IREN MEHN KASUKUHL 10
Ia Duwen Omw Kak Ese Mehnia Kaudok me Mehlel?
1. Mie pelien lamalam ehute me mehlel?
“Kumwail kalekeikumwailsang soukohp likamw akan.”—MADIU 7:15.
Sises ketin padahkihong sapwellime tohnpadahk kan pelien lamalam ehute, iei pelien lamalam mehlel. E duwehte ahl ehu me kohkohlahng mour soutuk. Sises mahsanih: “Me malaulau me kin diar” ahlo. (Madiu 7:14) Koht kin ketin kupwurkihte kaudok me poahsoankihda sapwellime Mahsen iei Paipel. Tohn kaudok mehlel koaros kin miniminpene nan pwoson tehieu.—Wadek Sohn 4:23, 24; 14:6; Episos 4:5.
Kilang kisin kasdo Koht Ketin Kupwurki Soangen Kaudok Koaros?
2. Dahme Sises mahsanih duwen Kristian likamw akan?
“Irail kin kosekose me re kin ese Koht, ahpw arail wiewia kan sohte pahrekiong me re kin koasoia.”—TAITUS 1:16.
Sises mahsanih me soukohp likamw kan pahn kasaminehla padahk en Kristian. Irail kin mwomwen tohnkaudok mehlel kan. Arail sarawi kan kin nda me dene irail Kristian. Ahpw ke kak ese me soangen aramas pwukat kaidehn Kristian mehlel. Ia duwen omw kak wia met? Kaudok mehlelete me kin wiahda Kristian mehlel kan me kin kasalehda irair mwahu kan oh wiewia mwahu kan me aramas kak kilang.—Wadek Madiu 7:13-23.
3. Ia duwen omw kak ese ihs tohnkaudok mehlel kan?
Tehk kilelepen tohnkaudok mehlel limau pwukat:
Tohnkaudok mehlel kan kin wauneki Paipel nin duwen Mahsen en Koht. Re kin nantihong kapwaiada kaweid kan en Paipel nan arail mour. Eri, pelien lamalam mehlel kin weksang pelien lamalam teikan me poahsoankihda madamadau en aramas. (Madiu 15:7-9) Tohnkaudok mehlel kan kin kapwaiada dahme re kin padahkihong meteikan ren wia.—Wadek Sohn 17:17; 2 Timoty 3:16, 17.
Sapwellimen Sises tohnpadahk mehlel kan kin wauneki mwaren Koht, Siohwa. Sises kin ketin wauneki mwaren Koht sang ni eh kin ketin padahkihong aramas akan. E kin ketin sewese irail ren esehla Koht oh kin ketin padahkihong ren kapakapki mwaren Koht en sarawihla. (Madiu 6:9) Nan omw wasahn kousoan, mehnia pelien lamalam me kin padahkihong aramas akan duwen mwaren Koht?—Wadek Sohn 17:26; Rom 10:13, 14.
Kristian mehlel kan kin kalohki Wehin Koht. Koht ketin poaronehdo Sises pwehn kalohki rongamwahu en Wehio. Wehin Koht iei ihte koapworopwor ong aramas. Sises ketin pousehlahte kalohki Wehio lao lel rahn me e pwoula. (Luk 4:43; 8:1; 23:42, 43) E mahsanih me sapwellime tohnpadahk kan pahn kalohki Wehio. Ma emen pahn kohdo rehmw oh koasoia duwen Wehin Koht, mehnia pelien lamalam me ke medewe e kin iang?—Wadek Madiu 24:14.
Sapwellimen Sises tohnpadahk kan kaidehn kisehn sampah suwed wet. Ke kak ese irail pwehki re sohte kin iang pidada palien politik oh uhpene kan me kin wiawi nanpwungen pwihn en aramas akan. (Sohn 17:16; 18:36) Irail pil sohte kin iang wiewia oh madamadau kan en sampah me suwed ong irail.—Wadek Seims 4:4.
Kristian mehlel kan kin ahneki limpoak mehlel nanpwungarail. Sang nan Mahsen en Koht, re kin sukuhlki en wauneki soangsoangen aramas koaros. Pelien lamalam likamw kan kin kalapw utung laud mahwen kan me kin wiawi nanpwungen wehi kan, ahpw tohnkaudok mehlel kan sohte kin wia met. (Maika 4:1-3) Ni soh roporop, Kristian mehlel kan kin doadoahngki arail ahnsou oh kepwe kan pwehn sewese oh kangoange meteikan.—Wadek Sohn 13:34, 35; 1 Sohn 4:20.
4. Ke kakehr kasawihada pelien lamalam mehlel?
Mehnia pelien lamalam me arail padahk koaros kin poahsoankihda Mahsen en Koht, wauneki mwaren Koht, oh kalohki Wehin Koht nin duwen ihte koapworopwor ong aramas? Mehnia pwihn me kin kasalehda limpoak oh sohte kin iang mahwen? Ia omw madamadau?—Wadek 1 Sohn 3:10-12.