Irelaud 10
Ahl Kan en Kalaudehla Ahmw Doadoahk en Kalohk
NI AHNSOU me Sises kadarala sapwellime tohnpadahk kan nin duwen sounkalohk kan en Wehio, e mahsanihong irail:“Mehlel pwe rahket me inenen laud, a tohndoadoahk kan me malaulau.” Mie doadoahk laud me anahne wiawi, kahrehda e kapatahiong: “Peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Madiu 9:37, 38) Sises padahkiong tohnpadahk pwukat iaduwen re pahn wia arail doadoahk en kalohk. Mie pepehm en karuwaru nan sapwellime mahsen kan. E mahsanih: “Kumwail sohte pahn kanekehla amwail doadoahk nan kahnimw koaros en Israel, mwohn Nein-Aramas eh pahn pwurodo.”—Madiu 10:23.
Rahnwet, pil mie anahn laud nan doadoahk en kalohk. Ahnsou kin wie mwotomwotala, oh rongamwahu en Wehio anahne lohkiseli mwohn imwio pahn leledo. (Mark 13:10) Pwehki wasahn kalohk iei sampah, e sansal me kitail kin lelong irair ehu me duwehte dahme Sises oh sapwellime tohnpadahk kan kin lelong, ahpw ihte laud sang. Kitail pil malaulau ni nempe kapahrekiong aramas billion kei en tohnsampah, ahpw kitail kak kamehlele me sapwellimen Siohwa sawas pahn mie. E sapwellimaniki manaman en kahrehiong rongamwahu en Wehio en lohkseli nin sampah pwon. Rongamwahuo pahn lohkseli oh imwio pahn leledo ni ahnsou me Siohwa ketin koasoanehdier. Ahpw kitail pahn dierek lelepek ohng kapwaiada atail pwukoa en iang doadoahk en kalohk? (Esekiel 33:8, 9) Kitail pahn mwohnki Wehin Koht nan atail mour ahnsou wet pwehn uhdahn kapwaiada atail doadoahk en kalohk? Soangen mehn akadei dah kan nan sapwellimen Siohwa doadoahk kitail kin nantiong lel pwehn wia met?
Pwehn kasalehda dahme Siohwa kupwurki ohng emen emen sapwellime ladu inouda kan, Sises mahsanih: “Ke uhdahn pahn poakohng Kaun-o, amwail Koht, nan kapehdomw unsek, ngenomw unsek, omw lamalam koaros unsek, oh omw kehl unsek.” (Mark 12:30) Kitail koaros anahne kihong atail mour unsek ong atail doadoahk ong Koht. Met wehwehki me emen emen kitail kak kasalehda uwen loal en atail poadidi ong ih oh mehlelpen atail inou sang ni atail kin wia uwen me kitail kak nan doadoahk en kalohk. (2 Timoty 2:15) Mie ahl tohto me emen emen kitail kak doadoahngki, nin duwen irair oh koahiek en emen emen. Medewehda ia ekei ahl kan, oh koasoanehdi mehnia mehn akadei kan ke pahn nantiong lel pwehn kapwaiada ahmw doadoahk en kalohk.
PAPAH NIN DUWEN EMEN SOUNKALOHK EN MWOMWOHDISO
Koaros me alehdi padahk mehlel ahneki pwais en kalohki rongamwahu. Met kin wia doadoahk kesempwal me Sises ketikihong sapwellime tohnpadahk kan en wia. (Madiu 24:14; 28:19, 20) Tohnpadahk en Sises Krais men kin tepida koasoiaiong meteikan duwen rongamwahu ni ahnsou me e ahpwtehn wehwehkila kesempwalpen wia met. Ihme Andru, Pilip, Kornilius, oh meteikan wia. (Sohn 1:40, 41, 43-45; Wiewia 10:1, 2, 24; 16:14, 15, 25-34) Met wehwehki me emen mwein ele pahn iang koasoiong meteikan duwen rongamwahu mwohn e papidaisla? Ehi. Mwurinte emen kakehr wia sounkalohk men me saikinte papidaisla nan mwomwohdiso, e pahn ahneki ahnsou mwahu en iang doadoahk en kalohk en ihmw lel ihmw. Oh pil, nin duwen ah koahiek oh ah irair kan, mwein ele e pahn iang wiepe teikan en doadoahk en kalohk en Kristian.
Nin duwen emen tohnmwomwohdiso me papidaislahr, ke kin uhdahn nsenohki en wia soahng koaros me ke kak wia pwehn sewese meteikan en sukuhliki rongamwahu. Ohl oh lih akan koaros kin ahneki pwais en iang doadoahk en kalohk me kohsang rehn Koht. Koaros anahne wia mehn kahlemeng mwahu en kapwaiada arail pwukoa kan nan mwomwohdiso. (1 Timoty 2:9-15; Taitus 2:1-10; 1 Piter 5:5) Ohl akan me towe mwomwohdiso me kin kekeirada ni pali ngehn oh kakehr mwein idihdda nin duwen ministerial servant kan. (1 Timoty 3:8-10, 12, 13) Irail pwukat me kin nantiong lel pwukoa kan en sounapwalih men oh me kin lel koasoandi kan me kileldi nan iren Paipel kan pahn idihdda nin duwen elder kan. Re kin padahk nan mwomwohdiso oh papah nin duwen silepen pelin sihpw kan. (1 Timoty 3:1-7; Taitus 1:5-9) E uhdahn wia pwais ieu en kihda sawas mendahki e tikitik ahpw en kekeirada ire kan me pid duwen Wehin Koht. Emen me kak kalaudehla ah doadoahk en kalohk pwehn ale pwais tohrohr akan en doadoahk wet kin uhdahn peren.
PAPAH NAN WASA KAN ME ANAHN LAUD MIE
Mwein ke kin papah nan mwomwohdiso ehu me doadoahk en kalohk kin kalapw wiawi nan wasahn kalohk oh kadehde mwahu kin wiawi. Ma ih duwen met, mwein ke pehm me ke kak kalaudehla ahmw doadoahk en kalohk sang ni ahmw pahn kosoula nan ehu wasa me mie anahn laud nan doadoahk en kalohk. (Wiewia 16:9) Ahmw sounapwalih en circuit mwein ele ahneki kaweid kan duwen iaduwen ke kak sewese ehu mwomwohdiso tohrohr nan circuito. Ma ke men papah nan ehu wasa tohrohr nan pein ahmw wehi, mwein ele ke pahn ntinglahng branch ohpis duwen ireo. Ma ke kin papah nin duwen elder men de ministerial servant men ni ahnsou wet, mwein ele e pahn mie ehu mwomwohdiso nan ahmw wehi me pahn kalahnganki ahmw sawas en apwalih anahn akan en mwomwohdiso.
Ke men kalaudehla ahmw doadoahk en Wehio nan ehu sahpw tohrohr? Ma ehi, ke anahne medemedewe duwen ahmw kosoula ni keneinei. E pahn wia wekidekla laud ong uhk oh emen me pahn iang uhk. (Luk 14:28) Ma ke sohte pilahn en mihmi nan wasao ahnsou reirei, mwein e pahn keieu mwahu en medewe en papah nan wasa kan nan pein ahmw wehi.
Mwohn branch ohpis nan pein ahmw wehi de nan ehu sahpw tohrohr kak kihong uhk eden mwomwohdiso kan me kak paiekihda ahmw sawas, ahmw pwihn en Service Committee en Mwomwohdiso pahn anahne kadarala kisin likou ehu me pahn kawehwehda duwen ire kan duwen kowe. Kisin likou wet anahne wiawihda sohte lipilipil ma ke kin papah nin duwen elder men, ministerial servant men, pioneer men, de sounkalohk men. Pwihn en service committee pahn kadarala kisin likou ehu duwen kowe iangahki noumw kisin likou en peidek kan ong branch ohpis en wehio me ke men papah.
Ma en papah nan wasa me anahn laud mie iei mehkot me ke men wia, ke sou koasoiong elder kan nan ahmw mwomwohdiso duwen ireo? Mwein re pahn kak sewese iuk en koasoanehdi iaduwen ke kak wiahda pilahn en kosoula de iaduwen ke kakehr en wia soangen doadoahk wet ni ehu ahnsou mwuhr.
DOADOAHK NAN EHU MWOMWOHDISO EN LOKAIA-TOHROHR
Pwehn kalaudehla ahmw doadoahk en kalohk, mwein ke men medemedewe en sukuhliki ehu lokaia tohrohr, iangahki sign language (lokaia ehu me kin doadoahngki peh kan ong aramas akan me sohte kak rong). Nan ekei peneinei kan me kin doadoahngki lokaia riau, pahpa oh nohno kan oh pil me pwulopwul kan kin papah nan mwomwohdiso en lokaia tohrohr kan pwehn kalaudehla arail doadoahk en Wehio. Ma ke ahneki mehn akadei en sukuhliki en kalohk ni ehu lokaia tohrohr, ke sou pahn koasoiong elder kan oh sounapwalih en circuit? Mwein re pahn kak kihong iuk sawas kan oh mehn kangoang kan me ke anahne. Ekei ahnsou, pahnangin kaweid en branch ohpis, circuit kan kin koasoanehdi kasukuhl en lokaia kan pwehn kihda sawas en lel aramas akan me kohsang liki.
DOADOAHK EN AUXILIARY, REGULAR, OH SPECIAL PIONEER
Soun kalohk kan koaros anahne ese dahme anahn ong doadoahk en auxiliary, regular, oh special pioneer oh pil ahl teikan en wia doadoahk en kalohk kaukaule. Ekei pak, Atail Doadoahk Ong Wehio kin kasalehda ekei ire teikan. Pioneer men anahne wia Kristian papidaislahr men me wia mehn kahlemeng mwahu oh ah irair kan kak mweidong ih en doadoahngki awa kan me koasoandier nan ehu ehu sounpwong ong kalohki rongamwahu ohng wehi pokon. Pwihn en Service Committee en Mwomwohdiso pahn tehk doaropwehn doadoahk en auxiliary pioneer, ahpw branch ohpis pahn idihada regular oh special pioneer kan.
Auxiliary pioneer kan mwein ele pahn idihdda ong ehu sounpwong nin duwen erein ahnsou me keiu mwotomwot, de sounpwong kei, de sounpwong koaros oh met kin poahsoankihda arail irair kan. Sounkalohk en Wehio tohto kin perenki papah nin duwen auxiliary pioneer kan nan ahnsou tohrohr kan, duwehte ahnsoun Kataman de nan sounpwong me mwemweit en sounapwalih en circuit wiawi. Ekei kin pilada ahnsoun kommoal sang doadoahk. Sounkalohk papidaislahr kan me kin iang sukuhl mwein ele men iang doadoahk en auxiliary pioneer erein sounpwong kan me re kin kommoal sang sukuhl. Sohte lipilipil soangen irair dah kan ke kin mih loale, ma ke kin kolokol tiahk mwakelekel, oh ke kak koasoanehdi ahmw irair kan pwehn kak lel awa kan me koasoandier nan doadoahk en kalohk, oh ke kamehlele me ke kak papah nan ehu sounpwong de sounpwong kei nin duwen auxiliary pioneer men, elder kan nan mwomwohdiso pahn perenki tehk noumw doaropwe ong pwais en doadoahk wet.
Pwehn kakehr en idihdda nin duwen regular pioneer men, ke anahne kak lel awa en kalohk kan ong sounpahr ehu me koasoandier. Atail Doadoahk Ong Wehio kin kihda sawas duwen mehn akadei en awa kan ong ehu sounpwong me kak sewese iuk en kapwaiada pwukoa wet. Nin duwen regular pioneer men, ke anahne ahnsou koaros doadoahk ni ahmw kin miniminiong mwomwohdiso me ke kin papah. Pioneer ngoang kan kin wia uhdahn kapai ehu ong mwomwohdiso, kahrehda ngoang ong doadoahk en kalohk oh kangoange meteikan en pil tepida doadoahk en pioneer. Ahpw mwohn elder kan pahn koasoanehdi ken idihdda nin duwen regular pioneer men, ke anahne papidaislahr sounpwong weneu, kolokol tiahk mwahu, oh kin kasalehda me ke kin wia sounkalohk men me kin wia mehn kahlemeng mwahu. Ke anahne kak idawehn koasoandi mwahu me kak mweidong uhk en doadoahngki awa kan me koasoandier nan doadoahk en kalohk.
Pali laud en ahnsou, Special pioneer kan kin pilipilda sang regular pioneer kan me kasalehdahr arail koahiek nan doadoahk en kalohk oh me kak papah nan wasa soh lipilipil me branch ohpis pahn pilada ong irail. Met kin kalapw wiawi nan soangen wasa tohrohr ieu me re kak diarada aramas akan me perenki rong oh wiahda mwomwohdiso kapw kan. Ekei ahnsou, special pioneer kan kin kohla nan mwomwodiso kan me anahne sawas pwehn kaukaule doadoahk nan arail wasahn kalohk. Ekei special pioneer kan me pil kin wia elder kan kin ale pwukoa en sewese mwomwohdiso tikitik kan, me sohte uhdahn anahne sounkalohk tohto nan wasahn kalohk. Special pioneer kan kin ale sawas en mwohni tikitik ong arail anahn akan.
MINISTERIAL TRAINING SCHOOL
Tohtohlahn mwomwohdiso kapw kan me kin wiawihda nan ehu ehu sounpahr kin kasalehda mehn kadehdehn sapwellimen Siohwa kapai ong nanti en sapwellimen aramas akan en kalohki rongamwahu en Wehio. (Wiewia 16:5) Pwehki tohtohlahn mwomwohdiso kan, anahn en elder kan oh ministerial servant kan pil kin laudla. Brother kiripw kan me kakehr kin ale kangoang en kaitarala anahn wet sang ni arail kin patohwanong Siohwa: “Iet ngehi, Maing, komwi ketin poaroneiehla.” (Aiseia 6:8) Me tohto mwekidki ni ahl wet sang ni arail kapedelong doaropwe en iang Ministerial Training School, me kin wiawi ongete ministerial servant oh elder kiripw kan me kin perenki oh kak papah nan wasa kan me anahn laud mie. Irail pwukat kak rong duwen koasondi kan ong sukuhlo sang ni arail pahn iang mihding kan ong brother kan me kin medemedewe duwen Ministerial Training School ni ahnsou me mihding pwukat kin wiawi nan kapokon en circuit kan.
Sukuhl wet kin kihda kaweid duwen padahk en Paipel kan oh ire kan me pid duwen pwihn pwe en kaunopada ohl kan me kakehr en apwalih sihpw nan mwomwohdiso oh pwukoa teikan. (Seremaia 23:4) Nin duwen imwilahn soangen kaiahn pwukat, ekei kin ale pwukoa en papah nan wasa kan me anahn laud mie nan pein arail wehi, oh ekei ale pwukoa nan wehin liki kan. Ekei ale kaweid en pwuralahng nan pein arail mwomwohdiso kan pwehn sewese oh kangoange brother kan oh sister kan nan wasao. Irail pwukat me alehda kaiahn kin onopada mwahu pwehn kihda sawas ni pali ngehn oh me pid duwen pwihn en sapwellimen Koht aramas akan.—2 Timoty 3:16, 17.
DOADOAHK EN MISSIONARY
Pwe rongamwahu en lohkiseli “oh lelohng ni irepen sampah” mwohn imwio pahn leledo, anahne kadarala missionary kan ong sahpw tohto. (Wiewia 1:8; Madiu 24:14) Met kin kihda ahnsou mwahu kan en kalaudehla pwais en doadoahk en kalohk ong Sounkadehdehn Siohwa kid kei, keieu irail akan me kin kasalehdahr me irail ngoangki, poadidi, oh koahiek nan doadoahk en Wehio. Pali laud en irail akan me ale luhk en iang doadoahk en missionary kin ale kaiahn tohrohr nan Watchtower Bible School of Gilead.
Emen anahne ahneki roson mwahu oh kehl en paliwar pwehn kak iang doadoahk en missinary, pwe missionary tohto kin ale doadoahk nan wehi kan me arail irair en mour kin apwal. Likin ah kin lelong soumwahu kan, missionary men mwein pahn anahne wiahda wekidekla kan ong irair en mour me weksang ah oh tiahk me uhdahn kapw ong ih.
Ma ke kin wia doadoahk en kalohk kaukaule oh men kalaudehla ahmw doadoahk en kalohk pwehn wiahla missionary men, ke kak rong duwen koasoandi kan ong doadoahk wet sang ni ahmw pahn iang mihding kan ong irail kan me kin medemedewe duwen doadoahk en missionary ni ahnsou me mihdingo pahn wiawi nan kapokon en district kan. Ahmw sounapwalih en circuit mwein pahn kak kihong uhk kaweid mwahu. Ma ke kakehr, mwein ele ke pahn ahneki ahnsou mwahu en ale doadoahk wet me kin kihda sawas laud ong kekeiradahn kaudok mehlel nin sampah pwon.
DOADOAHK EN BETHEL
En papah nan ehu imwen Bethel nanpwungen imwen Bethel tohto nin sampah pwon kin wia pwais tohrohr. Ahdo Bethel wehwehki “Tehnpas en Koht,” oh ahd wet inenen konehng poasoanpen wiewia kan me pid duwen doadoak en kalohk en sampah pwon. Brother kan oh sister kan me kin wia doadoahk en Bethel kin wia doadoahk kesempwal ieu me pid duwen wiahda oh kihseli pwuhk kan me Sounkadehdehn Siohwa kan en sampah pwon kin doadoahngki. Sang Bethel nan Brooklyn, Governing Body kin kihda epwel oh kaweid ong mwomwohdiso kan nin sampah pwon.
Pali laud en doadoahk me kin wiawi nan Bethel iei doadoahk laud en paliwar. Pwehki kahrepe wet, pali laud en irail me kin ale luhk en iang doadoahk en Bethel iei brother kan me inoudahr oh papidaislahr me pwulopwul, ahneki roson mwahu oh kehlail ni paliwar. Ma mie anahn nan ahmw wehi oh ke men doadoahk nan Bethel, ke kak rong duwen koasondi kan ong doadoahk wet sang ni ahmw pahn iang mihding tohrohr kan ong irail akan me kin medemedewe duwen doadoahk en Bethel ni ahnsou me mihding pwukat pahn wiawi nan kapokon en district kan. Ahmw sounapwalih en circuit kak kihda sawas duwen ire wet.
DOADOAHK EN KAUWADA KINGDOM HALL
En kauwada Kingdom Hall kan oh Assembly Hall kan wia doadoahk sarawi ieu, duwehte doadoahk en kauwada tehnpas sarawi en Solomon. (1 Nanmwarki 8:13-18) Brother oh sister tohto kin kasalehda arail ngoang kehlail ong sapwellimen Siohwa pwihn sang ni arail kin tounmeteikihla arail ahnsou oh dipwisou kan ong doadoahk wet.
Ke kak sewese elen doadoahk sarawi wet? Ma ke kin wia brother de sister me papidaislahr oh wia mehn kahlemeng mwahu oh ahneki koahiek en wia ihmw, pwihn en Regional Building Committee pahn uhdahn kalahngahnki ahmw pahn kihda sawas. Ekei kak toukihda pein irail nin duwen international construction servant kan ong doadoahk kan en kauwada Kingdom Hall oh Assembly Hall nan sahpw teikan. Ma ke sohte ahneki koahiek en kauwada ihmw de ke kin wia sounkalohk men me saikinte papidaisla oh wia mehn kahlemeng mwahu nan mwomwohdiso, mwein ele ke pahn kak sewese doadoahk en kauwada ehu Kingdom Hall nan pein ahmw wasa. Ke sou pahn kehsehki elder kan nan ahmw mwomwohdiso oh sounapwalih en circuit me ke kak kihda sawas?
IA AHMW MEHN AKADEI EN PALI NGEHN KAN?
Ma ke inoukihongehr Siohwa ahmw mour, ineng me ke kasalehdahr iei en papah Siohwa kohkohlahte. Ahpw ia ahmw mehn akadei en pali ngehn kan mwohn ke pahn lel ahmw mehn akadei kesempwal wet? En ahneki mehn akadei en pali ngehn kan pahn sewese iuk en doadoahngki ahmw kehl oh dipwisou teikan ni elen loalokong. (1 Korint 9:26) Ke pahn kak akadeiong mehkot katapan. Soangen mehn akadei pwukat kin sewese iuk en kekeirada ni pali ngehn oh pahn sewese iuk en medemedewehte mehkan me kesempwal ni ahmw kin nantiong lel pwais kan en papah.—Pilipai 1:10; 1 Timoty 4:15, 16.
Nan sapwellime karasaras en sounkamwarako, Sises kasansalehda me pwelmwahu kin kapwarehda soangsoangen wah tohto. E mahsanih: “A me pwupwudiong nan pwelmwahwo, wehwehki irail kan me kin rong mahseno oh wehwehki mwahu mehlel; e ahpw kin wa rehrail, rehn ekei uwen tohtohn wa epwiki, a rehn ekei weneisek, a rehn ekei silihsek.” (Madiu 13:23) Ma kitail uhdahn wehwehki mouren mahseno, kitail sou anahne nannanti pwehn kapwarehda wah tohto ong sapwellimen Siohwa kaping? Kitail sou men kihda wahn Wehio tohto ni atail kin ngoangki iang doadoahk en kalohk? Oh kitail sou men uhdahn kapwarehda wahn ngehn en Koht nan atail mour rahn koaros? (Sohn 15:2, 3; Kalesia 5:22, 23) Ahneki mehn akadei en pali ngehn kan kak sewese kitail en wia mehpwukat koaros.
Wahnpoaron Pohl wia mehn kahlemeng mwahu kitail en kahlemengih nan atail papah Koht. (1 Korint 11:1) Pohl kin uhdahn wia uwen ah kak koaros nan ah papah Siohwa. E wehwehki me sapwellimen Siohwa doadoahk kin kihong ih ahnsou mwahu tohto. Ong brother kan nan Korint, Pohl ntingihdi: “Wenihmw laud ehu me pahn kahluwalahng doadoahk kin langada ong ie.” Met pil mehlel ong kitail? Kitail sou ahneki ahnsou mwahu tohto en papah Siohwa ni atail kin patehng mwomwohdiso, keieu nan kalohki rongamwahu en Wehio? Ahpw duwehte Pohl, kitail anahne tamataman me en pidelong nan “wenihmw laud” wet kin wehwehki en pelianda “Imwintihti tohto.” (1 Korint 16:9, NW) Pohl kin perenki kaukaule kaiahnehda pein ih, duwehte sounmwadong men me men ale elin kapwat nan siai, kapwat me pahn mwadang sohrala. Tehk dahme Pohl koasoia: “I kin kaloke paliwereiet oh irehdi pein ngehi.” (1 Korint 9:24-27) Kitail kin ahneki soangen madamadauohte?
Me tohto kin papah nin duwen missionary kan rahnwet pwehki kangoang kan sang rehn arail pahpa oh nohno kan oh meteikan, re wiahki kasukuhl en Gilead oh doadaohk en missionary arail mehn akadei sang mahs nan arail mour, ni ahnsou me irail wia seri kan. Duwehte met, me tohto me kin doadoahk nan Bethel ahnsou wet wiahki doadoahk en Bethel arail mehn akadei, ni ahnsou me irail uhdahn pwulopwul de ni ahnsou me irail ahpwtehn rong rongamwahu oh sukuhliki duwen pwais tohrohr en doadoahk wet.
Nin duwen ahn emen emen irair nan mour, emen emen kin ale kangoang en nantiong lel mehn akadei en pali ngehn kan. Mwein ekei mehn akadei kan iei en iang doadoahk en kalohk ehu ehu wihk, en tepida oh wia ehu onop en Paipel, en koasoanehdi ahnsou laud en kaunopada ong mihding en mwomwohdiso kan, en iang doadoahk en auxiliary de regular pioneer, en papah nan wasa me anahn laud mie, en kauwada Kingdom Hall kan oh Asembly Hall kan, en doadoahk nan Bethel de doadoahk en missianry. Mehlel, ni ahnsoun mihding en mwomwohdiso kan, kapokon kan, oh nan sawaspen Paipel kan en Sounkadehdehn Siohwa kan, mehn akadei en pali ngehn teikan pahn mwein ele kohda nin duwen pein ahmw irair akan, mwein ke pahn medemedewe oh nantiong lel. Me kesempwal iei ken kehlailte oh uhdahn kapwaiada ahmw doadoahk en kalohk. Ma ke kin wia met, ke pahn kawauwih Koht oh lel ahmw mehn akadei me keieu kesempwal, iei en papah Siohwa kohkohlahte.—Luk 13:24; 1 Timoty 4:7b, 8.