto duwehte lidu kan nan wasa keper kan. Mie me kin idingkihong seri kan en wiahla sounpei de en netiki paliwar. Seri tohto solahr kin likih aramas laud kan pwehki mie irail kan nan arail peneinei me angkehlailih irail oh wiakauwe irail.

Aramas akan me kin nsenohki seri kan kin nsensuwedkihla kahpwal kan me kin lelohng seri kan. Mendahki re kin wehwehki me noahrok oh tiahk suwed me kin kahrehda kahpwal pwukat, ekei kin apwalki wehwehki dahme kahrehda Koht limpoak men kak mweidohng soangen wiewia sapwung pwukat en wiawi. Re kin medewe me Koht likidmeliehla seri pwukat oh sohte ketin nsenohkin irail. Ia duwe, met mehlel? Ire mehlel wet me aramas kin mwersuwedih oh wiakauwe seri kan wehwehki me Koht sohte ketin nsenohkin irail? Dahme Paipel mahsanih duwen met?

Koht Ketin Kalahdeki Aramas Mwersuwed kan

Siohwa Koht sohte kupwurki aramas akan en wiakauwe seri kan. Wiakauwe seri kan iei ehu imwila suwed en uhwong sapwellimen Koht kaunda me wiawi nan mwetuwel en Ihden. Uhwong wet me kahrehda aramas akan kin wiakauwe aramas teikan.—Senesis 3:11-13, 16; Eklesiasdes 8:9.

Koht ketin kalahdeki irail kan me kin isanekihla oh wiakauwe irail me luwet duwehte seri kan. Wehi tohto en mahs me sohte kin kaudokiong Siohwa kin meirongki seri kan. Ahpw Siohwa mahsanih me e “sohte koasoanehdiong irail re en wia soahng wet—e pil sohte mwahn kupwukupwure soahng wet.” (Seremaia 7:31) Koht ketin panawih sapwellime aramas akan en mahs: “Kumwail dehr wiakauwe . . . me sepwoupwou men. Ma kumwail pahn wia met, ngehi, KAUN-O, I pahn rong irail ni ar pahn likweriong ie pwe I en sewese irail, oh I pahn engiengda.”—Eksodus 22:22-24.

Siohwa Ketin Poakohng Seri kan

Sapwellimen Koht nsenoh ong seri kan kin sansalkihda sapwellime kaweid kan ong pahpa oh nohno kan. Seri kan me kin tikida nan peneinei mwahu ehu kin kalapw kekeirda mwahu oh wiahla aramas koahiek kan. Ihme kahrehda atail Sounkapikada ketin wiahda koasoandi en pwopwoud pwe ohl pwopwoud oh lih pwopwoud en mihpene erein ara mour. E mahsanih: “Iei kahrepe wet me ohl emen pahn kin mweikihsang seme oh ine oh ehukihong eh pwoud, pwe ira en kin wiahla ehu.” (Senesis 2:24) Paipel kasalehda me wendipene kak wiawi ihte nanpwungen ohl pwopwoud oh lih pwopwoud pwehki seri kan kak kekeirda nan peneinei ehu me soandi mwahu.—Ipru 13:4.

Paipel pil kin kasalehda me pahpa oh nohno kan anahne kaiahnehda seri kan. E mahsanih: “Seri kan, iei kisakis ehu sang rehn KAUN-O; uhdahn kapai ehu sang reh. Pwutak kan me ohl emen nainekidahr ni eh pwulopwul, rasehng arep kei nan pehn sounpei men.” (Melkahka 127:3, 4) Seri kan iei kisakis kesempwal ehu sang rehn Koht oh e kupwurki irail en pweida mwahu. Koht ketin padahkihong pahpa oh nohno kan en kaiahnehda seri kan duwehte sounkesik men kin kaikainene ni keneinei nah arep kan. Mahsen en Koht mahsanih: ‘Kumwail sahm oh ihn kan, kumwail dehr kamwakara mwahl noumwail seri kan. A kumwail kaiahneirailda nan padahk en Kristian oh dahme re uhdahn pahn wia nin duwen Kristian.’—Episos 6:4.

Siohwa pil kin ketin kasalehda sapwellime limpoak ong seri kan ni eh kin ketin padahkihong pahpa oh nohno kan en pere neirail seri kan sang aramas mwersuwed kan. Koht ketin padahkihong mehn Israel kan en mahs me ‘seri kan’ pil anahne rong Kosonnedo me kin kasalehda wiewia kan me konehng oh sohte konehng me pid nsenen pwopwoud. (Deuderonomi 31:12; Lipai 18:6-24) Koht kupwurki pahpa oh nohno kan en wia uwen arail kak pwehn perehla neirail seri kan sang aramas akan me kak wiakauwe de mwersuwedih irail.

Koapworopwor Ehu ong Seri kan

Sises Krais kin ketin kasalehda sapwellimen Siohwa limpoak ong seri kan pwehki e kin ketin kahlemengih Semeo ni unsek. (Sohn 5:19) Mie ahnsou me sapwellime wahnpoaron kan medewe me re kin sewese Sises ni ar kauhdi pahpa oh nohno kan en dehr wahdo neirail seri kan reh. Ahpw Sises ketin kapwungala irail oh mahsanih: “Kumwail pweisang kisin seri kan pwe re en kohdo rehi.” Ih eri “pwoalehdi seri ko oh ketikidahng lime ko pohn emenemen irail oh kupwuramwahwihirailla.” (Mark 10:13-16) Siohwa oh sapwellime Ohlo kin ketin kesempwalki seri kan.

Ni ahnsou keren, Koht pahn ketin doadoahngki sapwellime Nanmwarki Sises Krais pwehn doarehla seri kan me kin mi nan kahpwal. Aramas mwersuwed kan pahn sohrala. (Melkahka 37:10, 11) Ong me aktikitik kan me kin rapahki Siohwa, Paipel mahsanih: “E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:3, 4.

Ahpw ni ahnsou wet, Koht kin ketin kasalehda sapwellime limpoak ni eh kin ketin sewese irail koaros me kin lelohng kahpwal kan pwehki aramas wiakauwe irail. E ketin inoukihda: “I pahn kin rapahki me salongalahr akan, kapwurehdo me kin kohkohseli mwahl akan, kidimpene ohlahn me lipwalipwada kan, kamwahwihala me soumwahu kan.” (Esekiel 34:16) Siohwa kin ketin doadoahngki sapwellime Mahsen, sapwellime manaman, oh mwomwohdisohn Kristian pwehn apwalih seri kan me kin lelohng kahpwal pwukat. E inenen kansenamwahu me ni ahnsouwet, “Samatail me kalahngan oh Koht me pwarer en kansenamwahu koaros . . . kin ketin sewesei kitail nan atail apwal akan koaros” duwehte e pahn ketin wia ni ahnsou kohkohdo.—2 Korint 1:3, 4.

[Kawehwehpen kilel kan nan ehu ehu pali 26]