Wasahn Kaudok en Sounkadehdehn Siohwa kan koaros kin pidada mwaren Koht me sarawi. Ihme kahrehda, kitail kin pehm me atail iang apwalih Wasahn Kaudok pwe en mwakelekel, mwomw mwahu oh soandi mwahu kin wia pwais kaselel ehu oh kisehn atail kaudok me kesempwal. Koaros kak iang.

Iang sawas en kamwakel mwurin mihting. Mwurin ehuehu mihting, tohnmwomwohdiso kan kin perenki wia kisin kamwakel pwe Wasahn Kaudok en soandi mwahu. Koasoandi en kamwakele Wasahn Kaudok pwon kin kaukaule wiawi. Elder men de sounsawas men kin koasoanehdi doadoahk wet ni eh kin idawehn soahng kan me kileldi en wiawi. Ma anahnepe mie, emenemen kin iang sawas en koakoahk oh dahlimwih taht pil wasa teikan, kainenehla sehr kan, kamwakelehki imwen kainen wini kan, widen wenihmwtok oh kilahs en irongen, kesehla kihd, de kamwakele liki. Pak ehu de tohtohsang nan sounpar ehu, rahn ehu kin koasoandi ong kamwakel laud. Sang ni atail mweidohng neitail seri kan en iang wia ekei doadoahk pwukat, kitail kin padahkihong irail ren wauneki atail wasahn kaudok.​—Eklesiasdes 5:1.

Iang sawas en kamwahwihala wasa de dipwisou kan. Sounpar koaros, dou pisetik kin wiawi loale oh likin Wasahn Kaudok. Sang dou wet, doadoahk en apwalih kin kaukaule wiawi pwe Wasahn Kaudok en soandi mwahu oh pwe en dehr doadoahngkihla mwahl mwohni. (2 Kronikel 24:13; 34:10) Wasahn Kaudok me mwakelekel oh soandi mwahu kin wia wasa ehu me warohng atail kin kaudok ong Koht. Ni atail kin iang doadoahk wet, kitail kin kasalehda me kitail kin poakohng Siohwa oh wauneki atail wasahn kaudok. (Melkahka 122:1) Met kin wia kadehde mwahu ong aramas akan wasao.​—2 Korint 6:3.

• Dahme kahrehda kitail en dehr soukautih ong atail wasahn kaudok?

• Soangen koasoandi dah kan me kin wiawi pwe Wasahn Kaudok en mwakelekel?

Ke men wia roporop pwehn kalaudehla omw wehwehki Paipel? Ke men esehla duwen ehu iren Paipel, aramas men, wasa ehu, de mehkot me kileldi nan Paipel? De mie pak me ke kin medewe ma Mahsen en Koht kak apwalihala iren kapwunod ehu me ke ahneki? Eri, ke kak doadoahngki Library en Wasahn Kaudok.

E kin kihda mehn sawas kan ong roporop. Mwein ke sohte naineki sawaspen Paipel koaros me Sounkadehdehn Siohwa kan wiahda ni omw lokaia. Ahpw nan library en Wasahn Kaudok, mie pali laud en pwuhk kapw kan. Mwein pil mie soangsoangen kawehwehn Paipel kan, dikseneri mwahu kan oh pwuhk teikan me kak sewese atail roporop. Ke kak doadoahngki libraryo mwohn de mwurin mihting kan. Ma mie computer, Watchtower Library pahn mi loale. Prokram wet kin audaudki neitail pwuhk tohto oh e kin mengei en wia roporop sang ni omw pahn rapahki oaralap ehu, lepin lokaia ehu de iren Paipel ehu.

E kin wia sawas ong tohnsukuhl kan me kin iang Mihting en Atail Mour oh Kalohk. Ke kak doadoahngki library en Wasahn Kaudok ni omw pahn kaunopada omw padahk kan. Sounapwalih en Mihting en Atail Mour oh Kalohk kin pwukoahki apwalih library. E pwukoahki en tehk mwahu ma mie pwuhk kapw kan oh e kin soandi mwahu. Ih de me kin onop Paipel rehmw kak kasalehiong uhk ia duwen omw pahn diar dahme ke anahne. Ahpw sohte pwuhk ehu nan library pahn wisiksang nan Wasahn Kaudok. Kitail pil men kanahieng atail doadoahngki pwuhk pwukat oh dehr ntingih loale.

Paipel kin kawehwehda me pwe kitail en uhdahn esehla Koht, kitail anahne ngoangki wia met “rasehng me kin rapahki silper de takai kesempwal me rir kan.” (Lepin Padahk 2:1-5) Library en Wasahn Kaudok kak seweseiuk ken tepida wia omw roporop.

• Soangen mehn sawas dah kan ong roporop me mi nan library en Wasahn Kaudok?

• Ihs me kak seweseiuk ken doadoahngki library ni ahl me keieu mwahu?

Sises Krais mahsanihong sapwellime tohnpadahk ko: “Amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:16) Pwehn wia met, se kin doadoahngki soangen dipwisou kan nan rahnwet iangahki Internet. Nait website, jw.org, iei Web site me se kin doadoahngki me kin kihda ire kan me pid dahme Sounkadehdehn Siohwa kan kin kamehlele oh arail wiewia kan. Dahme e kin kasalehda?

Pasapeng kan sang Paipel ong peidek kan me aramas kin kalapw idek. Ke kak diarada pasapeng kan ong ekei peidek kesempwal kan me aramas kin idek. Karasepe, kisin doaropwe kan, Lokolok Pahn Imwisekla? oh Me Melahr akan Uhdahn Kak Pwurehng Mourda? kin wiawihda ni lokaia tohtohsang 600. Ke pil kak diarada New World Translation ni lokaia tohtohsang 130 oh sawaspen Paipel tohto, iangahki pwuhken Dahme Paipel Uhdahn Padahngki? oh Kahn Iroir oh Awake! kapw kan. Ke kak wadek de rong tohtohn pwuhk pwukat nan Internet de download dahme ke men rong de wadek nan MP3, PDF de EPUB. Ke pil kak print ekei pali en pwuhk pwukat pwehn ehukihong emen me perenki wadek ni pein eh lokaia! Kasdo kan pil kin wiawihda ni soangsoangen lokaia tohto ong irail kan me sohte kak rong. Ke kak download wadawad en Paipel me wiawi ni mwomwen sipai, sipai kan en Paipel, oh keseng kaselel kan pwe ken kak perenki rong.

Ire kan me pid Sounkadehdehn Siohwa kan. Ke pil kak diar rohng kapw kan me ke kak wadek oh kisin kasdo kan duwen at doadoahk nan sampah pwon, soahng kan me wiawi me pidada Sounkadehdehn Siohwa kan, oh at doadoahk en sewese irail kan me kin lelohng kahpwal kan. Ke kak diar pakair kan me pid mihting tohrohr kan me pahn wiawi oh ia duwen omw kak lokaialahng ohpis en Sounkadehdehn Siohwa kan.

Ni ahl pwukat, se kin kasansalehda marain en padahk mehlel lella wasa doh kan nan sampah. Aramas nan wasa koaros iangahki Antarctica kin paiekihda marain wet. Se kin kapakapki mahsen en Siohwa “en wonlahte mwowe oh mwadang lohkseli” nan sampah pwon pwehn kalinganahla Koht.​—2 Deselonika 3:1.

• Ia duwen jw.org eh kin sewese aramas tohto ren sukuhlki padahk mehlel en Paipel?

• Dahme ke men rapahki nan nait website?