Tengedihong Padahk Mehlel
1. Ia duwen pwuhken Paipel Padahngki eh kin sewese irail me kin onop Paipel?
1 Ia uwen atail peren pwehki pwuhken Dahme Paipel Uhdahn Padahngki? mieier ni lokaia daulih 200 iangahki lokaia kan en Micronesia! Pwuhk wet kin sewese irail me kin onop Paipel ren mwadang esehla padahk mehlel oh pil karanihala Siohwa.—Seims 4:8.
2. (a) Dahme kak kahrehda eh apwal en wehwehki dahme Paipel uhdahn padahngki? (b) Dahme kitail pahn tehkpene?
2 Ahpw kawehwehn Paipel tohto iangahki Paipel ni mahsen en Pohnpei kin doadoahngki lepin lokaia kan me sohte kin pahrekiong dahme Paipel uhdahn padahngki. Re kin utung padahk kan me kin kasohwahwih Koht, karasepe, Koht wiawihkihda meh silimen oh mie mehkot me kin momour mwurin mehla. Kitail pahn tehkpene dahme kahrehda mie wekidekla kan me pid lepin lokaia kan nan neitail sawaspen Paipel kan. Met wiawi pwehn kasalehda padahk mehlel en Paipel ni pwung.
3. (a) Mehnia Lepin lokaia sapwung me kin kalapw kadoadoahk nan Paipel en mahsen en Pohnpei? Dahme kahrehda? (b) Soangen wekidekla dah me wiawihong neitail pwuhk kan?
3 Karasepe, pelien lamalam tohto kin padahngki me mie “Ngehn Sarawi” oh “ngehn” wet iei emen koht me duwehte Siohwa oh Sises. Ihme kahrehda nan Paipel en mahsen en Pohnpei, lepin lokaia wet “sapwellimen Koht manaman,” kin kawehwehdi nin duwen met, “Ngehn Sarawi.” Ahpw lepin lokaia “ngehn” kin dokedoke ngehn akan me duwehte tohnleng kan oh Koht, a kaidehn sapwellimen Koht manaman. Met wehwehki me ni atail kin padahkihong meteikan duwen padahk mehlel, kitail anahne kawehwehda me lepin lokaia “Ngehn Sarawi” kin kadoadoahk ni ahl sapwung nan wasa kan me lepin lokaia wet “sapwellimen Koht manaman” kin pwarada ie nan Paipel ni ahnsou me e tepin wiawihda. Eri, pwehn sewese irail akan me kitail kin kasukuhlih pwe ren wehwehkihla mwahu padahk mehlel, met neitail pwuhken Paipel Padahngki oh pwuhk teikan kin doadoahngki lepin lokaia “sapwellimen Koht manaman.”
4. Ia pil ahl sapwung teikan me lepin lokaia “ngehn” kin kadoadoahk?
4 Pil mie ahl sapwung teikan me lepin lokaia “ngehn” kin kadoadoahk. Karasepe, “kehlail ni pali ngehn” kin kadoadoahk ni atail kin koasoia duwen aramas emen me kin mweidohng sapwellimen Koht manaman en kamwakid eh madamadau oh kasalehda wahn manamano, de emen me kin wauneki oh peikiong Koht oh kesempwalki eh nanpwungmwahu reh. (1 Kor. 2:14-16; Kal. 5:22, 23) “Mwengehn ngehn” kin kadoadoahk ong mahsen en Koht me kin kakehlaka kitail. (1 Kor. 10:3) Kitail pil kin doadoahngki lepin lokaia “paradais en ngehn” pwehn kawehwe irair mwahu en sapwellimen Siohwa aramas akan nin sampah. Lepin lokaia pwukat kin kasalehda padahk sapwung kan oh solahr kin kadoadoahk nan neitail pwuhk kan.
5. Dahme kahrehda wekidekla pwukat anahne wiawi?
5 Duwehte Sises, ladu lelepek oh loalokong kin tengedihong padahk mehlel. (Sohn 18:37) Kahrehda irail kin pousehlahte sewese kahpwal kan me neitail sounkawehwe kan kin lelohng pwe neitail pwuhk kan en pahrekiong dahme Paipel uhdahn padahngki. Ia uwen eh wia kapai laud en alehdi “tehte manaman ekei” me duwehte pwuhken Paipel Padahngki pwehn sewese kapwungala padahk likamw kan me kin “pelianda erpit en Koht” pwe “aramas koaros en ale komourparail oh marainkihla me mehlel.”—1 Tim. 2:4; 2 Kor. 10:4, 5.