Iren Mehn Kasukuhl 11
Padahk kan oh Tiahk kan me kin Kainsensuwedih Koht
Soahngen padahk oh tiahk dah kan me sapwung? (1)
Kristian akan en iang kamehlele me Koht emen Trinity? (2)
Dahme kahrehda Kristian mehlel akan sohte kin wia Krismas, Easter, de kasarawi en wia ipwidi? (3, 4)
Mehlahr akan kak lidere irail akan me memour? (5)
Sises pwoula nin lohpwuwo? (6)
Ia uwen kesempwal en kaperenda Koht? (7)
1. Kaidehkin padahk oh tiahk kan koaros kin suwed. Ahpw Koht sohte kin kupwurki ma re kin kohsang kaudok likamw de pelianda padahk kan en Paipelo.—Madiu 15:6.
2. Trinity: Siohwa iei Trinity—persona silimen ahpw Koht tehmen? Soh! Siohwa, Sahmo, iei “Koht mehlelo.” (Sohn 17:3; Mark 12:29) Sises iei sapwellime ohl, mesenih, oh e kin ahnsou koaros uhpaiong Koht. (1 Korint 11:3) Sahmo lapalapsang sapwellime Ohl. (Sohn 14:28) Ngehn sarawi kaidehn koht emen; ahpw iei sapwellimen Koht manaman.—Senesis 1:2; Wiewia 2:18.
3. Krismas oh Easter: Sises sohte ipwidi nan December 25. E ipwidi mpen October 1, ahnsou ieu me silipen sihpw kan kin mweidong neirail sihpw kan en mihmih likin ihmw kan ni pwong. (Luk 2:8-12) Sises sohte padahkiong Kristian akan en kasarawi rahn me e ipwidi. Ahpw, e kekehlikiong sapwellime tohnpadahk kan en kasarawi, de kataman ansoun eh pwoula. (Luk 22:19, 20) Krismas oh tiahk kan me pid Krismas kin kohsang kaudok likamw en mahs mahsie. Duwehte tiahk kan me pid Easter, me rasehng doadoahngki kutoahr kan oh mahn rabbit kan. Kristian en mahs sohte kin wia Krismas de Easter, duwehte Kristian mehlel kan en nan rahnpwukat.
4. Wia Ipwidi: Kasarawi en wia ipwidi riaute me Paipel mahsanih oh aramas me sohte kin kaudokiong Siohwa me kin wia. (Senesis 40:20-22; Mark 6:21, 22, 24-27) Kristian en mahs akan sohte kin wia ipwidi. Tiahk en kasarawi rahn me emen ipwidi kin kohsang kaudok likamw en mahs mahsie. Kristian mehlel kan kin kisikise aramas teikan oh pil pereniong mehteikan nan ahnsou teikan nan pahro.
5. Masak me Mehlahr akan: Aramas mehlahr akan sohte kak wia mehkot de pehm mehkot. Kitail sohte kak sewese irail, oh re sohte kak kamedek kitailla. (Melkahka 146:4; Eklesiasdes 9:5, 10) Soul de mour kin mehla; e sohte kak wie momour mwurin mehla. (Esekiel 18:4) Ahpw ekei pak, tohnleng suwed kan, me adaneki dimen kan (ngehn saut), kin mwomwehda me irail ngehn en me mehlahr akan. Tiahk kan me kin pid duwen masak de pwongih me mehlahr akan me sapwung.—Aiseia 8:19.
6. Lohpwu: Sises sohte pwoula nin lohpwu. E pwoula nin tuhke pwoat. Lepin loakaian Krihk me kawehwehdi “lohpwu” ni kawehwehn Paipel tohto kin wehwehki tuhke apwoat te. Lohpwu kin kohsang kaudok likamw akan en mahs. Tepin Kristian kan sohte kin mware lohpwu de doadoahngki ong kaudok de mehkot tohrohr. Eri, ke lemeleme e pahn pwung en doadoahngki lohpwu ong kaudok?—Deuderonomi 7:26; 1 Korint 10:14.
7. Mweinele e pahn apwal en kesehla padahk oh tiahk pwukat. Omw peneinei oh koampoakepomw kan mwein pahn song en kangongehkin uhk en dehr kesehla omw lamalam. Ahpw, kaperenda Koht mehkot kesempwal sang kaperenda aramas.—Lepin Padahk 29:25; Madiu 10:36, 37.
[Kilel nan pali 22]
Koht kaidehn emen Trinity
[Kilel nan pali 23]
Krismas oh Easter tepsang kaudok likamw akan en mahs
[Kilel nan pali 23]
Sohte kahrepe en kaudokiong irail kan me mehlahr de masak irail